MARUKA 5

1Yesu lee, jaŋu unrunw womɔ lee, dibe gɔ kɛjaa taŋaa, Gerasa bɛɛnw gana gɔ nɛ dɔwaabɛin. 2Yesu, diikoro nɛ goou wo digɛu, ainɛ turu ɔnsain yalu nɛ gowaa, wo bɛrɛ wɛɛube. Ainɛ wogɔ jinrun kuu womɔ nɛ yadaanbe. 3Wo ɔnsain gɔ ginrun womɔi bojaa, kɔɔ nɛ yabiyɛbe. Woi inɛ gɛli bɛɛbe wɔlɔ. Halu yɔgu le woi pagu gɛli bɛɛmɔbele. 4Kubɔ joo, kubɔ womɔ inrun le tɔŋɔubɛin. Iyaa, numɔ womɔ yɔgu le pagaubɛin. Kaa, wo kɔɔbe puu biɲɛ ye, polugutiibe. 5Agai sɛlɛ, digɛi sɛlɛ, waaru puu wo kai, ɔnsain nɛ ma, kokoo nɛ ma, tibu le unruin barumanu, kɔun kɔnwɔnnu, yabiyɛbe. 6Ainɛ kɔɔ, wagee Yesui wo iye gɔ, jɔbaa wiyaa giru womɔ nɛ tuŋiyaan, 7mii diyɛ le kɔnwaan gi: «Yesu, Ama daa naa daa go wɔɔ baŋa Aini gɔ, uwɔ ingei? Ama ga, mui ɔɲɔmɔnɔu.» 8Yesu, jinrun gɔ le sɔɔu, «Jinrun, ainɛ kɔɔ kuu nɛ goo» gɛɛube dɛi ainɛ gɔ kɔɔ gin’ sɔi. 9Kaa Yesu pilemaa sɔwaa gi: «Boi uwɔ inge gɛɛɲu?» Jinrun gɔ saa: «Emɛ jinrun jooi wɔin digɛu, boi ma “Emɛ jooi wɔin” gɛɛɲu.» 10Wo Yesu womaa unrunbei ɔnsain gɔ yalu nɛ goomɔnɔu ga, wo bɛrɛ ɛjii gɛɛunbe. 11Be le bɛrii, kokoo kuu nɛ tolube joo belu tɛnwɛun yabɛin. 12Kɔɔ dɛi jinrun gɔbe Yesu bɛrɛ ɔn gin’ gɛɛnbɛin: «Emi pajaa ye tolu gɔbe nɛ emɛ yoomɔ.» 13Yesu bemaa wogɔ kanran bɛbɛɛdɛin gi. Jinrun gɔbe ainɛ gɔ kuu nɛ gowaa, yaa, tolu gɔbe nɛ yowaabɛin. Tolu kulɔ gɔ puu kokoo daa gɔ nɛ gowaa, ɔgu jɔbaa, dibe gɔ nɛ wiyaa yowaa, piriyaa yinwaain. Yalu kɔɔ nɛ tolu bee, tolu muɲu lɛi dɔwaabe. 14Kɔɔ gin’ wo biyaa, inɛw tolu gɔbe girɛubɛin gɔbe, jɔbaa yaa kibɛru gɔ ginrun go lee, olu go lee tagaabɛin. Inɛw, kibɛru gɔ ɛgaa, sɔɔ bii gɔ yɛnɛi wiyaabɛin. 15Be Yesu genɛ nɛ wiyaa dɔwaa, ainɛ jinrun joo kuu womɔ nɛ daanbe gɔ, sɛɛu, sɔi kunaa wo daaun iyaabɛin. Be liyaain. 16Sɔɔ gɔ puu aŋai galu gɔ inɛw iyin gɔbe, ainɛ gɔ lee, tolu gɔbe lee bɛrɛ, sɔɔ dɔi gɔ, digu le, digu le, be bɛrɛ tagaabɛin. 17Inɛw gɔbe wogɔ waaru be ɛgu le, be Yesu bɛrɛ gɛnyaan womaa, gana unrunbemɛ nɛ goojɛ gin. 18Yesu gowaa, diikoro gɔ nɛ yoodo ga kanraun wo wɔu, ainɛ jinrun kuu womɔ nɛ daanbe gɔ wo bɛrɛ gɛnyaan, unrun wo le yaadɔn gi. 19Yesu wogɔ yabalu. Kaa wo ainɛ gɔ le sɔwaa gi: «Pilemɛ ye ginrun uwɔ nɛ, u maranw bɛrɛ yaa. Inɛw Baŋa Ama, amasɔgɔ jugɔ womɔ dɛi sɔɔ diyɛ u bɛrɛ wo kanrun gɔ, bei taga.» 20Kunrin ainɛ gɔ gowaa yaa, Ana Pɛlu gana gɔ puu nɛ Yesu wo dɛi kijɛ diyɛ kanrun sɔɔ tagai tɔlaabe. Inɛw sɔɔ womɔ ɛgin gɔbe puu ɛjii bei maunɛ kanrun. 21Yesu, diikoro gɔ nɛ yowaa, Galile dibe diŋirun waja go galu. Dii gɔ genɛ nɛ wo iŋɛu, inɛw ɛjii wɛi wɛi mɔrinyɛun, woi gɔŋɔubɛin. 