LUKA 7

1Yesu, sɔɔ kɔɔbe puu inɛw woi keŋiyɛnw bɛrɛ waaru sɔwaa wo kilu le, wo gowaa, Kapɛrunaumu ana nɛ yowaabe. 2Nɛɛ, sɔludasu suŋu kuu baŋa turu, gunɔnɛ womɔ ɛjii jinwaan, yiun le bɛrii bee. Ainɛ gɔ bɛrɛ gunɔnɛ gɔ saii maai bee. 3Kɔɔ gin’ Yesu sɔɔ sɔɔu be wɔu ɛgaa, wo Yahutunw inɛw naw gamuu goonaa, Yesu bɛrɛ tiyaa, bemaa wo bɛrɛ gɛɛn ye, wɛɛ ye, gunɔnɛ unrunmɔi bajuga wa. 4Yahutunw inɛw naw gɔbe Yesui wiyaa tɛmaa, wo bɛrɛ ɛjii gɛnyaan, ɔn gin’ gin: «Ainɛ kɔɔ gɛɛn u saaun dagaa, 5sabu wo tɔgu emɛ gɔ ibɛɛ wɔɔ. Iyaa Ama gɛɛn ginrun emɛ gɔ yaa, emi ujaa wo obu.» 6Yesu, kɔɔ waaru le Yahutunw inɛw naw gɔbe le digiyaa, oju gowaabe. Kaa waaru ginrun gɔ le wo bɛruni le, sɔludasu kuu baŋa gɔ unrun anrungebei goonaa, Yesu bɛrɛ tiyaa gi: «Mu Baŋa, kuu uwɔ ɔɲɔmɔnɔu, sabu ginrun ma nɛ u yooun mu le dagalu. 7Kɔɔ sabu dɛi, mu kuu ma le u bɛrɛ wɛɛ ga mu le dagalu gɔ jugaabɔn. Kaa sɔɔ turu gɛɛ, birɛbirɛnɛ ma gɔ babajado. 8Mu kuu ma bɛɛnw diŋɛ le wɔun. Iyaa, mu yaa, sɔludasu unrunw gamuu bɛrɛ tɔɔru obu bɛbɛɛjɔn. Koturu baŋa womaa yaa gun ye wo yayaajɛ. Lee womaa wɛɛ gun ye wɛwɛɛjɛ. Iyaa, gunɔnɛ ma womaa ɔn kanran gun ye kakanranjɛ.» 9Yesu, waaru sɔɔ kɔɔ wo ɛgu le, ainɛ gɔi woi maunɛ kanraanbe. Yesu onu kigelemaa, inɛw woi dimɛbɛin gɔbe le ɔn gin’ sɔi: «Mu e bɛrɛ tagauwɔn, halu Isɛrɛlu tɔgu nɛ kanran mu gagawu ɔn tunmɔ iyetɛlun.» 10Waaru inɛw Yesu bɛrɛ tiin gɔbe ginrun pilemaa be yai le, be gunɔnɛ gɔ sɛɛu wo wɔu tɛmaabɛin. 11Sɔɔ kɔɔbe galu onu nɛ, aga baa yaa gɔ, Yesu, ana turu, boi gɔ Nayin gɛɛɲu gɔ nɛ yaaube. Yesu jaŋu unrunw lee, mɔɔnu diyɛ lee, Yesu le yaaubɛin. 12Kunrin Yesu, ana yoogu gɔ le waaru bɛrii wo bee le, yɛnɛ, inɛw, yiun duiyaa goonɔubɛin. Wogɔ yapanunɛ turu aini turui bee. Yapanunɛ gɔ le ana bɛɛnw joo yabɛin. 13Yapanunɛ gɔi waaru wo iye le, Inɛw Baŋa, yaanran gɔ amasɔgɔ woi aa, wo le ɔn gin’ sɔi: «U sɔmiyɛnnɔu.» 14Kɔɔ gin’ Yesu yadɔwaa, abiyɛ baga gɔi tabaabe. Inɛw yiun gɔ duyɔbɛin gɔ iŋiyaanbɛin. Yesu ɔn gin’ sɔi: «Sagatara, mu u le sɛun, ingele!» 15Kɔɔ waaru le yiun gɔ ingelaa dɛinyaan, sɔɔ sɔɔi tɔlaabe. Yesu kɔɔ gin’ wo na bɛrɛ woi obaabe. 16Sɔɔ kɔɔ waaru be iye le, inɛw gɔbe puu liliyɛ le jowaabɛin. Iyaa, be Amai sɔmɔu: «Logoro emɛ nɛ inɛ Ama titiyainɛ diyɛ turu ingelaai.» Iyaa, «Ama, tɔgu unrunmɔ inɛw gɔbei yɛnɛi wiyaai» gɛɛubɛin. 17Yesu sɔɔ kanrun gɔ Judea gana nɛ lee, genɛ womɔ nɛ gana daanbɛin gɔbe puu nɛ lee ginaa dɔwaabe. 