LUKA 21

1Yesu waaru kuu jɛiin kanrun le, wo ɔgɔ unrunw gɔbe wɛi wɛi ye, Ama Ginrun Diyɛ yalu sin obu kunɔɲu gɔ nɛ sin obu bemɛ kunɔubɛin ga iyaabe. 2Iyaa, yapanunɛ dɛguginɛ turu yaa wiyaa, buudu saa wo dagi gɔ, buudu ii lɛi kunɔu wo wɔu, Yesu iyaabe. 3Wo saa gi: «Mu naran go e bɛrɛ tagauwɔn, yapanunɛ dɛguginɛ kɔɔ, inɛw wajunw puu dɛi sigɛ buudu kunu. 4Sabu inɛw wajunw gɔbe puu buudu sigɛ bemɛi jɛɛlaa kuni. Kaa yaanran kɔɔ, dɛgu womɔ le buudu wo kunu gɔi laa ye, buudu waja pana ɛbɛɲu sɛlɛ.» 5Inɛw gamuu Ama Ginrun Diyɛ gɔ aŋai tibu ɛju ɛju le ujaaɲu gɔ lee, sin obu kijɛbe le aŋai saŋaraanɲu gɔ lee sɔɔ sɔɔubɛin. Kɔɔ waaru le, Yesu saa gi: 6«Bai yawɛɛjɛ, kijɛ e yɛnɛjɛ ɔnbe, tibu, tibu waja kuu nɛ wo timɛnu iyemɔidolo. Puu damatiidɛin.» 7Kaa be wo bɛrɛ selumaa gin: «Jaŋudeerenɛ, sɔɔ kanɛ u sɔi gɔ waaru inge le biyɛdo? Iyaa waaru gɔ dɔwaai ga, sɛɛrɛ inge le jugɔmɔdo?» 8Yesu saa gi: «Kuu ebe kajubai, ei lelemɔnɔugi. Sabu inɛw joo boi ma kunɔ ye wɛwɛɛdɛin. Be, Ama Yabanɛ Diyɛ tii gɔ unrunbei gɛɛdɛin. Be iyaa waaru gɔ dɔwaai gɛɛdɛin. E bei dimiyɛnnɔugi. 9Kɔmɔ siɲɛ ma, murutu ma sɔɔ ɛgaajɛi ye, e bimili ye biyɛnɔugi. Sɔɔ kɔɔbe laa biyɛ ga waajibi. Kaa ginsɛsai, sɔɔ kɔɔbe onu nɛ aduna dogogu gɔi laa.» 10Yesu iyaa be le kijɛ gi: «Tɔgu turu, tɔgu waja le jajaiyɛdo. Laamu, laamu waja le jajaiyɛdo. 11Minɛjigu diyɛ diyɛ bibiyɛdo. Aduna sibɛ dɛin dɛin nɛ giyɛ lee, jaabu lee kijɛ inɛi liirɛmu lee, alagala goi ye sɛɛrɛ diyɛbe lee bibiyɛdo. 12Kaa kɔɔbe biyɛmɔ nɛ, ei ahaadɛin, ei tɔtɔɔɲɔdɛin. Saliyɛ nɛ ei jɛyaa ga, Ama gɛɛn ginrun gɔbe nɛ ei ahaadɛin. Ei kaju nɛ kukunɔdɛin. Boi ma le gawaa e wɔɔ gɔ dɛi, inɛw ɔgɔnw lee, sɛmɛgunw lee bɛrɛ, ei jɛyayaadɛin. 13Kaa e wogɔ le digɛnu sɛɛrɛ ma goowin bibiyɛdei. 14Sɔɔ ɔn kinɛ ebe nɛ kunɔi: Saliyɛ kiru yalu nɛ yaa ye, e sɔɔ inge sɔɔdei ma, waaru gɔ dɔɔmɔ nɛ ajubanɔugi. 15Sabu mu e bɛrɛ sɔɔ lee, hakilɛ lee ohobodɔn. Jaŋuw ebe logoro nɛ, inɛ turu kanran wogɔ le jiiru bɛɛidolo, inɛ turu kanran wogɔ sɔnu goonu bɛɛidolo. 16Halu, ei naranw lee, e ba unrunw lee, e maranw lee, e anrungebe kanran, numɔ nɛ ei kukunɔdɛin. Be logoro ebe nɛ joo dadaadɛin. 17Boi ma le gawaa e wɔɔ gɔ dɛi, inɛw puu ei ihibiliyɛdɛin. 18Kaa halu kukuli ebe koturu kanran manaidolo. 19E muyɔn ebe le ɔnmɔsɔgɔ gɔ bɛbɛɛdei. 20«Waaru kɔmɔ numɔbe Jerusalɛmu ana gɔ gɔŋaa be wɔun e iyaajɛ, ana gɔ jɔgɔidɛin waaru bɛruniyaain ga e jugi biyɛi. 