LUKA 20

1Kɔɔ gin’ bai turu Yesu, Ama Ginrun Diyɛ gɔ nɛ deeru deereu, Kibɛru Ɛju gɔ tagau wo wɔu, Ama bɛrɛ sadagadɔɔnɔw gɔbe lee, Ama tɔɔru deerenw gɔbe lee, Yahutunw inɛw naw gɔbe lee kowiyaa, 2wo bɛrɛ ɔn gin’ sɔin: «Kijɛ inge uwɔ dɛi u kijɛ ɔnbe kanraunwɔu? Inɛ aa u bɛrɛ gɔnrɔn obaa, uwaa kijɛ ɔnbe kanran gi ma emɛ bɛrɛ taga.» 3Yesu aŋa bemɛ saau, ɔn gin’ sɔi: «Mu kanran, selumu turu ɔn sai e bɛrɛ selumɛdɔn. Jan womaa batise kanran ga, Ama woi tii ma, inɛw woi tii? Wogɔ mu bɛrɛ tagai.» 5Yesu kɔɔ gin’ bei selumaa wo kanran, be tunmɔ le sɔwaa ɔn gin’ gɛɛbɛin: «Emɛ Ama woi tii giyaaɲu ye, wo emaa inge dɛi sɔɔ womɔ le gawanɛ kanrin ma gɛɛdo. 6Kaa, iyaa emɛ inɛw woi tii gin ye, inɛw puu tibu le emi kakamadɛin. Sabu inɛw puu Jain inɛ Ama titiyainɛ ga gawaa bɛin.» 7Be kɔɔ gin’ saa, unrunbe inin gin. 8Yesu yaa aŋa bemɛ saa, unrun kanran gɔnrɔn le kijɛ ɔnbe unrun kanranjɛ gɔ sɔɔidolɔn gi. 9Yesu, inɛw bɛrɛ taanrinyɛn ɔn daan, ɔn gin’ sɔi: «Ainɛ turu, resɛn sadiŋɛ yegeraa, resɛn yibaabe. Kɔɔ onu nɛ, wo resɛn birɛbirɛnw le aaraa, sadiŋɛ gɔ be bɛrɛ gawaraatiyaa, wo gowaa ana yaa tanwaanbe. 10Resɛn kɔɔɲu waaru wo dɔwaa, sadiŋɛ baŋa gɔ, birɛbirɛnɛ unrunmɔ turu goonaa, resɛn birɛbirɛnw gɔbe bɛrɛ tiyaa, bemaa resɛn unrunmɔ kuru obo tii gi. Kaa inɛw gɔbe woi aa lagaa, numɔ ije le pilemaa tiyaabɛin. 11Iyaa sadiŋɛ baŋa, birɛbirɛnɛ waja goonaa tiyaabe. Kaa inɛw gɔbe kɔɔbaŋai lagaa, woi duyaa, numɔ ije le woi digaa tiyaabɛin. 12Kɔɔ onu nɛ wo iyaa inɛ taaniye gɔ tiyaabe. Kaa be woi barumu kanraantiyaa, bain go woi kamaa gooni. 13Kɔɔ onu nɛ sadiŋɛ baŋa gɔ gi: ‘Mu nɛɛ yani kanrandɔn ma? Mu aini ibɛ ma gɔi titiidɔn. Ajubu ma nɛ, be woi kai bababadɛin.’ 14Kaa resɛn birɛbirɛnw gɔbe, aini gɔ wɛɛu wo wɔu iyaa, be tunmɔ le aaraa, ɔn gin’ sɔin: ‘Ɔn aini kɛn balanɛ gɔi. Sadiŋɛ gɔ emɛi biyɛ ga emɛ woi daamɔi.’ 15Be kɔɔ gin’ aini gɔi sadiŋɛ gɔ nɛ biɲaa goonaa daabɛin. «Nɛɛ, sadiŋɛ baŋa gɔ wo be bɛrɛ inge kanrando? 