LUKA 9

1Yesu, jaŋu unrunw pɛli lɛisigɛ womɔ gɔbe boonaa, jinrun wooi inɛw kuu nɛ nana goonɔ ga, jiun bajamɔ ga, gɔnrɔn lee, paŋa lee bei obaabe. 2Ama diinɛ waaju taga ga, jiungunw bajamɔ ga, wo bei tiyaabe. 3Bei tiiu, wo ɔn gin’ be le gi: «Oju ebe dɛi baga ma, jɛmɛ ma, buru ma, buudu ma gɛliyɛnɔugi. Arugoi lɛi lɛi gɛliyɛnɔugi. 4Ginrun e sugoido gɔ nɛ, e yaaido baa, kɔɔ nɛ yabiyɛi. 5Yalu turu nɛ e dɔwaa, gana gɔ bɛɛnw ei sɛgɛrɛ ga yabanɛ biyaai ye, ana wogɔ nɛ goonu kubɔ ebe nɛ minɛ tara gɔ pogoti gooi. Wogɔ, be bɛrɛ jarugu be le yɔɔ sɛɛrɛi biyɛdo.» 6Yesu kɔɔ gin’ bei tinwɛnraan wo kilaa, jaŋu unrunw gɔbe gowaa, ana ana nɛ gɔŋɔlaabɛin. Be yalu wooi nɛ Kibɛru Ɛju waaju tagaubɛin. Yalu wooi nɛ jiungunwin bajamɔubɛin. 7Sɛmɛginɛ Herɔde, Yesu birɛ dɛin dɛin birɛube gɔ kibɛru waaru wo ɛgu le, woi bimiliyaa, sɔɔ kanranɲu inɛɛ bee. Sabu inɛw Yesu dɛi sɔɔ dɛin dɛin sɔɔubɛin. Inɛw gamuu, woi Jan Batisei yiun nɛ bulaa wiyaa gɛɛbɛin. 8Inɛw gamuu iyaa woi inɛ Ama titiyainɛ Elii, pilemaa wɛi gɛɛbɛin. Iyaa, gamuu womaa pɔɔlɔ inɛw Ama titiyaanw logoro nɛ koturui bulaa wɛi gɛɛbɛin. 9Kaa Herɔde, wo ɔn gin’ gi: «Mu Jan kuu polomaabɔn. Nɛɛ inɛ dɛi sɔɔ kɔɔbe wooi ɛgɛu mu wɔɔ gɔ, wogɔ inɛ aai ma gun?» Wo kɔɔ gin’ gɛɛu, Yesui bana iyeɲu dɛnɛube. 10Kɔɔ gin’, waaru waaju tagaa pilemaa be wɛi le, Yesu jaŋu unrunw tiyaaɲu gɔbe, kijɛ be kanrun gɔbe puu Yesu bɛrɛ tagaabɛin. Yesu bei dimɛraan, dɛiin, ana turu boi womɔ Bɛtusayida gɛɛbɛin gɔ sibɛ go jɛyaabe. 11Kaa inɛw kulɔ wogɔ ɛgaa, woi dimiyaanbɛin. Yesu bei ɛjii sɛgɛraa, Ama diinɛ sɔɔ be bɛrɛ tagaabe. Iyaa inɛw bajamu kai sɛbɛin gɔbei yaa bajamaabe. 12Nai yɔraa, digɛnai sugoube sabu dɛi, jaŋu unrunw pɛli lɛisigɛ gɔbe Yesu genɛ nɛ dɔwaa, wo le ɔn gin’ gin: «U mɔɔnu gɔi pajaa ye, bemaa kɔɔ nɛ yalu diinyɛnɲu lee, kijɛ kayaɲu lee bɛɛ ga, ana diyɛ lee, dagi lee emi gɔŋaa wɔin gɔbe nɛ bei yaamɔ. Sabu yalu emɛ wɔɔ ɔn nɛ kijɛ kanma wɔlɔ.» 13Yesu aŋa bemɛ ɔn gin’ sai: «E kuu ebe le pana bei oboi.» Kɔɔ waaru le, jaŋu unrunw gɔbe wo le ɔn gin’ gin: «U emaa kuu emɛ le inɛw ɔn puu dɛi yai kakayɔn ɛbɛ jɛɛlɛ ga wɔlɔu ye kai, emɛ buru numɔrɔn lee, iiju lɛi lee laa ye, kijɛ waja sɛnɛ.» 14Inɛw kɔɔ nɛ bɛin gɔbe lugo gɔ, anranw sai inɛw muɲu numɔrɔn gin’ bee. Yesu, jaŋu unrunw womɔbe bɛrɛ tɔɔraabe, bemaa inɛw gɔbei pɔrɔ le pɔrɔ le, inɛw pɛnumɔrɔn pɛnumɔrɔn dɛinyɛnmɔ gi. 15Jaŋu unrunw gɔbe kɔɔ gin’ kanraanbɛin. Be inɛw gɔbe puu dɛinyɛnmaabɛin. 