LUKA 8

1Kɔɔ onu nɛ Yesu, ana diyɛ diyɛbe nɛ lee, ana dagi dagibe nɛ lee gɔŋɔlɔube. Wo Ama diinɛ Kibɛru Ɛju gɔ tagaube. Jaŋu unrunw pɛli lɛisigɛ gɔbe wo le yabɛin. 2Iyaa, yaanw gamuu kuu nɛ Yesu jinrun nanaa wo goonu lee, jiun bemɛ wo bajamu gɔbe lee yaa yabɛin. Yaanran turu gɔ boi Mari Magudala ana bɛɛnnɛ gɛɛɲu. Jinrun sɔi kuu womɔ nɛ nanaa gooni. 3Yaanran waja boi Jannɛ gɛɛɲu. Wo, Herɔde ginrun kɔlɔ sɔɔ ainɛ wo sagi bee, Kuja yaanrain bee. Iyaa, Susana lee, yaanw waja joo lee yabɛin. Kɔɔbɛɛnw puu, numɔ bemɛ kijɛ le Yesu lee, jaŋu unrunw womɔ leei baraubɛin. 4Inɛw, ana ana gɔbe wooi nɛ goo goo ye wɛɛ ye, Yesu genɛ nɛ mɔrinyɛunbɛin. Kɔɔ waaru le, Yesu, taanrinyɛn le sɔɔ ɔn jeɲaa sɔi: 5«Toimaɲanɛ turu toi maɲai gowaabe. Toi maɲau wo wɔu, toi ii gamuu oju nɛ sugin. Inɛw kubɔ le namau galin. Iyaa, sasaabe kanran wiyaa, toi ii wogɔbe jɔnwaanɲu. 6Toi ii gamuu, tibu yalu nɛ sugin. Kaa, toi gɔ tɛiyaa, dii bei baalɛ dɛi maaŋiyaain. 7Toi ii gamuu dɔgɔ jijii sɛin logoro nɛ sugin. Kaa dɔgɔ jijii sɛin gɔbe be wooi tunmɔ go tɛiyaa, dɔgɔ gɔbe be dɛi sigɛ gabiyaa, bei kimaatin. 8Toi ii gamuu minɛ ɛju nɛ sugin. Toi wogɔbe tɛiyaa, ɛjii gabiyaa, dɛnrɛn gaai bɛɛmaabe.» Taanrinyɛn kɔɔ daantiyaa, Yesu, mii ɛɛn le ɔn gin’ gi: «Inɛ suguru ɛhɛgu sɛɛ, wo sɔɔ gɔ keŋiyɛn.» 9Yesu jaŋu unrunw gɔbe womaa taanrinyɛn kɔɔ tiyɛ gɔ ingei ma selumi. 10Yesu aŋa bemɛ saa: «Ama diinɛ sɔɔ boŋurun gɔ, e bɛrɛ kai jugɔmaaɲu. Kaa inɛw wajunw bemaa giri gɔmaa kosɛin kanran, giri iyenɔu dɛi, iyaa, be suguru dɛɛraa wɔin kanran, paamu kanrannɔu dɛi, be bɛrɛ taanrinyɛn le sɔɔdɛin.» 11«Aiwa, nɛɛ taanrinyɛn mu dain gɔ tiyɛ womɔ unwɔ: Toi ii gɔ, Ama sɔɔ gɔ woi. 12Toi ii oju nɛ sugin gɔbe, inɛw Ama sɔɔ ɛgaa, bemaa Ama sɔɔ be ɛgu gɔ le gawu ye, yayabu gɔ bɛɛnɔu giye jinrun puu kuu baŋa wɛi ye, sɔɔ gɔ kinɛ bemɛ nɛ goonɔjɛɛjɛ gɔbe bei. 13Toi ii tibu yalu nɛ sugin gɔbe, inɛw Ama sɔɔ gɔ ɛgaa ye kinɛ ɛɛli le yabaɲu gɔbe bei. Kaa be duu bɛɛnɛ. Be waaru gaila le sɔɔ gɔ le gagawaɲu. Kaa subɔrɔ be bɛrɛ dɔwaai ye, be sɔɔ gɔ pajatiiɲu. 14Nɛɛ, toi ii dɔgɔ jijii sɛin logoro nɛ sugin gɔbe, wogɔ inɛw sɔɔ gɔ ɛgaa, kaa yaa ye, jiire lee, arusɛgɛ mɔɔnu lee, iyaa aduna kijɛ kinɛ ɛɛliyɛmɔjɛ lee bei kimɛtiiɲu dɛi, ii bemɛ gɔ ilɛidolo. 