18Jan Batise jaŋu unrunw gɔbe Yesu kijɛ kanrun gɔbe puu wo bɛrɛ yaa tagaabɛin. Kɔɔ gin’ Jan, jaŋu unrunw unrunmɔ lɛi boonaa, 19bei Inɛw Baŋa Yesu bɛrɛ tiyaabe. Bemaa wo bɛrɛ ɔn gin’ selumɛ gi: «Inɛ wɛwɛɛjɛ gin gɔ, ui maa inɛ waja emɛ dɔmiyɛun jaan?» 20Inɛw lɛi gɔbe Yesu bɛrɛ wiyaa wo le ɔn gin’ sɔin: «Jan Batise emi u bɛrɛ tiyaa, u le ɔn gin’ gi: ‘Inɛ wɛwɛɛjɛ gin gɔ, ui maa inɛ waja emɛ dɔmiyɛun jaan?’ » 21Nɛɛ, waaru wogɔ le tee, Yesu, inɛw joo jiun bemɛ lee, goju bemɛ nɛ nurun tobe gɔ lee bajamɔube. Inɛw joo kuu nɛ jinrunbei nana goonɔube, girumuw joo giri pinɛlɛube. 22Wo Jan Batise, inɛw wo bɛrɛ tii gɔbe le ɔn gin’ sɔi: «Kijɛ e iyi gɔ lee, kijɛ e ɛgu gɔ lee, Jan bɛrɛ yai tagai. Womaa girumuw giri iyeuwɔin wa. Tegutegenw, sɛɛu yoi yaauwɔin wa. Nɛwɛngunw bajauwɔin wa. Suguruduŋube, suguru ɛgɛuwɔin wa. Yiunbe bulouwɔin wa. Dɔgɔpaganw bɛrɛ Kibɛru Ɛju gɔ tagauwɔin wa. 23Mu dɛi inɛ kinɛ womɔ yanwanlu gɔ, inɛ wogɔ Ama wo yabu.» 24Jan inɛw tii gɔbe yaa be yaa, Yesu, inɛw joo wo le bɛin gɔbe bɛrɛ Jan dɛi sɔɔ ɔn gin’ sɔɔi tɔlu: «Waaru olusolo go e yai le, e, inɛ inge tɔgui yɛnɛi yaii? Saguba ooɲɔ woi jigemɔjɛi yɛnɛi yaii ma? 25Nɛɛ, e ingei yɛnɛi yaii? Ɔgɔinɛ sɔi ɛju kunaa wɔɔi yɛnɛi yaii ma? Ai. Inɛw sɔi ɛju kunaa, saŋa kayaɲu gɔbe, be, ɔgɔginrun nɛ toiyoɲu. 26Kɔɔi biyaa ye, e, olusolo go inge dɛi yaii? Inɛ Ama titiyainɛ yɛnɛi yaii ma? Ee gun, halu titiyainɛ dɛi kanran sigɛ. 27Sabu Jan, Ama Dɔn nɛ, inɛ dɛi Ama ɔn gin’ tɔŋɔmu gɔ woi: “Yɛnɛ, mu, inɛ titiyainɛ ma giru uwɔ nɛ titiidɔn. U wɛɛmɔ nɛ, wo oju uwɔ yeyegeredo.” 28Mu e bɛrɛ tagauwɔn, yaanw, unrunw narin logoro nɛ, inɛ Jan dɛi gaa wɔlɔ. Kaa, Ama diinɛ nɛ inɛ wo dagi gɔ, wo dɛi gaa.» 29Inɛw gɔbe puu lee, sɛgu yabanw gɔbe lee, be inɛw Ama teitai wɔɔ ga jugaa, unrunbei Jan bɛrɛ batise kanranmaabɛin gɔbe, Yesu sɔɔ gɔ keŋiyɛunbɛin. 30Kaa Parisiɛnbe lee, Ama tɔɔru jugɔnw gɔbe lee, be, inɛw Jan bɛrɛ unrunbei batise kanranmɔnɛ gɔbe, Ama be dɛi kijɛ aaraabe gɔ le yabanɛ. 31Sɔɔ kɔɔbe kuu nɛ gimaa, Yesu, inɛw gɔbe le ɔn gin’ sɔi: «Kanɛ inɛw ɔnbe, mu aa le bei tunwɔndɔn? Bei aa le murun? 32Be unrunw dagunw, tai nɛ dɛinyaan, tunmɔ ɔn gin’ jarugaɲu le murin wɔin: ‘Kere emɛ sujaa, e gɔɔ gɔɔli. Iyaa, yiun tɔɔnrɔn emɛ tɔɔnraan, e pii piili.’ 33Sabu Jan Batise wiyaa, jaa kayabele, resɛndii ilɛ nɔɔbele wo wɔu, jinrun kuu womɔ nɛ daan e yingi. 34Inɛ Aini gɔ wiyaa, jaa kayau, dii nɔɔu wo wɔu, e saa, inɛ ɔn, jaa kayanɛi kɔɲɔnɔɔnɛi gi. Wo, sɛgu yabanw lee, inɛ waja boi mɔɲu bemɛ gowaa wɔɔ lee anrungei gi. 35Kaa hakilɛ Ama bɛrɛ goojɛ gɔ teitai wɔɔ ga, inɛw wogɔ dimiyaan yaanw gɔbe le jugɔmɔjɛ.» 