16Kɔɔ waaru le, Yesu, buru numɔrɔn gɔ lee, iiju lɛi gɔ lee jeɲaa, giri daa go dɛɛraa gɛlɛu, Amai birɛpoo tagaabe. Kɔɔ onu nɛ, wo buru gɔbe kabalaa, jaŋu unrunw gɔbe bemaa inɛw bɛrɛ gamala ga, bei obu. 17Kɔɔ gin’ inɛw puu pana kayaa, bei baabe. Kɛbɛlɛ waju gɔbe be turaa, taju pɛli lɛisigɛ jowaabe. 18Yesu, bai turu dɛiin biyaa, Ama gɛɛun waaru wo bee le, jaŋu unrunw womɔ yaa wo le yabɛin. Kɔɔ gin’ wo be bɛrɛ ɔn gin’ selumu: «Inɛw mui inɛ aai gɛɛɲu?» 19Jaŋu unrunw gɔbe saa: «Inɛw gamuu ui Jan Batisei bulaa wɛi gɛɛɲu. Gamuu uwaa inɛ Ama titiyainɛ Elii gɛɛɲu. Gamuu iyaa, uwaa pɔɔlɔ inɛw Ama titiyaanw logoro nɛ koturu bulaa wɛi gɛɛɲu.» 20Yesu be bɛrɛ selumaa: «Nɛɛ, e mui aai ga sɛi?» Piɛru saa: «Ama Yabanɛ Diyɛ tii gɔ ui.» 21Piɛru kɔɔ gin’ wo saa, Yesu, jaŋu unrunw womɔ bɛrɛ ɛjii sɔwaa, bemaa sɔɔ kɔɔ inɛ turu kanran bɛrɛ jugɔmɔnɔu gi. 22Kɔɔ onu nɛ Yesu, jaŋu unrunw womɔ bɛrɛ ɔn gin’ sɔɔi tɔlu: «Inɛ Aini gɔ, waajibi ɔɲɔmu joo bɛbɛɛdo. Yahutunw inɛw naw gɔbe lee, Ama bɛrɛ sadagadɔɔnɔw kuu bɛɛnw gɔbe lee, Ama tɔɔru deerenw gɔbe lee, wo le yabaidenɛ. Waajibi woi dadaadɛin. Kaa bai taaniye gɔ wo bubulodo.» 23Kɔɔ onu nɛ, Yesu, inɛw kɔɔ nɛ bɛin gɔbe wooi le ɔn gin’ sɔi: «Inɛ aai kanran, jaŋu ii mai bii ibɛɛ wɔɔ ye, wogɔ baŋa kuu womɔ naŋa ye, baga jai womɔ bai wooi duiyi ye, mui wo dimiyɛnmɔ. 24Aduna ɔn dɛi, inɛ kinrun unrunmɔ yabado ga wɔɔ gɔ, kɔɔbaŋa, aduna wɛɛido gɔ nɛ kinrun womɔ susuyodo. Kaa inɛ kinrun unrunmɔ mu dɛi pajaajɛ, wogɔ baŋa kinrun womɔ yayabado. 25Aduna ɔn puu uwɔi kanran, kuu uwɔ suyaajɛu ma, kuu uwɔ yamalaajɛu ma biyaai ye, niwɛn yasɛ ma? 26Mu lee, sɔɔ mabe lee dɛi, inɛ aai kanran dɔgɔ woi ahaajɛ ye, Inɛ Aini gɔ, dooro womɔ nɛ lee, Ba gɔ dooro nɛ lee, mɛlɛnkɛ ɛjaa wɔin gɔbe dooro nɛ lee, waaru wo wiyaajɛ, inɛ wogɔ dɛi dɔgɔ woi ahaado. 27Mu naran go e bɛrɛ tagauwɔn, inɛw unwɔin ɔnbe logoro nɛ, gamuu, Ama diinɛ iyelu go yinwɛindenɛ.» 