LUKA 2

1Waaru wogɔ le, Rɔmɛ ɔgɔnɛ diyɛ Ogusute gɛɛbɛin gɔ, laamu womɔ gana gɔbe nɛ, inɛw gɔbe wooi lugo ga, tɔɔru ginɛgaabe. 2Lugo pɔlɔ wogɔ waaru le, Siri gana nɛ sɛmɛginɛ daanbe gɔ, Kiriniusu gɛɛbɛin. 3Inɛ tuturu puu gowaa, inɛ kanma ana womɔ tɔitɔi nɛ yaa ye, unruin lugomɔbe. 4Kɔɔ gin’, Josɛpu yaa, Galile gana, Nasarɛtu nɛ gowaa, Judea gana nɛ, Dawide ana, Bɛtɛlɛhɛmu gɛɛbɛin gɔ nɛ yaabe. Sabu wo Dawide ginrun bɛɛnnɛi, wo tiruwɛnɛi. 5Josɛpu, boi unrunmɔ lee, yaalai womɔ Mari boi lee tɔŋɔmɔi yaabe. Mari bɛrɛ le bee. 6Waaru Bɛtɛlɛhɛmu nɛ be bee le, Mari bɛrɛ dɔwaai. 7Wo bɛrɛ pɔlɔ unrunmɔ aini naraan, sɔi le munaa, arusɛgɛ koro nɛ duunaabe. Sabu, yerunw ginrun sugo yalu gɔ nɛ, be yalu bɛɛnɛ. 8Gana turu wogɔ nɛ, pejugirɛnw olu nɛ yabɛin. Be bɛlu kulɔ bemɛ dɔmɔnu baa yaaubɛin. 9Inɛw Baŋa mɛlɛnkɛ turu, giru bemɛ nɛ wiyaa iŋiyaanbe. Ama dooro gɔ, yalu be bee gɔi ɛjii wijɛmaabe. Kɔɔ waaru le liliyɛ diyɛ kinɛ bemɛ nɛ yowaabe. 10Mɛlɛnkɛ gɔ be le kijɛ gi: «E turu kanran liyɛnɔugi. Sabu yɛnɛi, mu kibɛru ɛju inɛw puu dɛi kinɛ ɛɛli sɔɔi biyɛido e bɛrɛ tagai wɛiun. 11Dawide ana nɛ, iye, Yabanɛ e dɛi naraanɲu. Wogɔ Kirisito, Inɛw Baŋa gɔ woi. 12Ɔn e bɛrɛ sɛɛrɛi biyɛdo: E ibanrin turu sɔi le munaa, arusɛgɛ koro nɛ wo diinnu tɛtɛmɛdei.» 13Ɔgu kɛu, mɛlɛnkɛ kulɔ joo, alagala gowaa mɛlɛnkɛ pɔlɔ mɔ gɔ le bariyaa, Ama boi sɔmɔu, kijɛ be gɛɛbe: 14«Daa go, alagala nɛ, Ama boi sɔmi biyɛmɔ. Aduna nɛ inɛw Ama kinɛ aamɔw gɔbe, jamu be le biyɛ.» 15Kɔɔ gin’, mɛlɛnkɛ gɔbe waaru bei pajaatiyaa, alagala be yai le, pejugirɛnw gɔbe tunmɔ le kijɛ be gi: «Kɔɔ gin’ biyaai ye, emɛ Bɛtɛlɛhɛmu baa yaamɔi. Inɛw Baŋa Ama, emɛ bɛrɛ kijɛ jugɔmu gɔ yɛnɛi yaamɔi.» 16Be ɔgu kɛu gowaa yaabɛin. Be Mari lee, Josɛpu leei tɛmaabɛin. Ibanrin gɔ yaa, arusɛgɛ koro nɛ wo diiun tɛmaabɛin. 17Waaru kɔɔ be iyi le, be ibanrin gɔ dɛi sɔɔ be bɛrɛ tagin gɔbe jugɔmaabɛin. 18Pejugirɛnw gɔbe sɔɔ sɔin inɛw ɛgɛnw gɔbe puu bɛrɛ maunɛ biyaabe. 19Kaa Mari, sɔɔ kɔɔbe puu kinɛ unrunmɔ nɛ gɛliyaa, ajubaube. 20Pejugirɛnw gɔbe wogɔ nɛ gowaa, pilemaa yalu bemɛ nɛ yaau, bana be bɛrɛ jugɔmi le kɛukɛu, kijɛ be ɛgu lee, kijɛ be iyi lee dɛi Amai sɔmɔubɛin, woi babaubɛin. 