MARUKA 14

1Taŋagalu janwan lee, buru kijɛ pidemu tolo janwan gɔ lee, bai lɛi waju gɛɛu be wɔu, Ama bɛrɛ sadagadɔɔnɔw kuu bɛɛnw gɔbe lee, Ama tɔɔru deerenw gɔbe lee baŋi ye aŋai Yesui ai ye, be daaido dabulu dɛnɛubɛin. 2Be tunmɔ le ɔn gin’ gɛɛbɛin: «Emɛ Yesui ahaadɛin kanran, janwan waaru gɔ le woi aamɔnɔugin. Kɔɔi laa ye, mɔɔnu gɔ emɛ dɛi ihingeledo.» 3Yesu, Betani ana nɛ bee. Simɔ nɛwɛnginɛ ginrun nɛ, jaa kayau wo daaun, yaanran turu, alubatere tɔɲɔ, lajukɔrɔ le joo gɛliyaa yoi. Lajukɔrɔ gɔ, tiun naru gɛɛɲu gɔ nii tɔitɔi le yegeraa sɛbɛin. Dɔnrun womɔ ɛjii gaai bee. Yaanran kɔɔ wiyaa, Yesu kuu nɛ iŋɛu tɔɲɔ gɔ kɔkɔlɔ tumɔraantiyaa, lajukɔrɔ gɔ puu Yesu kuu nɛ togaa kɔɔraabe. 4Inɛw gamuu yalu gɔ nɛ wɔu kinɛ ɛjii jinwaan, ɔn gin’ tunmɔ le gɛɛbɛin: «Lajukɔrɔ gɔ ɔn gin’ yamalaa wo paju gɔ, ingei? 5Lajukɔrɔ ɔn dɔnraan ye, sarudu buudu suŋu taanu dɛi gaa. Nɛɛ, lajukɔrɔ gɔ dɔnrɔn ye, buudu gɔ naugunw bɛrɛ gamulu bɛɛmɔbele ma?» Be kɔɔ gin’ yaanran gɔi ɛjii gɛɛrɛubɛin. 6Kaa Yesu be le ɔn gin’ sɔi: «Yaanran gɔi yoboi pajai. E inge dɛi kinɛ womɔ jinwɛnmɔuwɔi? Kijɛ wo kanrun gɔ, wo mu sibɛ go birɛ ɛjui biru. 7Naugunw bai puu e le kowɔin. Waaru be bɛrɛ ɛju kanran e nawan puu, e, be bɛrɛ ɛju kanran bɛbɛɛdei. Kaa, mu bai puu e le kobiyɛidolɔn. 8Yaanran ɔn, kijɛ wo gɔnrɔnjɛi kanrun. Inɛw mui dadaadɛin. Kɔɔ dɛi yaanran gɔ kanɛ baa yiun ma aŋai yegere wo bɛɛjɛ gɔ, kɔɔ woi. 9Mu naran go e bɛrɛ tagauwɔn, aduna sibɛ nai nɛ yalu Kibɛru Ɛju gɔ tagaidɛin wooi nɛ, yaanran ɔn kijɛ kanrun gɔ yaa sɔsɔɔdɛin. Kɔɔ gin’ inɛw woi naŋaidenɛ.» 10Kɔɔ waaru le Yesu jaŋu unrunw pɛli lɛisigɛ gɔbe nɛ turu, Judasu Isukariɔte gɔ, Ama bɛrɛ sadagadɔɔnɔw kuu bɛɛnw gɔbei wiyaa tɛmaa, unrun Yesui numɔ bemɛ nɛ kukunɔdo gi. 11Waaru sɔɔ kɔɔ be ɛgu le, kinɛ bemɛ gaai aabe. Be unrunbe wo bɛrɛ kɛɛlɛ ohobodɛin ga wo le pui jeɲaabɛin. Tunmɔ le kɔɔ gin’ aaraa, Judasu gowaa Yesui numɔ bemɛ nɛ bana wo kunɔido dɛnɛi yai. 12Kɔɔ gin’ buru kijɛ pidemu tolo janwan, bai pɔlɔ gɔ dɔwaai. Bai wogɔ, ginrun tuturu nɛ peju ii yɛmaa ye, sɛnwaan ye, Taŋagalu pana bemɛ kunrin yegerebɛin. Yesu jaŋu unrunw gɔbe genɛ womɔ nɛ dɔwaa, ɔn gin’ wo bɛrɛ selumi: «Taŋagalu pana gɔ, emɛ inɛ aa mɔ nɛ yegere ga ibɛu?» 13Yesu, jaŋu unrunw lɛi yɛmaa, be le ɔn gin’ sɔi: «Ana kɔlɔ nɛ yaai. Ainɛ turu toroi le dii duiyaa wo wɛɛnu, e wooi sɛsɛgɛrɛdo. Woi digiyɛi. 