16Wo wiyaai ye, resɛn birɛbirɛnw kɔɔbei daatiyaa ye, sadiŋɛ unrunmɔ inɛw waja bɛrɛ gagawarado.» Inɛw gɔbe waaru kɔɔ be ɛgu le, kijɛ be gi: «Ama kɔɔ asuu biyɛmɔnɔu!» 17Kaa, Yesu bei yɛnaa be le ɔn gin’ gi: «Kɔɔi biyaa ye, Ama Dɔn nɛ sɔɔ tɔŋaaɲu ɔn tiyɛ gɔ ingei? “Ginrun ujɔnw tibu kamaa pajin gɔ, tibu wogɔ, ginrun sibɛ tibu gɔ woi bii.” 18Tibu kɔɔ le inɛ tomiyaan numaa ye, dɔdɔrɔ womɔ jɔjɔgɔdo. Nɛɛ, tibu gɔi, inɛ gɔ kuu nɛ sugu ye, woi gɛjɛ ye punau tanugado.» 19Ama tɔɔru deerenw lee, Ama bɛrɛ sadagadɔɔnɔw kuu bɛɛnw lee, waaru wogɔ le womaa unrunbe dɛi taanrinyɛn kɔɔ dain ga jugaabɛin dɛi, woi aa ga bana dɛnɛubɛin. Kaa be mɔɔnu gɔ liyaain. 20Be Yesui seberei tɔlaabɛin. Kunrin be inɛw tebutebenw, unrunbei inɛw teitai wɔin gin’ bojaa, Yesu bɛrɛ tiyaabɛin. Be Yesu sɔɔ sɔɔido gɔ le digɛnu woi sɛmɛginɛ numɔ nɛ kunɔ ibɛɛ bɛin. 21Kɔɔ gin’ be selumu ɔn wo bɛrɛ selumi: «Jaŋudeerenɛ, emɛ igii wɔin, u sɔɔ uwɔ nɛ lee, deeru uwɔ nɛ lee teitai wɔu. U inɛw kabu kunɔɔlɛu. Kaa u Ama oju bana dimiyɛun jaan gɔ daii deerejɛu. 22Nɛɛ, Rɔmɛ ɔgɔnɛ diyɛ gɔ bɛrɛ, sɛgu emɛ tujɔun jaain wɔɔ ma jaanla?» 23Kaa Yesu, ajubu mɔɲu bemɛ jugaabe gɔ digɛu, be le kijɛ wo gi: 24«E sarudu buudu turu mu bɛrɛ jɛɛlu yɛnɛmɔi. Buudu gɔ nɛ, kuu yegeraa too gɔ lee, boi tɔŋaa wɔɔ gɔ lee aa mɔi?» Inɛw gɔbe saa, Rɔmɛ ɔgɔnɛ diyɛ mɔi gin. 25Yesu saa gi: «Kɔɔi biyaa ye, ɔgɔnɛ diyɛ mɔi kijɛ wɔɔ gɔ, wo bɛrɛ oboi. Kijɛ Ama mɔi wɔɔ gɔ, Ama bɛrɛ oboi.» 26Be Yesui, sɔɔ inɛw giru nɛ wo sɔɔbe le digɛu bana aaun bɛɛnɛ. Kaa aŋasaara womɔ gɔ dɛi, be bɛrɛ maunɛ biyaabe. Be sɔɔ turu kanran sɔɔnɛ. 27Kɔɔ onu nɛ, Saduseyɛnbe gamuu, inɛw bulogu wɔlɔ gɛɛnw gɔbe, Yesui wiyaa tɛmi. 28Be selumu ɔn Yesu bɛrɛ selumi: «Jaŋudeerenɛ, Tɔɔru dɔn gɔ nɛ Mɔise emɛ dɛi ɔn gin’ tɔŋaa paju: “Ainɛ turu yaanran jɛyaa, yaanran kɔɔ le ii bɛɛlu go yinwaain biyaai ye, wo bainɛ gɔ yapanunɛ gɔ jeɲɛ ye ii naraan ye, inɛ yinwɛnnɛ gɔ bɛrɛ tɔgu wo tɔgɔun jaain wɔɔ.” 29Kunrin anranw sɔi yabɛin. Be wooi ba turu, na turu. Delenɛ gɔ yaanran jeɲaa, ii bɛɛlu wɔu yinwaain. 