LUKA 4

1Kɔɔ gin’ Yesu, Kikinu Pilu le jowaa, wo Jurudɛn dibe gɔ nɛ gowaa, Ama Kikinu, olusolo nɛ woi dimɛraan yaabe. 2Bai pɛnai jinrun puu kuu baŋa woi subɔraabe. Yesu, bai pɛnai gɔ wooi nɛ kijɛ turu kanran kayalu. Bai pɛnai gɔ onu nɛ, giyɛ Yesui aai. 3Kɔɔ waaru le jinrun puu kuu baŋa wo le kijɛ gi: «Ui Ama Ainii ye tibu ɔnbe bemaa buru taŋa giye tɔɔrɔ.» 4Kaa Yesu aŋa womɔ saa gi: «Ama Dɔn nɛ tɔŋaaɲu: “Inɛi jaa le sai kɔiyɔɔlɛ.”» 5Kɔɔ onu nɛ, jinrun puu kuu baŋa, Yesui yalu gabu turu nɛ unaa, wo bɛrɛ ɔgu kɛu aduna laamu gɔbe puu tagaraa, 6Yesu le kijɛ wo gi: «Mu gɔnrɔn ɔn wooi lee, diinɛ ɔnbe dooro gɔ lee, u bɛrɛ ohobodɔn. Sabu mu bɛrɛ wogɔ obaaɲu, iyaa, mu inɛ obu mu ibɛ bɛrɛ obodɔn. 7Nɛɛ, u mui demɛniyɛnmaajɛu ye, kijɛ ɔn puu uwɔi biyɛdo.» 8Yesu aŋa womɔ saa gi: «Ama Dɔn nɛ tɔŋaaɲu: “U Inɛw Baŋa Ama uwɔ gɔ wo turu sai demɛniyɛnmɔ, wo turu sai baba.”» 9Kɔɔ onu nɛ, iyaa, jinrun puu kuu baŋa, Yesui dimɛraan, Jerusalɛmu nɛ jɛyaabe. Ama Ginrun Diyɛ daa gɔ nɛ yalu pala naa pala gɔ nɛ woi unaa, wo le kijɛ gi: «Ui Ama Ainii ye, daa ɔn nɛ gowaa ye, doɲu gɔ nɛ kili sugo. 10Sabu, Ama Dɔn nɛ tɔŋaaɲu: “Ama, bemaa ui ɛjii gɛliyɛ ga, mɛlɛnkɛ womɔbe bɛrɛ u dɛi tɔtɔɔrɔdo.” 11Iyaa, tɔŋaaɲu: “Tibu nɛ kubɔ uwɔ tomɔnɔu giye, be numɔ bemɛ le ui dɔɔn gɛgɛliyɛdɛin.”» 12Yesu, jinrun puu kuu baŋa aŋa saa gi: «Ama Dɔn nɛ tɔŋaaɲu: “U, Inɛw Baŋa Ama uwɔi subɔrɔnɔu.”» 13Jinrun puu kuu baŋa, kɔɔ gin’ dabulu dɛin dɛin le Yesui subɔraa kilaa, waaru waja wɛɛido baa, wo Yesui pajaatiyaa, gowaa yai. 14Yesu, Ama Kikinu gɔnrɔn le jowaa, Galile nɛ pilemaa yaabe. Boi womɔ gana wogɔ wooi nɛ gowaabe. 15Wo Ama gɛɛn ginrun gɔbe nɛ deeru deereube. Inɛw wooi boi ɛju womɔ boonɔubɛin. 16Yesu, ana wo gabi, Nasarɛtu nɛ yaabe. Bana kanraan wo wɛɛjiyaa gin’, deeliye bai le, wo Ama gɛɛn ginrun gɔ nɛ yowaabe. Wo Ama Dɔn jaŋa ga ingelaabe. 