LUKA 17

1Yesu, jaŋu unrunw womɔ le sɔwaa gi: «Waajibi, kinɛ yanwan sɔɔ bibiyɛdo. Kaa, kinɛ yanwan inɛ le digi wɛɛido gɔ, kɔɔbaŋa kai, bɔnrɔn wo le yɔɔ. 2Kɔɔbaŋa, inɛw dagunw ɔnbe logoro nɛ, halu koturu hakɛ nɛ wo yoomu dɛi, yuuna diyɛ nɛ suŋu kɔmaa ye kɔkɔlɔ womɔ nɛ yaa pagaa ye, nɛudii nɛ woi kamaa kuni wo bɛrɛ ire. 3Kɔɔ sabu dɛi kuu kajubu le biyɛi. «U bainɛ u bɛrɛ sɔɔ mɔɲu kanranjɛ ye, u womaa sɔɔ wo kanranjɛ gɔ ɛjula ga wo bɛrɛ taga. Wo bana womɔ duliyemaati ye, u woi yaabu kanran. 4Wo bai turu nɛ kubɔ sɔi u bɛrɛ sɔɔ mɔɲu kanraantiyaa, kubɔ sɔi gɔ puu wiyaa u bɛrɛ unruin lelaai ga sɔwaajɛ ye, u woi yaabu kanraun jaain wɔɔ.» 5Yesu jaŋu unrunw tiyaaɲu gɔbe, Inɛw Baŋa le kijɛ be gi: «Gagawu emɛ bariyɛmɔ.» 6Inɛw Baŋa saa gi: «Gagawu ebe gɔ halu mutarudu ii popoo baa bee ye, tiun na ɔn womaa ɔn nɛ goi ye, nɛudii nɛ yai yibiye giyaajɛi ye, wo sɔɔ ebe yayababe.» 7«Kɔɔ gin’, logoro ebe nɛ inɛ turu, birɛbirɛnɛ woluwalanɛ ma, bɛlugirɛnɛ yasɛ ye, birɛbirɛnɛ gɔ olu gowaa wiyaai ye, womaa wɛɛ maini dɛinyɛn, jaa kaya gɛgɛɛdo ma? 8Ai! E kɔɔ gin’ gɛɛidelei. Kaa kijɛ e gɛɛido: U mu dɛi digɛ pana yegere, u dɔin uwɔ paga. Jaa kayi ye, kijɛ nɔɔɲu nɔɔ ye, mu kilɛido baa u mui dɔmiyɛn. Kɔɔ onu nɛ u yaa jaa uwɔ kaya, kijɛ nɔɔɲu uwɔ nɔɔ. 9Wo birɛbirɛnɛ womɔ, kijɛ tɔɔrin gɔ kanraanbe dɛi woi birɛpoo tagaidolo, woi laa? 10E yaa, birɛ e bɛrɛ tɔɔrin gɔ waaru biraa e kilaajɛ, ɔn gin’ gɛɛi: ‘Emi birɛbirɛnw niwɛn toloi, kijɛ emɛ kanraun jaan gɔi emɛ kanrin.’ » 11Yesu waaru Jerusalɛmu oju gowaa wo yaabe le, wo Samari gana lee, Galile gana lee urɔ diŋirun gɔ kɛjaa galaabe. 12Ana turu nɛ waaru wo dɔi le, nɛwɛngunw pɛlu wo bɛrɛ wiyaabɛin. Be Yesu le wagee iŋiyaan, 13kɔnwaan, kijɛ wo le be gi: «Yesu, emɛ baŋa, amasɔgɔ emɛ jugɔ!» 14Yesu bei iyaa, be le sɔwaa gi: «E yaai ye, Ama bɛrɛ sadagadɔɔnɔw bɛrɛ ei tagarai.» Kunrin gowaa yaau, oju nɛ be tou, bei bajaai. 15Kaa nɛwɛngunw gɔbe logoro nɛ, turui, unruin bajaai ga iyaa, Ama boi mii diyɛ le sɔmɔu, pilemaa wiyaabe. 16Wo Yesu giru nɛ tuŋiyaan, woi birɛpoo tagaabe. Ainɛ wogɔ Samari gana bɛɛnnɛi bee. 17Yesu, kɔɔ waaru le saa gi: «Inɛw pɛlu gɔbe puu bajugamɔnɛ ma? Nɛɛ, inɛw tuwɔ gɔbe, be yago wɔin? 18Ainɛ yerunɛ ɔin laa ye, inɛ waja wiyaa Amai birɛpoo tagu wɔlɔ ma?» 19Kɔɔ onu nɛ Yesu, ainɛ gɔ le kijɛ gi: «Ingele ye yaa, gagawu uwɔ ui bajamaati.» 