LUKA 15

1Sɛgu yabanw gɔbe lee, inɛw waja boi mɔɲu bemɛ gowaa wɔɔ gɔbe lee, Yesu sɔɔ keŋiyɛn dɛi, be puu genɛ womɔ nɛ dɔwaabɛin. 2Parisiɛn gɔbe lee, Ama tɔɔru deerenw gɔbe lee guguun guun, kijɛ be gɛɛbe: «Ainɛ ɔn, wo inɛw boi mɔɲu bemɛ gowaa wɔɔ gɔbei ɛjii sɛgɛrɛuwɔ, iyaa be le mɔrin ye jaa kayauwɔ.» 3Kaa Yesu, taanrinyɛn ɔn be bɛrɛ jeɲaa tagu: 4«Inɛ aa, logoro ebe nɛ peju suŋu sɛnu, turu manaai ye, peju pɛtuwɔ tuwɔsigɛ gɔbe olu nɛ pajaatiyaa ye, turu manaai gɔi wo iyeido baa, dɛnɛnu biyɛidolo ma? 5Waaru peju gɔi wo iyaajɛ, wo kinɛ ɛɛli le tatabu womɔ nɛ yayaŋarando. 6Kɔɔ onu nɛ waaru ginrun wo dɔwaajɛ, wo unrun anrungebe lee, ginrun bɛŋu womɔ inɛw lee boonaa ye, be le ɔn gin’ gɛɛdo: ‘E mu le bari ye kinɛ ɛɛliyɛmɔi, sabu peju ma manaa bee gɔi iyaajɔn.’ 7«Kɔɔ gin’, mu e bɛrɛ tagauwɔn, inɛ turu bana duliyaai dɛi, alagala nɛ kinɛ ɛɛli biyɛido gɔ, inɛw teitai wɔin pɛtuwɔ tuwɔsigɛ bana dulomu kai sɛnɛ mɔ dɛi sigɛ biyɛdo.» 8«Iyaa kɔɔ gin’, yaanran aa, sarudu kɛɛlɛ pɛlu sɛnu, koturu manaai ye, lanpa tanugaa ye, ginrun kɔlɔ gɔ sɛmaa ye, kɛɛlɛ gɔ wo iyeido baa, ɛjii dɛnɛlu kanrando? 9Waaru wo iyaajɛ, wo yaanw wo anrungebe lee, ginrun bɛŋu womɔ yaanw gɔbe lee boonaa ye, be le ɔn sɔɔdo: ‘E mu le bari ye kinɛ ɛɛliyɛmɔi, sabu kɛɛlɛ uji ma manaa bee gɔi iyaajɔn.’ 10«Kɔɔ gin’ mu e bɛrɛ tagauwɔn, hakɛ kanrannɛ turu bana duliyaai dɛi, mɛlɛnkɛbe logoro nɛ kinɛ ɛɛli yɔɔ.» 11Yesu iyaa ɔn gin’ sɔi: «Ainɛ turu yabe, wo anranw unrunw lɛi sɛbe. 12Aini dagunɛ gɔ wo le ɔn gin’ sɔi: ‘Mu ba, kɛn uwɔ nɛ kijɛ mui dinrɛindo gɔ mu bɛrɛ obo.’ Kɔɔ gin’, banɛ gɔ kijɛ wo sɛɛ gɔ be lɛi logoro nɛ gamalaabe. 13Bai gaila onu nɛ, aini dagunɛ gɔ, kijɛ wo sɛɛ puu dɔnraan, kɛɛlɛ gɔ balaa, gana wage turu nɛ yai. Kɔɔ nɛ wo kijɛ wo sɛɛ puu dimu dimi le yanwan tɛbaabe. 14«Waaru kɛɛlɛ womɔ puu dogu le, gana gɔ nɛ giyɛ diyɛ yowaai. Wo kanran nau woi aai tɔlaabe. 15Kɔɔ gin’ wo gowaa yaa, gana gɔ inɛ turu birɛ nɛ yowaabe. Kɔɔbaŋa woi minɛ unrunmɔ nɛ tolu girɛ ga tiyaabe. 16Kɔɔ gin’ wo tolube tiun ii kayabe gɔ le bɛrɛ unrunmɔ joonɔ ibɛɛ bee. Kaa inɛ turu kanran wogɔ wo bɛrɛ obolu. 