28Yesu, sɔɔ kɔɔbe wo sɔi, bai gagara gin’ dɔwaa wo kanran, wo Piɛru lee, Jan lee, Jake lee dimɛraan, Ama gɛɛn dɛi kokoo kuu nɛ unu. 29Kɔɔ gin’ Yesu, Ama gɛɛun wo gɛlɛu, girupala womɔ bana gɔ duliyaai. Sɔi womɔ piluniyaan, ɛjii dooroube. 30Kɔɔ onu nɛ, ginsɛsai anranw lɛi Yesu le sɔɔ sɔɔu kohiŋi. Anranw lɛi wogɔbe, Mɔise lee, Eli leei bɛin. 31Bei dooro diyɛ le tagaraabɛin. Be, Yesu bana birɛ womɔ kibemɔ ye, bɛrii Jerusalɛmu nɛ aŋai wo yinwɛindo sɔɔ sɔɔubɛin. 32Kaa Piɛru lee, inɛw wo le bɛin gɔbe lee, giri yeiyaa bɛnraan diinbɛin. Waaru giri be yemɛ le, be Yesu dooro gɔ iyaabɛin, inɛw lɛi gɔbe yaa wo le be wɔun iyaabɛin. 33Anranw lɛi gɔbe waaru Yesu le be kabiyɛbe le, Piɛru, Yesu le ɔn gin’ sɔi: «Mu baŋa, yalu ɔn nɛ biyɛ ga ɛjii wɔɔ. Kuru taanu kuraa ye, turu uwɔi, turu Mɔise mɔi, turu Eli mɔi bojomɔi.» Wo sɔɔ wo sɔɔbe inɛɛbe. 34Piɛru kɔɔ gin’ gɛɛu wo wɔu, kulumɔ turu wiyaa, bei dɛbaabe. Waaru kulumɔ gɔ bei dɛbɛube le, jaŋu unrunw gɔbe liyaain. 35Kulumɔ gɔ nɛ mii ɛgɛmaabe: «Ɔn Aini ma gɔ woi. Woi mu yɛmu. Sɔɔ womɔ ɛjii keŋiyɛin.» 36Mii gɔ ɛgɛmu onu nɛ, Yesui laa ye, inɛ kanma bele. Jaŋu unrunw gɔbe kijɛ be iye gɔbe dɛi, waaru wogɔ le, be sɔɔ wogɔ inɛ turu kanran bɛrɛ taganɛ bɛin. 37Aga baa yaa gɔ, Yesu lee, jaŋu unrunw womɔ lee, waaru kokoo kuu nɛ gowaa be sugu le, mɔɔnu diyɛ Yesui sɛgɛrɛi wiyaabe. 38Mɔɔnu gɔ logoro nɛ, ainɛ turu kɔnwaan ɔn gin’ gi: «Jaŋudeerenɛ, mu u bɛrɛ gɛɛunwɔn, u aini turu ma gɔ, ii ma gɔi marun yɛnɛ. 39Jinrun turu woi ahaajɛ, woi ginsɛsai pipiimɔjɛ. Ii gɔi ɛjii jigemaatiyaa ye, aŋa womɔ nɛ yugɔrɔ goomɔjɛ. Woi ɛjii ɔɲɔmɔjɛ, iyaa woi ɔgu pajaalɛ. 40Mu jaŋu unrunw uwɔbe bɛrɛ jinrun gɔ ii ma kuu nɛ nanu goonɔ ga gɛnyaanbɔn. Kaa be kanraan bɛɛnɛ.» 41Yesu saa gi: «Aa! E inɛw mɔɲu, inɛw gagawu sɛnɛ gɔbe. Waaru yagɔ baa e le mu biyɛun jaan? Waaru yagɔ baa ei muyɔndɔn? Ii uwɔ gɔ ɔn nɛ jɛɛlɛ.» 42Waaru ii gɔ Yesu le wo bɛruni le, jinrun gɔ ii gɔi minɛ nɛ sunugaa, woi ɛjii jigemaabe. Kaa Yesu, jinrun gɔi ɛjii ganwaanbe. Wo ii gɔi bajamaatiyaa, banɛ gɔ bɛrɛ obaabe. 43Ama gɔnrɔn diyɛ gɔ dɛi, inɛw gɔbe puu bɛrɛ maunɛ biyaabe. Yesu kijɛ kanranbe gɔbe dɛi inɛw gɔbe puu waaru maunɛ bee le, Yesu, jaŋu unrunw unrunmɔ le ɔn gin’ sɔi: 44«E kai sɔɔ ɔn ɛjii keŋiyɛin: Inɛ Aini gɔi inɛw numɔ nɛ kukunɔdɛin.» 