MARUKA 4

1Yesu iyaa Galile dibe diŋirun gɔ nɛ yaa, deeru deerei tɔlaabe. Inɛw wiyaa ɛjii mɔriin gɔ digɛu, Yesu diikoro turu nɛ yowaa dɛinyin. Wo kɔɔ gin’ dibe gɔ nɛ diikoro gɔ nɛ daanbe. Mɔɔnu gɔ dibe diŋirun gɔ nɛ, dii gɔ le daii minɛ nɛ daanbe. 2Yesu taanrinyɛn le mɔɔnu gɔ bɛrɛ deeru tɔgu dɛin dɛin obaabe. Deeru womɔ nɛ wo ɔn gin’ sɔi: 3«Ɛjii keŋiyɛin! Toimaɲanɛ turu toi maɲai gowaabe. 4Toi maɲau wo wɔu, toi ii gamuu oju nɛ sugin. Sasaabe wiyaa toi ii wogɔbe jɔnwaanɲu. 5Toi ii gamuu tibu yalu nɛ, yalu minɛ gaai wɔlɔ nɛ sugin. Minɛ gɔ toola digɛu, toi gɔ ɔgiri tɛiyaabe. 6Kaa nai ɛjii wo gowaa, toi gɔ duu ɛju bɛɛlu bee gɔ digɛu, kijɛ tɛiyi gɔ nai tɛgaa maaŋiyɛnmaati. 7Toi ii gamuu dɔgɔ jijii sɛin logoro nɛ sugin. Kaa waaru be tɛiyɛjɛ le dɔgɔ jijii sɛin gɔbe, be dɛi sigɛ gabiyaa bei kimaatin. Be ii biyaa kunɔnɛ. 8Kaa toi ii gamuu minɛ ɛju nɛ sugin. Toi wogɔbe tɛiyaa, ɛjii gabiyaa, ii kunaabɛin. Gamuu sɔɔrɔ pɛtaanu kuni, gamuu pɛlukuloi, gamuu suŋu.» 9Taanrinyɛn kɔɔ daantiyaa, Yesu gi: «Inɛ suguru ɛhɛgu sɛɛ, wo sɔɔ gɔ keŋiyɛn.» 10Inɛw pɛli lɛisigɛ Yesu yɛmu gɔbe lee, jaŋu unrunw wajunw gɔbe lee, Yesu be wooi sai wɔu, be womaa taanrinyɛn womɔ tiyɛ gɔ unrunbe bɛrɛ taga gin. 11Yesu aŋa bemɛ saa gi: «Ama diinɛ sɔɔ boŋurun gɔ, e bɛrɛ kai jugɔmaaɲu. Kaa inɛw wajunw bɛrɛ, sɔɔ puu babaŋa. Be, Ama le yabaa bana bemɛ dulomaatin ye, Ama hakɛ bemɛ be bɛrɛ yaabu kakanrando ma be liyaain. Kɔɔ digɛu, bemaa giri gɔmaa yɛnɛuwɔin kanran iyenɔu dɛi, iyaa sɔɔ gɔ ɛgɛuwɔin kanran, paamu kanrannɔu dɛi, be bɛrɛ taanrinyɛn le sɔɔdɛin.» 13Kɔɔ onu nɛ Yesu be le sɔwaa gi: «E taanrinyɛn ɔn paamu kanraanlɛi ye, taanrinyɛn wajunw gɔbe yani paamu kanrandei? 14Taanrinyɛn ma tiyɛ unwɔ: Toimaɲanɛ gɔ Ama sɔɔi tɔɔjɛ. 15Inɛw gamuu bana gɔ oju genɛ nɛ toi ii sugu gɔ gin’ wɔɔ. Sɔɔ gɔ be ɛgu onu nɛ, Setanu wɛi ye, sɔɔ kinɛ bemɛ nɛ kuni gɔ goonɔjɛɛjɛ. 16Inɛw gamuu bana gɔ tibu yalu nɛ toi ii sugu gɔ gin’ wɔɔ. Wogɔ bɛɛnw, sɔɔ gɔ ɛgɛnu digɛnu kinɛ ɛɛli le yabaɲu. 17Kaa be sɔɔ gɔ kinɛ bemɛ nɛ paŋa siyɛmɔɔnɛ digɛu, sɔɔ gɔ nɛ kuu kunu ye tanwaannɛ. Wogɔ digɛu, Ama sɔɔ gɔ dɛi ɔɲɛ ma, tɔɔɲɔ ma, be bɛrɛ dɔwaa ye, be ɔgu kɛu sɔɔ gɔ pajatiiɲu. 18Inɛw gamuu bana gɔ iyaa dɔgɔ jijii sɛin logoro nɛ toi ii tɛɛjɛ gɔ gin’ wɔɔ. Be sɔɔ gɔ kekeŋiyɛnɲu. 19Kaa aduna ɔn sɔɔ jiire lee, arusɛgɛ mɔɔnu dadaaru inɛi lelemɔjɛ gɔ lee, iyaa dadaaru wajabe lee wiyaain ye, sɔɔ gɔ kimɛjɛɛɲu. Kɔɔ dɛi sɔɔ gɔ kinɛ bemɛ nɛ birɛ birɛɛlɛ. 20Nɛɛ, inɛw gamuu bana gɔ toi ii minɛ ɛju nɛ sugu gin’ wɔɔ. Wogɔ bɛɛnw, sɔɔ gɔ ɛgaa ye, yayabaɲu. Sɔɔ gɔ kinɛ bemɛ nɛ birɛ bibirɛjɛ, ii nanaranjɛ. Gamuu mɔ pɛtaanu, gamuu mɔ pɛlukuloi, gamuu mɔ suŋu.» 21Kɔɔ onu nɛ Yesu be le sɔwaa gi: «Inɛ turu kanran lanpa yaun tanugaa ye, taju le kii ma, teenu bɔlɔ nɛ kunɔ ma kanraanlɛ. Kaa lanpa tanugaa ye, yalu wijɛ ɛjii wo obo bɛɛjɛ nɛ jeledo. 