LUKA 6

1Deeliye bai turu, Yesu, alukama minɛ turu nɛ kɛjaa galaube. Jaŋu unrunw womɔ gɔbe, alukama gɔ polaa ye, nawanranmu ye, tɛnwɛunbɛin. 2Parisiɛn gamuu wogɔ iyaa, ɔn gin’ be le gin: «Deeliye bai kijɛ kanran danwan gɔ, e wogɔ inge dɛi kanranjɛi?» 3Yesu aŋa bemɛ saa, gi: «Dawide lee, inɛw wo le bɛin gɔbe lee, giyɛ ɛjii bei aa wo kanran, kijɛ be kanrun gɔ, e jaŋali ma? 4Wo Ama ginrun gɔ nɛ yayowaa, Ama burui ga, buru duunaaɲu gɔ, wo wogɔ jeɲaa kayaabe. Iyaa, inɛw wo le bɛin gɔbe bɛrɛ obaa, kayamaabe. Buru wogɔ Ama bɛrɛ sadagadɔɔnɔw gɔbei laa ye, inɛ waja kayaun jaanla bee.» 5Yesu iyaa be le sɔwaa gi: «Inɛ Aini gɔ, deeliye bai sɔɔ gɔ wo sagi.» 6Deeliye bai waja, Yesu, Ama gɛɛn ginrun gɔ nɛ yowaa, deeru deereube. Ainɛ turu numɔ iin sanaai kɔɔ nɛ tɛmaabe. 7Ama tɔɔru deerenw gɔbe lee, Parisiɛnbe lee, Yesu womaa, deeliye bai gɔ le, inɛ babajamɔdo ma woi ɛjii sebereubɛin. Iyaa, wogɔ le woi sɔɔ nɛ kunu ibɛi bɛin. 8Kaa Yesu, kinɛ bemɛ ajubu igii bee. Wo ainɛ numɔ sanaai gɔ le ɔn gin’ gi: «Ingele! Logoro ɔn nɛ wɛɛ iŋiyɛn!» Ainɛ gɔ ingelaa, wiyaa iŋiyaanbe. 9Yesu, inɛw woi sebereubɛin gɔbe bɛrɛ ɔn gin’ gi: «Mu e bɛrɛ selumɛuwɔn: Deeliye bai inge kanraun jaan? Ɛju kanraun jaan ma, mɔɲu kanraun jaan? Inɛ kinrun yabaun jaan ma, inɛi suyoun jaan?» 10Yesu, sibɛ sibɛ womɔ nɛ inɛw bɛin gɔbei yɛnaatiyaa, ainɛ gɔ le ɔn gin’ gi: «Numɔ uwɔ wajara.» Ainɛ gɔ, numɔ womɔ wo wajaraa, numɔ gɔ bajaai. 11Kɔɔ waaru le, inɛw gɔbe kinɛ saii banraain. Be Yesu bɛrɛ kijɛ inge kanrandɛin ma tunmɔ le badaubɛin. 12Sɔɔ kɔɔbe onu nɛ, bai turu Yesu, kokoo turu nɛ Ama gɛɛn ga ulaabe. Wo wogɔ nɛ Ama gɛɛun baa yaabe. 13Baa wo yaa, wo jaŋu unrunw womɔbe boonaa jɛɛlaabe. Kɔɔ gin’ logoro bemɛ nɛ inɛw pɛli lɛisigɛ yɛmu. Yesu, inɛw pɛli lɛisigɛ gɔbe boi jaŋu unrunw tiyaaɲu kunaabe. 14Inɛw pɛli lɛisigɛ wo yɛmu gɔbe boi bemɛ unwɔ: Simɔ, Yesu boi womɔ Piɛru kunu gɔ lee, wo bainɛ Andere lee, Jake lee, Jan lee, Pilipe lee, Barutelɛmi lee, 15Matiu lee, Tɔmasu lee, Alupe ii Jake lee, Simɔ lee. Wo gana womɔ gunɔ nɛ goo ga mainiyɛunbe. 16Judasu, Jake ii gɔ lee, Judasu Isukariɔte Yesui jamanɛ gɔ lee. 17Yesu, jaŋu unrunw womɔ le kokoo gɔ kuu nɛ gowaa sugaa, para turu nɛ iŋiyaanbe. Yalu wogɔ nɛ jaŋu unrunw womɔ mɔɔnu diyɛ yabe. Yalu gɔ nɛ iyaa, inɛw kulɔ joo Judea gana wooi nɛ lee, Jerusalɛmu nɛ lee, dii diŋirun ana gɔbe, Tire lee, Sidɔn lee nɛ gowaa wɛin. 18Be Yesu sɔɔ keŋiyɛn dɛi lee, jiun bemɛ bajamɔ dɛi lee ga wɛin. Kɔɔ gin’ inɛw jinrun kuu bemɛ nɛ daanbe gɔbe, Yesu bei bajamaabe. 