MARUKA 3

1Yesu iyaa Ama gɛɛn ginrun nɛ yaabe. Wo ainɛ numɔ sanaai turu kɔɔ nɛ tɛmaabe. 2Yesu kijɛ jaanla turu wo kanrun ye, inɛw, wogɔ le woi sɔɔ nɛ kunɔdɛin ga bɛin. Kɔɔ dɛi be womaa ainɛ numɔ sanaai gɔi, deeliye bai gɔ le, babajamɔdo ma, woi ɛjii sebereubɛin. 3Yesu ainɛ numɔ sanaai gɔ le sɔwaa gi: «Ingele! Logoro ɔn nɛ iŋiyɛn!» 4Kɔɔ onu nɛ wo inɛw gɔbe bɛrɛ ɔn gin’ selumu: «Deeliye bai, inge kanraun jaan? Ɛju kanraun jaan ma, mɔɲu kanraun jaan? Inɛ kinrun yabaun jaan ma, inɛi daaun jaan?» Kaa inɛ turu kanran aŋa womɔ saa ga yabalu. 5Yesu sibɛ sibɛ, be puui kinɛbanrun le yɛnaabe. Amasɔgɔ jugɔ sɛlɛ bemɛ gɔ dɛi, kinɛ womɔ ɛjii jinwaanbe. Wo pilemaa ainɛ numɔ sanaai gɔ le sɔwaa gi: «Numɔ uwɔ wajara.» Ainɛ gɔ numɔ womɔ wo wajaraa, numɔ gɔ bajaai. 6Yesu ainɛ gɔi bajamaa wo kanran, Parisiɛn gɔbe gowaa, ɔgu kɛu yaa, Ɔgɔnɛ Herɔde mɔɔnu nɛ inɛw tobɛin gɔ, be wooi badu dɛinyaan, Yesui aŋai dai be bɛɛido sɔɔ yegereubɛin. 7Yesu lee, jaŋu unrunw womɔ lee gowaa, Galile dibe diŋirun go yain. Inɛw joo bei yadimɛbɛin. Inɛw wogɔbe gamuu Galile gana bɛɛnwin. 8Kaa gamuu Judea gana nɛ goin. Halu Jerusalɛmu, ana diyɛ gɔ nɛ gowaa inɛw wiyaabɛin. Gamuu Idumɛ gana sibɛ go goin. Gamuu Tire lee, Sidɔn lee ana sibɛ go goin. Inɛw kɔɔbe Yesu kijɛ kanranbe puu kibɛru ɛgaa, wogɔ dɛi wo bɛrɛ wɛin. 9Wo jiungunw joo bajamɔube. Wogɔ digɛu, jiungunw gɔbe woi bɛɛ tabu ye bajadɛin giye, giru giru kanrun ye, wo sibɛ go wɛɛubɛin. Inɛw, unruin namanɔu ga, Yesu, jaŋu unrunw womɔ bemaa unrun dɛi diikoro dagi dɛnu bojo gi. 11Inɛw jinrun kuu bemɛ nɛ daain gɔbe Yesui iyaa ye, giru womɔ nɛ wiyaa, numaa sugaa tuŋiyaan ye, mii ɛɛn le ɔn gin’ kɔnwɔunbɛin: «Ama Aini gɔ ui.» 12Kaa Yesu jinrun gɔbe bemaa unruin aai ma jugɔmɔnɔu giye, bei ganwaunbe. 13Kɔɔ onu nɛ, Yesu tetemɛ turu kuu nɛ yai. Wo inɛw wo dɛnɛjɛ gɔbei boonaabe. Be wo bɛrɛ wiyaabɛin. 14Inɛw wogɔbe logoro nɛ, inɛw wo le bii ye, waaju taga wo tiido, inɛw pɛli lɛisigɛ yɛmaabe. 15Wo be bɛrɛ inɛw kuu nɛ jinrun nanu goonu gɔnrɔn yaa obaabe. 16Inɛw pɛli lɛisigɛ wo yɛmu gɔbe boi bemɛ unwɔ: Simɔ, Yesu boi womɔ Piɛru kunu gɔ lee, 17Sebede anranw unrunw lɛi gɔbe Jake lee, wo bainɛ Jan lee Yesu boi bemɛ Boanɛrugɛsu kunu. Tiyɛ gɔ anrandagulu unrunw. 