MARUKA 11

1Jerusalɛmu ana le bɛrii, Bɛtupaje lee, Betani lee ana nɛ, Oliwe tetemɛ yalu gɔ nɛ waaru be dɔi le, Yesu, jaŋu unrunw womɔ lɛi giru bemɛ nɛ tiiu, 2be le ɔn gin’ sɔi: «Giru ebe nɛ ana kowɔɔ kɔɔ nɛ yaai. Kɔɔ nɛ dɔɔnu digɛnu, jandulu borogo, kuu womɔ nɛ inɛ yaŋiyɛntɛlu turu wo kɔmɔnu e tɛtɛmɛdei. E woi kɔmɔlaajɛi ye, jɛɛlɛi. 3Inɛ ebaa inge dɛi jandulu gɔ kɔmɔlɔjɛ ma selumaajɛ ye, Inɛw Baŋa kai yasɛ gɛɛi. Tanwanlu go womaa pilemu ye kojɛɛlɛdo wa.» 4Kɔɔ gin’ jaŋu unrunw lɛi gɔbe yaa, jandulu borogo turu ginrun kɛru nɛ, murɔn aŋa nɛ wo kɔmɔu tɛmaa, kɔmɔlaabɛin. 5Inɛw gamuu yalu gɔ nɛ wɔu, selumaa gin: «Hei! Ebe ingei? Inge dɛi jandulu kɔɔ kɔmɔlɔuwɔi?» 6Jaŋu unrunw gɔbe Yesu bemaa aŋai saa gi gin’, be inɛw gɔbe aŋa yinsain. Kɔɔ gin’ be saa, inɛw gɔbe bei pajaa yaamaabɛin. 7Be kɔɔ gin’ jandulu gɔ Yesu bɛrɛ jɛɛlaabɛin. Be sɔi bemɛ jandulu kuu nɛ jabaa, Yesu, kuu gɔ nɛ ulaa dɛinyaanbe. 8Inɛw joo, sɔi bemɛ oju gɔ nɛ abaraubɛin. Gamuu oju genɛ nɛ tiun liyɛ laraa, wogɔi oju gɔ nɛ jabaubɛin. 9Inɛw, Yesu giru nɛ lee, onu womɔ nɛ lee bɛin gɔbe kɔnwɔun, ɔn gin’ gɛɛubɛin: «Ama gana, Inɛw Baŋa Ama boi le inɛ wɛɛjɛ gɔ, duba wo le biyɛmɔ. 10Emɛ ba Dawide diinɛ kowɛɛjɛ kɔɔ, Ama wogɔi duba kanran. Daa go alagala nɛ Ama boi sɔmi biyɛmɔ.» 11Yesu kɔɔ gin’ Jerusalɛmu ana nɛ yowaa, Ama Ginrun Diyɛ gɔ nɛ yai. Kɔɔ nɛ yalu gɔ puu yɛnaajiyaa, digɛnai ɛjii yɔraa yaabe gɔ dɛi, wo jaŋu unrunw pɛli lɛisigɛ womɔ gɔbe le, Betani ana nɛ yai. 12Aga baa yaa gɔ, Betani ana nɛ waaru be goi le, Yesui giyɛ yasɛbe. 13Wo wagee, gaa na turu liyɛ dɔgaa wo wɔu iyaa, ii kuu gɔ nɛ tɛtɛmɛdo ma yaa yɛnaabe. Kaa, tiun gɔ nɛ dɔwaa wo kanran, gaa waarui bele gɔ digɛu, liyɛi laa ye ii turu kanran bele. 14Yesu, tiun gɔ le ɔn gin’ sɔi: «Inɛ turu kanran asuu waja ii uwɔ kayanɔu.» Jaŋu unrunw womɔ wogɔ ɛgaabɛin. 15Kɔɔ onu nɛ, be Jerusalɛmu ana nɛ dɔwaabɛin. Yesu, Ama Ginrun Diyɛ gɔ nɛ yowaa, kɔlɔ gɔ nɛ dɔnrun dɔnrɔnw gɔbe lee, ebu ɛbɛnw gɔbe lee nanu goonɔi tɔlaabe. Wo kɛɛlɛ wɛjɛnw tabalu gɔbe lee, pelegele dɔnrɔnw dɔindain gɔbe lee damaa sunugaabe. 16Wo iyaa inɛ turui kanran kijɛ gɛli ye Ama ginrun gɔ kɛjɛ galamɔbele. 