LUKA 14

1Deeliye bai turu, pana kaya dɛi, Parisiɛnbe inɛ giru too turu, ginrun unrunmɔ nɛ Yesui boonaabe. Inɛw kɔɔ nɛ bɛin gɔbe, Yesu kijɛ kanranjɛ gɔ puu ɛjii sebereubɛin. 2Ainɛ goju pidu jiun le bee turu, Yesu genɛ nɛ wiyaa dɔwaabe. 3Yesu, sɔɔ jeɲaa, Ama tɔɔru deerenw gɔbe lee, Parisiɛn gɔbe lee le ɔn gin’ sɔi: «Tɔɔru emɛ le kɛukɛu, deeliye bai, inɛ jɔŋɔu jaain wɔɔ ma jaanla?» 4Yesu kɔɔ gin’ wo selumaa, be wooi puu sɔɔ turu kanran saanɛ. Kɔɔ waaru le, Yesu, jiunginɛ gɔi aa, woi bajamaatiyaa, ginrun tii. 5Kɔɔ onu nɛ Yesu, inɛw kɔɔ nɛ bɛin gɔbe le ɔn gin’ gi: «Logoro ebe nɛ, inɛ aa, aini womɔ ma, naa jiŋu womɔ ma, deeliye bai ɛkɔrɔ nɛ ɛliyaa yowaai ye, ɔgu kɛu goonɔlu go kɔɔ nɛ pajado?» 6Be sɔɔ saaun turu kanran bɛɛnɛ. 7Inɛw jaa dɛi booni gɔbe dɔindain sigɛ gɔbe tee yɛmɛɲu ga waaru wo iye le, Yesu, taanrinyɛn ɔn be bɛrɛ daan, kijɛ wo gi: 8«Purupagu jaa dɛi ui boonaaɲu ye, u dɔindain sigɛ yɛmɛ ye dɛinyɛnnɔu. Sabu inɛ u dɛi ire turu yaa boonaabɛin bibiyɛ. 9Nɛɛ kɔɔ gin’, inɛ ui lee, woi lee boonɔnɛ gɔ, u le wɛɛ ye ɔn gin’ sɔɔdo: ‘Dɔindain uwɔ gɔ inɛ ɔn bɛrɛ obo.’ Wo kɔɔ gin’ u le giyaajɛ ye, u waja bɔlɔ go, dɔindain mɔɲu gɔ nɛ ingelaa ye yaa ga, u bɛrɛ dɔgɔi biyɛdo. 10Kɔɔ sabu dɛi, waaru janwan yalu nɛ ui boonaaɲu, u dɔindain mɔɲu gɔ nɛ dɛinyɛn. Kɔɔ gin’ waaru inɛ ui boonɔnɛ gɔ wiyaajɛ, wo u le ɔn gin’ sɔɔdo: ‘Mu anrunge, u dɔindain ɛju kɔɔ nɛ dɔɔ.’ Kɔɔ waaru le, inɛw jaa kaya dɛi boonaaɲu gɔbe wooi giru nɛ, wogɔ u bɛrɛ baba diyɛi biyɛdo. 11Sabu inɛ aai kanran kuu unrunmɔ unaajɛ ye, kuu womɔ susunugodɛin. Iyaa inɛ kuu unrunmɔ sunugaajɛ gɔ, kuu womɔ uhunɔdɛin.» 12Kɔɔ onu nɛ, Yesu, ainɛ ginrun unrunmɔ nɛ woi boonɔnɛ gɔ le ɔn gin’ sɔi: «U aga pana dɛi ma, digɛ pana dɛi ma inɛwin boonaajɛu ye, u anrungebe ma, u ba unrunw ma, u maranw ma, ɔgɔ unrunw ginrun diŋu uwɔbe ma boonɔnɔu. Sabu be kanran ui pilemɛ ye boonɔ ye, uwɔ gɔ ui tujɔ bɛbɛɛɲu. 13Kaa, waaru ginrun uwɔ nɛ janwan dɛi inɛwin u boonaajɛ, u dɛgugunw lee, inɛw numɔ ma, kubɔ ma yanwaain gɔbe lee, tegutegenw lee, girumuw lee, bei boonɔ. 14Kɔɔ gin’ u duba bɛbɛɛdou, sabu be kijɛ le ui tujɔɲu sɛnɛ. Inɛw teitai wɔin bai buloidɛin, u tujɔ ɛju uwɔ bɛbɛɛdou.» 15Janwan gɔ nɛ inɛwin boonaaɲu gɔbe logoro nɛ, turu baŋa waaru sɔɔ kɔɔ wo ɛgu le, kijɛ gi: «Inɛ Ama diinɛ nɛ jaa kayaido, kɔɔbaŋa Ama wo yabu.» 16Yesu wo bɛrɛ taanrinyɛn ɔn sɔɔ tagaa, kijɛ gi: «Ainɛ turu, bai turu janwan dɛi jaa diyɛ yegeraa, inɛw joo wogɔ dɛi boonɔmaabe. 17Jaa kayi lɛɛrɛ waaru dɔi le, birɛbirɛnɛ womɔ tiyaa, inɛwin jaa kaya dɛi boonaaɲu gɔbe le ɔn gin’ gɛɛ gi: ‘Nɛɛ e wɛɛi, yeguru yegeraa kilaai.’ 