MARUKA 15

1Agapaali, Ama bɛrɛ sadagadɔɔnɔw kuu bɛɛnw gɔbe lee, Yahutunw inɛw naw gɔbe lee, Ama tɔɔru deerenw gɔbe lee mɔrinyaan, badaa, Yesui aa pagaa, Sɛmɛginɛ Pilate bɛrɛ jɛyaabɛin. 2Pilate Yesui selumaa gi: «Ui Yahutunw ɔgɔnɛi ma?» Yesu aŋa womɔ saa gi: «Wogɔ u gi.» 3Sadagadɔɔnɔw kuu bɛɛnw gɔbe sɔɔ joo nɛ Yesui jarugaabɛin. 4Pilate pilemaa ɔn gin’ wo le gi: «Inɛw ɔnbe kuu uwɔ nɛ sɔɔ sɔɔu wɔin gɔ u ɛgɛɛlɛu ma? Be le sɔɔ saaɲu sɛlɛu ma?» 5Kaa Yesu waja aŋa womɔ saalu. Wogɔ Pilate bɛrɛ ɛjii maunɛ kanrun. 6Nɛɛ, Taŋagalu janwan wɛɛjɛ puu, Pilate, kajuginɛ turu pajaube. Inɛw, kajuginɛ paja giyaaɲu gɔi pajabe. 7Waaru kɔɔ le, kajuginɛ turu yabe. Boi womɔ Barabasu gɛɛbɛin. Wo lee, wo bɔɔnw lee, murutu waaru le, inɛ be daa, kɔɔ gin’ bei kaju kuni. 8Nɛɛ inɛw, Pilate mɔ nɛ yaa, womaa bana pɔɔlɔ baa kanraan wɛɛjiyaa wo wɔɔ gin’ unrunbe bɛrɛ kanran ga gɛɛin tɔlaabɛin. 9Pilate aŋa bemɛ saa gi: «Maa Yahutunw ɔgɔnɛ gɔi e dɛi paja ga e ibɛɛ wɔi ma?» 10Sabu Pilate, Ama bɛrɛ sadagadɔɔnɔw kuu bɛɛnw gɔbe, ele dɛi Yesui numɔ womɔ nɛ kuni ga, jugaabe. 11Kɔɔ gin’ wo selumaa, Ama bɛrɛ sadagadɔɔnɔw kuu bɛɛnw gɔbe, mɔɔnu gɔ logoro nɛ yowaa, inɛw bemaa Barabasui paja giye, Pilate aŋa saa gin. 12Pilate pilemaa be bɛrɛ ɔn gin’ selumu: «Kɔɔi ye, inɛ Yahutunw ɔgɔnɛi e gɛɛjɛ gɔ le, maa inge kanran?» 13Inɛw gɔbe puu ɔn gin’ sain: «Baga jai nɛ woi pɛgɛ ye daa!» 14Pilate, inɛw gɔbe bɛrɛ ɔn gin’ selumu: «Kɔɔi ye inɛ ɔn mɔɲu ingei kanrun?» Kaa inɛ kanma puu mii bemɛ ɛɛnnaa ye, ɔn gin’ gɛɛbɛin: «Woi baga jai nɛ pɛgɛ ye, daa!» 15Pilate kinɛ bemɛ aamu ibɛi bee dɛi, Barabasui pajaatiyaa, Yesui bɔɔniyɛn le ɛjii lagamaa, baga jai nɛ pɛgɛ ye daa ga sɔludasu womɔbe numɔ nɛ woi kunu. 16Pilate sɔludasu gɔbe Yesui aa woi gɛliyaa, sɛmɛginɛ ginrun nɛ, sɔludasu unrunw yalu toin gɔ nɛ jɛɛlaa, sɔludasu gɔbe puu boonaa mɔɔnaabɛin. 17Be arugoi diyɛ banrun wo bɛrɛ kunaa, jijii le domɔ tiyaa, kuu womɔ nɛ kunaabɛin. 