MARUKA 10

1Yesu Kapɛrunaumu ana nɛ gowaa, Judea gana nɛ yaa, kɔɔ onu nɛ Jurudɛn dibe sibɛ waja gɔ nɛ galaabe. Inɛw joo wiyaa be mɔrinyaan, wo pɔɔlɔ baa aŋai wo kanranjɛ le kɛukɛu be bɛrɛ deeru deerei tɔlaabe. 2Parisiɛnbe wiyaa, aŋa womɔ bɛɛ ga, wo bɛrɛ selumaa gin: «Yaanran paju sibɛ go, u yani ajubauwɔu? Wogɔ kanraun jaain wɔɔ ma jaanla?» 3Yesu yaa selumu ɔn le aŋa bemɛ sai: «Mɔise, wogɔ sibɛ go Tɔɔru dɔn nɛ yani gi?» 4Be saa gin: «Ainɛ, yaanran womɔ papajado ye, yaajipolu dɔn tɔŋaa obaa ye, woi paja bɛbɛɛmɔdo ga, Mɔise yintɔŋu.» 5Yesu sɔwaa gi: «E kuu ɛɛn le wɔi dɛi Mɔise, sɔɔ kɔɔ e dɛi tɔŋu. 6Kɔɔi laa ye, tɔlɔ gɔ le, waaru kijɛ puu maŋabɛin le, “Ama, ainɛ lee, yaanran lee maŋu.” 7“Kɔɔ sabu dɛi, ainɛ, wo ba lee, wo na lee, be le kabi ye, yaanran womɔ le biyɛjɛ. 8Kunrin be lɛi inɛ turu taŋaɲu.” Nɛɛ, be waja inɛw lɛi laa, kaa turu. 9Ama, kuu womɔ le kijɛ mɔɔnaajɛ gɔ, inɛ turu kanran wogɔ kabuganɔu.» 10Ginrun pilemaa wiyaa, jaŋu unrunw gɔbe sɔɔ kɔɔ sibɛ go Yesu bɛrɛ pilemaa selumu be selumaa, 11wo aŋa bemɛ saa gi: «Ainɛ aai kanran, yaanran womɔ pajaatiyaa, yaanran waja jeɲaajɛ ye, ainɛ wogɔ yaanran pɔlɔ womɔ sibɛ go dimu dimiyɛunwɔ. 12Yaanran yaa, wo igɛ le gowaa, ainɛ waja le igɛ ɛyaajɛ ye, dimu dimiyaanti.» 13Kɔɔ onu nɛ, inɛw Yesu womaa unrunw bemɛ kuu nɛ numɔ yaŋurun ye, Ama duba gɛɛn ga, bei dimɛraan wo bɛrɛ jɛɛlɛu be wɔu, jaŋu unrunw gɔbe inɛw gɔbei ganwaanbɛin. 14Yesu wogɔ iyaa, kinɛ womɔ ɛjii jinwaanbe. Wo ɔn gin’ be le sɔi: «Unrunw gɔbei tɛŋɛnɔugi. Bei pajaa ye, mu bɛrɛ wɛɛmɔi. Sabu inɛw be gin’ wɔin gɔbe, Ama diinɛ gɔ bemɛi. 15Mu naran go e bɛrɛ tagauwɔn, inɛ aai kanran, Ama diinɛ gɔ nɛ yoi ibɛɛ wɔɔ ye, ii dagi bana jeɲaa wɛɛlu ye, inɛ wogɔ baŋa bɛɛ yooidolo.» 16Kɔɔ gin’ giyaatiyaa, Yesu, unrunw gɔbei jeɲaa, amugiyaa, kuu bemɛ nɛ numɔ yaŋaraan ye, bei duba kanraunbe. 17Yesu, jaŋu unrunw womɔ be wooi oju be gowaa, ainɛ turu jɔbaa wiyaa giru womɔ nɛ tuŋiyaan ɔn gin’ wo nɛ selumu: «Jaŋudeerenɛ, u inɛ ɛju gɔ, maa ɔnmɔsɔgɔ bɛɛ ga, kijɛ kanraun mu jaan gɔ ingei?» 18Yesu aŋa womɔ saa gi: «Inge dɛi ma inɛ ɛjui gɛɛjɛu? Amai laa ye inɛ ɛju wɔlɔ. 19Nɛɛ, u Ama tɔɔru gɔbe igii wɔu: “Inɛ daanɔu, dimu dimiyɛnnɔu, gunyɔn gunyɔnnɔu, sɛɛrɛ kakalu goonɔu, kakalu le inɛ kijɛ ɛlɛnɔu, u ba lee, u na lee baba.”» 20Ainɛ gɔ unrun, dagi unrunmɔ le baa tɔɔru kɔɔbe yadigɛun gi. 21Yesu woi sɛɛn yɛnaa, woi ibɛi biyaabe. Wo ɔn gin’ wo le gi: «Sɔɔ turu u le wajaai: Yaa ye, kijɛ u sɛɛ dɔnraan ye buudu gɔ dɛgugunw bɛrɛ obo. Kɔɔ gin’ kanraanjɛu ye, u alagala nɛ kijɛ gaai bɛbɛɛdou. Kɔɔ onu nɛ wɛɛ mui dimiyɛn.» 