45Kaa jaŋu unrunw gɔbe, sɔɔ kɔɔ paamu kanranbenɛ. Sɔɔ gɔ bemaa paamu kanrannɔu ga, tiyɛ gɔ be bɛrɛ baŋaraantin. Iyaa be tiyɛ womɔ Yesu bɛrɛ selumɛ ga liyɛubɛin. 46Kaa jaŋu unrunw gɔbe logoro nɛ jiiru biyaabe: Be logoro bemɛ nɛ aa diyɛi ma jiireubɛin. 47Kaa Yesu, kinɛ bemɛ ajubu gɔ jugaa, ii dagi turu jɛɛlaa, genɛ unrunmɔ nɛ bojaa, 48jaŋu unrunw gɔbe le ɔn gin’ gi: «Inɛ aai kanran, boi ma le ii dagi ɔin ɛjii sɛgɛraajɛ ye, kɔɔbaŋa mui sɛguru. Iyaa inɛ mui sɛgɛraajɛ, mui tiinɛ gɔi sɛguru. Sabu logoro ebe nɛ inɛ sigɛ le kuu unrunmɔ sunugaa wɔɔ gɔ, kɔɔbaŋa inɛ wo sigɛ wɔɔ gɔ woi.» 49Kɔɔ onu nɛ Jan saa gi: «Mu baŋa, emɛ ainɛ turu, boi uwɔ le jinrun inɛw kuu nɛ nanau wo wɔu iyaabɛin. Kaa inɛ wogɔ emɛ le ui digɛla gɔ dɛi, emɛ woi tɛŋaabɛin.» 50Kaa Yesu saa gi: «E woi turu kanran tɛŋɛnɔugi. Sabu inɛ e jaŋui laa gɔ, e bɔɔi.» 51Waaru Yesu, aduna nɛ goo ye, alagala wo uloido bɛruni le, wo anrangaju le biyaa, Jerusalɛmu yaa ga ɛjii namaa iŋiyaan kole bee. 52Wo giru unrunmɔ nɛ inɛw tiyaabe. Inɛw gɔbe yaa Samari bɛɛnw ana dagi turu nɛ Yesu dɛi ginrun sugo yegere ga yowaabɛin. 53Kaa ana gɔ bɛɛnw, Yesu Jerusalɛmu yaaube dɛi, woi sɛgɛrɛ ga yabanɛ. 54Yesu jaŋu unrunw, Jake lee, Jan lee kɔɔ iyaa, ɔn gin’ gin: «Inɛw Baŋa, yaun alagala goo sugu ye, inɛw ɔnbei tɛgɛ ga emaa gɛɛ ga u ibɛlau ma?» 55Kaa, Yesu be sibɛ go kigelemaa, bei ɛjii ganwaanbe. 56Be kɔɔ gin’ oju bemɛ dimiyaan, ana dagi waja nɛ yain. 57Oju nɛ be tou, inɛ turu wiyaa, Yesu le ɔn gin’ gi: «Yalu u yaaido wooi nɛ, mu ui didimiyɛndɔn.» 58Kaa Yesu aŋa womɔ saa gi: «Yurugube bonɔ yasin. Sasaabe kuru yasin. Kaa Inɛ Aini gɔ, yalu kuu tuŋɔrɔnɲu kanran sɛlɛ.» 59Kɔɔ onu nɛ Yesu, turu baŋa le ɔn gin’ gi: «Wɛɛ mui dimiyɛn.» Kaa baŋa wo le saa gi: «Mu Baŋa, u mu bɛrɛ mu ba yiun laa yai mu bojomɔ.» 60Kaa Yesu saa gi: «Inɛw yiun gɔbe pajaa ye yiun bemɛ be bojomɔ. Kaa u kai yaa ye Ama diinɛ kibɛru sɔɔ gɔ taga.» 61Inɛ waja yaa Yesu le ɔn gin’ sɔi: «Mu Baŋa, mu ui didimiyɛndɔn, kaa mu maranw bɛrɛ jamu biyɛmɔ gɛɛi mu yaamɔ.» 62Kaa Yesu, inɛ wogɔ baŋa le ɔn gin’ gi: «Inɛ aai kanran, sari wolu walu aa gɛliyaa, onu gɔnɔ gɔnɔ yɛnɛjɛ ye, inɛ wogɔ baŋa gɔ Ama diinɛ wo le jaanla.»

will be added

X\