14Ginrun wo yooido gɔ nɛ, ginrun baŋa le ɔn gin’ gɛɛi: ‘Jaŋudeerenɛ emɛ uwaa, unrun, jaŋu unrunw unrunmɔ le, Taŋagalu pana deun unrunbe kayaido gɔ yago wɔɔ ma gi.’ 15Wo ginrun sɔɔrɔ turu nɛ deun diyɛ e bɛrɛ tatagarado. Deun gɔ nɛ kijɛ kai emɛ sɛɛ puu sɛɛu yegeraa e tɛtɛmɛdei. E wogɔ nɛ Taŋagalu pana yeguru yegerei.» 16Jaŋu unrunw lɛi gɔbe yaa, ana kɔlɔ nɛ yowaa, bana bei tagin gin’ yintɛmi. Be kɔɔ gin’ Taŋagalu pana yeguru puu yegeraabɛin. 17Digɛ wo digiyaa, Yesu lee jaŋu unrunw pɛli lɛisigɛ womɔ lee, Taŋagalu pana kayai yinwɛin. 18Pana kayau daaun, Yesu gowaa ɔn gin’ jaŋu unrunw womɔ le sɔi: «Mu naran go e bɛrɛ tagauwɔn, emɛ puu kanɛ sɛɛu jaa kayau undaain, kaa logoro ebe nɛ inɛ turu mui numɔ nɛ kukunɔdo.» 19Jaŋu unrunw gɔbe kinɛ bemɛ jinwaanbe. Be inɛ tuturu puu ɔn gin’ Yesu le gɛɛubɛin: «Mui kai laa woi laa?» 20Kɔɔ waaru le, Yesu ɔn gin’ sai: «Inɛ numɔ nɛ mui kunɔido gɔ, e pɛli lɛisigɛ gɔbe logoro nɛ inɛ baɲa nɛ kubɔ tunmɔ mu le numɔ kunɔu wɔɔ gɔi. 21Inɛ Aini gɔ, Ama Dɔn nɛ pɔɔlɔ baa bana wo dɛi tɔŋaaɲu gin’, waajibi, wo yiyinwɛndo. Kaa, inɛ woi numɔ nɛ kunɔido gɔ, bɔnrɔn wo le yɔɔ. Wogɔ baŋa woi naranla wo bɛrɛ ire biyɛdo.» 22Jaa kayau wɔu, Yesu buru jeɲaa, Amai birɛpoo tagaatiyaa, buru gɔ kabalaa, jaŋu unrunw womɔi obou ɔn gin’ be le gi: «Ɔn goju mai, yabai.» 23Kɔɔ onu nɛ Yesu resɛndii ilɛ gɔ jeɲaa, Amai birɛpoo tagaatiyaa, jaŋu unrunw gɔbei obu. Be puu resɛndii ilɛ gɔ nɔwaanbɛin. 24Iyaa, wo ɔn gin’ be le gi: «Ɔn ili mai, aaru ilii, inɛw joo dɛi togi gɔ woi. 25Mu naran go e bɛrɛ tagauwɔn, iye galaai ye, Ama diinɛ gɔ nɛ, resɛndii ilɛ kana mu nɔɔido bai yai dɔɔ baa, mu waja resɛndii ilɛ asuu nɔɔidolɔn.» 26Kɔɔ onu nɛ, be Ama Sɔmu nii niyaantiyaa, Oliwe tetemɛ go yain. 27Yaau wɔu, Yesu ɔn gin’ jaŋu unrunw gɔbe le gi: «E puu mui pajati ye jɔbɔ yaadei. Sabu Ama Dɔn nɛ tɔŋaaɲu: “Mu, pejugirɛnɛ gɔi dadaadɔn, peju kilɛ gɔ giginɛdo.” 