MARUKA 13

1Yesu, Ama Ginrun Diyɛ gɔ nɛ goou wo wɔu, jaŋu ii turu wo le ɔn gin’ gi: «Jaŋudeerenɛ, Ama ginrun gɔ aŋai ujaaɲu gɔ yɛnɛ! Ginrun uju gɔ ɛjii yegiyaa wɔɔ. Tibu gɔbe aŋai labaaɲu gɔ ɛjii yegiyaa wɔɔ.» 2Yesu ɔn gin’ aŋa womɔ sai: «U ginrun diyɛ diyɛ ɔnbe iyeuwɔu ma? Bai turu ɔn nɛ tibu, tibu waja kuu nɛ wo timɛnu iyeidolou. Puu damatiidɛin.» 3Oliwe tetemɛ nɛ wɔu, Yesu, Ama Ginrun Diyɛ gɔ le daii daanbe. Piɛru lee, Jake lee, Jan lee, Andere lee, dɛiin genɛ womɔ nɛ dɔwaa, wo bɛrɛ ɔn gin’ selumi: 4«Sɔɔ kanɛ u sɔi gɔ, waaru inge le biyɛdo? Iyaa waaru wogɔ dɔwaai ga, sɛɛrɛ inge le jugɔmɔdo ma, emɛ bɛrɛ taga.» 5Yesu sɔɔ ɔn jeɲaa bei tagu: «Kuu ebe kajubai, inɛ turu bɛrɛ kanran ei lelemɔnɔugi. 6Inɛw joo boi ma kunɔ ye wɛwɛɛdɛin. Ama Yabanɛ Diyɛ tii gɔ, unrunbei gɛɛdɛin. Be kunrin inɛw jooi lelelemɔdɛin. 7Iyaa, kɔmɔ siɲɛ ma, kɔmɔ wage kibɛru ma, waaru e ɛgaajɛ le kikinu manu le biyɛnɔugi. Sɔɔ kɔɔbe biyɛ ga waajibi. Kaa aduna dogogu gɔ kɔɔ woi biyɛidolo. 8Tɔgu turu, tɔgu waja le jajaiyɛdo. Laamu, laamu waja le jajaiyɛdo. Aduna sibɛ dɛin dɛin nɛ minɛ jijigedo. Giyɛ bibiyɛdo. Aduna kana wɛwɛɛdo gɔ digɛu, ɔɲɛ kɔɔbe nɔrun dɛinyin tɔlɔgu gin’ wɔɔ. 9«E bɛrɛ yaa sɔɔ dɔdɔɔdo. Kɔɔ dɛi kuu ebe dɛi yaa ajubai. Inɛw, saliyɛ kiru yalu nɛ, ei boboonɔdɛin. Ama gɛɛn ginrun gɔbe nɛ, ei lalagadɛin. Mu le gawaa e wɔɔ gɔ dɛi, sɛmɛgunw bɛrɛ lee, ɔgɔnw bɛrɛ lee, ei jajaaradɛin. Kole digɛnu e be bɛrɛ sɛɛrɛ goo bɛbɛɛdei. 10Sabu aduna dogomɔ nɛ, Kibɛru Ɛju ɔn laa, tɔgu puu nɛ dɔɔun jaain wɔɔ. 11Kɔɔ gin’ saliyɛ kiru yalu nɛ ei jɛɛlɛdɛin giye, sɔɔ e sɔɔido dɛi liliyɛ le biyɛnɔugi. Kikinu Pilu e bɛrɛ sɔɔ sɔɔmɔdo digɛu, sɔɔ e sɔɔido gɔ, kuu ebe sɔɔi biyɛidolo. Kɔɔ dɛi, waaru wogɔ le tee, e bɛrɛ sɔɔ oboidɛin gɔ, sɔɔ wogɔ tee sɔɔi. 12Kɔɔ gin’ inɛw, be ba unrunwin tɔitɔi daiti giye numɔ nɛ kukunɔdɛin. Banw, unrunw bemɛ daa giye numɔ nɛ kukunɔdɛin. Unrunw kanran, bei naranw dɛi ingele ye, bei koi daamɔdɛin. 13Boi ma le gawaa e wɔɔ gɔ dɛi inɛw puu ei ihibiliyɛdɛin. Kaa, dumɔ gɔ baa inɛ ɛɛn go iŋiyaanjɛ gɔi yayabadɛin. 14«Bai turu, kijɛ mɔɲu yanwan diyɛ jɛɛlɛjɛ gɔ, Ama Ginrun Diyɛ gɔ nɛ wo wɔnu e ihiyedei.» Sɔɔ kɔɔ jaŋanɛ baŋa gɔ ɛjii paamu kanran. «Wogɔ iyaajɛi ye, Judea gana nɛ inɛw toin gɔbe, be jɔbɔ ye kokoobe sibɛ go be yaaun jaain wɔɔ. 15Sɔɔ kɔɔ dala nɛ ui tɛmu ye, ginrun kɔlɔ nɛ sugo ye, kijɛ jeɲɛ ye jɔbɔdɔn gɛɛnɔu. 16Olu nɛ ui tɛmu ye, ginrun pilemɛ wɛɛ ye, arugoi diyɛ jeɲɛ ye jɔbɔdɔn gɛɛnɔu. 