18Kɔɔ onu nɛ be woi poonɔu kijɛ be gɛɛbe: «Yahutunw ɔgɔnɛ, poo!» 19Kunrin be saguba le kuu womɔ lagau, kuu womɔ nɛ yuguja tɔitɔi tiiu, iyaa giru womɔ nɛ tuŋiyaan ye, woi babaɲu gin’ kanraunbɛin. 20Waaru woi yamurinyɛnmaa bei bai le, be arugoi diyɛ banrun gɔ wo bɛrɛ goonaatiyaa, arugoi womɔ gɔ pilemaa wo bɛrɛ kunaa, woi gɛliyaa baga jai nɛ pɛgɛ daai yinyain. 21Sɔludasu unrunw gɔbe oju nɛ ainɛ turu olu gowaa wɛɛu wo wɔu, paŋa le Yesu baga jai gɔ wo bɛrɛ duuraabɛin. Ainɛ wogɔ, Sirɛnɛ ana bɛɛnnɛ Simɔi. Alɛsandere lee, Rupusu lee ba gɔ woi. 22Kunrin be Yesui dimɛraan, yalu Gɔlugota gɛɛɲu, tiyɛ gɔ kuu togolo yalu gɔ nɛ yaabɛin. 23Sɔludasu unrunw gɔbe, resɛndii ilɛ, loo miire gɛɛɲu gɔ le mɔɔnaa, Yesu bɛrɛ obaabɛin. Kaa, wo nɔi yabalu. 24Kɔɔ onu nɛ, be woi baga jai nɛ pɛgaa, sɔi womɔbe be tuturu bɛrɛ bana dinrɛindo yɛnɛ ga keri teŋaa gamalaabɛin. 25Yesui baga jai nɛ, aga lɛɛrɛ tuwɔ waaru le pɛgin. 26Baga jai gɔ kuu gɔ nɛ, woi sɔɔ dɛi pɛgin tɔŋaa bojaa yasɛbɛin: “Yahutunw ɔgɔnɛi.” 27Yesui waaru pɛgin le, tebutɛbɛnw lɛi kanran pɛgaabɛin. Turu numɔ iin womɔ sibɛ go bee. Lɛiye gɔ numɔ nana womɔ sibɛ go bee. [ 28Yesui kɔɔ gin’ tebutɛbɛnw logoro nɛ be pɛgu gɔ, Ama Dɔn nɛ sɔɔ tɔŋɔ turui kibemɔjɛ. Wogɔ nɛ tɔŋaa gi: “Tebutɛbɛnw gin’ woi lugaabɛin.”] 29Inɛw oju galanw gɔbe kuu jigemaa ye, Yesui duyɔu, kijɛ be gɛɛbe: «Hei! U inɛ Ama Ginrun Diyɛ gɔ damati ye, bai taanu logoro nɛ ujɔ bɛbɛɛdou gɛɛube gɔ, 30kuu uwɔ yaba, baga jai kuu nɛ wɛɛ sugo.» 31Ama bɛrɛ sadagadɔɔnɔw kuu bɛɛnw gɔbe lee, Ama tɔɔru deerenw gɔbe lee, be kanran Yesui yamurinyɛnmɔu, tunmɔ le ɔn gin’ gɛɛbɛin: «Yɛnɛi! Wo inɛwin yabaa, kuu womɔ yabu bɛɛlɛ. 32Nɛɛ, Ama Yabanɛ Diyɛ tii gɔ, Isɛrɛlu ɔgɔnɛ gɔ woi ye, baga jai kuu nɛ wɛɛ wo sugomɔ. Emɛ wogɔ iyaaɲu ye, wo le gagawadɛin.» Tebutɛbɛnw Yesu genɛ nɛ bɛin gɔbe kanran, Yesu le sɔɔ mɔɲu mɔɲu sɔɔubɛin. 33Nɛɛ, naitege gowaa, digɛnai lɛɛrɛ taanu waaru yai dɔɔ baa, gana gɔ puu ɔlɔi biyaabe. 