28Kaa, waaru mu bulaajɛ, mu giru ebe nɛ Galile gana nɛ yayaadɔn.» 29Kaa Piɛru wo le ɔn gin’ gi: «Jaŋu unrunw wajunw gɔbe ui pajaatin kanran, mu ui pajaidolɔn.» 30Yesu aŋa womɔ saa: «Mu naran go u bɛrɛ tagauwɔn, iye digɛ tee ɛɲɛ, kubɔ lɛi wo kɔnwɔnmɔ nɛ, u kubɔ taanu mui inɛɛu gɛgɛɛdou.» 31Kaa Piɛru gimaa gimaa sɔwaa, Yesu womaa kinrun unrunmɔ wo gooidoi laa ye, unrun woi inɔn ga asuu gɛɛidolɔn gi. Jaŋu unrunw wajunw gɔbe kanran Piɛru bana gi gin’ unrunbe asuu Yesui inin gɛɛidenɛ gin. 32Yesu lee, jaŋu unrunw womɔ lee, Jɛtisemanɛ yalu gɛɛɲu gɔ nɛ yain. Wo be le ɔn gin’ sɔi: «Ɔn nɛ dɛinyɛin. Mu Ama gɛɛin yaajɔn.» 33Kɔɔ gin’ wo Piɛru lee, Jake lee, Jan lee dimɛraan yai. Yesu, hakilɛ womɔ bimiliyei tɔlaabe. Wo bɛrɛ saii nawin biyɛi tɔlaabe. 34Wo jaŋu unrunw taanu gɔbe le ɔn gin’ gi: «Kinɛ ma jinwaan, yinwɛnluin laa ye, mu bɛrɛ kijɛ waju wɔlɔ. Ɔn nɛ biyɛi, giri yeiyenɔugi.» 35Wo dagaa dɔraa gowaa, minɛ nɛ numaa sugaa, Ama gɛnyaan, Ama womaa kanrun bɛbɛɛmɔ ye, ɔɲɛ gɔbe nɛ unruin paaba gi. 36Wo ɔn gin’ Ama gɛɛnbe: «Mu Ba, u kijɛ puu gɔgɔnrɔnjɛu. Ɔɲɛ ɔn, mu le wageniyɛnmɔ. Kaa, diŋɛ uwɔ gɔi laa ye, diŋɛ ma biyɛmɔnɔu.» 37Kunrin Ama gɛnyaan, pilemaa wiyaa, wo jaŋu unrunw taanu gɔbe giri yeiyaa be wɔu tɛmu. Wo bei yemɛlaa, Piɛru le ɔn gin’ sɔi: «Simɔ, u giri yeiyeuwɔu ma? U lɛɛrɛ turu sai kanran, giri yeiyelu go biyaa bɛɛlu ma? 38Ebaa subɔrɔ waaru le numɔnɔu ga giri yeiyelu kanraan ye, Ama gɛɛnnu biyɛi. Adama ii, kinɛ womɔ nɛ birɛ ɛju birɛ ibɛɛ wɔɔ. Kaa, wogɔ kanran ga, wo gɔnrɔn sɛlɛ.» 39Kɔɔ gin’ giyaatiyaa, Yesu pilemaa dɔraa gowaa, amagɛɛn tunmɔ gɔ gɛin. 40Pilemaa wiyaa, wo jaŋu unrunw gɔbe giri yeiyaa be wɔu tɛmu. Jaŋu unrunw gɔbe giri bemɛ numɔ le gɛlɛbɛin. Be Yesu aŋa bana saaɲu inin bɛin. 41Yesu kubɔ taaniye gɔ Ama gɛnyaantiyaa pilemaa wiyaa jaŋu unrunw gɔbe le ɔn gin’ sɔi: «E nimɛ kanran giri yeiyeu, ei deeliyemɔuwɔi ma? Nɛɛ sɔɔ dogaai. Inɛ Aini gɔi, inɛw mɔɲu numɔ nɛ kunɔidɛin waaru dɔwaai. 