1 Kɔɔ gin’ Yesu, jaŋu unrunw womɔ bemaa waaru puu Ama gɛɛun jaain wɔɔ ga, bemaa amagɛɛn nɛ ɔɲɔnɔu ga, bei deere ga, taanrinyɛn turu daanbe. 2 Kijɛ wo gi: «Ana turu nɛ, ainɛ saliyɛkirenɛ, Ama giri liyɛɛlɛ turu yabe. Wo inɛ turu kanran bababele. 3 Ana wogɔ nɛ yapanunɛ turu kanran yabe. Yapanunɛ gɔ, ainɛ saliyɛkirenɛ gɔ bɛrɛ jaa wɛɛube, wo le kijɛ wo gɛɛbe: ‘Jaŋunɛ ma kuu nɛ ma naran bɛɛ dɛi, mui bara.’ 4 Kaa, saliyɛkirenɛ gɔ bai joo biyaabe, wo gɛɛn gɔ yabalu. Kɔɔ onu nɛ kuu unrunmɔ le kijɛ wo gi: ‘Halu, mu Ama giri liyɛnɛi laaun kanran, mu inɛwin babaalɔn kanran, 5 yapanunɛ ɔn womaa dumɔ gɔ suguru ma pujomɔnɔu dɛi, mu jaŋunɛ womɔ kuu nɛ wo bɛrɛ naran ohobodɔn. Sabu wo mui ɔɲɔmaati.’ » 6 Kɔɔ onu nɛ Inɛw Baŋa sɔwaa gi: «Saliyɛkirenɛ nabaraginɛ kɔɔ sɔɔ gi gɔi ɛjii kajubu yɛnɛi. 7 Nɛɛ Ama, wo, inɛw womɔ wo yɛmu gɔbe, unrunbei bara dɛi aga lee, digɛ lee wo bɛrɛ piinw gɔbe be bɛrɛ naran oboidolo ma? Wo aŋa bemɛ saa dɛi dɔdɔmiyɛndo ma? 8 Mu e bɛrɛ daii sɔɔuwɔn: Wo ɔgu be bɛrɛ naran ohobodo. Kaa, Inɛ Aini gɔ, waaru aduna nɛ pilemu wo wɛɛido, inɛw gagawu sɛin tɛtɛmɛdo ma?» 9 Yesu iyaa, inɛw unrunbe teitai wɔin ga namaa iŋi gɔbe, inɛw inɛw wajunwin lugaa sɛnɛ gɔbe dɛi, taanrinyɛn ɔn daanbe: 10 «Anranw lɛi Ama gɛɛn ga Ama Ginrun Diyɛ gɔ nɛ ulaabɛin. Ainɛ turui Parisiɛn bee, lɛiye gɔ sɛgu yabanɛi bee. 11 Parisiɛn gɔ iŋiyaan, kinɛ unrunmɔ nɛ ɔn gin’ gɛin: ‘Ama, mu inɛw wajunw gɔbe gin’ wɔlɔn dɛi, mu ui birɛpoo tagauwɔn. Be gugunyɔnwin, mɔɲu kanranwin, iyaa, Dimudimiyɛnwin. Halu, mu ainɛ sɛgu yabanɛ ɔn gin’ wɔlɔn dɛi, ui birɛpoo tagauwɔn. 12 Mu bai sɔi nɛ kubɔ lɛi aŋa pagauwɔn. Kijɛ mu bɛɛjɛ wooi nɛ mu jaka goonɔuwɔn.’ 13 Kaa sɛgu yabanɛ gɔ wagee biyaa, halu giri unrunmɔ daa go dɛɛrɛ ga daariyɛlu. Kaa wo gegeɲɛ unrunmɔ lagau, ɔn gin’ gɛɛbe: ‘Ama, u mu inɛ hakɛ kanrannɛ gɔ amasɔgɔ jugɔ.’ » 14 Yesu kijɛ gi: «Mu e bɛrɛ tagauwɔn, ainɛ sɛgu yabanɛ kɔɔ, Ama, hakɛ womɔ yaabu kanraan ginrun yai. Kaa pɔlɔ baŋa gɔ yaabu kanrun bɛɛlu. Kɔɔ gin’ inɛ aai kanran kuu unrunmɔ unaajɛ ye, kuu womɔ susunugodɛin. Iyaa inɛ kuu unrunmɔ sunugaajɛ gɔ, kuu womɔ uhunɔdɛin.» 15 Inɛw, Yesu bɛrɛ unrunw banrin yaa jɛɛlaa, womaa kuu bemɛ nɛ numɔ yaŋaran gin. Kaa waaru kɔɔ be iye le, jaŋu unrunw gɔbe inɛw gɔi ganwaanbɛin. 16 Kaa Yesu bei wo bɛrɛ jɛɛlɛmaa, kijɛ wo gi: «Unrunw gɔbei tɛŋɛnɔugi. Bei paja ye, mu bɛrɛ wɛɛmɔi. Sabu inɛw be gin’ wɔin gɔbe, Ama diinɛ gɔ bemɛi. 17 Mu naran go e bɛrɛ tagauwɔn, inɛ aai kanran, Ama diinɛ gɔ nɛ yoi ibɛɛ wɔɔ ye, ii dagi bana jeɲaa wɛɛlu ye, inɛ wogɔ baŋa bɛɛ yooidolo.» 18 Kɔɔ onu nɛ Yahutunw inɛ giru too turu Yesu bɛrɛ selumaa gi: «Jaŋudeerenɛ, u inɛ ɛju gɔ, ɔnmɔsɔgɔ bɛɛ ga, kijɛ inge mu kanraun jaan ma?» 19 Yesu aŋa womɔ saa gi: «Inge dɛi maa inɛ ɛjui gɛɛjɛu? Amai laa ye, inɛ ɛju wɔlɔ. 20 Nɛɛ, u Ama tɔɔru gɔbe igii wɔu: “Dimu dimiyɛnnɔu, inɛ daanɔu, gunyɔn gunyɔnnɔu, sɛɛrɛ kakalu goonɔu, u ba lee u na lee baba.”» 21 Kuu baŋa gɔ saa, unrun dagi unrunmɔ le baa tɔɔru kɔɔbe yadigɛun gi. 22 Yesu, aŋa sɛɛrɛ womɔ gɔ ɛgaa, wo le ɔn gin’ gi: «Nimɛ kanran sɔɔ turu u le wajaai: Kijɛ u sɛɛ puu dɔnraan ye buudu gɔ dɛgugunw bɛrɛ gamala. Kɔɔ gin’ kanraanjɛu ye, u alagala nɛ kijɛ gaai bɛbɛɛdou. Kɔɔ onu nɛ wɛɛ mui dimiyɛn.» 23 Ainɛ kɔɔ ɔgɔinɛ diyɛi bee. Kɔɔ dɛi Yesu kɔɔ gin’ wo giyaa, wo kinɛjiun le gowaa yai. 24 Yesu kɔɔ iyaa, saa gi: «Ama diinɛ nɛ yoo ga, ɔgɔ unrunw bɛrɛ halu nawin wɔɔ. 25 Inɛw arusɛgɛ nɛ diyɛ bemɛ daanaa gɛlin, Ama diinɛ nɛ be yoomɔ nɛ, ɔgɔyɔn laa kala bonɔ nɛ gala bɛru.» 26 Inɛw sɔɔ gɔ keŋiyɛnw gɔbe saa gin: «Kɔɔ gin’ wɔɔ biyaa ye nɛɛ, inɛ yabu bɛɛmɔido gɔ aai?» 27 Yesu aŋa bemɛ saa gi: «Inɛw kijɛ kanrun bɛɛnɛ gɔ, Ama wogɔ kanrun bɛbɛɛjɛ.» 