LUKA 24

1Jugu bai pɔlɔ gɔ, agapaali, yaanw gɔbe nii jiɲu ɛju be yeguru gɔ gɛliyaa, ɔnsain gɔ nɛ yaabɛin. 2Be ɔnsain aŋa gɔ nɛ dumɔ pinɛbe gɔ, dunɔrɔnmaa, goonaatin tɛmaabɛin. 3Kɔɔ gin’ be ɔnsain gɔ nɛ yowaabɛin. Kaa be Inɛw Baŋa Yesu yiun gɔ tɛmɛnɛ. 4Be sɔɔ kanranɲu inin be wɔu, anranw lɛi arugoi pilu doorojɛ goriyaa, giru bemɛ nɛ iŋiyaanbɛin. 5Yaanw gɔbe liyaa yaa, girupala bemɛ minɛ nɛ dujaa be wɔu, anranw gɔbe be le kijɛ be gi: «E inge dɛi inɛ ɔnmɔi wɔɔ gɔ inɛw yiunbe logoro nɛ dɛnɛuwɔi ma? 6Wo ɔn nɛ tolo. Kaa wo bulaai. Galile gana nɛ waaru wo bee le, e le sɔɔ wo sɔɔbe gɔ ajubu yɛnɛi. 7Wo ɔn gin’ gɛɛbe: ‘Inɛ Aini gɔi waajibi inɛw hakɛ kanranw numɔ nɛ kukunɔdɛin, woi baga jai nɛ pɛgɛ ye dadaadɛin. Kaa bai taaniye gɔ, waajibi wo bubulodo.’ » 8Kɔɔ waaru le yaanw gɔbe, Yesu sɔɔ gɔbe naŋaraanbɛin. 9Be kɔɔ gin’ ɔnsain gɔ nɛ gowaa, sɔɔ kɔɔbe puu Yesu jaŋu unrunw pɛli turusigɛ gɔbe bɛrɛ lee, inɛw wajunw gɔbe puu bɛrɛ lee yaa tagin. 10Yaanw wogɔbe, Mari Magudala ana bɛɛnnɛ gɔ lee, Jannɛ lee, Mari Jake na gɔ lee bei bee. Be lee, yaanw wajunw be le bɛin gɔbe lee, sɔɔ kɔɔbe, Yesu jaŋu unrunw tiyaaɲu gɔbe bɛrɛ yaa be tagu. 11Kaa be yaanw kɔɔbe be bɛrɛ sɔɔ tagu gɔbe tiyɛ sɛlɛ ga lugaa, yaanw gɔbe sɔɔ le gawanɛ. 12Kaa Piɛru ingelaa, jɔbaa, ɔnsain gɔ nɛ yaabe. Wo jimiyaan yɛnaa wo kanran, lɛn sɔi bojo gɔbei laa ye, kijɛ waja iyelu. Kɔɔ onu nɛ wo gowaa, kijɛ bii gɔ dɛi wo bɛrɛ maunɛ biyaa, ginrun wiyaabe. 13Bai wogɔ tee, Yesu jaŋu unrunw lɛi, ana dagi turu boi gɔ Ɛmause gɛɛɲu gɔ nɛ yaaubɛin. Ɛmause ana gɔ lee, Jerusalɛmu lee logoro nɛ kilomɛtɛrɛ pɛli turusigɛ gin’ too. 14Be tunmɔ bɛrɛ kijɛ biyaabe gɔbe wooi sɔɔ sɔɔubɛin. 15Be kɔɔ gin’ tunmɔ le sɔɔ sɔɔu, jiiru kunɔu yaau be wɔu, Yesu kuu womɔ le bei wiyaa dɔwaa be le yaaube. 16Kaa, kijɛ turu giri bemɛ dɛbaajɛ gin’, be Yesui jugɔnɛ. 17Wo be le kijɛ wo gi: «E tunmɔ le inge sɔɔ sɔɔu yaauwɔi ma?» Kɔɔ waaru le be kinɛ jinwɛnmaa, iŋiyaanbɛin. 18Turu baŋa boi womɔ Kileyopasu gɛɛɲu gɔ, Yesu aŋa saa gi: «Jerusalɛmu ana nɛ, bai lɛi ɔn nɛ sɔɔ bii gɔ, ui laa ye, inɛ Jerusalɛmu nɛ too ɛgɛlu gɔ aai?» 19Sɔɔ inge tɔgui ma Yesu selumaabe. Be saa gin: «Yesu Nasarɛtu bɛɛnnɛ gɔ bɛrɛ sɔɔ dɔi gɔi. Wo inɛ Ama titiyainɛ diyɛi bee: Wo wogɔ, birɛ womɔ nɛ lee, sɔɔ womɔ nɛ lee, Ama lee, inɛw lee giru nɛ tagaraabe. 