21Yesui narin bai gagaraye gɔ, woi araa nɔɔmɔɲu bai gɔ, boi womɔ Yesu kuni. Boi wogɔ mɛlɛnkɛ, Mari, bɛrɛ bɛrɛlu baa, boi kunu gɔ woi. 22Nɛɛ, Mɔise tɔɔru le kɛukɛu bei ɛjɛmɔidɛin bai gɔ wo dɔwaa, be ii gɔi gɛliyaa Jerusalɛmu yaabɛin. Inɛw Baŋa Ama tɔɔru nɛ tɔŋaaɲu: “Aini pɔlɔ naraindɛin puu, Inɛw Baŋa Ama dɛi woi dɛiin bobojodɛin.” Sɔɔ kɔɔ le kɛukɛu ii gɔi Ama bɛrɛ sagu gawaraabɛin. 24Iyaa Inɛw Baŋa Ama tɔɔru le kɛukɛu, sadaga goonɔu jaain wɔɔ gɔ, “pelegele lɛi ma, gurumɔ unrunw lɛi ma”, be sadaga wogɔ goonaabɛin. 25Ainɛ turu yaa Jerusalɛmu nɛ yabe. Boi womɔ Simɛyɔn gɛɛbɛin. Wo ainɛ teitai bee, iyaa wo Ama giri liyɛnɛi bee. Ainɛ kɔɔ, inɛ wɛɛ ye kinɛ kaalu Yahutunw tɔgu bɛrɛ obonɛ gɔi dɔmiyaan bee. Kikinu Pilu wo nɛ yatobe. 26Kikinu Pilu wo bɛrɛ jugɔmaa, womaa Inɛw Baŋa Ama Yabanɛ Diyɛ tii gɔi giri womɔ le iyelu go, yiun wo bɛrɛ dɔɔidolo gi. 27Ama Kikinu woi dimɛraan, Ama Ginrun Diyɛ gɔ nɛ jɛɛlaabe. Josɛpu lee, Mari lee, Mɔise tɔɔru nɛ, kijɛ ibanrin gɔ dɛi kanraun dagaa gɔ kibemɔ ga, waaru Ama Ginrun Diyɛ gɔ nɛ ii gɔi be jɛɛlu le, 28Simɛyɔn, ibanrin gɔi amugiyaa gɛliyaa, ɔn gin’ Amai birɛpoo tagaabe: 29«Inɛw Baŋa, nɛɛ bana u sɔwaabe gin’, u gunɔnɛ uwɔ gɔi pajaa ye jamu le yaamɔ. 30Sabu inɛw wooi giru nɛ yayabu u yegeraabe gɔ, giri ma iyaajɛ. 32Wogɔ wijɛi biyɛdo. Wijɛ le digɛnu tɔgu wooi ui jugɔidɛin gɔi. Iyaa, tɔgu uwɔ Isɛrɛlu boi ɛju goi sɔɔi biyɛdo.» 33Ii ba gɔ lee, ii na gɔ lee, ibanrin gɔ dɛi kijɛ sɔɔbɛin gɔ bei ɛjii maunɛ kanraanbe. 34Simɛyɔn, bei duba kanraantiyaa, ii na Mari le ɔn gin’ sɔi: «Ii ɔn Isɛrɛlu nɛ inɛw joo wo dɛi numɔ ye susugodɛin, iyaa inɛw joo gamuu wo sabu dɛi pilemɛ ye ingilu bɛbɛɛdɛin. Woi Ama sɛɛrɛi biyɛdo. Sɛɛrɛ le inɛw joo jaiyɛidɛin biyɛdo. 35Kɔɔ le digɛnu wo sɔɔ boŋurun inɛw joo kinɛ nɛ too gɔ jujugɔmɔdo. Kaa u kai, ii na gɔ, kinɛjiun kinɛ uwɔ polukaaba gin’ sɔsɔbɔdo.» 