MARUKA 2

1Bai gaila kanraan, Yesu pilemaa Kapɛrunaumu ana nɛ wɛi. Wo wiyaai ga kibɛru gɔ yalu puu nɛ ɔgiri wo ginaa, 2inɛw wiyaa ginrun wo tobe gɔ nɛ jowaa, yalu biyɛɲu turu kanran bele. Halu, bain go, murɔn aŋa gɔ nɛ kanran yalu bele. Yesu be bɛrɛ waaju tagaube. 3Bei waajau wo wɔu, inɛw gamuu, ainɛ goju sanaai turu, anranw nai bɛrɛ duiyɔmaa wo bɛrɛ jɛɛlin. 4Kaa, mɔɔnu gɔ gabaai gɔ digɛu, be Yesu bɛrɛ bana dɔɔɲu sɛbenɛ. Be dala go ulaa, dala gɔ tɔgɔraa, ainɛ goju sanaai gɔi, pɛnrɛnpanran womɔ gɔ le bonɔ gɔ nɛ Yesu yalu bee gɔ nɛ tee yasunugin. 5Yesu, inɛw gɔbe aŋai wo le gawaa be wɔɔ gɔ iyaa, jiunginɛ gɔ le sɔwaa gi: «Aini ma, hakɛ uwɔ yaabu kanraantin.» 6Ama tɔɔru deerenw gamuu yalu gɔ nɛ daaun, kinɛ bemɛ nɛ ɔn gin’ gɛɛbɛin: 7«Ainɛ ɔn, sɔɔ inge tɔgui sɔɔjɛ? Amai laa ye inɛ aa, hakɛ yaabu kanrun bɛɛjɛ? Wo Ama boi yamalauwɔ.» 8Yesu ɔgu kɛu kinɛ bemɛ ajubu jugaa, be le ɔn gin’ sɔi: «Inge dɛi e kinɛ ebe nɛ ajubu kɔɔ ajubauwɔi? 9Ainɛ goju sanaai gɔ womaa, hakɛ womɔ yaabu kanraantin aŋa le gɛɛ lee, womaa ingele ye pɛnrɛnpanran womɔ jeɲɛ ye, yoi yaa gɛɛ lee, kolɛi logoro nɛ yagɔ naaran? 10Kaa Inɛ Aini gɔ, aduna nɛ inɛw bɛrɛ hakɛ bemɛ yaabu kanranɲu gɔnrɔn yasɛ, e bɛrɛ jugɔmɔdɔn.» Kɔɔ gin’ sɔwaatiyaa, Yesu ainɛ goju sanaai gɔ le ɔn gin’ gi: 11«U le gɛɛjɔn! Ingele, pɛnrɛnpanran uwɔ jeɲɛ, ginrun uwɔ nɛ yaa.» 12Jiunginɛ gɔ ɔgu kɛu ingelaa, pɛnrɛnpanran womɔ jeɲaa, inɛw puu, giru gɔmaa woi yɛnɛu be wɔu, gowaa yai. Sɔɔ gɔ inɛwin ɛjii maunɛ kanraanbe. Be Ama boi sɔmɔu, «Asuu emɛ sɔɔ ɔn tunmɔ iyetɛnɛ» gɛɛubɛin. 13Yesu, iyaa Galile dibe genɛ nɛ yai. Inɛw joo gɔbe kɔɔ nɛ wo bɛrɛ yaaubɛin. Wo bei deereube. 14Yesu, oju galau Alupe ii Lewi, sɛgu yabu yalu nɛ wo daaun iyi. Wo wo le sɔwaa gi: «Wɛɛ mui dimiyɛn.» Lewi ingelaa woi dimiyaanbe. 15Kɔɔ onu nɛ, Yesu, jaŋu unrunw womɔ le, Lewi ginrun nɛ jaa kayau daanbe. Sɛgu yabanw lee, inɛw boi mɔɲu bemɛ gowaa wɔin wajabe lee, joo Yesu onu nɛ yadigiyɛbɛin dɛi, be kanran, jaa kai gɔ nɛ yabɛin. 