LUKA 22

1Buru kijɛ pidemu tolo janwan gɔ, Taŋagalu janwan gɛɛɲu gɔ bai gɔ bɛruniyɛunbe. 2Ama bɛrɛ sadagadɔɔnɔw kuu bɛɛnw gɔbe lee, Ama tɔɔru deerenw gɔbe lee, dabulu yagɔ tɔgu le Yesui ai ye daadɛin ma dɛi, bana dɛnɛubɛin. Kaa be mɔɔnu gɔ liliyɛbɛin. 3Setanu, kɔɔ gin’ Judasu, boi womɔ Isukariɔte gɛɛɲu gɔ nɛ yowaabe. Judasu kɔɔ Yesu jaŋu unrunw pɛli lɛisigɛ gɔbe logoro nɛ turu gɔ woi. 4Wo gowaa, Ama bɛrɛ sadagadɔɔnɔw kuu bɛɛnw gɔbe lee, Ama Ginrun Diyɛ garidu kuu bɛɛnw gɔbe lee yaa tɛmaa, be le bana Yesui numɔ bemɛ nɛ wo kunɔido sɔɔ sɔwaabe. 5Waaru sɔɔ kɔɔ be ɛgu le, kinɛ bemɛ gaai aabe. Be unrunbe wo bɛrɛ kɛɛlɛ ohobodɛin ga wo le pui jeɲaabɛin. 6Judasu, wogɔ yabaa, inɛw mɔɔnu gɔ soo sɛlɛ be wɔnu, bana Yesui numɔ bemɛ nɛ wo kunɔido dɛnɛube. 7Kɔɔ gin’ buru kijɛ pidemu tolo janwan gɔ, Taŋagalu pana dɛi peju ii bai sɛnwɛnɲu gɔ wiyaa dɔwaai. 8Yesu, Piɛru lee, Jan lee goonaa tiyaa, be le ɔn gin’ gi: «E, emɛ dɛi Taŋagalu pana emaa kaya ga, wogɔ yegerei yaai.» 9Be Yesu aŋa saa gin: «U emaa wogɔ yalu yagɔ nɛ yegere ga wɔu?» 10Yesu saa, be le kijɛ gi: «Yɛnɛi, waaru ana kɔlɔ gɔ nɛ yaa e yowaajɛ, e ainɛ turu toroi le dii duiyaa wo wɛɛnu e wooi sɛsɛgɛrɛdo. Ginrun wo yooido gɔ nɛ, wo le digi yoi. 11Ginrun baŋa gɔ le ɔn gin’ gɛɛi: ‘Jaŋudeerenɛ emɛ uwaa, unrun, jaŋu unrunw unrunmɔ le Taŋagalu pana deun nɛ unrunbe kayaido gɔ yago wɔɔ ma gi.’ 12Ginrun baŋa gɔ, ginrun sɔɔrɔ turu nɛ deun diyɛ e bɛrɛ tatagarado. Deun gɔ nɛ kijɛ kai emɛ sɛɛ puu e tɛtɛmɛdei. E wogɔ nɛ Taŋagalu pana yeguru yegerei.» 13Waaru jaŋu unrunw lɛi gɔbe ana kɔlɔ nɛ be yai le, bana bei tagin gin’ yintɛmi. Be kɔɔ gin’ Taŋagalu pana yeguru yegeraabɛin. 14Jaa kayaun waaru wo dɔwaa, Yesu, jaŋu unrunw tiyaaɲu womɔbe le jaa kaya ga dɛinyaanbe. 15Kɔɔ waaru le, Yesu be le kijɛ gi: «Ɔɲɛ nɛ mu yoomɔ nɛ, Taŋagalu janwan ɔn e le mɔrin ye kaya ga kinɛ ma nɛ ɛjii daariyaabɔn. 16Sabu, Ama diinɛ nɛ Taŋagalu pana tiyɛ gɔ kibeido baa, mu waja Taŋagalu pana kayaidolɔn.» 17Kɔɔ onu nɛ, Yesu resɛndii ilɛ gɔ jeɲaa, Amai birɛpoo tagaatiyaa, kijɛ wo gi: «Yabai, e wooi gamulu ye nɔɔi. 18Iye galaai ye, Ama diinɛ wɛɛido baa, mu resɛndii ilɛ asuu nɔɔidolɔn.» 