18Kaa, be wooi puu tuturu temu tamu dɛnaabɛin. Pɔlɔ baŋa gɔ gi: ‘Mu minɛ turu ɛbaajɔn, wogɔ yɛnɛi mu yaaun jaain wɔɔ. Kɔɔ sabu dɛi mu u bɛrɛ gɛɛunwɔn, kawuru kanran.’ 19Turu baŋa yaa saa gi: ‘Mu naa jiŋu pɛlu ɛbaajɔn, mu wolu walu bemɛ bana ɛjii wɔɔ ma, marun yɛnɛi yaadɔn. Kɔɔ sabu dɛi mu u bɛrɛ gɛɛunwɔn, kawuru kanran.’ 20Inɛ waja kanran saa gi: ‘Mu yakana jɛyaa wɔun. Kɔɔ sabu dɛi mu wɛɛ bɛɛidolɔn.’ 21Birɛbirɛnɛ gɔ pilemaa wiyaa, wo baŋa bɛrɛ kijɛ bii gɔbe puu sɔwaabe. Kɔɔ waaru le, ginrun kuu baŋa gɔ, kinɛ banranmaa, birɛbirɛnɛ gɔ le ɔn gin’ gi: ‘U ɔgu gowaa ye, taibe nɛ lee, ana pɔŋɔrɔn nɛ lee yaa. Dɛgugunw lee, inɛw numɔ ma, kubɔ ma yanwaain gɔbe lee, girumuw lee, tegutegenw lee, bei ɔn nɛ boonu jɛɛlɛ.’ 22Siin wo kanraan, birɛbirɛnɛ gɔ wo baŋa le kijɛ gi: ‘Mu baŋa, kijɛ u tɔɔraabe gɔ kanraantin, kaa nimɛ kanran yalu wajaai.’ 23Ginrun kuu baŋa gɔ birɛbirɛnɛ gɔ le kijɛ gi: ‘U bɛdɛ gɔbe nɛ lee, sadiŋɛ gonɔ diŋirun gɔbe nɛ lee yaa, ginrun ma kɔlɔ gɔ nɛ inɛw jooi biyɛ ga, paŋa le inɛwin dimɛrɛn ye jɛɛlɛ. 24Mu naran go e bɛrɛ sɔɔuwɔn, inɛw jaa kaya dɛi laa mu boonaabe gɔbe logoro nɛ, inɛ turu kanran digɛ pana ma nɛwɛindolo.’ » 25Mɔɔnu kulɔ joo Yesu onu nɛ dimiyaan yaaubɛin. Kɔɔ waaru le, Yesu be sibɛ go kigelemaa, be le ɔn gin’ sɔi: 26«Inɛ mu bɛrɛ wɛɛjɛ gɔ, wo ba lee, wo na lee, yaanran womɔ lee, unrunw womɔ lee, wo ba unrunw lee, wo saabe lee, halu kinrun womɔ ibiliyɛlu ye, wo jaŋu ii mai bii bɛɛidolo. 27Iyaa, inɛ aai kanran, baga jai womɔ duiyi ye, onu ma nɛ dimiyɛɛnlɛ ye, inɛ wogɔ, jaŋu ii mai bii bɛɛidolo. 28«Logoro ebe nɛ inɛ aai kanran ginrun diyɛ ujɔ ibɛɛ wɔɔ ye, wo bɔlɔtei gɔ daanaatiyaa ye, ginrun gɔ ujɔ dɔɔnu bɛɛidolo kakanrando ma giye, wogɔ ujɔ dɔɔnɔɲu kɛɛlɛ yasɛ ma, inɛ dɛinyaan ye ajubaidolo gɔ yɔɔ ma? Kɔɔi laa ye, bɔlɔtei gɔ wo daanaajɛ onu nɛ, wo dɔɔnaa bɛɛlu ye, inɛw woi iyeidɛin puu woi mɔmɔmɔdɛin. 30Iyaa kijɛ be gɛɛido: ‘Ainɛ ɔn ginrun ujɔ ga tɔlaabe, kaa wo dɔɔnaa bɛɛlu.’ 31«Maa, iyaa ɔgɔnɛ turu ɔgɔnɛ waja le kɔmɔ tai ibɛɛ wɔɔ ye, inɛw muɲu pɛlu le, inɛw muɲu pɛɛlɛi kuu nɛ gɔnrɔn bɛbɛɛdo ma, ɔgɔnɛ dɛinyaan ye badu badaidolo gɔ yɔɔ ma? 32Wo yagɔ baŋai gɔnrɔindolo jugaajɛ ye, ɔgɔnɛ waja gɔ wage nɛ baa wo wɔnu, unrun wo le tubiyaai ga inɛw wo bɛrɛ titiido. 33Kɔɔ gin’ logoro ebe nɛ inɛ aai kanran kijɛ wo sɛɛ wooi pajalu ye, jaŋu ii mai bii bɛɛidolo.» 34«Narain, nɛu kai kijɛ ɛjui. Kaa, nɛu ɛɛlu womɔ manaai ye, wo bɛrɛ ɛɛlu gɔ yani pilemɛ ye obu bɛɛmɔdo? 35Minɛ bɛrɛ woi ire sɛlɛ, iyaa binugui laa. Woi bain go togotiidɛin. Inɛ suguru ɛhɛgu sɛɛ, wo sɔɔ gɔ keŋiyɛn.»

will be added

X\