LUKA 16

1Yesu, jaŋu unrunw womɔ le kijɛ gi: «Ainɛ ɔgɔinɛ turu yabe. Wo ainɛ arusɛgɛ womɔ kajubanɛ turu yasɛbe. Arusɛgɛ kajubanɛ dɔnrun dɔnrɔnnɛ gɔ womaa ɔgɔinɛ gɔ kɛɛlɛ gɔ yanwan tɛbɛuwɔ ga, inɛw wiyaa ɛlu womɔ gooni. 2Arusɛgɛ kajubanɛ gɔi boonaa, ɔgɔinɛ gɔ wo le kijɛ gi: ‘U dɛi sɔɔ mu ɛgɛjɛ gɔ inge sɔɔi ma? Aiwa! Mu birɛ ma nɛ ui goonaatun. Kɔɔ sabu dɛi u yaa ye, kɛɛlɛ ma lugi gɔ puu dɔn nɛ tɔŋaa ye jɛɛlɛ.’ 3Kɔɔ waaru le, arusɛgɛ kajubanɛ gɔ ajubaa yɛnaa, kinɛ womɔ nɛ kijɛ gi: ‘Mu nɛɛ inge kanrandɔn? Sabu mu baŋa arusɛgɛ kajubu womɔ birɛ gɔ nɛ mui gogoonɔdo gi. Mu wolu walu birɛ gɔnrɔindolɔn. Iyaa, gɛɛn gɛɛn ga, mu bɛrɛ wogɔ dɔgɔi. 4Mu kijɛ mu kanraindo igii wɔun. Kɔɔ gin’ birɛ mu too gɔ nɛ mui nanaa goonaatin ye, inɛw, ginrun bemɛ nɛ mui sɛsɛgɛrɛdɛin.’ 5Kɔɔ gin’ arusɛgɛ kajubanɛ gɔ, wo baŋa yoru inɛw tobɛin gɔbe puu tuturu boonaa jɛɛlaa, pɔlɔ baŋa bɛrɛ ɔn gin’ gi: ‘U mu baŋa yoru aŋa baa sɛu?’ 6Wo saa, unrun nii litere muɲu nai sɛun gi. Kaa arusɛgɛ kajubanɛ gɔ wo le saa gi: ‘Yoru uwɔ dɔn unwɔ: Ɔgu dɛinyɛn, u nii litere muɲu lɛi sɛu tɔŋɔ.’ 7Kɔɔ onu nɛ inɛ waja le sɔwaa gi: ‘U yaa yoru aŋa baa sɛu?’ Kɔɔbaŋa saa gi: ‘Alukama bɔɔri suŋu.’ Ainɛ arusɛgɛ kajubanɛ gɔ saa gi: ‘Yoru uwɔ dɔn unwɔ: U pilemɛ ye bɔɔri pɛgagara sɛu tɔŋɔ.’ 8Kuu baŋa gɔ arusɛgɛ kajubanɛ teitai laa gɔ sasai birɛ biraabe dɛi woi sɔmaabe. Sabu aduna ɔn inɛw gɔbe, inɛw be bɔɔnw gɔbe sibɛ go, wijɛ inɛw dɛi sigɛ sasai le kijɛ kakanranɲu.» 9Yesu iyaa lee sɔwaa gi: «Mu yaa e bɛrɛ tagauwɔn, e aduna ɔn arusɛgɛ le anrunge dɛnɛi. Waaru arusɛgɛ gɔbe numɔ ebe nɛ dogaai onu nɛ, inɛw bemaa ginrun asuu sɔgɔido gɔ nɛ ei sɛgɛrɛ ga kɔɔ gin’ kanrain. 10Inɛ kijɛ dagi nɛ sɔɔ turu baŋai wɔɔ gɔ, kijɛ diyɛ nɛ yaa sɔɔ turu baŋai biyɛjɛ. Kaa inɛ kijɛ dagi nɛ teitai wɔlɔ ye, kijɛ diyɛ nɛ kanran teitai wɔlɔ. 11E aduna ɔn arusɛgɛ gɔbe sibɛ go sɔɔ turu bɛɛnwin biyɛli ye, inɛ aa arusɛgɛ tɔitɔi gɔbe sagu e bɛrɛ gawarado ma? 12E inɛ waja arusɛgɛ dɛi sɔɔ turu bɛɛnwin biyɛli ye, arusɛgɛ ebei biyɛ ga aa e bɛrɛ obodo ma? 13«Birɛbirɛnɛ turu kanran kuu bɛɛnw lɛi dɛi birɛ birɛ bɛɛidolo. Wo koturu baŋai ibɛi biyaa, waja gɔi ibɛi biyɛlu kanrun ye koi. Koturu baŋa birɛ nɛ kuu womɔ obaa ye, waja gɔ birɛ nɛ kuu kunɔlu kanrun ye koi. Ama dɛnɛ lee, kɛɛlɛ dɛnɛ lee, e sɔɔ kɔɔbe lɛi kubɔ tunmɔ kanrun bɛɛidelei.» 14Parisiɛnbe, sɔɔ kɔɔbe puu ɛgɛubɛin. Be kɛɛlɛ ibɛɛ bɛin dɛi Yesui mɔmɔubɛin. 15Yesu be le kijɛ gi: «E, inɛw giru nɛ ei inɛw teitai wɔiin ga tagarajɛi. Kaa Ama, kinɛ ebe igii wɔɔ. Sabu inɛw kijɛ sigɛi ga kijɛ be lugojɛ gɔ, wogɔ Ama giru nɛ kijɛ jɛbaatii. 