42Yɛnɛi! Kanɛ baa ainɛ mui numɔ nɛ kunɔido gɔ kowɛɛjɛ. Ingele ye yaamɔi.» 43Yesu sɔɔ sɔɔu wo wɔu, ɔgu kɛu Judasu, jaŋu unrunw pɛli lɛisigɛ gɔbe logoro nɛ koturui bee gɔ wiyaa dɔwaabe. Wo le digiyaa, mɔɔnu, Ama bɛrɛ sadagadɔɔnɔw kuu bɛɛnw lee, Ama tɔɔru deerenw lee, Yahutunw inɛw naw lee bei tiyaa be kanran, polukaaba lee, baga lee gɛliyaa wiyaabɛin. 44Yesui numɔ nɛ kunɔido baŋa gɔ, be le aaraa, bemaa inɛ amugi ye unrun poonɔido gɔ, inɛ be aaun jaan gɔ woi gi. Woi ai ye, ɛjii gɛli ye yaa gi. 45Yalu gɔ nɛ dɔɔu digɛu, Judasu, Yesu genɛ nɛ dɔwaa, woi poonaatiyaa, amugiyaabe. 46Inɛw wajunw gɔbe Yesui yaa aabɛin. 47Kɔɔ waaru le, Yesu le inɛ digɛbe turu polukaaba womɔ bowaa Ama bɛrɛ sadagadɔɔnɔnɛ kuu baŋa birɛbirɛnɛ turu mɔ tɛraa, suguru gɔ jabalaa gowaai. 48Yesu, inɛw gɔbe le ɔn gin’ sɔi: «Mui aa ga, e tebutɛbɛnɛ bana aaɲu gin’, polukaaba lee, baga lee gɛliyaa wɛɛjɛi ma? 49Mu bai puu, Ama Ginrun Diyɛ gɔ nɛ inɛw deereu e le kobɔn. Kaa e mui aali. Iye sɔɔ ɔn biyaai ye, Ama Dɔn nɛ sɔɔ tɔŋi gɔ kibe dɛi bii.» 50Kɔɔ waaru le, jaŋu unrunw gɔbe puu Yesui pajaatiyaa jɔbaa yain. 51Kaa sagatara ii turu, yaasɔi sai goriyaa, Yesu onu nɛ yadigɛbe. Woi aijɛɛdɛin be giyaa, 52wo, yaasɔi womɔ inɛw gɔbe bɛrɛ pajaatiyaa, ije go jɔbaa yai. 53Inɛw, Yesui ain gɔbe woi Ama bɛrɛ sadagadɔɔnɔnɛ kuu baŋa ginrun nɛ jɛyaabɛin. Kɔɔ nɛ sadagadɔɔnɔw kuu bɛɛnw lee, Yahutunw inɛw naw lee, Ama tɔɔru deerenw lee yamɔrɔnbɛin. 54Piɛru wagee Yesui digiyaa, ginrun gonɔ gɔ nɛ yowaa, garidu gɔbe le dɛinyaan, yaun ɛgɛube. 55Sadagadɔɔnɔw kuu bɛɛnw gɔbe lee, badubadanw diyɛnw gɔbe puu lee Yesui daadɛin ga, inɛ sɛɛrɛ gooido dɛnɛubɛin. Kaa be bɛɛnɛ. 56Inɛw joo wiyaa, wo dɛi sɛɛrɛ kakalu gowaabɛin. Kaa sɛɛrɛ be goobe gɔ, tunmɔ le sɛgɛrɛbele. 57Inɛw gamuu ingelaa, sɛɛrɛ kakalu ɔn gin’ goin: 58«Inɛ ɔn, unrun Ama Ginrun Diyɛ inɛ ujaajɛ ɔn damati ye, Ama Ginrun Diyɛ waja inɛ ujɔlu, bai taanu nɛ ujɔ bɛbɛɛdɔn wo gɛɛu emɛ ɛgaabɛin.» 59Kaa sɛɛrɛ wogɔ nɛ kanran, sɔɔ be sɔɔbe gɔ, tunmɔ le sɛgɛrɛbele. 