17Kɔɔ waaru le, wo bɛrɛ inɛ Ama titiyainɛ Esayi dɔn gɔ obaabɛin. Wo dɔnmunɔ gɔ munɔraan, yalu turu dɛnaabe, wogɔ nɛ ɔn gin’ tɔŋaaɲu: 18“Inɛw Baŋa Ama Kikinu gɔ kuu ma nɛ yɔɔ, sabu wo maa dɔgɔpaganw bɛrɛ Kibɛru Ɛju gɔ taga ga, nii togokɔɔru le mui yɛmaabe. Kajugunw hɔɔlɔwin biyɛ ga, girumuw giri pinɛlaai biyɛ ga, maa wogɔ boonu kunɔ ga, wo mui tii. Inɛw ɔɲaa wɔin gɔbei deeliye obo ga, 19iyaa, Inɛw Baŋa Ama nɛɛma anranguju kibɛru gɔ boonu kunɔ ga mui tii.” 20Kɔɔ onu nɛ, Yesu, dɔn gɔ pilemaa munaa, birɛbirɛnɛ gɔ bɛrɛ obaatiyaa, yaa dɛinyin. Ama gɛɛn ginrun gɔ nɛ inɛw tobɛin gɔbe puu, giriyɛnu wo bɛrɛ dɛɛraabɛin. 21Kɔɔ waaru le wo sɔɔ sɔi tɔlaa, be le kijɛ gi: «Ama Dɔn sɔɔ ɔn, iye waaru e ɛgɛjɛ gɔ le tee, kibaai.» 22Be wooi Yesu sɛɛrɛ ɛju gooubɛin. Iyaa nɛɛma sɔɔ aŋa womɔ nɛ goobe gɔ dɛi, be puu bɛrɛ maunɛ bee. Kɔɔ dɛi be gɛɛubɛin: «Ɔn baŋa Josɛpu aini gɔi laa ma?» 23Kaa, Yesu be le saa gi: «E mu le taanrinyɛn ɔn dadaandei ga, mu igii wɔun: ‘Jɔŋujɔŋɔnɛ, kuu uwɔ le ui jɔŋɔ.’ E iyaa gɛgɛɛdei: ‘Kapɛrunaumu ana nɛ kijɛ uwaa kanraanbe ga emɛ ɛgu gɔ, nɛɛ ana uwɔ gɔ nɛ yaa, wogɔ kanran.’ » 24Iyaa, Yesu sɔwaa gi: «Mu naran go e bɛrɛ tagauwɔn, Inɛ Ama titiyainɛ turu kanran wo ba ginrun nɛ ɛjii sɛgɛrɛidenɛ. 25Kaa mu naran go e bɛrɛ tagauwɔn, anranguju taanu lee iyepilu kuloi lee baa, anran miilu kanraan, giyɛ diyɛ Isɛrɛlu gana gɔ wooi nɛ waaru yoi le, Eli waaru le, gana gɔ nɛ yapanuw joo yabɛin. 26Kaa Elii gana kɔɔ nɛ yapanuw bɛin turu kanran bɛrɛ tiinɛ, Sidɔn gana nɛ, Sarɛputa ana nɛ yapanunɛ turu bɛrɛ laa ye. 27Elise, inɛ Ama titiyainɛ gɔ waaru le kanran, Isɛrɛlu gana nɛ nɛwɛngunw joo yabɛin. Kaa logoro bemɛ nɛ inɛ turu kanran bajamɔnɛ, Siri gana bɛɛnnɛ Naamai laa ye.» 28Waaru sɔɔ kɔɔbe be ɛgu le, Ama gɛɛn ginrun gɔ nɛ inɛw tobɛin gɔbe puu kinɛ saii banraain. 29Be ingelaa, Yesui nanaa, ana bemɛ nɛ goonaabɛin. Kokoo kuu nɛ ana bemɛ daan gɔ nɛ woi dimɛraan jɛyaabɛin. Daa gɔ nɛ goo ye doɲu gɔ nɛ woi dama tii dɛnaabɛin. 30Kaa Yesu, logoro bemɛ nɛ sɔriyaa galaa yaai. 31Kɔɔ onu nɛ Yesu, Kapɛrunaumu ana, Galile gana nɛ sugaabe. Wo deeliye bai inɛwin deereube. 