17Bai kɔɔbe le, yabɛrɛgunw lee, yaanw unrunw aramɔw lee bɛrɛ mɔɲi biyɛdo. 18Sɔɔ kɔɔ kaali waaru le biyɛnɔu giye Ama gɛɛin. 19Waaru kɔɔ le, ɔɲɛ gɔ aŋai mɔɲi biyɛido gɔ, Ama, aduna wo maŋu nɛ gowaa iye wɛɛ dɔɔ, ɔɲɛ kɔɔ tunmɔ iyemɔtɛlu. Waja kanran, asuu iyemɔidolo. 20Inɛw Baŋa Ama, ɔɲɛ kɔɔbe bai gamalu bee ye, inɛ turu kinrun kanran ɛliyɛbele. Kaa inɛw wo yɛmu gɔbe sabu dɛi, wo bai gɔ gamaati. 21Iyaa, waaru kɔɔ le inɛw yabanw kakalugunw lee, inɛw titiyaanw kakalugunw lee wɛwɛɛdɛin. Ama inɛw yɛmaajɛ gɔbei lelemɔ bɛbɛɛdɛin ma giye, be sɛɛrɛ taanrinyɛn lee, yarabirɛ lee kanran tatagaradɛin. Kɔɔ dɛi, inɛ uwaa Ama Yabanɛ Diyɛ tii gɔ ɔn nɛ yɔɔ ma, kɔɔ nɛ yɔɔ ma giyaajɛ ye, yabanɔu. 23Mu, kanɛ baa sɔɔ kɔɔ puu e bɛrɛ tagaaginaa wɔun. Kuu ebe kajubai.» 24«Ɔɲɛ kɔɔbe waaru galaai ye, nai dooriyeidolo. Yalu gɔ puu ɔlɔi biyɛdo. Iyaa iyepilu, wijɛ womɔ oboidolo. 25Tolo gɔbe alagala goi ye babagadɛin. Alagala kijɛ paŋagunw gɔbe puu jijigedɛin. 26Kunrin, Inɛ Aini gɔ, anrankulumɔ nɛ, gɔnrɔn diyɛ lee, dooro diyɛ lee le wo wɛɛnu ihiyemɔdo. 27Aduna sibɛ nai nɛ, wo mɛlɛnkɛbe titiido. Wo aduna sibɛ turu nɛ goo ye, sibɛ waja nɛ dɔɔ, inɛw wo yɛmaajɛ gɔbei mɔmɔɔnɔdo. 28«Gaa na bana gɔ paamu kanrain: Numɔ ii womɔbe liyɛ dɔgɔi tɔlaain ye, jinrɛn dɔwaai ga e igii wɔi. 29Kɔɔ bana wɔɔ gin’, sɔɔ kɔɔbe wɛɛu be wɔu waaru e iyaajɛ, Inɛ Aini gɔ, wɛɛgu womɔ bɛrii wɔɔ, wo mɔnɔgolo nɛ dɔwaai ga jugɔi. 30Mu naran go e bɛrɛ tagauwɔn, iye inɛw gɔbe logoro nɛ, gamuu, be yinwɛnmɔ nɛ, sɔɔ kɔɔbe puu bibiyɛdo. 31Alagala lee, minɛ lee gagaladɛin, kaa sɔɔ mabe asuu galaidenɛ.» 32«Kaa sɔɔ kɔɔbe bai wɛɛido gɔ ma, lɛɛrɛ gɔ ma, inɛ turu kanran inɛɛ. Mɛlɛnkɛbe kanran inin. Halu Aini gɔ kanran inɛɛ. Ba Ama turu sai igu. 33Nɛɛ, sɔɔ kɔɔbe bai wɛɛido e inin gɔ digɛu, yeguru le biyɛi. Giri yeiyenɔugi. 34Bai kɔɔ aŋai wɛɛido sɔɔ ɔn le tunwɔn bɛbɛɛmɔdo: Ainɛ turu ana yaado ga, ginrun goou, ginrun gɔ, birɛbirɛnw unrunmɔbe bɛrɛ dɔmɔraan paju. Wo birɛbirɛnw gɔbe puu bɛrɛ birɛ gamalaatiyaa, inɛ ginrun murɔn aŋa dɔmɔ gɔ womaa kanran giri yeiyenɔu giyaatiyaa, kɔɔ gin’ yai. 35Nɛɛ, e ginrun baŋa waaru wɛɛido inin dɛi giri yeiyenɔugi. Digɛnaii biyɛdo ma, digɛtaŋu lei biyɛdo ma, ɛɲɛ kɔun lei biyɛdo ma, agai biyɛdo ma, e inin. 36Kodigɛu, wo soo sɛlɛ ebe le, giri yeiyaa e wɔnu ei wɛɛ tɛmɛdo ma liyɛi. 37Sɔɔ kɔɔbe, e turu sai dɛi sɔɔlun. Kaa inɛw puu le sɔɔuwɔn. Giri yeiyenɔugi.»

will be added

X\