20Parisiɛnbe, Yesu bɛrɛ selumaa, womaa Ama diinɛ gɔ aduna nɛ waaru inge le wɛɛdo ma gin. Yesu aŋa bemɛ saa gi: «Ama diinɛ wɛi gɔ, sɛɛrɛ giri le iyemɔjɛ le biyɛidolo. 21Iyaa kɔɔ gin’, inɛw, Ama diinɛ gɔ ɔn nɛ yɔɔ ma, kɔɔ nɛ yɔɔ ma gɛɛnu biyɛidenɛ. Sabu yɛnɛi, Ama diinɛ gɔ logoro ebe nɛ yato.» 22Yesu, jaŋu unrunw gɔbe le kijɛ wo gi: «Bai yawɛɛjɛ, e Inɛ Aini gɔ bai gɔbe logoro nɛ, koturu iyaabei ye, e bɛrɛ ɛjii bibiyɛbe. Kaa wogɔ bɛɛ iyeidelei. 23Inɛw iyaa e le gɛgɛɛdɛin: ‘Yɛnɛi, wo ɔn nɛ wɔɔ.’ ‘Yɛnɛi wo kɔɔ nɛ wɔɔ.’ E yalu wogɔbe nɛ yaanɔugi. Iyaa, e inɛw wogɔbe onu nɛ dimiyɛnnɔugi. 24Anrangiriyenu sibɛ turu nɛ goi ye, ɔgu kɛu sibɛ waja nɛ baa bana wo yaajɛ gin’, Inɛ Aini gɔ, wɛɛgu womɔ le kɔɔ gin’ biyɛdo. 25Kaa sɔɔ kɔɔbe biyɛmɔ nɛ, waajibi, Inɛ Aini gɔ gaai ɔɲɔu jaain wɔɔ. Iyaa, kanɛ inɛw ɔnbe wo le yabalu kanran ga waajibi. 26Nɔwe waaru le bana bii gin’, Inɛ Aini wɛɛgu le kɔɔ gin’ tee biyɛdo. 27Inɛw jaa kayaubɛin, dii nɔɔubɛin, puru pagaubɛin, unrunw yaanw bemɛ igɛ oboubɛin. Kɔɔ gin’ kanraun be wɔu, Nɔwe, diikoro diyɛ gɔ nɛ wo yoi bai wiyaa dɔi. Dii diyɛ gɔ wiyaa be puu suyaabe. 28Lote waaru le bana bii gin’, Inɛ Aini wɛɛgu le kɔɔ gin’ tee biyɛdo. Inɛw jaa kayaubɛin, dii nɔɔubɛin, ebu ɛbɛubɛin, dɔnrun dɔnrɔunbɛin, toi tɔɔubɛin, ginrun ujɔubɛin. 29Kaa Lote Sodomɛ ana nɛ bai goi, bai wogɔ yaun lee, sidu lee alagala gowaa anran gin’ miyaan, inɛw gɔbe puu suyaabe. 30Inɛ Aini gɔ, bai unruin wo tagaraido, kɔɔ gin’ tee biyɛdo. 31«Bai wogɔ le inɛ dala kuu nɛ wɔɔ, sugo ye, ginrun kɔlɔ nɛ kijɛ jeɲɛ ye jɔbɔdɔn gɛɛnɔu. Inɛ olu go wɔɔ, ginrun pilemɛ ye wɛɛnɔu. 32E Lote yaanran sɔɔ ajubu yɛnɛi. 33Inɛ kinrun unrunmɔ yabu dɛnɛjɛ gɔ, woi susuyodo. Kaa kinrun womɔ mu dɛi paja ga inɛ yabaajɛ gɔ, kinrun womɔ yayabadɛin. 34Mu e bɛrɛ naran go sɔɔuwɔn, digɛ wogɔ, inɛw lɛi teenu tunmɔ nɛ be diinnu, turu jeɲɛ ye, turu papajadɛin. 35Yaanw lɛi dɛnrɛn nawannu be wɔnu, turu jeɲɛ ye, turu papajadɛin. [ 36Anranw lɛi olu nɛ be wɔnu, turu jeɲɛ ye, turu papajadɛin.]» 37Jaŋu unrunw gɔbe, Yesu le kijɛ be gi: «Wogɔ yalu yagɔ nɛ biyɛdo ma, Inɛw Baŋa?» Kaa wo aŋa bemɛ saa gi: «Yalu inge nɛi kanran, kijɛ yiun yadiin ye, waajibi dubɔbe kɔɔ nɛ mɔmɔrinyɛndɛin.»

will be added

X\