19Kɔɔ onu nɛ, wo buru jeɲaa, Amai birɛpoo tagaatiyaa, kabalaa, jaŋu unrunw gɔbe bɛrɛ obou kijɛ wo gi: «Ɔn goju mai, [e dɛi obin gɔ woi. Mui ajuba ga kunrin kanrain.» 20Pana kayaajiyaa, wo kɔɔ gin’ resɛndii ilɛ gɔ jeɲaa, be bɛrɛ obou, ɔn gin’ gi: «Resɛndii ilɛ ɔn Ama aaru kanai, ili ma e dɛi togiyeido gɔ le aaru kunin gɔ woi.] 21Kaa yɛnɛi! Inɛ mui jamaido gɔ, baɲa nɛ mu le numɔ kunɔuwɔ. 22Inɛ Aini gɔ, Ama bana wo dɛi wo aaraabe gin’, waajibi wo yiyinwɛndo. Kaa inɛ woi numɔ nɛ kunɔido gɔ bɔnrɔn wo le yɔɔ.» 23Kɔɔ onu nɛ be, logoro bemɛ nɛ inɛ aa wogɔ kanrando ma ga, tunmɔi selumɛubɛin. 24Kaa jaŋu unrunw gɔbe logoro nɛ, jaŋu ii yagɔi wajunw gɔbe dɛi sigɛ lugaa sɛin ma jugɔ dɛi, jiiru diyɛ ingelaabe. 25Kaa Yesu be le kijɛ gi: «Aduna ɔgɔnw gɔbe, inɛw bemɛ kuu nɛ gɔnrɔn yasin. Iyaa inɛw laamu kanranw gɔbe, inɛw, bei ɛju kanranwin gɛgɛɛɲu. 26Kaa e sibɛ go kunrin biyɛmɔnɔugi. Logoro ebe nɛ inɛ wo sigɛ gɔ, unruin dagunɛ gin’ bojo. Iyaa inɛ kuu baŋai wɔɔ gɔ, birɛbirɛnɛ gin’ wo biyɛmɔ. 27Sabu inɛ dɛinyaan jaa kayau wɔɔ lee, inɛ jaa jeɲu jɛɛlɛnɛ gɔ lee, be lɛi logoro nɛ kuu baŋa gɔ aai? Inɛ jaa kayau daan gɔi laa ma? Kaa, mu logoro ebe nɛ inɛ jaa jeɲu jɛɛlɛnɛ gɔ gin’ wɔun. 28E kai, waaru nau ma wooi nɛ mui pajali. 29Mu Ba maa laamu kanran ga, gɔnrɔn mu bɛrɛ bana wo obu gin’, mu yaa, laamu kanran ga, gɔnrɔn e bɛrɛ obouwɔn. 30Kunrin e diinɛ ma nɛ mu le jaa kakayadei, mu le nɔnɔɔdei. E iyaa Yahutunw tɔgu pɛli lɛisigɛ gɔbe laama ga ɔgɔdɔin nɛ dɛdɛinyɛndei.» 31Inɛw Baŋa kijɛ gi: «Simɔ, Simɔ, yɛnɛ, Setanu yuu gin’ ei bɛɛ ye wɛɛ ga ei selumaabe. 32Kaa mu gagawu uwɔ dogonɔu ga, u dɛi Ama gɛnyaanbɔn. Kunrin, waaru pilemaa mu bɛrɛ u wiyaajɛ, jaŋu unrunw u bɔɔnw gɔbe gagawu gɔ paŋa bariyɛmɔ.» 33Piɛru, Yesu le kijɛ gi: «Inɛw Baŋa, mu jiiru wɔlɔ go kaju nɛ u le yoyoodɔn. Iyaa u le yiyinwɛndɔn.» 34Kaa Yesu aŋa womɔ saa gi: «Piɛru, mu u bɛrɛ tagauwɔn, iye kubɔ taanu mui inɛɛ gɛɛlu u wɔnu, ɛɲɛ kɔnwɔindolo.» 