16Yesu, inɛw kɔɔbe tunmɔ le mɔrinyaan jaa kayauwɔ ga, Ama tɔɔru deerenw, Parisiɛnbe mɔɔnu nɛ toin gɔbe iyaa, be jaŋu unrunw womɔ gɔbe bɛrɛ ɔn gin’ gin: «Inge dɛi wo sɛgu yabanw lee, inɛw boi mɔɲu bemɛ gowaa wɔin wajabe lee le mɔrinyaan jaa kayauwɔ?» 17Yesu wogɔ ɛgaa, be le sɔwaa gi: «Inɛw sɛɛu wɔin gɔbe, jɔŋujɔŋɔnɛ kai sɛnɛ. Inɛw jiungunw, jɔŋujɔŋɔnɛ kai be sɛɛ. Mu inɛw teitai wɔin dɛi wɛɛlun. Kaa inɛw hakɛ kanranw dɛi wɛiun.» 18Nɛɛ Jan Batise jaŋu unrunw lee, Parisiɛnbe lee, be aŋa pagaa sɛbɛin. Inɛw wiyaa Yesu bɛrɛ ɔn gin’ gin: «Jan Batise jaŋu unrunw lee, Parisiɛnbe jaŋu unrunw lee, aŋa papagaɲu. Inge dɛi jaŋu unrunw uwɔ gɔbe aŋa pagaanɛ wɔin?» 19Yesu aŋa bemɛ saa gi: «Purupagu bai gɔ, akana anrunge gɔbe, akana le wɔnu aŋa pagu ye bii bɛbɛɛdɛin ma? Asuu! Akana be wooi wɔnu, be aŋa pagu bɛɛidenɛ. 20Kaa, bai yawɛɛjɛ, akana gɔ be le kabugutiidɛin. Bai wogɔ dɔwaai ye, be aŋa papagadɛin.» 21Yesu kɔɔ kuu nɛ gimaa gi: «Inɛ turu kanran sɔi kana pɛlɛ ye, sɔi pɛi kuu nɛ daŋaalɛ. Wogɔ gin’ kanraan ye, sɔi gɔ biɲiyaain ye, kaaru gɔ babariyɛjɛ. 22Iyaa inɛ turu kanran kɔɲɔ ilɛ umulu pɛibe nɛ kunɔɔlɛ. Wogɔ gin’ kanraan ye, kɔɲɔ gɔ waaru ilɛnu wo yaajɛ, umulu gɔbei pojomu ye, kɔɲɔ gɔ lee, umulu gɔ lee nɛ ui tolo biyɛdo. Kɔɔ dɛi kɔɲɔ ilɛ gɔ, umulu kanabe nɛ kunɔɲu.» 23Deeliye bai turu Yesu lee, jaŋu unrunw womɔ lee, alukama minɛ turu nɛ kɛjaa galaubɛin. Jaŋu unrunw gɔbe alukama gɔ polo polo nawanranmu ye, tɛnwɛunbɛin. 24Parisiɛnbe wogɔ iyaa, Yesu le sɔwaa gin: «Jaŋu unrunw uwɔ yɛnɛ. Deeliye bai kijɛ kanran danwan gɔ, be wogɔ inge dɛi kanranɲu?» 25Yesu aŋa bemɛ saa gi: «Dawide lee, inɛw wo le bɛin gɔbe lee, giyɛ bei yasɛbe dɛi, pana dɛnɛu kijɛ be kanrun gɔ, e jaŋali ma? 26Ama bɛrɛ sadagadɔɔnɔnɛ kuu baŋa, Abiataru waaru le, Dawide Ama ginrun gɔ nɛ yayowaa, Ama burui ga, buru duunaaɲu gɔ, wo wogɔ jeɲaa kayaabe. Iyaa inɛw wo le bɛin bɛrɛ obaa kayamaabe. Buru wogɔ, Ama bɛrɛ sadagadɔɔnɔw gɔbei laa ye, inɛ waja kayaun jaanla bee.» 27Yesu iyaa pilemaa be le sɔwaa gi: «Deeliye bai gɔ, inɛ dɛi bojin. Ama, deeliye bai dɛi inɛi maŋalu. 28Wogɔ digɛu, Inɛ Aini gɔ, deeliye bai sɔɔ gɔ wo sagi.»

will be added

X\