22Yahutunw Ama gɛɛn ginrun kuu baŋa turu, wo kanran yalu gɔ nɛ wiyaa dɔi. Ainɛ wogɔ, boi womɔ Jayirusu gɛɛbɛin. Yesui iyaa, giru womɔ nɛ tuŋiyaan, 23ɛjii wo bɛrɛ gɛnyaan gi: «Iyaa dagi ma jinwaan yinwɛndo ga wɔɔ. Womaa yinwɛnnɔu giye, wɛɛ kuu womɔ nɛ numɔ yaŋaran ye, wo bajamɔ.» 24Yesu wo le dimiyaan, yaabe. Be yaau be wɔu, inɛw joo tunmɔ damau, be le dimiyaan yaaubɛin. 25Inɛw kɔɔbe logoro nɛ yaanran turu, anranguju pɛli lɛisigɛ baa bain goi jiun le wɔɔ yatobe. 26Wo jɔŋujɔŋɔw joo numɔ nɛ ɔɲaabe. Iyaa buudu womɔ puu jɔŋu nɛ yadogu. Kaa kɔɔ wooi nɛ, jiun womɔ gɔ bariyɛ laa ye, gaila kanran gamiyɛnlu. 27Yaanran kɔɔ Yesu kibɛru aŋai wo ɛgu le kɛukɛu, wo kinɛ womɔ nɛ unrun Yesu sɔi sai biyaa tabaa ye, unruin babajado ga gawaabe. Kɔɔ dɛi wo mɔɔnu logoro nɛ, yaa yaa Yesu onu nɛ dɔwaa sɔi womɔ tabaabe. 29Ginsɛsai jiun womɔ bajaai. Wo kuu womɔ le woi pele pele bajaai ga jugaabe. 30Yesu, gɔnrɔn wo nɛ gowaai ga jugaabe. Kɔɔ dɛi, wo iŋiyaan, inɛw woi gɔŋaa bɛin gɔbe bɛrɛ selumaa gi: «Inɛ aa arugoi ma tabu?» 31Jaŋu unrunw gɔbe aŋa womɔ saa gin: «Inɛw sibɛ puu nɛ ui damauwɔin iyeuwɔu, iyaa inɛ aa ui tabu ma, yani selumɛjɛu?» 32Kaa Yesu kai, yalu gɔ puu gɛŋɛrɛuun yɛnɛu, inɛ aa arugoi womɔ tabu ma, dɛnɛube. 33Kɔɔ waaru le, yaanran gɔ, sɔɔ wo bɛrɛ bii igii bee dɛi, liyaa ɛjii kinwɛunbe. Wo Yesu giru nɛ wiyaa tuŋiyaan, sɔɔ gɔ puu wo bɛrɛ tagaabe. 34Yesu wo le saa gi: «Iyaa ma, gagawu uwɔ ui bajamaati. Jamu le yaa. Jiun uwɔ bajaai biyɛ.» 35Yesu kɔɔ gin’ yaanran gɔ le sɔɔu wo gɛlɛu, Yahutunw Ama gɛɛn ginrun kuu baŋa, Jayirusu ginrun nɛ gowaa inɛw wiyaa, Jayirusu le sɔwaa gin: «Iyaa uwɔ yinwaain. Nɛɛ jaŋudeerenɛ gɔi ɔɲɔmɔnu doori.» 36Yesu sɔɔ bemɛ gɔ ɛgaabe. Kaa wo sɔɔ gɔ lugolu kanraan, Jayirusu le sɔwaa gi: «Liyɛnɔu. Mu le gawa sai.» 37Yesu, Piɛru lee, Jake lee, wo bainɛ Jan lee laa ye, inɛ waja wo le digiyɛ ga yabalu. 38Be wooi gowaa, yaa Ama gɛɛn ginrun kuu baŋa ginrun nɛ dɔwaabɛin. Yesu, ginrun gɔ siɲɛ joo wo wɔu tɛmu. Atɛmu bemɛ le kɛukɛu, inɛw pii piiu, ɛjii sɔmiyɛunbɛin. 39Yesu, ginrun gɔ nɛ yowaa, inɛw gɔbe le ɔn gin’ sɔi: «E inge dɛi ɔn gin’ siɲɛ siɲɛu, pii piiuwɔi? Ii gɔ yinwɛnlu. Wo giri yeiyeuwɔ.» 40Kɔɔ gin’ wo giyaa, inɛw gɔbe woi mɔmɔubɛin. Kaa wo inɛw gɔbe puu bain go goonaatiyaa, iyaa gɔ ba lee, wo na lee, jaŋu unrunw taanu wo le wɛin gɔbe lee gɛliyaa, iyaa gɔ deun tobe gɔ nɛ yoi. 41Yesu, iyaa gɔ numɔ aa, sɔwaa gi: «Talita kumu.» Tiyɛ gɔ, iyaa dagi, uwaa ingele gun. 42Ginsɛsai wo ingelaa yoi yaai tɔlu. Anranguju womɔ pɛli lɛisigɛ bee. Wo maranw waaru kɔɔ be iye le, bei ɛjii maunɛ kanraanbe. 43Kaa Yesu ɛjii be bɛrɛ sɔwaa, bemaa inɛ kanma bɛrɛ sɔɔ gɔ jugɔmɔnɔu gi. Kɔɔ onu nɛ, wo bemaa iyaa gɔ bɛrɛ pana obo gi.

will be added

X\