19Inɛw mɔɔnu kulɔ gɔ puu, Yesui tabu ibɛɛ bɛin. Sabu gɔnrɔn wo nɛ goo ye, be wooi bajamɔube. 20Kɔɔ onu nɛ, Yesu, jaŋu unrunw womɔ sibɛ go giri dɛɛraa, be le ɔn gin’ gi: «E, dɔgɔpaganw gɔbe, Ama e yabu. Ama diinɛ gɔ ebei. 21E, inɛw kanɛ giyɛ le wɔin gɔbe, Ama e yabu. Sabu ei babaado. E, inɛw kanɛ sɔmiyɛn sɔmiyɛnw gɔbe, Ama e yabu. E mɔmu mɔmɔmɔdei. 22«Inɛ Aini gɔ dɛi, inɛw ei ibiliyaaɲu ma, ei logoro bemɛ nɛ nanaa goonaaɲu ma, ei duyaaɲu ma, boi ebe yamalaaɲu ma biyaai ye, Ama e yabu. 23Kɔɔ gin’ e bɛrɛ kanraanɲu biyaai ye, alagala nɛ e tujɔ diyɛ bɛbɛɛdei. Pɔlɔ baa kanran, inɛw kɔɔbe tirɛ anranw gɔbe, inɛw Ama titiyaanw gɔbei yinhɔɲɔmi. Kɔɔ dɛi sɔɔ kɔɔ tunmɔ e bɛrɛ dɔwaai ye, naran go kinɛ ebe ɛɛliyɛmɔi. 24Kaa e ɔgɔ unrunw gɔbe, bɔnrɔn e le yɔɔ. Sabu e kinɛ ɛɛlu ebe kanɛ baa biyaa galaai. 25E, inɛw kanɛ ɛnrinyaan wɔin gɔbe, bɔnrɔn e le yɔɔ. Sabu giyɛ ei ahaado. E, kanɛ inɛw mɔmu mɔmɔuwɔin gɔbe, bɔnrɔn e le yɔɔ. Kinɛ ebe sɔsɔmiyɛndo, e giridii gogoodei. 26«Inɛw puu boi ɛju ebe sɔɔɲu ye, bɔnrɔn e le yɔɔ. Inɛw boi ɛju ebe boonɔw kɔɔbe tirɛ anranw yaa, inɛw titiyaanw kakalugunw gɔbe bɛrɛ kɔɔ gin’ kanraunbɛin.» 27«Nɛɛ, e inɛw sɔɔ ma keŋiyɛnw gɔbe, mu e le ɔn gin’ gun: E jaŋuwin ibɛi biyɛi. Inɛw ei ibiliyaa wɔin gɔbe bɛrɛ ɛju kanrain. 28Inɛw ei jɛbɛnw gɔbe dɛi, Ama boi booi. Inɛw ei ɔɲɔmɔw gɔbe dɛi, Ama gɛɛin. 29Inɛ turu mamana uwɔ sibɛ turu pejaajɛ ye, sibɛ lee gɔ woi dɛɛrɛ. Iyaa, inɛ turu arugoi naa uwɔ yabado ga wɔɔ ye, arugoi dagi uwɔ jeɲɛ ga woi tɛŋɛnɔu. 30Inɛ u bɛrɛ kijɛ gɛnyaanjɛ ye, wo bɛrɛ obo. Iyaa, inɛ, kijɛ uwɔi wɔɔ jeɲaajɛ ye, wo bɛrɛ pilemɛ ye selumɛnɔu. 31Nɛɛ, inɛw, kijɛ e bɛrɛ kanran ga e ibɛ puu, e yaa, kijɛ wogɔbe be bɛrɛ kanrain. 32«E, inɛw ei ibɛɛ wɔin gɔbe sai ibɛi ye, kijɛ sigɛ e kanranjɛ wɔlɔ. Halu hakɛ kanranw gɔbe, be kanran, inɛw bei ibɛɛ wɔin gɔbei ibɛɛ wɔin. 33Iyaa, e inɛw e bɛrɛ ɛju kanranw gɔbe sai bɛrɛ ɛju kanranjɛi ye, kijɛ sigɛ e kanranjɛ wɔlɔ. Halu, inɛw hakɛ kanranw gɔbe yaa, yinkanraunwɔin. 34E iyaa, inɛw numɔ nɛ yoru ebe bɛbɛɛdei ga e wɔɔ gɔbe bɛrɛ yoru kunɔjɛi ye, kijɛ sigɛ e kanranjɛ wɔlɔ. Inɛw hakɛ kanranw gɔbe yaa, pilemɛ ye kɔɔ tunmɔ bɛɛ ga, hakɛ kanranw be bɔɔnw gɔbe bɛrɛ yoru yinkunɔɲu. 