17Wo ɔn gin’ deeru deerei tɔlu: «Ama Dɔn nɛ tɔŋaa gi: “Ginrun ma gɔ, tɔgu puu amagɛɛn yalui biyɛdo.” Kaa e kai, gugunyɔnw kɔmɔi bojaa sɛi.» 18Ama bɛrɛ sadagadɔɔnɔw kuu bɛɛnw gɔbe lee, Ama tɔɔru deerenw gɔbe lee, Yesu sɔɔ kanrun gɔ ɛgaa, dabulu le woi daaɲu dɛnɛi tɔlaabɛin. Sabu Yesu deeru gɔ, inɛwin ɛjii aabe dɛi be woi liyɛubɛin. 19Digɛnai yɔraa wo kanran, Yesu lee, jaŋu unrunw womɔ lee, ana gɔ nɛ gowaabɛin. 20Aga baa yaa gɔ, oju galau, Yesu gaa na jɛbu gɔ yɛnaa be kanran, tiun gɔ, duu gɔ nɛ gowaa, daa gɔ nɛ yai dɔɔ, maaŋiyaanyaabe. 21Piɛru, Yesu bana tiun gɔi jɛbu naŋaraan, Yesu le ɔn gin’ gi: «Jaŋudeerenɛ, yɛnɛ! Gaa na u jɛbu gɔ maaŋiyaain.» 22Yesu be puu le ɔn gin’ sɔi: «Ama le gawai. 23Mu naran go e bɛrɛ tagauwɔn, inɛ aai kanran, kinɛ womɔ lɛilɛi bojolu kanraan, kijɛ wo gɛɛido gɔ bibiyɛdo ga gawaa wɔɔ ye, kokoo ɔn womaa kɔɔ nɛ goi ye, nɛudii nɛ yai yoo gi ye, wogɔ wo bɛrɛ bibiyɛdo. 24Kɔɔ dɛi, mu e bɛrɛ tagauwɔn, waaru Ama bɛrɛ kijɛ turu e gɛɛnjɛ, kijɛ wogɔ biyaajɛi ga gawai. Wogɔ e bɛrɛ ohobodɛin. 25Iyaa amagɛɛn nɛ tonu, inɛ turu le sɔɔ yasɛi ga jugaajɛi ye, e Ba Ama alagala nɛ daan gɔ womaa hakɛ ebe e bɛrɛ yaabu kanran giye, e kanran, inɛ gɔi yaabu kanrain. [ 26Kaa e inɛwin yaabu kanraanlɛi ye, e Ba Ama alagala nɛ daan gɔ yaa, hakɛ ebe e bɛrɛ yaabu kanraindolo.]» 27Kɔɔ gin’ be Jerusalɛmu nɛ pilemaa yowaabɛin. Yesu Ama Ginrun Diyɛ gɔ nɛ gɔŋɔlɔu wo wɔu, Ama bɛrɛ sadagadɔɔnɔw kuu bɛɛnw gɔbe lee, Ama tɔɔru deerenw gɔbe lee, Yahutunw inɛw naw gɔbe lee, genɛ womɔ nɛ dɔwaa, 28ɔn gin’ wo bɛrɛ selumi: «Kijɛ inge uwɔ dɛi u kijɛ ɔnbe kanraunwɔu? Inɛ aa u bɛrɛ gɔnrɔn obaa, uwaa kijɛ ɔnbe kanran gi?» 29Yesu ɔn gin’ aŋa bemɛ sai: «Mu e bɛrɛ selumu turu ɔn sai seselumɛdɔn. E aŋa ma saajɛi ye, mu kanran gɔnrɔn le kijɛ ɔnbe mu kanranjɛ gɔ e bɛrɛ tatagadɔn. 30Jan, womaa batise kanran ga, Ama woi tii ma, inɛw woi tii? Mu bɛrɛ sai oboi.» 31Be tunmɔ le sɔwaa ɔn gin’ gɛɛubɛin: «Emɛ Ama woi tii giyaaɲu ye, wo emaa inge dɛi sɔɔ womɔ le gawanɛ kanrin ma gɛɛdo. 32Kaa, iyaa emɛ inɛw woi tii gin ye, yani biyɛdo?» Inɛw puu Jan inɛ Ama titiyainɛi ga lugaa sɛin gɔ digɛu, be inɛw woi tii gɛi gɔ liyaain. 33Kɔɔ dɛi be saa, unrunbe inin gin. Yesu yaa aŋa bemɛ saa, unrun kanran gɔnrɔn le kijɛ ɔnbe unrun kanranjɛ gɔ sɔɔidolɔn gi.

will be added

X\