15Kaa toi ii minɛ ɛju nɛ sugin gɔbe, wogɔbe inɛw Ama sɔɔ ɛgaa, kinɛ teitai lee, kinɛ ɛju lee sɔɔ gɔ gɛliyɛnw gɔbe bei. Be muyɔn le bii ye, ii kukunɔɲu.» 16Yesu, iyaa taanrinyɛn ɔn jeɲaa be le sɔi: «Inɛ turu kanran lanpa yaun tanugaa ye, taju le kii ma, teenu bɔlɔ nɛ kunɔ ma kanraanlɛ. Kaa lanpa tanugaa ye, inɛw ginrun gɔ nɛ yoonw gɔbe wijɛ womɔ iye ga, lanpa gɔi yalu wijɛ ɛjii wo obo bɛɛjɛ nɛ jeleɲu. 17Sabu kijɛ babaŋa ɛlu gooidolo turu kanran wɔlɔ, iyaa sɔɔ boŋurun jugɔmɔidolo turu kanran wɔlɔ. Puu dɛdɛbɛlɛdɛin. 18«Kɔɔ sabu dɛi sɔɔ aŋai e keŋiyɛnjɛ gɔ dɛi kuu kajubu le biyɛi. Kunrin inɛ kijɛ sɛɛ baŋa bɛrɛ, baraa ye ohobodɛin. Kaa inɛ kijɛ sɛlɛ gɔ, gaila yasɛ ga wo wɔɔ gɔ yaa wo bɛrɛ ɛhɛlɛdɛin.» 19Yesu kɔɔ gin’ sɔɔ sɔɔu wo wɔu, wo na lee, wo suŋɔw lee yalu wo bee gɔ nɛ wiyaa dɔwaabɛin. Kaa inɛw joo Yesui gɔŋaa sɛbɛin gɔ digɛu, be genɛ womɔ nɛ tee dɔwaa bɛɛnɛ. 20Kunrin inɛw wiyaa Yesu le ɔn gin’ gin: «U na lee, u suŋɔw lee bain go yɔɔin. Be ui selumɛuwɔin.» 21Kaa Yesu aŋa bemɛ saa gi: «Mu na lee, mu suŋɔw gɔbe lee, wogɔbe inɛw Ama sɔɔ keŋiyaan ye, wogɔ le kɛukɛu yoi yaanw gɔbe bei.» 22Bai turu Yesu, jaŋu unrunw womɔ le diikoro nɛ yowaa, bemaa dibe diŋirun waja go galamɔ gi. Kɔɔ waaru le be dibe gɔ kɛjɛ taŋai tɔlaabɛin. 23Waaru dibe gɔ kɛjaa taŋau be bee le, Yesu giri yeiyaai. Iyaa kɔɔ waaru le ooɲɔ diyɛ naa diyɛ dibe gɔ nɛ ingelaabe. Diikoro kɔlɔ gɔ nɛ dii jooube. Kunrin bei suiyodo ga bee. 24Jaŋu unrunw gɔbe yaa, Yesui yemɛlaa ɔn gin’ wo le sɔin: «Emɛ baŋa, emɛ baŋa, emi suiyoido!» Yesu giri yemaa, ooɲɔ gɔ lee, diigunu gɔ lee ganwaanbe. Kɔɔ waaru le yalu gɔ kelemu biyaabe. 25Yesu, jaŋu unrunw womɔ gɔbe le ɔn gin’ gi: «Gagawu ebe gɔ yago wɔɔ?» Kaa, be kai, Yesu kijɛ kanrun gɔ iyaa, liyaa maunɛ biyaa, tunmɔ le ɔn gin’ gɛɛbɛin: «Aa! Inɛ ɔn inɛ inge tɔgui? Ooɲɔ lee, dibe dii lee, sɔɔ womɔ koi yabaɲu.» 26Yesu lee, jaŋu unrunw womɔ lee, kɔɔ onu nɛ, Gerasa bɛɛnw gana, Galile le daii wɔɔ nɛ yaa dɔwaabɛin. 27Yesu, diikoro gɔ nɛ gowaa, waaru minɛ nɛ wo dɔi le, yalu wogɔ le bɛrii ana bee turu ainɛ wo bɛrɛ wiyaabe. Ainɛ wogɔ jinrunbe kuu womɔ nɛ yadaanbɛin. Sɔi kunɔlu go wo bii tanwaain, iyaa ɔnsain yalu nɛ laa ye, wo ginrun nɛ toiyobele. 