MARUKA 16

1Deeliye bai gɔ galau wo digɛu, Mari Magudala bɛɛnnɛ gɔ lee, Mari, Jake na gɔ lee, Salomɛ lee, Yesu yiun gɔ dɛi, nii jiɲu ɛju ɛbaa yagɛlɛbɛin. 2Kunrin, jugu bai pɔlɔ gɔ, aga, giresin, nai tumɔgu waaru gɔ le, be ɔnsain gɔ nɛ yaabɛin. 3Ɔnsain gɔ nɛ yaau wɔu, be tunmɔ le ɔn gin’ gɛɛbɛin: «Ɔnsain gɔ nɛ dɔwaa ye, dumɔ diyɛ murɔn aŋa gɔ nɛ pinɛ gɔ, inɛ aa emɛ bɛrɛ dunɔrɔnmu obodo?» 4Kaa be yɛnaa, dumɔ diyɛ gɔ dunɔrɔnmaa, goonaatiyaabɛin ga be iyaabɛin. 5Be ɔnsain gɔ nɛ yowaabɛin. Kɔɔ nɛ sagatara ii turu, arugoi pilu le numɔ iin bemɛ sibɛ go wo daaun be iyaabɛin. Yaanw gɔbe woi iyaa, liyaain. 6Kaa, sagatara ii gɔ be le ɔn gin’ sɔi: «E kai, liyɛnɔugi. E, Yesu, Nasarɛtu ana bɛɛnnɛ, baga jai nɛ pɛgaa dain gɔi dɛnɛjɛi. Wo ɔn nɛ tolo. Wo bulaai. Yɛnɛi! Yalu wo diinbe gɔ unwɔ. 7Nɛɛ yaai, jaŋu unrunw womɔ bemaa bana be bɛrɛ pɔɔlɔ baa wo tagaabe le kɛukɛu, wo Galile gana nɛ giru bemɛ nɛ yaai wa. Bemaa kɔɔ nɛ woi iyedɛin wa. Piɛru bɛrɛ taga ga naŋanɔugi.» 8Yaanw gɔbe liliyɛ le jowaa wɔu, kinwɛun, ɔnsain gɔ nɛ gowaa, wagee jɔbaa yain. Liliyɛ bemɛ sabu dɛi be inɛ turu bɛrɛ kanran, sɔɔ kanma taganɛ. [ 9Jugu bai pɔlɔ gɔ agapaali, Yesu bulaa, Mari Magudala bɛɛnnɛ bɛrɛ laa unruin taguru. Wo Mari wogɔ kuu nɛ jinrun sɔi baa nanaa goonu. 10Nɛɛ, Mari, jaŋu unrunw gɔbe yiun pii piiu, sɔmiyɛun be wɔu wiyaa tɛmaa, kibɛru gɔ be bɛrɛ tagaabe. 11Kaa Yesu ɔnmɔi wɔɔ, unrun woi iyaabɔn ga, Mari wo sɔwaa waaru be ɛgu le, be wo le gawanɛ. 12Kɔɔ onu nɛ, ana dagi turu oju nɛ, Yesu unruin jaŋu unrunw lɛi bɛrɛ bana waja le tagaraabe. 13Be ginrun wiyaa jaŋu unrunw wajunw gɔbe bɛrɛ sɔɔ gɔ tagaabɛin. Kaa jaŋu unrunw gɔbe, kɔɔbɛɛnw le yaa gawanɛ. 14Kɔɔ onu nɛ, jaŋu unrunw pɛli turusigɛ gɔbe jaa kayau be wɔu, Yesu be bɛrɛ wiyaa unruin taguru. Yesu bulaai ga inɛw iyin gɔbe sɛɛrɛ le gawanɛ be kanrun gɔ dɛi, Yesu, gagawu sɛlɛ bemɛ lee, kɔkɔlɔ maa bemɛ lee dɛi bei pɛbaabe. 15Kɔɔ onu nɛ, wo be le ɔn gin’ sɔi: «Aduna kale wooi nɛ yaai. Inɛw puu bɛrɛ Kibɛru Ɛju gɔ tagai. 16Inɛ kole gawaa, unruin batise kanranmaajɛ, inɛ wogɔi yayabadɛin. Kaa inɛ kole gawalu gɔ, kuu womɔ nɛ jarugu duduurɔdɛin. 17Inɛw kole gawaidɛin gɔbe taanrinyɛn birɛ be birɛido gɔbe unwɔ: Be boi ma le inɛ kuu nɛ jinrun nananadɛin. Be sɔɔ kana sɔsɔɔdɛin. 18Be yuguru numɔ bemɛ le aaɲu kanran, dugo kayaaɲu kanran, kijɛ kanma be bɛrɛ biyɛidolo. Jiungunw kuu nɛ numɔ yayaŋarandɛin, be babajadɛin.» 19Sɔɔ kɔɔbe be le sɔwaatiyaa, Inɛw Baŋa Yesu alagala go ulaa, Ama numɔ iin sibɛ go dɛinyin. 20Jaŋu unrunw gɔbe, yalu wooi nɛ Kibɛru Ɛju gɔ tagai yaabɛin. Inɛw Baŋa Yesu, birɛ wogɔ nɛ bei baraube. Waaju be tagajɛ gɔ narain ga inɛw bemaa jugɔ ga wo taanrinyɛn birɛ joo be bɛrɛ birɛmɔube.]

will be added

X\