MARUKA 1

1Yesu Kirisito, Ama Aini gɔ, wo dɛi Kibɛru Ɛju ɛgɛmu gɔ unwɔ: 2Pɔɔlɔ baa inɛ Ama titiyainɛ Esayi, Ama ɔn gin’ gi ga dɔn womɔ nɛ tɔŋu: “Yɛnɛ, mu inɛ titiyainɛ ma, giru uwɔ nɛ titiidɔn. Wo oju uwɔ yeyegeredo. 3Olusolo nɛ inɛ wogɔ mii goonaabe. Kijɛ wo gɛɛbe: ‘E Inɛw Baŋa oju gɔ yegerei. Oju na womɔbe demu demu bojoi.’” 4Kunrin Jan Batise, birɛ womɔ olusolo nɛ tɔlu. Wo batise kanraun, inɛwin waaju kanraun bemaa hakɛ yaabu kanrun bɛɛ ga, bana bemɛ dulomɔ ye, batise yoo gɛɛube. 5Jerusalɛmu ana nɛ lee, Judea gana, ana wajunw nɛ lee goi ye, inɛw puu wo bɛrɛ wɛɛubɛin. Inɛw kɔɔbe hakɛ bemɛ sɔwaa be jɛ ye, wo kɔɔ gin’ bei Jurudɛn dibe nɛ batise kanraunbe. 6Jan, sɔi wo tobe gɔ, ɔgɔyɔn kukuli le yegeraabɛin. Wo guju kɛyaa narun womɔ nɛ pagaa sɛbe. Wo kakaa lee, olu yɛin lee le pana unrunmɔ kunɔube. 7Iyaa, waaju womɔ nɛ kijɛ waja wo gɛɛbe unwɔ: «Inɛ turu onu ma nɛ yawɛɛjɛ. Wo mu dɛi sigɛ gɔnrɔn sɛɛ. Halu tebi ye taga womɔ suŋu kɔmɔlɔ ga mu le jaanla. 8Mu ei dii nɛ batise kanraanbɔn. Kaa inɛ wogɔ wiyaai ye, wo Kikinu Pilu nɛ ei batise kanrando.» 9Jan kɔɔ gin’ waaju kanraun wo wɔu, bai turu Yesu Galile gana, Nasarɛtu ana nɛ gowaa wiyaa, Jurudɛn dibe nɛ, Jan bɛrɛ unruin batise kanranmu. 10Batise yowaa kilaa, dibe gɔ nɛ goou wo digɛu, alagala pinɛlaa, Ama Kikinu, pelegele gin’ sugaa, kuu womɔ nɛ dɛinyɛun wo wɔu iyaabe. 11Kɔɔ onu nɛ alagala gowaa, mii ɛgɛmaabe gi: «Aini ibɛ ma gɔ ui. U le kinɛ ma ɛjii aa wɔɔ.» 12Ginsɛsai Ama Kikinu, Yesui olusolo go yaamaabe. 13Olusolo gɔ nɛ, wo bai pɛnai baa, olunawanbe le bee. Kɔɔ nɛ, Setanu woi subɔraabe. Mɛlɛnkɛbe wiyaa, kai womɔ kilɛubɛin. 14Jain kaju nɛ kunaa be tiyaa, Yesu kɔɔ gin’ Galile gana nɛ yai. Wo Kibɛru Ɛju Ama bɛrɛ goi gɔ, inɛw bɛrɛ tagaube. 15Wo ɔn gin’ gɛɛube: «Bai kɛju gɔ dɔwaai, Ama diinɛ gɔ bɛruniyaain. Kɔɔ dɛi bana mɔɲu ebe gɔ dulomɔi, Kibɛru Ɛju gɔ le gawai.» 16Bai turu Yesu Galile dibe genɛ gɔ nɛ galau, Simɔ lee, wo bainɛ Andere lee, dii gɔ nɛ jɔɔ kamau be wɔu iyaabe. Simɔ lee, Andere lee, iiju ai gɔ birɛ bemɛi bee. 17Wo be le ɔn gin’ sɔi: «Mui wɛɛ dimiyɛin. Mu ei inɛw aawin bojodɔn.» 18Ɔgu kɛu Simɔ lee, Andere lee, jɔɔ bemɛ pajaatiyaa woi dimii. 19Yesu, giru go gaila yaa, be Sebede unrunw lɛi gɔbe, Jake lee, wo bainɛ Jan lee iyaabɛin. Be diikoro kɔlɔ nɛ jɔɔ bemɛ yegereubɛin. 20Ginsɛsai Yesu bei boonaabe. Be, be ba Sebedei diikoro gɔ nɛ birɛbirɛnw gɔbe le pajaatiyaa Yesui dimiyaanbɛin. 21Yesu lee, jaŋu unrunw womɔ gɔbe lee Kapɛrunaumu ana nɛ yain. Deeliye bai, Yesu Yahutunw Ama gɛɛn ginrun nɛ yowaa, inɛwin deerei tɔlaabe. 22Inɛw gɔbe puu, deeru bana wo deerejɛ gɔ bei ɛjii maunɛ kanraanbe. Deeru bana wo deereu bee gɔ lee, Ama tɔɔru deerenw mɔ gɔ lee, ɛjii kabu yato. Wo gɔnrɔn le bei deereube. 