30Wo suŋɔrɔn gɔ yapanunɛ gɔ jeɲu. 31Iyaa ainɛ taaniye gɔ yaa, yapanunɛ gɔi jeɲaabe. Kɔɔ gin’, anranw sɔi gɔ puu dinrɛn le dinrɛn le yapanunɛ gɔ jeɲaa, ii bɛɛlu wɔu yinwaain. 32Kɔɔ onu nɛ, yaanran gɔ kanran wiyaa yinwaain. 33Nɛɛ, anranw sɔi gɔ puu yaanran gɔi jeɲaabɛin gɔ digɛu, yiun bulogu bai gɔ le, yaanran gɔ aa mɔi biyɛdo?» 34Yesu aŋa bemɛ saa gi: «Yaanw jeɲɛw gɔbe lee, igɛ ɛɛnw gɔbe lee, wogɔ aduna ɔn inɛw gɔbei. 35Kaa inɛw bulogu gɔ nɛ lee, aduna wɛɛido gɔ nɛ lee biyɛun dagaa ga lugaaɲu gɔbe, anranw lee, yaanw lee tunmɔ jeɲɛidenɛ. 36Bei waja yinwɛindolo. Sabu be mɛlɛnkɛbe gin’ bibiyɛdɛin. Bei Ama unrunwin. Sabu be yiun nɛ bulaain. 37Yiunbe bubulodɛin gɔ, Mɔise wogɔ daii sɔwaabe. Uriye turu yaun tɛgɛbele ga yalu tɔŋɔ gɔ nɛ, Mɔise Inɛw Baŋa womaa Abarahamu Amai, Isaka Amai, iyaa Jakɔbu Amai gi.» 38Yesu iyaa baraa gi: «Ama, inɛw yiunbe Amai laa, kaa inɛw ɔnmɔi wɔin Amai. Sabu Ama nɛ, inɛw womɔ wooi ɔnmɔi wɔin.» 39Ama tɔɔru deerenw gamuu saa gin: «Jaŋudeerenɛ, aŋasaara uwɔ gɔ ɛjii wɔɔ.» 40Kunrin, be waja Yesu bɛrɛ selumu turu kanran selumɛ ga daariyɛnɛ. 41Yesu be le kijɛ gi: «Ama Yabanɛ Diyɛ tii gɔ, yani inɛw woi Dawide tiruwɛnɛi gɛɛuwɔin ma? 42Sabu Dawide kuu womɔ le Sɔmu dɔn nɛ kijɛ gi: “Inɛw Baŋa Ama, Inɛw Baŋa ma le ɔn gin’ gi: ‘Jaŋuw uwɔ gɔbe gɔnrɔn ye, kubɔ uwɔ doɲu nɛ yai mu kunɔido baa, uwɔ numɔ iin ma sibɛ nɛ wɛɛ dɛinyɛn.’” 44Kɔɔ gin’ Dawide, Ama Yabanɛ Diyɛ tii gɔ Inɛw Baŋai gi. Nɛɛ, Inɛw Baŋa womɔ wo tiruwɛnɛi yani bii bɛɛjɛ?» 45Inɛw gɔ puu woi keŋiyɛun be wɔu, Yesu, jaŋu unrunw womɔ gɔbe le kijɛ gi: 46«Ama tɔɔru deerenw gɔbe dɛi kuu ebe kajubai. Be arugoi diyɛ diyɛ kunɔ ye gɔŋɔlɔ ga be bɛrɛ saii ɛjii wɔɔ. Iyaa be taibe nɛ inɛw bei poonɔ ga be bɛrɛ ɛjii wɔɔ. Ama gɛɛn ginrun nɛ yalu inɛw bei iyeɲu nɛ dɛinyɛn lee, jaa diyɛ yalu nɛ bei boonaa ye, inɛw diyɛnw yalu nɛ dɛinyɛn lee, be wogɔi dɛnɛɲu. 47Inɛw kɔɔbe yapanuw kijɛ sɛɛ puu ɛlɛjɛɛɲu. Kaa unrunbei inɛw ɛjubei tagaradɛin giye, be amagɛɛn pala pala gɛɛnɲu. Be tujɔ mɔɲu be le jaan gɔ bɛbɛɛdɛin.»

will be added

X\