36Iyaa, inɛ Ama titiyainɛ, boi womɔ Anɛ gɛɛbɛin gɔ yaa yabe. Woi Panuɛlu iyaai bee. Asɛru tɔgui bee. Anɛ yaanran pɛii bee. Wo anranguju sɔi, gulɔi womɔ waaru le igɛ wo ɛi gɔ le biyaa, 37panu dɛinyaan, igɛ ɛɛlu. Anranguju womɔ pɛgagara naisigɛ bee. Wo Ama Ginrun Diyɛ gɔ nɛ goobele. Wo aŋapagu lee, amagɛɛn lee nɛ biyaa, aga lee, digɛ lee, Ama babaube. 38Kɔɔ gin’ wo yaa, waaru kɔɔ le tee Ama Ginrun Diyɛ gɔ nɛ yowaa, Amai birɛpoo tagai tɔlaabe. Ama, Jerusalɛmui numɔ nɛ goonɔido bai inɛw dɔmɔbɛin gɔbe bɛrɛ, wo ii gɔ sɔɔ sɔɔube. 39Inɛw Baŋa Ama tɔɔru nɛ kijɛ kanraun jaain wɔɔ gɔbe puu waaru be kibemu le, Josɛpu lee, Mari lee, Galile gana nɛ, ana bemɛ Nasarɛtu nɛ pilemaa yain. 40Ii gɔ kai bariyɛube, gɔnrɔn bɛɛ bɛɛ yaaube. Wo hakilɛ le jowaa bee, iyaa, Ama nɛɛma gɔ wo le bee. 41Yesui naranw gɔbe, anranguju tuturu wooi, be Taŋagalu janwan gɔ dɛi Jerusalɛmu nɛ yaaubɛin. 42Taŋagalu janwan atɛmu gɔ le kɛukɛu, Yesu, anranguju pɛli lɛisigɛ womɔ waaru wo bɛi le, wo lee, wo maranw gɔbe lee, be Jerusalɛmu yaabɛin. 43Kaa, janwan gɔ kilaa, waaru ginrun pilemaa be yaaube le, Yesu, Jerusalɛmu nɛ yabii. Woi naranw gɔbe soo sɛbenɛ. 44Ajubu bemɛ nɛ, Yesu, inɛw mɔɔnu yoi yaanw be bɔɔnw gɔbe le digiyaa yai ga sɛbɛin. Kɔɔ sabu dɛi be bai turu sɛɛu yoi yaa, be mɛrɛnw lee, inɛw be igu gɔbe lee logoro nɛ, Yesui dɛnaabɛin. 45Kaa woi dɛnaa iyenɛ kanraan, be pilemaa woi dɛnɛ dɛnɛ Jerusalɛmu wiyaabɛin. 46Bai taaniye gɔ, be Yesu, Ama Ginrun Diyɛ gɔ kɔlɔ nɛ, Ama tɔɔru deerenw gɔbe logoro nɛ dɛinyaan, bei keŋiyɛun, iyaa selumu be bɛrɛ selumɛu wo wɔu yaa tɛmaabɛin. 47Inɛw sɔɔ womɔ ɛgɛnw gɔbe puu, hakilɛ womɔ gɔ lee, bana aŋa wo saabe gɔ lee, be bɛrɛ ɛjii maunɛ bee. 48Mari lee, Josɛpu lee, waaru Yesui be iye le, be bɛrɛ ɛjii maunɛ biyaabe. Wo na wo le kijɛ gi: «U inge dɛi ɔn gin’ emɛ bɛrɛ kanraanbeu ma? Yɛnɛ, u ba lee, mu lee, emɛ ui dɛnɛu ɛjii liyaabɛin.» 49Yesu aŋa bemɛ saa gi: «E inge dɛi mui dɛnɛubei ma? E maa, mu Ba birɛ mu birɛun dagaa ga inin ma?» 50Kaa be sɔɔ wo sɔɔbe gɔ paamu kanraunbenɛ. 51Kɔɔ gin’ wo onu bemɛ nɛ dimiyaan, Nasarɛtu nɛ wiyaabe. Iyaa, wo sɔɔ bemɛ yabaube. Wo na, sɔɔ kɔɔbe puu, kinɛ unrunmɔ nɛ gɛliyɛube. 52Yesu, hakilɛ bɛɛ bɛɛ yaaube, sɛɛu gabiyɛube. Ama lee, inɛw lee giru nɛ, sɔɔ womɔ ɛjii bee.

will be added

X\