36Parisiɛn turu, Yesu womaa unrun le wɛɛ ye, jaa kaya ga, woi boonaabe. Wo Parisiɛn gɔ ginrun nɛ yowaa, jaa kaya ga dɛinyaanbe. 37Kɔɔ waaru le ana gɔ yaanran hakɛ kanrannɛ turu, ginrun gɔ nɛ wiyaa yoi. Yesu womaa Parisiɛn gɔ ginrun nɛ jaa kayaun yatobe ga, wo ɛgaabe. Yaanran gɔ alubatere tɔɲɔ lajukɔrɔ joo, numɔ le gɛliyaa, 38Yesu onu go, kubɔsɔrɔ womɔ nɛ biyaa, sɔmiyɛun, giridii unrunmɔ le Yesu kubɔ gɔbe ɛnɛrɛunbe. Kɔɔ onu nɛ wo kuu womɔ kukuli le Yesu kubɔ gɔi sujɔube. Iyaa, wo Yesu kubɔ gɔ aŋa le ɔɲɔube, lajukɔrɔ togu togu kɔɔrɔube. 39Kaa Parisiɛn Yesui ginrun unrunmɔ nɛ boonɔnɛ gɔ, yaanran gɔ sɔɔ kanraunbe gɔ iyaa, kinɛ womɔ nɛ Yesu le ɔn gin’ gɛɛube: «Inɛ ɔn naran go woi inɛ Ama titiyainɛi bee ye, wo yaanran woi tabau wɔɔ gɔ aai ma, yaanran inge tɔgui ma jujugɔbe. Wo woi yaanran hakɛ kanrannɛi ga igii bibiyɛbe.» 40Kaa Yesu, Parisiɛn gɔ le saa kijɛ gi: «Simɔ, mu sɔɔ u bɛrɛ tagaun turu yasɔn.» Simɔ saa gi: «Jaŋudeerenɛ, u wogɔ sɔɔ.» 41Yesu saa gi: «Ainɛ yoru kunɔnɛ, inɛw lɛi bɛrɛ yoru obaabe. Ainɛ turui bɛrɛ sarudu buudu suŋu numɔrɔn yoru kunaabe. Ainɛ lɛiye gɔi sarudu buudu pɛnumɔrɔn yoru kunaabe. 42Be yoru gɔ bana tujɔɲu sɛbenɛ dɛi, yoru kunɔnɛ gɔ, inɛw lɛi gɔ kɛu bɛrɛ yoru gɔ yaabaatun gi. Nɛɛ inɛw lɛi gɔbe logoro nɛ, inɛ yagɔ, ainɛ yoru kunɔnɛ gɔi sigɛ le ibɛɛ biyɛdo?» 43Simɔ saa gi: «Ajubu ma nɛ kai, ainɛ bɛrɛ yoru gaai yaabu kanrin gɔi.» Yesu yaa saa gi: «Aŋai u sɔi gɔ teitai wɔɔ.» 44Kɔɔ onu nɛ, Yesu, yaanran gɔ sibɛ go kigelemaa, Simɔ le ɔn gin’ gi: «U yaanran ɔin iyeuwɔu laa? Aiwa, mu ginrun uwɔ nɛ yowaabɔn, kaa kubɔ ma mɔŋɔ ga u mu bɛrɛ dii obolu. Kaa yaanran ɔn giridii womɔ le kubɔ mabe ɛnɛraan kukuli unrunmɔ le sujaabe. 45U aŋa le mui ɔɲɔlu. Kaa ɔn nɛ mu yoi nɛ, yaanran ɔn kubɔ mabe aŋa le ɔɲu pajalu. 46U kuu ma nɛ nii togaa kɔɔrɔlu. Kaa yaanran ɔn kubɔ mabe nɛ lajukɔrɔ togaa kɔɔraabe. 47Kɔɔ sabu dɛi mu u bɛrɛ tagauwɔn, hakɛ joo wo sɛbe gɔbe wo bɛrɛ yaabu kanraantin gɔ dɛi, yaanran ɔn ihibɛ diyɛ sɛɛrɛ tagarauwɔ. Kaa, inɛ bɛrɛ hakɛ gaila yaabu kanraanɲu gɔ, wo ihibɛ gaila sɛɛrɛ tagarajɛ.» 48Kɔɔ onu nɛ Yesu, yaanran gɔ le kijɛ gi: «Hakɛ uwɔ gɔbe ui yaabu kanraantin.» 49Kɔɔ waaru le inɛw Yesu le jaa kayaun daanbɛin gɔbe kinɛ bemɛ nɛ kijɛ be gɛɛbe: «Kɔɔi ye, ɔn inɛ aai, hakɛ yaa yaabu kanranjɛ baŋa gɔ?» 50Kaa Yesu, yaanran gɔ le ɔn gin’ sɔi: «Gagawu uwɔ ui yabaati, u jamu le yaa.»

will be added

X\