MARUKA 12

1Kɔɔ onu nɛ Yesu, Yahutunw inɛw giru tobɛin kɔɔbe le taanrinyɛn le sɔɔ sɔɔi tɔlu. Wo ɔn gin’ be le gi: «Ainɛ turu resɛn sadiŋɛ yegeraa, resɛn yibaabe. Wo sadiŋɛ gɔ ɛjii gɔŋaa, bonɔ tɔgɔraa, yalu resɛn ii namu ye dii goonɔɲu yegeraa, iyaa yalu domu dɔmi ujaa paju. Kɔɔ onu nɛ, wo resɛn birɛbirɛnw le aaraa, sadiŋɛ gɔ be bɛrɛ gawaraatiyaa, wo gowaa ana yai. 2Resɛn kɔɔɲu waaru wo dɔwaa, sadiŋɛ baŋa gɔ, gamulu unrunmɔ bɛɛ ga, birɛbirɛnɛ unrunmɔ turu goonaa, resɛn birɛbirɛnw gɔbe bɛrɛ tiyaabe. 3Kaa inɛw gɔbe woi aa, woi lagaa, numɔ ije le pilemaa tiyaabɛin. 4Sadiŋɛ baŋa iyaa birɛbirɛnɛ waja wo tiyaa, be wogɔ baŋa mɔ aa, lagaa, kuu gɔ barumaa, woi duyaabɛin. 5Sadiŋɛ baŋa gɔ iyaa birɛbirɛnɛ taaniye wo tiyaa, be wogɔ baŋa mɔ aa daatin. Inɛw gɔbe birɛbirɛnw joo bɛrɛ kɔɔ gin’ kanrin. Gamuu mɔ lagaa pajin. Gamuu mɔ daatin. 6Nɛɛ, sadiŋɛ baŋa gɔ inɛ tii wo bɛɛbe inɛ turu waju bee. Wogɔ aini ibɛ turu womɔ gɔ woi. Wo ajubaa yɛnaa, bemaa ii unrunmɔ kai bababadɛin ga, woi be bɛrɛ tii. 7Kaa resɛn birɛbirɛnw gɔbe ii gɔ wɛɛu wo wɔu iyaa, tunmɔ le aaraa ɔn gin’ sɔin: ‘Ɔn aini kɛn balanɛ gɔi. Wɛɛ woi daamɔi. Kunrin sadiŋɛ gɔ emɛi taŋado.’ 8Be kunrin ii gɔi aa, daa, yiun womɔ sadiŋɛ gɔ onu go kamaa pajin. 9«Nɛɛ, sadiŋɛ baŋa gɔ inge kanrando? Wo wiyaa ye, resɛn birɛbirɛnw kɔɔbei daatiyaa ye sadiŋɛ unrunmɔ inɛw waja bɛrɛ gagawarado. 10Yɛnɛi! E sɔɔ ɔn Ama Dɔn gɔ nɛ jaŋaatɛliyaawɔi ga mu igii wɔun: “Inɛw Baŋa Ama birɛ biru gɔ unwɔ: wogɔ emɛ bɛrɛ taanrinyɛn sɔɔi. Ginrun ujɔnw tibu kamaa pajin gɔ, tibu wogɔ, ginrun sibɛ tibu gɔ woi bii.”» 12Yahutunw inɛw giru tobɛin gɔbe, taanrinyɛn kɔɔ Yesu be dɛi dain ga igii bɛin gɔ digɛu, woi bana be aaido dɛnɛubɛin. Kaa be inɛwin liyɛubɛin dɛi, Yesui pajaatiyaa yinyain. 13Kɔɔ onu nɛ, Parisiɛn gamuu lee, Ɔgɔnɛ Herɔde mɔɔnu nɛ inɛw tobɛin gamuu lee, Yesu bɛrɛ wiyaabɛin. Yahutunw inɛw giru tobɛin gɔbe bei tiin. Be sɔɔ le Yesui ai ibɛɛ bɛin. 14Be sɔɔ ɔn le wɛin: «Jaŋudeerenɛ, emɛ igii wɔin, u inɛ naran sɔɔnɛi. Inɛw puu u bɛrɛ kɛukɛu digɛu u inɛ turu kanran giri liyaa wɔlɔu. Kaa Ama oju bana dimiyɛun jaan gɔ daii deerejɛu. Nɛɛ, Rɔmɛ ɔgɔnɛ diyɛ gɔ bɛrɛ, sɛgu emɛ tujɔun jaain wɔɔ ma jaanla. Ɔgɔnɛ diyɛ gɔ bɛrɛ emaa sɛgu tujɔ ma tujɔnɔu.» 