17«Kunrin waaru hakilɛ wo bɛɛ le, unruin ajubaa, ajubaa yɛnaa, kinɛ womɔ nɛ ɔn gin’ gi: ‘Mu ba ginrun nɛ birɛbirɛnw joo yɔɔin, be jaa kayaa ye waju dagaɲu, kaa mu kai ɔn nɛ giyɛ mui daa ga wɔɔ. 18Mu ingele ye, mu ba bɛrɛ yayaadɔn, wo le kijɛ mu gɛɛido: Mu ba, mu Ama lee, u lee giru nɛ hakɛ kanraantun. 19Mui waja ii uwɔi gɛɛun jaanla. Birɛbirɛnɛ uwɔ turu gin’ mui lugo.’ 20Wo ba bɛrɛ yaa ga wo oju gowaabe. «Wage nɛ wo ba woi iyaa, amasɔgɔ womɔ woi aabe. Wo jɔbaa yaa, aini unrunmɔ kɔkɔlɔ nɛ waagiyaa, ɛjii kanwaanbe. 21Kaa aini womɔ wo le kijɛ gi: ‘Mu ba, mu Ama giru nɛ lee, giru uwɔ nɛ lee hakɛ kanraantun. Mui waja ii uwɔi gɛɛun jaanla.’ 22Kaa banɛ gɔ, birɛbirɛnw womɔ le kijɛ gi: ‘E arugoi wo sigɛ gɔ ɔgu jɛɛlɛi, wo nɛ goroi, iyaa numɔ ii womɔ nɛ numɔsagai kunɔi, kubɔ womɔ nɛ taga kunɔi. 23Kɔɔ onu nɛ naa ii siigiyaa wɔɔ gɔ jɛɛlaa ye daai. Emɛ jaa kayamɔi, kinɛ ɛɛliyɛmɔmɔi. 24Sabu aini ma yinwaanyaabe gɔ, wo pilemaa ɔnmɔi biyaai. Woi manaayaabe, kaa woi pilemaa iyemaajɛ.’ Be kɔɔ gin’ kinɛ ɛɛliyɛmɔi tɔlaabɛin. 25«Kaa aini diyɛnɛ womɔ gɔ olu go bee. Pilemaa wɛɛu, ginrun waaru wo bɛruni le, wo boi soguru lee, inɛw gɔɔ gɔɔubɛin siɲɛ lee ɛgaabe. 26Wo birɛbirɛnw gɔbe logoro nɛ turui boonaa, sɔɔ kɔɔ tiyɛ ingei ma selumaabe. 27Birɛbirɛnɛ gɔ saa gi: ‘U suŋɔrɔn gɔi ginrun pilemaa wɛi. Wo jamu le ginrun pilemaa yowaai dɛi, u ba naa ii siigu gɔ daabe.’ 28«Kɔɔ waaru wo ɛgu le, aini diyɛnɛ gɔ kinɛ banranmaa, ginrun yoo ga yabalu. Kɔɔ dɛi wo ba gowaa, wo bɛrɛ gɛnyaanbe. 29Kaa wo ba le ɔn gin’ sai: ‘Yɛnɛ, mu anranguju joo u le birɛ birɛuwɔn, iyaa bai turu kanran sɔɔ uwɔ yabalu kanrantɛlun. Kaa maa mu anrungebe le kinɛ ɛɛliyɛmɔ ga, halu ɛnrɛn ii turu kanran mui obotɛlu. 30Kaa aini uwɔ ɔn, inɛ yaanw dimu le kayanw le arusɛgɛ uwɔ yamalaabe gɔ, wo pilemaa wiyaa dɛi u wo dɛi naa ii siigu gɔ daajɛu!’ 31Kɔɔ waaru le banɛ gɔ wo le kijɛ gi: ‘Ii ma, u waaru puu mu le kowɔu, iyaa kijɛ mu sɛɛ gɔ puu uwɔi. 32Kaa yɔgɔrɔ yɔgɔrɔun jaain wɔɔ. Iyaa, kinɛ ɛɛliyɛmɔu jaain wɔɔ. Sabu u suŋɔrɔn ɔn, woi yinwaanyaabe, kaa wo pilemaa ɔnmɔi biyaai. Woi manaayaabe, kaa woi pilemaa iyemaajɛ.’ »

will be added

X\