35Kaa, e jaŋuwin ibɛi biyɛi. Iyaa inɛw bɛrɛ ɛju kanrain, inɛw bɛrɛ yoru kunɔi, kaa wogɔ dɛi kijɛ turu kanran dɔmiyɛnnɔugi. Kɔɔ gin’ tujɔ ɛju ebe gaai biyɛdo, iyaa e Ama daa naa daa go wɔɔ unrunwin bibiyɛdei. Wo inɛw yogosɛlɛ sɛlɛnw lee, inɛw mɔɲube lee dɛi ɛjii wɔɔ. 36E, bana Ama e Ba gɔ amasɔgɔjugɔnɛi wɔɔ gin’, inɛw amasɔgɔ jugɔi.» 37«Inɛwin jaruganɔugi. Kɔɔ biyaai ye, Ama ei jarugaidolo. Inɛw kuu nɛ jarugu duurɔnɔugi. Kɔɔ biyaai ye, kuu ebe nɛ yaa, jarugu duurɔidenɛ. Inɛwin yaabu kanrain, ei yaa yaabu kakanrandɛin. 38Inɛw bɛrɛ sin kanrain. Kunrin e bɛrɛ yaa kɔɔ gin’ kanrandɛin. Kɔɔ gin’ ɛjii tunwɔn ye, joonɔ ye, nɛɲɛ ye, jigemɛ ye, buriyemɛ ye, arugoi ebe jibɛ diyɛ nɛ togo kukunɔdɛin. Sabu inɛw mɔ gelu le e tunwɔnjɛ gɔ, Ama gelu wogɔ le ebe tunwɔndo.» 39Kɔɔ onu nɛ, Yesu, taanrinyɛn ɔn le be le sɔwaabe: «Giruminɛ, giruminɛ wo tunmɔnɛ teeremu bɛbɛɛjɛ ma? Kunrin, kanraain ye, be lɛi kɛu, bonɔ nɛ numɔ yooidenɛ ma? 40Jaŋu ii, jaŋudeerenɛ womɔ dɛi gaala. Kaa jaŋu ii bɛrɛ sɔɔ ɛjii deeraaɲu gɔ, jaŋudeerenɛ womɔ gin’ bibiyɛdo. 41«Giri uwɔ nɛ lalu too gɔ kajubaalɛu, u bɔɔnɛ giri nɛ keri too gɔ inge dɛi iyejɛu? 42Iyaa, u inɛ giri uwɔ nɛ lalu too gɔ iyeelɛ gɔ, u bɔɔnɛ womaa ‘Banrunge, giri uwɔ nɛ keri too gɔ goonɔmu’ yani gɛɛ bɛɛjɛu? U aŋa lɛilɛiginɛ gɔ, giri uwɔ nɛ lalu too gɔ laa yai goonɔ. Kɔɔ onu nɛ, u bɔɔnɛ giri nɛ keri too gɔ goonɔ ga sɛɛu giri ihiyedou.» 43«Tiun ɛju, ii mɔɲu naran bɛɛidolo. Tiun mɔɲu kanran, ii ɛju naran bɛɛidolo. 44Tiun na tuturu puu, ii womɔ le woi jugɔmɔjɛ. Gaa ii, teɲu na nɛ kɔi bɛɛmɔɔlɛ. Iyaa resɛn ilɛ, oruwo na nɛ kɔɔidenɛ. 45Inɛ ɛju, kijɛ ɛju womɔ yalu wo gɛliyɛjɛ nɛ, kijɛ ɛjui goonɔjɛ. Wogɔ, kinɛ womɔ gɔ woi. Inɛ mɔɲu, kijɛ mɔɲu womɔ yalu wo gɛliyɛjɛ nɛ, kijɛ mɔɲui goonɔjɛ. Kinɛ nɛ sɔɔ jowaa too gɔ, aŋa wogɔi sɔɔjɛ.» 46«Iyaa, e inge dɛi maa ‘Inɛw Baŋa, Inɛw Baŋa’ aŋa le sai gɛɛnu, kijɛ ebaa kanran mu gɛɛjɛ gɔbe kanraanlɛi wɔi ma? 47Kɔɔ gin’ inɛ aai kanran, inɛ mu bɛrɛ wɛɛjɛ gɔ, inɛ sɔɔ mu sɔi gɔbe keŋiyaan, wogɔ gin’ tee kanranjɛ biyaai ye, inɛ wogɔ kijɛ le tunwɔn bɛɛmɔido, mu e bɛrɛ tatagaradɔn: 48Inɛ wogɔ, ainɛ turu ginrun unrunmɔ ujɔ ga, bonɔ ɛjii guraa, ginrun bɔlɔtei gɔ tibu kuu nɛ daanaabe le murin wɔɔ. Kɔɔ gin’ dii diyɛ wiyaa, goro buriyaa, ginrun gɔi lagaabe, kaa ginrun gɔi ɛjii ujaaɲu gɔ digɛu, wololu. 49«Kaa, inɛ aai kanran sɔɔ ma gɔbe ɛgaa, wogɔ gin’ tee kanranlu ye, inɛ wogɔ baŋa, ainɛ ginrun unrunmɔ bɔlɔtei yegerelu go, minɛ peere nɛ ginrun ujɔnɛ le murin wɔɔ. Goro buriyaa, ginrun gɔi lagaabe. Ɔgu kɛu ginrun gɔ wolaai. Yanwan womɔ gɔ saii mɔɲi biyaabe.»

will be added

X\