15Kaa be kinɛ bemɛ nɛ sɔɔ too tɔitɔi gɔ sɔɔnɛ ga Yesu igii bee dɛi, saa gi: «E inge dɛi aŋa ma dɛnɛuwɔi. Sarudu buudu turu mu bɛrɛ jɛɛlu yɛnɛmɔi.» 16Buudu gɔ be jɛɛlaa, Yesu yɛnaa ɔn gin’ be bɛrɛ selumu: «Buudu gɔ nɛ kuu yegeraa too gɔ lee, boi tɔŋaa wɔɔ gɔ lee, aa mɔi?» Be saa, Rɔmɛ ɔgɔnɛ diyɛ mɔi gin. 17Kɔɔ gin’ be giyaa, Yesu ɔn gin’ gi: «Ɔgɔnɛ diyɛ mɔi kijɛ wɔɔ gɔ, wo bɛrɛ oboi. Kijɛ Ama mɔi wɔɔ gɔ, Ama bɛrɛ oboi.» Yesu bana aŋa sai gɔ, inɛw gɔbei ɛjii bimiliyemaa, bei maunɛ kanranmaabe. 18Kɔɔ onu nɛ, Saduseyɛn gamuu wiyaa Yesui tɛmi. Saduseyɛnbe yiun bubulojɛ ga gawabenɛ. Be wiyaa, Yesu bɛrɛ ɔn gin’ selumi: 19«Jaŋudeerenɛ, Tɔɔru dɔn gɔ nɛ Mɔise emɛ dɛi ɔn gin’ tɔŋaa paju: “Ainɛ turu yaanran jɛyaa ii bɛɛlu wɔnu yinwaain ye, wo bainɛ gɔ yapanunɛ gɔ jeɲɛ ye, ii naraan ye, inɛ yinwɛnnɛ gɔ bɛrɛ tɔgu wo tɔgɔun jaain wɔɔ.” 20Aiwa! Anranw sɔi yabɛin. Be wooi puu na turu ba turu. Nɛɛ, delenɛ gɔ yaanran jeɲaa, ii bɛɛlu wɔu yinwaain. 21Wo suŋɔrɔn gɔ yapanunɛ gɔ jeɲaa, ii bɛɛlu go yinwaain. Ainɛ taaniye gɔ mɔ yaa kunrin bii. 22Anranw sɔi gɔbe puu kɔɔ gin’ dinrɛn le dinrɛn le, yapanunɛ gɔ jeɲaa, ii bɛɛlu wɔu yinwaain. Kɔɔ puu onu nɛ yaanran gɔ kanran wiyaa yinwaain. 23Nɛɛ, anranw sɔi gɔ puu yaanran gɔi jeɲaabɛin gɔ digɛu, yiun bulogu bai gɔ le, yaanran gɔ aa mɔi biyɛdo?» 24Yesu aŋa bemɛ saa gi: «E Ama Dɔn inin, Ama gɔnrɔn kanran inin dɛi e lelu nɛ toi. 25Yiunbe waaru bulaaɲu, anranw lee, yaanw lee, tunmɔ jeɲɛidenɛ. Kaa be mɛlɛnkɛ alagala nɛ wɔin gin’ biyɛdɛin. 26Nɛɛ, yiun bulogu sɔɔ sibɛ go, Mɔise dɔn tɔŋu gɔ e jaŋali ma? Uriye turu yaun tɛgɛbele ga yalu tɔŋɔ gɔ nɛ, Ama ɔn gin’ Mɔise le gi: “Mui, Abarahamu Amai, Isaka Amai, iyaa Jakɔbu Amai.”» 27Yesu iyaa baraa gi: «Ama, inɛw yiunbe Amai laa. Kaa inɛw ɔnmɔi wɔin Amai. Nɛɛ, e lelu diyɛ nɛ toi ga iyeli ma?» 28Yesu lee, inɛw kɔɔbe lee kunrin sɔɔ sɔɔu be wɔu, Ama tɔɔru deerenɛ turu ɛgaabe. Yesu, Saduseyɛn gɔbe aŋa ɛjii sai ga, wo iyaabe. Kɔɔ dɛi wo Yesu genɛ nɛ dɔwaa, ɔn gin’ selumu: «Tɔɔru gɔbe logoro nɛ, tɔɔru sigɛ le maa gɔ, tɔɔru yagɔi?» 