22Kijɛ babaŋa puu, ɛlu gogoodo. Sɔɔ boŋurun puu dɛdɛbɛlɛdɛin. 23Inɛ suguru ɛhɛgu sɛɛ, wo sɔɔ gɔ keŋiyɛn.» 24Kɔɔ onu nɛ Yesu iyaa ɔn gin’ be le sɔi: «Sɔɔ e ɛgɛjɛ ɔnbe puu ɛjii ai gɛliyɛi. Inɛw mɔ gelu le e tunwɔnjɛ gɔ, Ama, gelu wogɔ le ebe tunwɔndo. Iyaa wogɔ kuu nɛ e bɛrɛ babaradɛin. 25Inɛ kijɛ sɛɛ baŋa bɛrɛ baraa ye ohobodɛin. Kaa inɛ kijɛ sɛlɛ gɔ, gaila wo sɛɛ gɔ yaa wo bɛrɛ ɛhɛlɛdɛin.» 26Yesu iyaa taanrinyɛn waja daan ɔn gin’ gi: «Ama diinɛ gɔ, ainɛ minɛ womɔ nɛ toi maɲaa sɛɛ le tunwɔn bɛbɛɛmɔdo. 27Baŋa, toi gɔ maɲaa kilaa, wo giri yeiyenu biyɛjɛ ma, ingelaa yayala ma, toi gɔ tɛtɛiyɛjɛ. Wo toi gɔ bana tɛyɛjɛ inɛɛ. 28Minɛ gɔ tunmi toi gɔ tɛiyɛmɔjɛ. Kɔɔ onu nɛ, toi gɔ gabiyaa ye tɛŋɛ tɛŋaa, bɛrɛ bɛraa, poraai ye, ii yinkunɔjɛ. 29Nɛɛ, gɛlu waaru dɔwaai ye, minɛ baŋa kijɛ gɛlu gɛlu womɔ gɛliyaa wiyaa ye, gɛlu wo gɛlɛjɛ gɔ woi.» 30Yesu iyaa taanrinyɛn waja daan gi: «Ama diinɛ gɔ paamu kanran ga emɛ kijɛ inge tɔgu le woi tunwɔndɛin? Sɔɔ inge tɔgu le tiyɛ womɔ sɔɔdɛin? 31Keŋiyɛin! Ama diinɛ gɔ, mutarudu ii le murin wɔɔ. Tiun ii walaɲube puu logoro nɛ, mutarudu ii wo uji. 32Kaa woi tɔwaa, tɛiyaa, gabiyaai ye, tiun nai. Sadiŋɛ nɛ, kijɛ walaɲu puu dɛi gaa. Numɔ ii womɔbe gaai bibiyɛɲu. Halu sasaabe wiyaa ye numɔ ii gɔbe yalu kurugiyaa wɔɔ nɛ kuru kukuroɲu.» 33Inɛw, sɔɔ aŋai paamu be kanraindo le kɛukɛu Yesu waaju womɔ nɛ taanrinyɛn kɔɔ tunmɔ joo daaunbe. 34Wo taanrinyɛn daanlu go sɔɔ womɔ sɔɔbele. Kaa jaŋu unrunw womɔ bɛrɛ dɛiin wo taanrinyɛn gɔbe puu tiyɛ tagaube. 35Bai kɔɔ, digɛnai yɔraa wo kanran, Yesu, jaŋu unrunw womɔbei boonaa bemaa Galile dibe diŋirun waja go galamɔ gi. 36Inɛw gɔbei dii diŋirun gɔ nɛ pajaatiyaa, jaŋu unrunw gɔbe, Yesu diikoro nɛ wo tobe gɔ le woi jɛyaabɛin. Inɛw wajabe kanran, diikoro waja nɛ yowaa, dii gɔ kɛjaa taŋaubɛin. 37Ooɲɔ diyɛ naa diyɛ ingelaa, diigunu diikoro gɔ nɛ yooube dɛi, kɔlɔ gɔ nɛ dii jooi tɔlaabe. 38Waaru wogɔ le, Yesu diikoro bɔlɔ go, kuu tuŋurun nɛ kuu womɔ duunaa giri yeiyeube. Jaŋu unrunw gɔbe woi yaa, yemɛlaa be gi: «Jaŋudeerenɛ, emi suiyoido ga wɔɔ gɔ u mai sɛlɛu ma?» 39Yesu giri yemaa ooɲɔ gɔi ganwaan, dii gɔ womaa kelemu biyɛ, deeliye gi. Kɔɔ gin’ wo giyaa, ɔgu kɛu ooɲɔ gɔ dɛɛnrinyaain. Dii gɔ yaa kelemu biyaai. 40Yesu, jaŋu unrunw womɔ le ɔn gin’ sɔi: «Inge sabu dɛi e ɔn baa liyaa wɔi? E nimɛ kanran gagawu le wɔlɔi ma?» 41Kaa, be kai liyaa tunmɔ le ɔn gin’ gɛɛbɛin: «Aa! Inɛ ɔn inɛ inge tɔgui? Halu ooɲɔ lee, dibe dii lee, sɔɔ womɔ yabauwɔin.»

will be added

X\