34Lɛɛrɛ taanu waaru gɔ le, Yesu ɛɛnnaa ɔn gin’ gi: «Eloi, Eloi, lɛma sabakutani.» Tiyɛ gɔ Ama ma, Ama ma, inge dɛi ɔn gin’ mui pajaajɛu? 35Yesu kɔɔ gin’ gɛɛu wo wɔu, inɛw kɔɔ nɛ bɛin gamuu ɛgaa, kijɛ be gi: «Yɛnɛi, wo inɛ Ama titiyainɛ Elii boonɔuwɔ.» 36Inɛ turu jɔbaa yaa kijɛ turu resɛndii ilɛ aaun nɛ sowaa, wogɔ bagi pala nɛ pagaa Yesu womaa nɔɔ ga wo bɛrɛ dɛɛraabe. Wo inɛw gɔbe le ɔn gin’ gi: «Dɔmiyɛin! Eli woi baga jai kuu nɛ susunugodo ma emɛ dɔmi yɛnɛmɔi.» 37Kaa kɔɔ waaru le, Yesu mii ɛɛn le sɔɔ sɔwaatiyaa kɔɔ gin’ kinrun goi. 38Waaru wogɔ le Ama Ginrun Diyɛ gɔ nɛ kɛju sɔi gɔ daa gɔ nɛ tɔlaa, doɲu yai dɔɔ, logoro gɔ nɛ tee kaaraai. 39Sɔludasu suŋu kuu baŋa gɔ, baga jai genɛ nɛ iŋɛu, Yesu bana yinwun gɔ iyaa ɔn gin’ gɛɛbe: «Ainɛ ɔn, naran go Ama Ainii bee.» 40Yaanw gamuu kanran wagee iŋiyaan, sɔɔ bii gɔ yɛnɛubɛin. Yesu, Galile gana nɛ waaru wo goi le baa, yaanw wogɔbe onu womɔ nɛ dimiyaan, woi baraubɛin. Yaanw wogɔbe logoro nɛ Mari Magudala ana bɛɛnnɛ gɔ lee, Mari, Jake dagi lee Jose lee na gɔ lee, iyaa Salomɛ lee yatobɛin. Iyaa, yaanw joo Yesu le Jerusalɛmu wɛin gɔbe kanran yabɛin. 42Sɔɔ kɔɔbe puu, deeliye bai dɛi yeguru kunɔɲu bai bii. 43Bai wogɔ nai numɔmɔ nɛ, ainɛ turu anrangaju kunaa, Pilate bɛrɛ yaa womaa Yesu yiun gɔ unrun bɛrɛ obu bojomɔ ga gɛnyaanbe. Ainɛ wogɔ boi Josɛpu gɛɛbɛin. Wo Arimate ana bɛɛnnɛi. Yahutunw badubadanw diyɛnw logoro nɛ, wo ɛjii baba yasɛbe. Kaa, wo kai Ama diinɛ wɛɛido gɔ ɛjii yadɔmɔbe. 44Yesu kinrun goi gɔ Pilate bɛrɛ ɔgiriyaa gabaa, woi maunɛ kanrun. Wo sɔludasu suŋu kuu baŋa gɔi boonaa, womaa Yesu yinwun tanwaan ma selumu. 45Sɔludasu kuu baŋa gɔ ee wo giyaa, wo Josɛpu gɛɛn gɔ yabaa, womaa Yesu yiun gɔ jeɲɛ bɛbɛɛdo gi. 46Kɔɔ gin’ Josɛpu yaa, bojo ɛbaa, Yesu yiun gɔ baga jai nɛ sunugaa, bojo gɔ kunaa, dumɔ nɛ ɔnsain tɔgɔraaɲu turu nɛ yaa duunu. Kɔɔ onu nɛ dumɔ diyɛ turu dunɔrɔnmaa dɔɔnaa, ɔnsain aŋa gɔ wogɔ le pinaabe. 47Mari Magudala bɛɛnnɛ gɔ lee, Mari, Jose na gɔ lee, Yesui yalu kuni gɔ yɛnɛubɛin.

will be added

X\