32Inɛw bɛrɛ deeru bana wo deerejɛ gɔ ɛjii maunɛ bee, sabu wo sɔɔ womɔ gɔ gɔnrɔn diyɛ le sɔɔube. 33Ama gɛɛn ginrun gɔ nɛ, ainɛ jinrun kuu womɔ nɛ daanbe turu yabe. Wo mii diyɛ le kɔnwaan: 34«Hei! Yesu, Nasarɛtu ana bɛɛnnɛ gɔ, mu ui aai ma igii wɔun. Inɛ ɛjaai Ama bɛrɛ goi gɔ ui. Inge dɛi u emi tɔɔɲɔuwɔu? U emi suyoi wɛiu ma?» 35Yesu, jinrun gɔi ganwaan gi: «Kemu kemu biyɛ. Ainɛ kɔɔ kuu nɛ goo.» Yesu kɔɔ gin’ wo giyaa, jinrun gɔ ainɛ gɔi inɛw logoro nɛ jaraatiyaa, mɔɲu wo bɛrɛ dɔɔnɔlu go, gowaa yinyai. 36Inɛw gɔbe puu bɛrɛ ɛjii maunɛ kanrun. Be tunmɔ le ɔn gin’ gɛɛbɛin: «Ɔn sɔɔ yeru inge tɔgui? Sabu wo jinrun gɔbe bɛrɛ gɔnrɔn le, paŋa le sɔɔ sɔwaajɛ ye, be inɛw kuu nɛ koi gooɲu.» 37Kɔɔ gin’ Yesu boigoo gɔ gana wogɔ sibɛ wooi nɛ dɔwaabe. 38Kaa kɔɔ onu nɛ, Yesu, Ama gɛɛn ginrun gɔ nɛ gowaa, Simɔ ginrun nɛ yowaabe. Simɔ yaanran na gɔ kɛbaamu mɔɲu le wo diiun, Yesu tɛmaabe. Be yaanran gɔ dɛi Yesu bɛrɛ gɛnyaanbɛin. 39Yesu, yaanran gɔ kuu nɛ jimiyaan, kɛbaamu gɔi ganwaanbe. Kɔɔ waaru le kɛbaamu gɔ woi pajaabe. Yaanran gɔ ɔgu kɛu ingelaa, Yesu lee, jaŋu unrunw womɔ lee bɛrɛ, pana oboi yintɔlu. 40Kɔɔ nɛ be wɔu, nai numɔgu waaru le, inɛw jiungunw tɔgu dɛin dɛin sɛbɛin gɔbe, Yesu bɛrɛ bei jɛɛlaabɛin. Wo jiungunw gɔbe tuturu kuu nɛ numɔ yaŋaraan, bei bajugaabe. 41Jinrunbe kanran, inɛw joo nɛ gowaa, kɔnwɔun, kijɛ be gɛɛbe: «Ama Aini gɔ ui.» Kaa Yesu ɛjii bei ganwaunbe. Wo be bɛrɛ sɔɔ turu kanran sɔɔmɔbele. Sabu jinrun gɔbe Ama Yabanɛ Diyɛ tii gɔ woi ga igii bɛin. 42Waaru baa yai le, Yesu ingelaa, bain go yalu babaŋa turu nɛ yai. Inɛw mɔɔnu joo woi dɛnɛu, yalu wo wɔɔ gɔ nɛ baa dɔwaabɛin. Be womaa unrunbei pajuti ye yaanɔu ga woi tɛŋɛubɛin. 43Kaa wo be le sɔwaa gi: «Mu Ama diinɛ Kibɛru Ɛju gɔ ana wajunw gɔbe nɛ yaa mu tagaun jaain wɔɔ. Sabu wogɔ dɛi mui tiyaaɲu.» 44Wo kɔɔ gin’ Yahutunw gana Ama gɛɛn ginrun gɔbe nɛ waaju tagaube.

will be added

X\