29Yesu saa: «Tɔɔru sigɛ le maa gɔ unwɔ: “Isɛrɛlu bɛɛnw, keŋiyɛin! Inɛw Baŋa Ama emɛ gɔ, woi laa ye Ama waja wɔlɔ. 30U Inɛw Baŋa Ama uwɔ gɔi kinɛ uwɔ wooi le, kinrun uwɔ wooi le, hakilɛ uwɔ wooi le, gɔnrɔn uwɔ wooi le, ibɛi biyɛ.” 31Tɔɔru kɔɔ onu nɛ digɛ gɔ unwɔ: “Aŋai kuu uwɔ u ibɛ gin’, u bɔɔnɛi yaa kɔɔ gin’ ibɛi biyɛ.” Tɔɔru kɔɔbe lɛi dɛi sigɛ, tɔɔru maa wɔlɔ.» 32Ama tɔɔru deerenɛ gɔ ɔn gin’ wo le sɔi: «Jaŋudeerenɛ, aŋai u sai gɔ ɛjii wɔɔ. U naran sɔwaajɛu: Inɛw Baŋa Amai laa ye, Ama waja wɔlɔ. Wo turu sai, Amai. 33Wogɔ digɛu, inɛ kinɛ womɔ wooi le, hakilɛ womɔ wooi le, gɔnrɔn womɔ wooi le, Amai ibɛi wo biyɛun jaain wɔɔ. Iyaa, aŋai kuu womɔ wo ibɛ gin’, wo bɔɔnɛi yaa kɔɔ gin’ ibɛi wo biyɛun jaain wɔɔ. Ama bɛrɛ bɛlu sadaga tɛgɛrɛ ma, sin obu wo bɛrɛ jɛɛlɛ dɛi, tɔɔru lɛi kɔɔbe kibemɔ ire.» 34Ainɛ kɔɔ, hakilɛ le sai ga Yesu iyaa, ɔn gin’ wo le gi: «Mainiyɛn! U Ama diinɛ le wagelau.» Sɔɔ kɔɔ onu nɛ, inɛ turu kanran Yesu bɛrɛ selumu selumɛ ga daariyɛlu. 35Yesu Ama Ginrun Diyɛ gɔ nɛ deeru deereu wɔu, ɔn gin’ sɔi: «Ama tɔɔru deerenw gɔbe, Ama Yabanɛ Diyɛ tii gɔ, Dawide tiruwɛnɛi be yani gɛɛuwɔin ma? 36Dawide, Kikinu Pilu woi damaa ɔn gin’ wo bɛrɛ sɔɔ sɔɔmu: “Inɛw Baŋa Ama, Inɛw Baŋa ma le ɔn gin’ gi: ‘Mu jaŋuw uwɔ gɔbe gɔnrɔn ye, kubɔ uwɔ doɲu nɛ yai mu kunɔido baa, uwɔ, numɔ iin ma sibɛ nɛ wɛɛ dɛinyɛn.’” 37Dawide, kuu womɔ le Ama Yabanɛ Diyɛ tii gɔ Inɛw Baŋai gi. Nɛɛ, Inɛw Baŋa womɔ wo tiruwɛnɛi yani bii bɛɛjɛ?» Inɛw joo kɔɔ nɛ bɛin gɔbe, kinɛ ɛɛli le woi keŋiyɛunbɛin. 38Yesu iyaa deeru womɔ nɛ ɔn gin’ be bɛrɛ gɛɛbe: «Ama tɔɔru deerenw gɔbe dɛi kuu ebe kajubai. Be arugoi diyɛ diyɛ kunu ye, gɔŋɔlɔ ga be bɛrɛ saii ɛjii wɔɔ. Iyaa be taibe nɛ, inɛw bei poonɔ ga be bɛrɛ ɛjii wɔɔ. 39Ama gɛɛn ginrun nɛ yalu inɛw bei iyeɲu nɛ dɛinyɛn lee, jaa diyɛ yalu nɛ bei boonaa ye, inɛw diyɛnw yalu nɛ dɛinyɛn lee, be wogɔi dɛnɛɲu. 40Inɛw kɔɔbe, yapanuw kijɛ sɛin puu ɛlɛjɛɛɲu. Kaa unrunbei inɛw ɛjubei tagaradɛin giye, be amagɛɛn pala pala gɛɛnɲu. Be tujɔ mɔɲu be le jaan gɔ bɛbɛɛdɛin.» 41Yesu, Ama Ginrun Diyɛ gɔ nɛ yalu sin obu kunɔɲu gɔ genɛ nɛ yaa dɛinyaan, inɛw aŋai buudu kunɔubɛin yɛnɛube. Ɔgɔ unrunw joo wɛi wɛi buudu gaai kunɔubɛin. 42Yapanunɛ dɛguginɛ turu yaa wiyaa, buudu saa wo dagi gɔ, buudu ii lɛi kunu. 43Yesu wogɔ iyaa, jaŋu unrunw womɔbei boonaa, ɔn gin’ sɔi: «Mu naran go e bɛrɛ tagauwɔn, yapanunɛ dɛguginɛ kɔɔ, inɛw wajunw puu dɛi sigɛ obu obu. 44Inɛw wajunw gɔbe puu buudu joo bemɛ gamaa jɛɛlaa kuni. Kaa, yaanran kɔɔ, dɛgu womɔ le buudu wo kunu gɔi laa ye buudu waja pana ɛbɛɲu sɛlɛ. Wo buudu wo sɛbe puu jɛɛlaa kunu.»

will be added

X\