22Ainɛ kɔɔ ɔgɔinɛ diyɛi bee dɛi, Yesu kɔɔ gin’ wo giyaa wo aŋa sunwaan, kinɛ jinwɛnmaa gowaa yaai. 23Yesu, jaŋu unrunw womɔ gɔbei yɛnaa be le ɔn gin’ sɔi: «Ama diinɛ nɛ yoo ga, ɔgɔ unrunw bɛrɛ halu nawin biyɛdo.» 24Sɔɔ kɔɔ jaŋu unrunw gɔbei ɛjii maunɛ kanranmaabe. Yesu iyaa be le sɔwaa gi: «Unrunw mabe, Ama diinɛ nɛ yoo ga halu nawin wɔɔ. 25Inɛw arusɛgɛ nɛ diyɛ bemɛ daanaa gɛlin, Ama diinɛ nɛ be yoomɔ nɛ, ɔgɔyɔn laa kala bonɔ nɛ gala bɛru.» 26Sɔɔ kɔɔ pɔlɔ mɔ gɔ dɛi sigɛ jaŋu unrunw gɔbei maunɛ kanranmu. Be tunmɔ le ɔn gin’ gɛɛbɛin: «Kɔɔ gin’ wɔɔ biyaa ye nɛɛ, inɛ yabu bɛɛmɔido gɔ aai?» 27Yesu bei yɛnaa, gi: «Inɛw, wogɔ kanrun bɛɛnɛ. Kaa Ama kanrun bɛbɛɛjɛ, sabu wo kijɛ puu kanrun bɛbɛɛjɛ.» 28Piɛru sɔwaa gi: «Kunrin biyaa ye, emɛ kai, kijɛ puu pajaatiyaa ui dimii, emɛ dɛi yani biyɛdo?» 29Yesu saa: «Mu naran go e bɛrɛ tagauwɔn, inɛ aai kanran, ginrun womɔ ma, ba unrunw womɔbe ma, wo saabe ma, wo na ma, wo ba ma, unrunw womɔbe ma, minɛ womɔ ma, mu lee, Kibɛru Ɛju gɔ lee dɛi pajaajɛ ye, 30inɛ wogɔ baŋa ginrunbe lee, ba unrunw lee, yasanw lee, naw lee, unrunw lee, minɛbe lee kijɛ kɔɔbe aduna ɔn nɛ kubɔ suŋu baa bɛbɛɛdo. Wo ɔɲɔmu yaa bɛbɛɛdo. Iyaa aduna wɛɛido gɔ nɛ inɛ wogɔ baŋa ɔnmɔsɔgɔ bɛbɛɛdo. 31Kaa inɛw kanɛ giru toin gɔbe logoro nɛ, inɛw joo onu didimiyɛndɛin. Iyaa inɛw onu dimi gɔbe logoro nɛ, inɛw joo giru totoyodɛin.» 32Yesu lee, jaŋu unrunw womɔ lee Jerusalɛmu oju nɛ tobɛin. Yesu giru yowaa yaaube. Jaŋu unrunw gɔbe bimiliyaa bɛin. Inɛw onu bemɛ nɛ dimɛbɛin gɔbe yaa liyɛubɛin. Yesu, jaŋu unrunw pɛli lɛisigɛ womɔ gɔbei dɛiin goonaa, sɔɔ bɛrii wo bɛrɛ dɔɔido gɔ iyaa be bɛrɛ tagaabe: 33«Emɛ kanɛ Jerusalɛmu yaauwɔin. Kɔɔ nɛ, Inɛ Aini gɔi, Ama bɛrɛ sadagadɔɔnɔw kuu bɛɛnw gɔbe lee, Ama tɔɔru deerenw lee numɔ nɛ kukunɔdɛin. Woi daaun jaain wɔɔ giye, be woi inɛw Ama inin numɔ nɛ kukunɔdɛin. 34Wogɔ bɛɛnw, woi yamurinyɛnmu ye, kuu womɔ nɛ yuguja tɔi ye, bɔɔniyɛn le woi lagu ye, woi yindaadɛin. Kaa kɔɔ gin’ be kanraindo bai taaniye gɔ, wo bubulodo.» 