18Iyaa Andere lee, Pilipe lee, Barutelɛmi lee, Matiu lee, Tɔmasu lee, Alupe ii Jake lee, Tade lee, Simɔ lee. Wo gana womɔ gunɔ nɛ goo ga mainiyɛunbe. 19Iyaa, Judasu Isukariɔte lee. Yesui, numɔ nɛ kunɔnɛ gɔ woi. 20Kɔɔ onu nɛ, Yesu pilemaa ginrun wo wiyaa, inɛw, woi dimɛu ginrun gɔ nɛ wiyaa mɔriin. Inɛw ginrun gɔ nɛ aŋai wɛɛubɛin gɔ dɛi, Yesu lee, jaŋu unrunw womɔ lee, pana kai bei bɔrɔbele. 21Wo maranw wogɔ kibɛru ɛgaa woi ginrun dimɛrɛn jɛɛlɛi yaadɛin ga, oju gowaabɛin. Sabu be womaa kuu womɔ kɛu wɔlɔ gɛɛubɛin. 22Iyaa, Jerusalɛmu ana nɛ gowaa, Ama tɔɔru deerenw gamuu Yesu yalu bee gɔ nɛ wiyaa yabɛin. Be wo dɛi ɔn gin’ gɛɛbɛin: «Kuu womɔ nɛ jinrunbe kuu baŋa, Belujebulei daan. Jinrunbe kuu baŋa kuu womɔ nɛ yadaan digɛu, wo wogɔ le inɛw kuu nɛ jinrun nana bɛɛjɛ.» 23Kɔɔ gin’ be giyaa, Yesu bei boonɔmaa, taanrinyɛn le aŋa bemɛ sai. Wo ɔn gin’ gi: «Setanu, jinrunbe kuu baŋa gɔ, kuu womɔ le birɛbirɛnw womɔbe nananado ma? Asuu. 24Laamu turu nɛ, inɛw tunmɔ le jaiyaain ye, laamu bemɛ gɔ suiyolu ma? 25Iyaa, ginrun turu nɛ, inɛw, tunmɔ le jaiyaain ye, ginrun bemɛ jɔgɔlu ma? 26Kɔɔ bana wɔɔ gin’, Setanu kuu womɔ le jaiyaa, kabiyaai ye, womɔ dogaai. Bai womɔ dɔwaai. 27«Iyaa inɛ turu, inɛ ɛjii paŋa sɛɛ ginrun nɛ yoi ye, baŋai laa ai ye kɔmɔlu go, ginrun gɔ bala bɛɛlɛ. Kaa woi laa aa kɔmaatiyaa ye, wo ginrun gɔ bala bɛbɛɛdo.» 28Yesu iyaa gimaa inɛw gɔbe le ɔn gin’ sɔi: «Mu naran go e bɛrɛ tagauwɔn, inɛw bɛrɛ hakɛ bemɛ tɔgu dɛin dɛin lee, Ama boi be yamalajɛ gɔ lee, wogɔbe yaabu kanrun bɛbɛɛmɔdo. 29Kaa inɛ aai kanran, Kikinu Pilu boi yamalajɛ ye, hakɛ wogɔ wo bɛrɛ asuu yaabu kanrun bɛɛmɔidolo. Wo asuu hakɛ wogɔ le biyɛdo.» 30Ama tɔɔru deerenw gɔbe, Yesu kuu nɛ jinrun yadaan be gi gɔ dɛi, Yesu sɔɔ kɔɔ sɔi. 31Yesu kɔɔ gin’ sɔɔ sɔɔu wo wɔu, wo na lee, wo suŋɔw lee wiyaa yindɔin. Be bain go wɔu tagaatiyaa Yesu womaa wɛɛ gin. 32Inɛw joo Yesui gɔŋaa be daaun, kibɛru wiyaa ɔn gin’ wo le sɔin: «U na lee, u suŋɔw lee, bain go yɔɔin. Be ui selumɛuwɔin.» 33Yesu saa: «Mu na gɔ aai? Mu suŋɔw gɔbe aabei?» 34Kɔɔ gin’ giyaatiyaa, wo inɛw woi gɔŋaa daain gɔbei yɛnɛu, saa gi: «Mu na lee, mu suŋɔw lee inɛw ɔnbei. 35Inɛ Ama diŋɛ kanranjɛ gɔ, wogɔ baŋa, mu ba ii gɔ woi, mu saa gɔ woi, mu na gɔ yaa woi.»

will be added

X\