28 Piɛru gowaa ɔn gin’ sɔi: «Kunrin biyaa ye, emɛ kai, ginrun emɛ pajaatiyaa ui dimii, emɛ dɛi yani biyɛdo?» 29 Yesu aŋa bemɛ saa gi: «Mu naran go e bɛrɛ tagauwɔn, inɛ aai kanran, ginrun womɔ ma, yaanran womɔ ma, wo ba unrunw ma, wo maranw ma, unrunw womɔbe ma, Ama diinɛ dɛi pajaajɛ ye, 30 inɛ wogɔ baŋa, aduna ɔn nɛ kɔɔ tunmɔ joo naa joo bɛbɛɛdo. Iyaa aduna wɛɛido gɔ nɛ inɛ wogɔ baŋa ɔnmɔsɔgɔ bɛbɛɛdo.» 31 Kɔɔ gin’, Yesu, jaŋu unrunw pɛli lɛisigɛ gɔbei dɛiin kabugaa goonaa, be le ɔn gin’ gi: «Emɛ kanɛ Jerusalɛmu yaauwɔin. Kɔɔ gin’ Inɛ Aini gɔ dɛi, inɛw Ama titiyaanw sɔɔ tɔŋi gɔ puu kikibedo. 32 Sabu, woi inɛw Ama inin numɔ nɛ kukunɔdɛin. Inɛw woi yamurinyɛnmu ye, woi duduyɔdɛin, kuu womɔ nɛ yuguja tɔi ye, 33 bɔɔniyɛn le woi lagu ye, woi yindaadɛin. Kaa woi be dai bai taaniye gɔ, wo bubulodo.» 34 Kaa jaŋu unrunw gɔbe, Yesu sɔɔ sɔɔbe gɔ turu kanran paamu kanraunbenɛ. Sɔɔ wogɔ be bɛrɛ sɔɔ boŋuruin bee. Be Yesu sɔɔ be le sɔɔu bee gɔ, tiyɛ womɔ inɛɛ bɛin. 35 Yesu waaru Jeriko ana laara nɛ wo dɔi le, ainɛ giruminɛ turu oju genɛ nɛ dɛinyaan, gɛɛn gɛɛunbe. 36 Mɔɔnu gɔ galau wo wɔu ɛgaa, wo inɛw bɛrɛ wogɔ ingei ma selumaabe. 37 Aŋa womɔ saa, Yesu, Nasarɛtu ana bɛɛnnɛ gɔi galauwɔ ga tagin. 38 Kɔɔ waaru le wo mii ɛɛn le kijɛ gi: «Yesu, Dawide tiruwɛnɛ gɔ, amasɔgɔ ma jugɔ.» 39 Inɛw giru tobɛin gɔbe woi ganwaun womaa siɲɛ paja gɛɛubɛin. Kaa wo mii womɔ baraa ye, ɔn gin’ gɛɛbe: «Dawide tiruwɛnɛ gɔ, amasɔgɔ ma jugɔ.» 40 Kɔɔ waaru le, Yesu iŋiyaan, ainɛ gɔi unrun bɛrɛ jɛɛlɛ ga tɔɔraabe. Waaru Yesu genɛ nɛ wo dɔi le, Yesu wo bɛrɛ selumaa: 41 «Maa u dɛi kijɛ kanran ga u ibɛ gɔ ingei?» Ainɛ gɔ saa: «Mu Baŋa, pilemu ye, giri mu iyemɔ.» 42 Yesu saa gi: «U giri pilemu iye, gagawu uwɔ ui bajamaati.» 43 Ainɛ gɔ ginsɛsai sɛɛu giri iyeube. Wo Amai birɛpoo tagau, Yesu onu nɛ dimiyaanbe. Inɛw kulɔ gɔ wogɔ iyaa, Amai sɔmɔubɛin.