20Ama bɛrɛ sadagadɔɔnɔw kuu bɛɛnw emɛ gɔbe lee, inɛw giru toin emɛ gɔbe lee, woi daa dɛi aabɛin. Kɔɔ gin’ be baga jai nɛ woi pɛgaa daabɛin. 21Emɛ ajubu emɛ nɛ, inɛ Yahutunwin gunɔ nɛ goonɔido gɔ woi ga bɛin. Kaa kɔɔ wooi nɛ, sɔɔ gɔbe bii, iye bai taaniye gɔi. 22Kaa yaanw gamuu logoro emɛ nɛ emɛ bɛrɛ sɔɔ be sɔi gɔ maunɛ kanraanbe: Be agapaali ɔnsain gɔ nɛ yaabɛin. 23Kaa be yiun womɔ kɔɔ nɛ tɛmɛnɛ kanraan, be wiyaa mɛlɛnkɛbe unrunbei be bɛrɛ tagaraabɛin gin. Mɛlɛnkɛ gɔbe womaa ɔnmɔi wɔɔ ga sɔin gin. 24Kɔɔ gin’ inɛw gamuu logoro emɛ nɛ gowaa, ɔnsain gɔ nɛ yaabɛin. Be yaanw gɔbe aŋai sɔin gin’, yaa kunrin tɛmaabɛin. Kaa be woi iyenɛ.» 25Kɔɔ waaru le, Yesu be le kijɛ gi: «E inɛw hakilɛ sɛnɛbei. Iyaa inɛw Ama titiyaanw sɔɔ sɔin gɔbe puu le yaa gawa ga kinɛ ebe ɔgiri yabaalɛ. 26Waajibi, Ama Yabanɛ Diyɛ tii gɔ, kɔɔ gin’ ɔɲɔ ye dooro womɔ nɛ wo yooun jaanla bee ma?» 27Kɔɔ gin’ Mɔise dɔn gɔbe lee, inɛw Ama titiyaanw dɔn tɔŋu gɔbe lee nɛ tɔlaa, Yesu unrun dɛi Ama Dɔn nɛ sɔɔ tɔŋaaɲu gɔbe puu tiyɛ, be bɛrɛ tagaabe. 28Be kɔɔ gin’ ana dagi be yaabe gɔ nɛ waaru be bɛruni le, Yesu oji womɔ dimiyaan ye gagalado gin’ kanraanbe. 29Kaa be wo bɛrɛ ɛjii gɛnyaan kijɛ be gi: «U emɛ le biyɛ, sabu digɛ yadiyɛjɛ, giri kurugu bɛruniyaain.» Wo be le biyɛ ga, be le ana kɔlɔ gɔ nɛ yowaabe. 30Yesu be le jaa nɛ daaun, buru jeɲaa, Amai birɛpoo tagaatiyaa, kabalaa, be bɛrɛ gamalaabe. 31Kɔɔ waaru le giri bemɛ pinɛlaa, be woi Yesui ga jugaabɛin. Kaa wo giru bemɛ nɛ manaai. 32Kɔɔ waaru le be tunmɔ le kijɛ be gɛɛbe: «Oju nɛ waaru emɛ le sɔɔ wo sɔɔbe le, waaru Ama Dɔn nɛ sɔɔ tɔŋaaɲu tiyɛ gɔ emɛ bɛrɛ wo tagabe le, kɔlɔ emɛ nɛ kinɛ emɛ ɛjii ɛɛli bele ma?» 33Yalu gɔ nɛ ɔgu ingelaa, be Jerusalɛmu pilemaa wiyaabɛin. Be Yesu jaŋu unrunw pɛli turusigɛ gɔbe lee, inɛw be le bɛin gɔbe lee mɔrinyaan be wɔu tɛmaabɛin. 34Inɛw gɔbe anranw lɛi gɔ le kijɛ be gɛɛbe: «Inɛw Baŋa naran go bulaai de! Wo Simɔ bɛrɛ unruin tagaraabe.» 