21Kɔɔ waaru le, Judea gana nɛ inɛw toin gɔbe, be jɔbɔ ye, kokoobe sibɛ go be yaaun jaain wɔɔ. Kunrin inɛw Jerusalɛmu ana kɔlɔ nɛ toin gɔbe, jɔbɔ ye be gooun jaain wɔɔ. Iyaa inɛw olu go wɔin gɔbe ana kɔlɔ nɛ yooun jaanla. 22Sabu kijɛ Ama Dɔn nɛ tɔŋaaɲu gɔ puu kibe ga, bai wogɔ duguru goi baii biyɛdo. 23Bai kɔɔbe le yabɛrɛgunw lee, yaanw unrunw aramɔw lee bɛrɛ mɔɲi biyɛdo. Sabu gana gɔ nɛ yanwan diyɛ bibiyɛdo. Ama kinɛbanrun, tɔgu kɔɔ inɛw kuu nɛ susugodo. 24Polukaaba le inɛw kɔɔbei dadaadɛin. Gana wooi nɛ bei gunɔ jɛyaadɛin. Diinɛ bemɛ galaido baa, tɔgu wajabe inɛw wɛɛ ye Jerusalɛmui gɔnrɔn ye kubɔ le namanu biyɛdɛin.» 25«Nai nɛ lee, iyepilu nɛ lee, tolobe nɛ lee sɛɛrɛ bibiyɛdo. Minɛ nɛ, gana inɛw, kinɛ manu diyɛ le bibiyɛdɛin. Be nɛudii lee, diigunu lee siɲɛ diyɛ gɔ dɛi saii bibimiliyedɛin. 26Aduna yalu wooi nɛ sɔɔ biyɛido ajubu dɛi inɛw ɛjii kinwɛn ye yinwɛndɛin giye biyɛdɛin. Sabu alagala kijɛ paŋagunw gɔbe puu jijigedɛin. 27Inɛ Aini gɔ, anrankulumɔ nɛ gɔnrɔn lee, dooro diyɛ lee wo wɛɛnu, ihiyemɔdo. 28Sɔɔ kɔɔbe biyɛi tɔlaa ye, kɔɔ waaru le e kinɛ ɛɛli le kuu jeɲɛi, anrangaju le biyɛi, sabu kuu ebe goonu bai gɔ bɛruniyaain.» 29Yesu, kɔɔ onu nɛ be bɛrɛ taanrinyɛn turu daan, kijɛ be le wo gi: «E gaa nabe lee, tiun wajunw gɔbe puu lee yɛnɛi. 30Waaru numɔ ii bemɛ liyɛ dɔgɔi tɔlaaɲu e kuu ebe le wogɔ iyaajɛi ye, jinrɛn dɔwaai ga jujugɔdei. 31Kɔɔ bana wɔɔ gin’ sɔɔ kɔɔbe wɛɛu be wɔu waaru e iyaajɛ, Ama diinɛ gɔ bɛrii wɔɔ ga jugi biyɛi. 32Mu naran go e bɛrɛ tagauwɔn, iye inɛw gɔbe logoro nɛ, gamuu, be yinwɛnmɔ nɛ, sɔɔ kɔɔbe puu bibiyɛdo. 33Alagala lee, minɛ lee gagaladɛin, kaa sɔɔ mabe asuu galaidenɛ.» 34«Kɔɔ dɛi e kuu ebe kajubai! E jaa gaa kayi lee, kɔɲɔ nɔi bimili lee, aduna sɔɔ jiire lee le kinɛ ebe nɛ joonɔ ye biyɛnɔugi. Kɔɔi laa ye, Inɛ Aini gɔ bai wɛɛido ɔgu kɛu soo sɛlɛ ebe nɛ wɛɛdo, 35pɛnrɛn gin’ biyɛdo. Sabu bai wogɔ aduna nɛ inɛw wɔin wooi kuu nɛ kubɔ turu sugodo. 36Ebaa kijɛ wɛɛido wooi nɛ, gɔnrɔn ɛli gooɲu siyɛ ga, ebaa, Inɛ Aini gɔ giru nɛ iŋi bɛɛ ga, e giri yeiyenɔugi. Iyaa waaru wooi amagɛɛn le biyɛi.» 37Kunrin, aga waaru le, Yesu, Ama Ginrun Diyɛ gɔ nɛ inɛwin deereube. Kaa digɛ wo gowaa ye, Oliwe tetemɛ gɛɛɲu gɔ nɛ yai ye diinyɛunbe. 38Agapaali, inɛw gɔbe wooi Ama Ginrun Diyɛ gɔ nɛ, sɔɔ womɔ keŋiyɛn ga wɛɛubɛin.

will be added

X\