35Yesu, kɔɔ onu nɛ be le kijɛ gi: «Waaru ei tiiu, ebaa kɛɛlɛ kuni ma, jɛmɛ ma, taga ma jeɲɛnɔu ga mu gɛɛbe le, e kijɛ inge kai siyaabei ma?» Be saa, unrunbe kijɛ turu kanran kai siyɛnɛ gin. 36Kaa wo be le saa gi: «Nɛɛ, kanɛ, inɛ kɛɛlɛ kuni sɛɛ, wogɔ jeɲɛ. Kunrin inɛ jɛmɛ sɛɛ kanran, jɛmɛ jeɲɛ. Inɛ kijɛ kɔɔbe sɛlɛ gɔ, arugoi diyɛ womɔ dɔnraan ye, polukaaba wo ɛbɛmɔ. 37Mu e bɛrɛ tagauwɔn, sɔɔ Ama Dɔn nɛ mu dɛi tɔŋaa: “Woi mɔɲu kanrannɛ gin’ lugaabɛin” gin gɔ, sɔɔ wogɔ mu dɛi kibeun jaain wɔɔ.» 38Be saa gin: «Inɛw Baŋa, polukaaba lɛi unwɔ.» Yesu saa: «Sɔɔ kɔɔ baa!» 39Yesu bana pɔɔlɔ baa wo kanranjɛ gin’, wo ana gɔ pajaatiyaa, Oliwe tetemɛ gɔ nɛ yai. Jaŋu unrunw womɔ onu womɔ nɛ yadimɛbɛin. 40Waaru yalu gɔ nɛ wo dɔi le, be le kijɛ wo gi: «Ebaa subɔrɔ nɛ yoonɔu ga, e amagɛɛn le biyɛi.» 41Kɔɔ onu nɛ wo genɛ bemɛ nɛ dɔraa gowaa, wawage gɔ tibu kamaaɲu ye yalu dɔɔido gin’ yaa, tuŋiyaan, 42Ama ɔn gin’ gɛnyaanbe: «Mu Ba, u yabaajɛu ye, ɔɲɛ ɔn mu le wageniyɛnmɔ. Kaa, diŋɛ uwɔ gɔi laa ye, diŋɛ ma biyɛmɔnɔu.» [ 43Mɛlɛnkɛ turu wo bɛrɛ wiyaa, wo bɛrɛ paŋa obaabe. 44Yesu kinɛjiun diyɛ le wɔu, Ama ɛjii gɛnyaanbe. Soo womɔ gɔ ili tegu gin’ biyaa, minɛ nɛ sugoube.] 45Kɔɔ gin’ Ama gɛnyaantiyaa, ingelaa, jaŋu unrunw womɔ bɛrɛ pilemaa waaru wo wɛɛ le, be kinɛjiun dɛi giri yeiyaa be wɔu tɛmaabe. 46Yesu be le kijɛ gi: «E inge dɛi giri yeiyeuwɔi ma? Ebaa subɔrɔ waaru le numɔnɔu ga, ingele ye Ama gɛɛin.» 47Yesu sɔɔ sɔɔu wo wɔu, inɛw kulɔ wiyaa yindɔin. Ainɛ Judasu gɛɛɲu gɔ, jaŋu unrunw pɛli lɛisigɛ gɔbe logoro nɛ turui gɔ, inɛw kulɔ gɔi dimɛraan wo gɛlɛbe. Wo kɔɔ gin’ Yesu genɛ nɛ dɔwaa, woi amugiyaabe. 48Yesu wo le kijɛ gi: «Judasu, u Inɛ Aini gɔi amugiyaa poonaatiyaa, kɔɔ gin’ woi numɔ nɛ kunɔjɛu ma?» 49Yesu jaŋu unrunw, wo le bɛin gɔbe, sɔɔ biyɛido gɔ iyaa, Yesu le ɔn gin’ gin: «Inɛw Baŋa, emaa polukaaba le be le jaiyɛ ma?» 50Kɔɔ gin’ jaŋu unrunw gɔbe logoro nɛ turui, Ama bɛrɛ sadagadɔɔnɔnɛ kuu baŋa birɛbirɛnɛ gɔ polu le tɛraa, suguru iin gɔ jabalaa goonaabe. 51Kaa Yesu saa gi: «E kɔɔ gin’ pajai!» Kɔɔ onu nɛ wo ainɛ gɔ suguru tabaa, woi bajamaabe. 52Kɔɔ onu nɛ Yesu, Ama bɛrɛ sadagadɔɔnɔw kuu bɛɛnw gɔbe lee, Ama Ginrun Diyɛ garidu kuu bɛɛnw gɔbe lee, Yahutunw inɛw naw gɔbe lee woi aa ga wiyaabɛin gɔbe le ɔn gin’ gi: «E tebutɛbɛnɛ bana aaɲu gin’ polukaaba lee, baga lee gɛliyaa wɛɛjɛi ma? 53Mu bai puu, Ama Ginrun Diyɛ gɔ nɛ e le tobɔn. Kaa e mui aali. Kaa waaru ebe gɔ ɔn woi. Ɔlɔ paŋa waarui.» 