35Inɛw lɛi gɔbe yaa, oju nɛ yaau be wɔu kijɛ be bɛrɛ bii gɔ lee, waaru Inɛw Baŋa buru wo kabulu le, bana woi be jugu sɔɔ gɔ lee be bɛrɛ tagaabɛin. 36Jaŋu unrunw gɔbe kɔɔ gin’ sɔɔu be gɛlɛu, Yesu kuu womɔ le wiyaa logoro bemɛ nɛ iŋiyaan, be le ɔn gin’ sɔi: «Jamu e le biyɛ.» 37Kaa jaŋu unrunw gɔbe kikinu manaa, ɛjii liyaabɛin, sabu be inɛ kikinui iyebɛin ga ajubaabɛin. 38Kaa Yesu be le ɔn gin’ sɔi: «E inge dɛi kikinu manu lee, kinɛ lɛilɛi lee le jowaa wɔi ma? 39E numɔ mabe lee, kubɔ mabe lee yɛnɛi. Mu tee mui. Mui tabu yɛnɛi. Inɛ kikinu, gojunawan lee, kii lee sɛlɛ. Kaa mu yasɔn ga e iyeuwɔi.» 40Kɔɔ gin’ sɔwaatiyaa, wo numɔ womɔbe lee kubɔ womɔbe lee, bei tagaraabe. 41Jaŋu unrunw gɔbe kɔɔ waaru le kinɛ ɛɛlu le jowaa gabaa, iyaa bei ɛjii maunɛ kanraan gabaa, be Yesui ma gawanɛ bɛin. Yesu waaru kɔɔ wo jugu le, wo be bɛrɛ ɔn gin’ selumu: «E ɔn nɛ kakayɔn yasin ma?» 42Kɔɔ gin’ wo selumaa be wo bɛrɛ iiju yɔɔru jɛɛlaa obaabɛin. 43Wo iiju gɔ yabaa be wooi giru nɛ tɛnwaanbe. 44Kɔɔ onu nɛ, be le kijɛ wo gi: «Ɔn nɛ, waaru e le mu bee le sɔɔ e bɛrɛ tagau mu bee gɔ woi. Mɔise tɔɔru dɔn nɛ lee, inɛw Ama titiyaanw dɔn gɔbe nɛ lee, Sɔmu dɔn gɔ nɛ lee, kijɛ mu dɛi tɔŋaaɲu gɔbe puu waajibi kibeun jaain wɔɔ.» 45Kɔɔ waaru le, bemaa Ama Dɔn nɛ sɔɔ tɔŋaaɲu gɔ paamu kanran dɛi, wo hakilɛ bemɛ pinɛlaabe. 46Wo be le ɔn gin’ gi: «Kijɛ tɔŋi gɔ unwɔ: Ama Yabanɛ Diyɛ tii gɔ waajibi ɔɲɛ diyɛ ihiyedo. Kaa bai taaniye gɔ wo yiun logoro nɛ bubulodo. 47Inɛw bemaa bana mɔɲu bemɛ dulomaatiyaa ye, hakɛ yaabu kanrun bɛɛ dɛi, Jerusalɛmu ana nɛ laa tɔlɔ ye, tɔgu wooi nɛ boi womɔ le waaju tagaun jaain wɔɔ. 48Ei kijɛ kɔɔbe sɛɛrɛ goowin. 49Mu, mu Ba kijɛ dɛi pui wo kunu gɔ, Kikinu Pilu gɔ e bɛrɛ titiidɔn. Kaa daa go gɔnrɔn goo ye wɛɛido kɔɔ e bɛrɛ mu tiido baa, e Jerusalɛmu nɛ kobiyɛi.» 50Kɔɔ onu nɛ Yesu, jaŋu unrunw gɔbei dimɛraan, Betani ana sibɛ go yaabe. Kɔɔ onu nɛ wo numɔ wajaraa, bei duba kanraanbe. 51Kɔɔ gin’ bei duba kanraun wɔu, wo be le kabiyaa, alagala go woi unin. 52Be kai, woi babaatiyaa, pilemaa kinɛ ɛɛlu diyɛ le Jerusalɛmu wiyaabɛin. 53Waaru wooi, be Ama boi sɔmɔu Ama Ginrun Diyɛ gɔ nɛ yatoiyobɛin.

will be added

X\