28Yesui waaru wo iyi le, wo mii diyɛ le piyaa, Yesu kubɔ doɲu nɛ numaa sugaa, mii ɛɛn le ɔn gin’ wo le sɔi: «Yesu, Ama daa naa daa go wɔɔ baŋa Aini gɔ, uwɔ ingei? Mu u bɛrɛ gɛɛunwɔn, mui ɔɲɔmɔnɔu.» 29Yesu, jinrun gɔ wa ainɛ gɔ kuu nɛ goo ga tɔɔrɔube dɛi wo sɔɔ kɔɔ sɔɔube. Jinrun gɔ kubɔ joo yanwunrinyɛunbe. Inɛw, yɔgu lee, inrun lee, kubɔ womɔbe pagaa sɛbɛin. Kaa wo kɔɔbe puu biɲɛ ye, puluguti ye, jinrun gɔ woi suuraa ye, yalu inɛ wɔlɔ, olusolo nɛ jɛyaaube. 30Yesu ainɛ gɔi selumaa: «Boi uwɔ inge gɛɛɲu?» Jinrun joo ainɛ gɔ kuu nɛ yadaanbɛin gɔ digɛu, wo saa gi: «Boi ma “Emɛ jooi wɔin” gɛɛɲu.» 31Bonɔ too dumɔ sɛlɛ gɔ nɛ bemaa yoo giye tɔɔrɔnɔu ga, jinrun gɔbe Yesu bɛrɛ ɛjii gɛɛunbɛin. 32Be le bɛrii, kokoo kuu nɛ tolu kulɔ joo belu tɛnwɛun yabɛin. Kɔɔ gin’ jinrun gɔbe Yesu bɛrɛ gɛnyaanbɛin, womaa unrunbei pajaa ye tolu gɔbe nɛ yoomɔ gin. Yesu bemaa wogɔ kanran bɛbɛɛdɛin gi. 33Kɔɔ gin’ jinrun gɔbe ainɛ gɔ kuu nɛ gowaa yaa, tolu gɔbe nɛ yoin. Tolu kulɔ gɔ puu kokoo daa gɔ nɛ gowaa, ɔgu jɔbaa, dibe gɔ nɛ wiyaa yowaa piriyaa yinwaain. 34Inɛw tolu gɔbe girɛubɛin gɔbe, sɔɔ gɔ iyaa, be jɔbaa yaa kibɛru gɔ ginrun go lee, olu go lee tagaabɛin. 35Inɛw, kibɛru gɔ ɛgaa, sɔɔ bii gɔ yɛnɛi wiyaabɛin. Kaa, inɛw gɔbe Yesu genɛ nɛ wiyaa dɔwaa, ainɛ jinrun joo kuu womɔ nɛ goi gɔ, sɛɛu, sɔi kunaa, Yesu genɛ nɛ wo daaun iyaa, be liyaain. 36Sɔɔ gɔ puu aŋai galu gɔ inɛw iyin gɔbe, ainɛ jinrun joo kuu womɔ nɛ daanbe gɔ bana baju gɔ, inɛw wɛin gɔbe bɛrɛ tagaabɛin. 37Gerasa gana bɛɛnw wooi Yesu bɛrɛ gɛnyaan, womaa gana unrunbemɛ nɛ goojɛ gin. Sabu be puu liliyɛ diyɛ le bɛin. Yesu kɔɔ gin’ gowaa diikoro nɛ yowaa, yaado ga kanraun wo wɔu, 38ainɛ jinrun kuu womɔ nɛ goi gɔ wo bɛrɛ gɛnyaan, unrun wo le yaadɔn gi. Kaa Yesu woi pilemɛmaatiyaa wo le ɔn gin’ gi: 39«Pilemɛ ye ginrun uwɔ nɛ yaa. Ama u dɛi kijɛ diyɛ kanrun gɔ taga.» Ainɛ gɔ kunrin gowaa yaa, ana gɔ puu nɛ Yesu wo dɛi kijɛ diyɛ kanrun sɔɔ tagaube. 40Yesu, waaru dibe diŋirun waja go gowaa wo wɛi le, mɔɔnu gɔ woi sɛgɛraabe. Sabu be puu woi dɔmɔbɛin. 