35Sebede unrunw gɔbe, Jake lee, Jan lee, Yesu genɛ nɛ dɔwaa ɔn gin’ wo le sɔin: «Jaŋudeerenɛ, kuu emɛ dɛi kijɛ uwaa kanran ga emɛ gɛɛindo gɔ, uwaa wogɔ kanran ga emɛ ibɛɛ wɔin.» 36Yesu bemaa be dɛi kijɛ inge unrun kanrun ye dɛnɛɲu ma wo selumaa, 37be saa gin: «Waaru dooro le laamu u kanraindo le, emi inɛ turu numɔ iin uwɔ sibɛ nɛ bojo, inɛ waja gɔ numɔ nana uwɔ sibɛ nɛ bojo.» 38Kɔɔ gin’ be sɔwaa, Yesu saa gi: «E kijɛ e gɛɛnjɛ inin. E ɔɲɛ mu tariyɛido gɔ tari bɛbɛɛdei ma? Ɔɲɛ batise mui kanraindɛin gɔ, e wogɔ tari bɛbɛɛdei ma?» 39Be saa, ee unrunbe tari bɛbɛɛdɛin gin. Yesu gimaa bemaa naran go, ɔɲɛ unrun tariyɛido gɔ, tatariyɛdɛin gi. Iyaa, ɔɲɛ batise unruin kanraindɛin gɔ, bei kakanrandɛin gi. 40Kaa, laamu unrunmɔ nɛ, numɔ iin unrunmɔ sibɛ nɛ dɛinyɛn ma, numɔ nana unrunmɔ sibɛ nɛ dɛinyɛn ma, sɔɔ unrunmɔi laa gi. Ama, yalu kɔɔ inɛw dɛi yegeraa wo sɛɛ gɔbe mɔi gi. 41Jaŋu unrunw pɛlu wajunw gɔbe sɔɔ kɔɔ ɛgaa, Jake lee, Jan lee le kinɛ banraain. 42Wogɔ digɛu, Yesu be wooi puu boonaa, be le ɔn gin’ sɔi: «Inɛw Ama inin gɔbe, kuu bɛɛnw bemɛi gin’ wɔin gɔbe, bei gunɔ kunaa sɛin. Iyaa inɛw diyɛnw gɔbe paŋa le bei laamu kanranɲu ga e igii wɔi. 43Kaa, logoro ebe nɛ kunrin biyɛmɔnɔugi. Logoro ebe nɛ inɛ turu inɛ diyɛi bii ibɛɛ wɔɔ ye, wogɔ baŋa birɛbirɛnɛ ebei wo biyɛun jaan. 44Iyaa inɛ turu kuui bii ibɛɛ wɔɔ ye, wogɔ baŋa inɛw puu gunɔnɛi wo biyɛun jaan. 45Sabu Inɛ Aini gɔ kuu womɔ le, inɛw bemaa wo dɛi birɛ birɛ ga wɛɛlu. Kaa, wo inɛw dɛi birɛ birɛi wɛi. Iyaa inɛw jooi hakɛ gunɔ nɛ dɔrugɔ ga, wo kinrun womɔ pajai wɛi.» 46Yesu lee, jaŋu unrunw womɔ lee Jeriko ana nɛ dɔwaabɛin. Jeriko nɛ giruminɛ turu yabe. Boi womɔ Barutimɛ gɛɛɲu. Wo Timɛ ii. Inɛw joo Yesu lee, jaŋu unrunw womɔ lee onu nɛ dimiyaan, Jeriko ana nɛ goou be wɔu, Barutimɛ oju genɛ nɛ gɛɛn gɛɛun daaun, 47Nasarɛtu bɛɛnnɛ Yesui galajɛ ga ɛgaa, mii ɛɛn le ɔn gin’ gɛɛi tɔlu: «Yesu, Dawide tiruwɛnɛ gɔ, amasɔgɔ ma jugɔ.» 48Inɛw joo woi ganwaun, womaa siɲɛ paja gɛɛubɛin. Kaa wo mii womɔ baraa ye, ɔn gin’ gɛɛbe: «Dawide tiruwɛnɛ gɔ, amasɔgɔ ma jugɔ.» 49Yesu iŋiyaan inɛw bemaa woi boonɔ ga tɔɔru. Inɛw woi boonaa gin: «Mainiyɛn! Wo ui boonɔuwɔ ga ingele!» 50Barutimɛ kɔɔ gin’ arugoi wo dalabe gɔ kamaatiyaa, kiliyaa ingelaa, Yesu bɛrɛ yai. 51Yesu gi: «Maa u dɛi kijɛ kanran ga u ibɛ gɔ ingei?» Barutimɛ saa: «Jaŋudeerenɛ, pilemu ye giri mu iyemɔ.» 52Yesu saa gi: «Gagawu uwɔ ui bajamaati. Jamu le yaa.» Ainɛ gɔ ginsɛsai sɛɛu giri iyeube. Nɛɛ, wo kanran Yesui dimiyaan yaaube.

will be added

X\