54Be Yesui aa, woi dimɛraan, Ama bɛrɛ sadagadɔɔnɔnɛ kuu baŋa ginrun nɛ jɛyaabɛin. Piɛru wagee, mɔɔnu gɔ onu nɛ yadimɛbe. 55Ginrun gonɔ gɔ logoro nɛ, inɛw, yaun tanugaa, wogɔ genɛ nɛ daanbɛin. Piɛru, logoro bemɛ nɛ dɛinyaanbe. 56Kaa ginrun gɔ gunɔ yaanran turu, yaun wijɛ gɔ nɛ Piɛru wo daaun iyaa, woi ɛjii yɛnɛu kijɛ wo gi: «Ainɛ ɔn kanran Yesu le bee.» 57Kaa Piɛru, sɔɔ gɔ kɔri ga saa gi: «Yaanran, mu ainɛ kɔɔ inɔn.» 58Siin wo kanraan, inɛ waja Piɛrui iyaa, kijɛ gi «U kanran be bɔɔnɛ turui.» Kaa Piɛru saa gi: «Ainɛ, wogɔ mui laa!» 59Lɛɛrɛ turu gin’ wo galaa, inɛ waja gimaa gimaa sɔwaa gi: «Naran go, ainɛ ɔn yaa, Yesu le bee, sabu wo kanran Galile gana bɛɛnnɛi.» 60Kaa, Piɛru kijɛ gi: «Hei, ainɛ! Mu sɔɔ u gɛɛjɛ gɔ inɔn.» Piɛru kɔɔ gin’ sɔɔu wo gɛlɛu, waaru wogɔ le tee, ɛɲɛ kɔnwaanbe. 61Inɛw Baŋa kigelemaa, Piɛrui yɛnaabe. Kɔɔ waaru le Piɛru, Inɛw Baŋa wo bɛrɛ sɔɔ sɔi gɔi naŋaraanbe: «Iye digɛ ɛɲɛ kɔnwɔnmɔ nɛ, u kubɔ taanu mui inɛɛu ga gɛgɛɛdou.» 62Piɛru, sɔɔ kɔɔ waaru wo naŋurun le bain go gowaa, ɛjii pii piyaabe. 63Inɛw Yesui gɛlɛbɛin gɔbe, woi yamurinyɛnmɔubɛin. Iyaa, woi lagaubɛin. 64Be girupala womɔ sɔi le kɔmaatiyaa ye, woi selumaa ye, ɔn gin’ gɛɛubɛin: «Inɛ aa ui lagu ma jugɔ bɛɛ!» 65Be Yesui duyɔu, kijɛ mɔɲu joo wo dɛi gɛɛubɛin. 66Baa wo yaa, Yahutunw inɛw naw gɔbe lee, Ama bɛrɛ sadagadɔɔnɔw kuu bɛɛnw lee, Ama tɔɔru deerenw gɔbe lee tunmɔ le mɔrinyaan, Yesui badubadanw diyɛnw bemɛ giru nɛ jɛyaa yaabɛin. 67Wo le kijɛ be gɛɛbe: «Ama Yabanɛ Diyɛ tii gɔ ui ye, emɛ bɛrɛ taga.» Yesu be le kijɛ gi: «Mui ga, e bɛrɛ tagaajɔn kanran e wogɔ le gawaidelei. 68Iyaa, mu e bɛrɛ selumu selumaajɔn kanran e aŋa ma saaidelei. 69Kaa, sɔɔ ɔnbe galaai ye, Inɛ Aini gɔ, Ama, gɔnrɔn baŋa numɔ iin sibɛ nɛ dɛdɛinyɛndo.» 70Be wooi puu sɔwaa gin: «Kole, Ama Aini gɔ, ui?» Yesu saa gi: «Bana e gɛɛjɛ gin’ wogɔ mui.» 71Kɔɔ gin’ be saa gin: «Nɛɛ kai, sɛɛrɛ dɛnɛnu doori. Emɛ kuu emɛ le aŋa sɛɛrɛ womɔ gɔ ɛgaabɛin.»

will be added

X\