41Ainɛ turu, boi womɔ Jayirusu gɛɛbɛin gɔ, yalu gɔ nɛ wiyaa dɔi. Ainɛ wogɔ, Yahutunw Ama gɛɛn ginrun kuu baŋai bee. Wo iyaa turu sai yasɛbe. Iyaa gɔ anranguju pɛli lɛisigɛ gin’ yasɛbe. Iyaa wogɔ jinwaan yinwɛndo ga bee dɛi, wo wiyaa, Yesu giru nɛ tuŋiyaan, womaa ginrun unrunmɔ nɛ wɛɛ dɛi wo bɛrɛ gɛɛunbe. Yesu kɔɔ gin’ ainɛ gɔ ginrun oju gowaa, yaau wo wɔu, mɔɔnu joo gɔ woi damaube. 43Kɔɔ gin’ yaanran turu anranguju pɛli lɛisigɛ baa, bain goi jiun le bee, inɛw gɔbe logoro nɛ yatobe. Jɔŋujɔŋɔw joo woi jɔŋɔɲu ga ɛjii woi kayaabɛin. Kaa kɔɔ wooi nɛ inɛ turu kanran woi jɔŋaa bɛɛlu. 44Kɔɔ gin’ wo Yesu onu nɛ dɔwaa, sɔi womɔ kinrun tabu. Yesu sɔi tabau wo digɛu, jiun womɔ bajaai. 45Kɔɔ waaru le, Yesu ɔn gin’ selumu: «Inɛ aai mui tabu?» Inɛw gɔbe puu unrunbei laa ga gɛɛubɛin. Piɛru saa gi: «Mu baŋa, mɔɔnu gɔ ui gɔŋaa gɛliyaa, inɛw sibɛ sibɛ ui damauwɔin iyeelɛu!» 46Kaa Yesu saa gi: «Inɛ turu mui tabaabe. Sabu gɔnrɔn mu nɛ gowaabe ga mu jugaabɔn.» 47Kɔɔ waaru le, yaanran gɔ sɔɔ wo kanrun gɔ ɛlu gowaai ga jugaa, wo kinwɛun, Yesu giru nɛ wiyaa tuŋiyaanbe. Kijɛ dɛi woi wo tabu gɔ lee, iyaa woi tabau wo digɛu bana jiun womɔ baju gɔ lee, inɛw puu giru nɛ wo Yesu bɛrɛ tagaabe. 48Kaa kɔɔ waaru le, Yesu wo le saa gi: «Iyaa ma, gagawu uwɔ ui bajamaati. Jamu le yaa.» 49Yesu kɔɔ gin’ sɔɔ sɔɔu wo gɛlɛu, inɛ turu, Yahutunw Ama gɛɛn ginrun kuu baŋa, Jayirusu ginrun nɛ gowaa wiyaa, Jayirusu le ɔn gin’ sɔi: «Iyaa uwɔ yinwaain. Nɛɛ, jaŋudeerenɛ gɔi ɔɲɔmɔnɔu.» 50Yesu, sɔɔ gɔ waaru wo ɛgu le, Jayirusu le ɔn gin’ sɔi: «Liyɛnɔu. Mu le gawa sai. Iyaa uwɔ gɔ babajado.» 51Waaru ginrun gɔ nɛ be dɔi le, Yesu, inɛ turu kanran unrun le yoomɔlu, Piɛru lee, Jan lee, Jake lee, iyaa gɔ ba gɔ lee, iyaa gɔ na gɔ lee laa ye. 52Inɛw gɔbe puu, iyaa gɔ dɛi pii piiubɛin, iyaa sɔmiyɛunbɛin. Kaa Yesu be le kijɛ gi: «E pii piinɔugi, iyaa gɔ yinwɛnlu. Wo giri yeiyeuwɔ.» 53Yesu kɔɔ gin’ wo giyaa, inɛw gɔbe woi mɔmɔubɛin. Sabu be iyaa gɔ yinwaan galaai ga igii bɛin. 54Kaa Yesu, iyaa gɔ numɔ aa, mii ɛɛn le ɔn gin’ sɔi: «Iyaa, ingele!» 55Iyaa gɔ kikinu womɔ wo bɛrɛ pilemaa wiyaabe. Kɔɔ waaru le tee wo ingelaai. Yesu, iyaa gɔ bɛrɛ pana obo ga tɔɔraabe. 56Iyaa naranw gɔbei ɛjii maunɛ biyaabe. Kaa Yesu be bɛrɛ sɔwaa, bemaa inɛ kanma bɛrɛ sɔɔ gɔ jugɔmɔnɔu gi.

will be added

X\