16«Sɔɔ Mɔise tɔɔru dɔn nɛ tɔŋaaɲu gɔbe lee, inɛw Ama titiyaanw dɔn gɔbe lee, Jan Batise waaru dɔɔ baa biin. Waaru wogɔ galaai onu nɛ, iye bai wɛɛ dɔɔ, Ama diinɛ Kibɛru Ɛju gɔ tagauwɔin. Iyaa inɛw, paŋa le Ama diinɛ gɔ nɛ yoo ga birɛuwɔin. 17Tɔɔru nɛ sɔɔ kiji turu manaido dɛi, alagala lee, minɛ lee galaido bɛru. 18«Ainɛ aai kanran, yaanran womɔ pajaatiyaa yaanran waja jeɲaajɛ ye, ainɛ wogɔ, yaanran lɛiye kɔɔ le dimu dimiyɛunwɔ. Iyaa, inɛ yaanran pajaaɲu gɔ jeɲaajɛ, inɛ kɔɔbaŋa kanran dimu dimiyɛnnɛi.» 19«Ainɛ ɔgɔinɛ turu yabe. Wo sɔi ɛju ɛju dɔnrun gaa kunɔube. Bai puu jaa ɛɛlu diyɛ diyɛ kayaube. 20Ginrun mɔnɔgolo womɔ nɛ, ainɛ dɛguginɛ turu yadiinyɛnbe. Boi womɔ Lasare gɛɛbɛin. Lasare goju puu nɛ mirun gowaa gowaa bee. 21Wo ɔgɔinɛ gɔ jaa kɛbɛlɛ bagabe gɔ le bɛrɛ unrunmɔ joonu ibɛɛ bee. Iyaa ijube wɛi wɛi ye, mirun womɔ gɔ dɛgɛubɛin. 22«Kɔɔ gin’ wɔu, dɛguginɛ gɔ yinwun. Wo yinwaan, mɛlɛnkɛbe kikinu womɔ jeɲaa, Abarahamu genɛ nɛ, alujɛnɛ nɛ jɛyaabɛin. Ɔgɔinɛ gɔ kanran wo yinwaan, woi bojaabɛin. 23Yinwunrun nɛ ɔɲɛ nɛ tou, waaru giri womɔ daa go wo dɛɛru le, wo wage nɛ Abarahamui iyaabe. Lasare kanran, Abarahamu genɛ nɛ wo wɔu iyaabe. 24Ɔgɔinɛ gɔ piyaa, kijɛ wo gi: ‘Mu ba Abarahamu, amasɔgɔ ma jugɔ. Kɔɔ gin’ Lasare tiyaa ye, numɔ ii womɔ dii nɛ sowaa ye, ninɛ ma nɛ kɔɔraa ye wo kaaliyɛmɔ. Sabu mu yaun bije ɔn nɛ saii ɔɲaa toun.’ 25Kaa Abarahamu wo le saa gi: ‘Aini ma, waaru ɔnmɔi u bee le, aduna nɛ u kijɛ ɛju uwɔ wooi biyaabeu ga naŋanɔu. Kaa Lasare, kɔɔ waaru le ɔɲɛ biyaabe. Kɔɔ sabu dɛi kanɛ wo ɔn nɛ jamu nɛ too, kaa u ɔɲɛ nɛ tou. 26Iyaa kɔɔ kuu nɛ sigiyaa, u lee, emɛ lee logoro nɛ ɔmɔrɔn diyɛ turu yegeraa pajaaɲu. Kɔɔ gin’ yalu emɛ wɔɔ gɔ nɛ goi ye yalu e wɔɔ gɔ nɛ inɛ galu bɛɛidolo. Iyaa yalu e wɔɔ gɔ nɛ goo ye, yalu emɛ wɔɔ gɔ nɛ inɛ galu bɛɛidolo.’ 27Ɔgɔinɛ gɔ saa gi: ‘Mu ba Abarahamu, mu koi ye, u bɛrɛ gɛɛunwɔn, u Lasare goonu ye, mu ba ginrun nɛ tii, 28sabu mu ba unrunw numɔrɔn yɔɔin. Bemaa kanran ɔɲɛ yalu ɔn nɛ wɛɛnɔu ga, be bɛrɛ yai taga wa.’ 29Abarahamu wo le saa gi: ‘U ba unrunw gɔbe, Mɔise lee, inɛw Ama titiyaanw sɔɔ tɔŋu gɔbe lee yasin, sɔɔ bemɛ gɔ be keŋiyɛnmɔ.’ 30Kaa ɔgɔinɛ gɔ saa gi: ‘Ai, mu ba Abarahamu, kɔɔ baaidolo. Kaa inɛ turu bulaa yaa bei tagaaginaajɛ ye, be bana duli bɛbɛɛdɛin.’ 31Abarahamu saa gi: ‘Be Mɔise lee, inɛw Ama titiyaanw gɔbe lee sɔɔ yabaanɛ ye, halu inɛ, yiun nɛ bulaa wiyaajɛ kanran, be gawaidenɛ.’ »

will be added

X\