23Waaru wogɔ le tee, ainɛ jinrun kuu womɔ nɛ daan turu gowaa mii diyɛ le kɔnwaan gi: 24«Yesu, Nasarɛtu ana bɛɛnnɛ gɔ, mu ui aai ma igii wɔun. Inɛ ɛjaai Ama bɛrɛ goi gɔ ui. Inge dɛi u emi tɔɔɲɔuwɔu? U emi suyoi wɛiu ma?» 25Yesu, jinrun gɔi ganwaan gi: «Kemu kemu biyɛ. Ainɛ kɔɔ kuu nɛ goo.» 26Yesu kɔɔ gin’ wo giyaa, jinrun gɔ ainɛ gɔi ɛjii jigemaatiyaa, piyaa, kuu womɔ nɛ gowaa yinyai. 27Inɛw gɔbe puu bɛrɛ ɛjii maunɛ kanrun. Be tunmɔ le sɔɔu, ɔn gin’ gɛɛbɛin: «Ɔn sɔɔ yeru inge tɔgui? Ɔn deeru kanai de! Ainɛ gɔ, halu jinrunbe bɛrɛ gɔnrɔn le sɔɔ sɔwaajɛ ye be sɔɔ womɔ koi yabaɲu.» 28Inɛw, yalu puu nɛ kɔɔ gin’ sɔɔubɛin digɛu, Galile gana puu nɛ Yesu boi gowaabe. 29Yesu ɔgu kɛu Ama gɛɛn ginrun gɔ nɛ gowaa, wo lee, Jake lee, Jan lee, be wooi digiyaa, Simɔ lee, Andere lee be ginrun nɛ yain. 30Ginrun gɔ nɛ be dɔwaa, Simɔ yaanran na kɛbaamu le diinbe dɛi inɛw ɔgu kɛu jiun womɔ sɔɔ gɔ Yesu bɛrɛ tagaabɛin. 31Yesu, yaanran gɔ yalu diinbe gɔ nɛ yayowaa, numɔ womɔ aa, woi jeɲaa wo ingelemaa, kɛbaamu gɔ woi pajaati. Yaanran gɔ be bɛrɛ pana oboi yintɔlu. 32Digɛnai, nai numaa wo kanran jiungunw gɔbe puu lee, inɛw kuu bemɛ nɛ jinrun daain puu lee, Yesu bɛrɛ jɛɛlaabɛin. 33Ana gɔ puu ginrun gonɔ gɔ nɛ mɔrɔnbɛin. 34Bai wogɔ, Yesu, inɛw jiun tɔgu dɛin dɛin le ɔɲaa bɛin joo bajamaabe. Iyaa inɛw kuu nɛ jinrun joo nanaa goonaabe. Kaa jinrunbe woi aai ma igii bɛin dɛi, wo be bɛrɛ sɔɔ turu kanran sɔɔmɔubele. 35Agapaali, yalu ɛjɛlu wo wɔu, Yesu ingelaa bain go yalu babaŋa turu nɛ yaa, Ama gɛɛunbe. 36Simɔ lee, wo bɔɔnw gɔbe lee ingelaa woi dɛnɛi tɔlin. 37Waaru woi dɛnaa be iye le, be sɔwaa gin: «Inɛw puu ui selumɛuwɔin.» 38Yesu aŋa bemɛ saa gi: «Emɛ ana wajunw, genɛ emɛ nɛ wɔin gɔbe nɛ yaamɔi. Ana wogɔbe nɛ kanran, waaju mu kanraun jaain wɔɔ. Kijɛ dɛi mu wɛi gɔ, kɔɔ woi.» 39Kɔɔ gin’, Yesu Galile gana yalu puu yai yai, Ama gɛɛn ginrun nɛ waaju kanraun, jinrun inɛw kuu nɛ nana goonɔube. 40Bai turu nɛwɛnginɛ turu, Yesu giru nɛ wiyaa tuŋiyaan gi: «U ibɛɛ wɔu ye, nɛwɛn ma gɔ ɛjɛmɔ bɛbɛɛdou.» 41Yesu, amasɔgɔ womɔ woi ɛjii aai. Wo numɔ wajaraa ainɛ gɔi tabaa gi: «Mu ibɛɛ wɔun. Ui ɛjaai biyɛ.» 42Ginsɛsai nɛwɛnginɛ gɔi pele pele bajaai. 43Yesu ɔgu kɛu woi tiiu, ɛɛnnaa wo le sɔwaa gi: 44«Ɛjii keŋiyɛn. Ui bajaai ga, inɛ kanma bɛrɛ sɔɔnɔu. Kaa Ama bɛrɛ sadagadɔɔnɔnɛ gɔ bɛrɛ yaa. Ui bajaai ga wo bɛrɛ tagara. Kɔɔ onu nɛ, ui naran go bajaai ga inɛw puu bɛrɛ sɛɛrɛi biyɛ ga, Mɔise, nɛwɛnginɛ bajaai ye, ɛjɛmu dɛi sadaga jɛɛlɛ wo gi gɔ, wogɔ jɛɛlɛ.» 45Kaa ainɛ gɔ yaa, unruin bajaai ga yalu puu ginɛmaa paju. Kɔɔ sabu dɛi, Yesu, ana wo yaabe wooi nɛ, ana kɔlɔ nɛ yoobele. Wo yalu inɛ wɔlɔ nɛ biyɛbe. Kaa, kɔɔ wooi nɛ, inɛw sibɛ puu nɛ goi ye, wo bɛrɛ wɛɛubɛin.

will be added

X\