60Kɔɔ gin’ wɔu, Ama bɛrɛ sadagadɔɔnɔnɛ kuu baŋa gɔ, inɛw puu giru nɛ ingelaa ɔn gin’ Yesu bɛrɛ selumu: «Inɛw ɔnbe u le sɔɔ gɛɛɲu gɔ, u ɛgɛuwɔlɔu ma? Sɔɔ be le saaɲu sɛlɛu ma?» 61Kaa Yesu kelemu biyaa, sɔɔ kanma saalu. Wo pilemaa ɔn gin’ wo bɛrɛ selumu: «Ama, boi sɔmu wo le dagaa baŋa Aini gɔ, ui ma? Ama Yabanɛ Diyɛ titiido gi gɔ, ui ma?» 62Yesu aŋa womɔ ɔn gin’ sai: «Wogɔ Mui. Inɛ Aini gɔ, Ama, gɔnrɔn baŋa numɔ iin sibɛ nɛ wo daannu e ihiyedei. Iyaa lee alagala gowaa wo wɛɛnu, e anrankulumɔ nɛ woi ihiyedei.» 63Sadagadɔɔnɔnɛ kuu baŋa gɔ ingelaa, arugoi unrunmɔ aa, kaaraatiyaa, wo bɔɔnw gɔbe le ɔn gin’ gi: «Nɛɛ kai sɛɛrɛ dɛnɛnu doori. 64E wooi puu Ama boi yamulu sɔɔ wo sɔi gɔ ɛgaabei. Nɛɛ, e wo bɛrɛ inge kanranmɔ gi?» Badubadanw gɔbe puu kuu womɔ nɛ jarugu duuraa, woi daaun jaain wɔɔ gin. 65Inɛw gamuu Yesu kuu nɛ yuguja tɔitɔi tii tɔlaabɛin. Be girupala womɔ sɛmɛlɛ le kɔmaa gɛliyaa, numɔ kumi le woi lagaatiyaa ye, wo le ɔn gin’ gɛɛubɛin: «Inɛ aa ui lagu ma jugɔ bɛɛ!» Kɔɔ onu nɛ, be Yesui garidu gɔbe numɔ nɛ be kunaa, be woi numɔ taɲi le sɛgɛraabɛin. 66Nɛɛ Piɛru, ginrun gonɔ gɔ nɛ yaun ɛgɛu daanbe. Ginrun gɔ gunɔ yaanran turu wiyaa, woi ɛjii yɛnaa, wo le ɔn gin’ sɔi: «Hei! Ainɛ ɔn ui, u kanran Yesu Nasarɛtu bɛɛnnɛ kɔɔ le yabeu.» 68Kaa Piɛru, sɔɔ gɔ kɔri ga saa, sɔɔ wo gɛɛjɛ kɔɔ, unrun inɔn, paamaalɔn gi. Kɔɔ gin’ yaanran gɔ aŋa saatiyaa, Piɛru ingelaa, dolu sibɛ go yai. Waaru wogɔ le ɛɲɛ kɔnwaanbe. 69Kɔɔ nɛ gunɔ yaanran gɔ woi iyaa, inɛw konɛ bɛin gɔbe le pilemaa ɔn gin’ gi: «Ainɛ ɔn kanran, be bɔɔnɛ turui.» 70Kaa Piɛru iyaa pilemaa unrun Yesui inɔn gi. Siin wo kanraan, inɛw gonɔ gɔ nɛ bɛin gɔbe pilemaa wo le ɔn gin’ gin: «Hei! U kanran Galile gana bɛɛnnɛi. Naran go, u kanran be bɔɔnɛ turui.» 71Kaa Piɛru, kuu womɔ le jɛbiyaa, aŋa bemɛ ɔn gin’ sai: «Naran go, ainɛ dɛi e sɔɔjɛ kɔɔ, mu woi inɔn.» 72Piɛru kɔɔ gin’ saau wo digɛu, ɛɲɛ waaru wogɔ le tee kubɔ lɛiye gɔ yinkɔnwun. Wo ɛɲɛ kɔun gɔ ɛgaa, Yesu wo le sɔɔ gi gɔ yinnaŋurun. Yesu, Piɛru le sɔwaa womaa ɛɲɛ kubɔ lɛi kɔnwɔnmɔ nɛ, kubɔ taanu unruin inɛɛ gɛgɛɛdo gi. Piɛru, sɔɔ kɔɔ waaru wo naŋurun le, ɛjii pii piyaabe.

will be added

X\