LUKA 13

1Waaru wogɔ le tee, Pilate womaa, Galile bɛɛnw gamuu, waaru sadaga arusɛgɛ bemɛ be sɛnwɛnbe le, bei wiyaa daamaa, ili bemɛ sadaga arusɛgɛ ili gɔ le ligijiyemaabe ga, inɛw gamuu kibɛru wogɔ Yesu bɛrɛ wiyaa tagin. 2Yesu aŋa bemɛ ɔn gin’ sai: «Ajubu ebe nɛ, Galile bɛɛnw kɔɔbe bana bei dain gɔ dɛi, be Galile bɛɛnw wajunw gɔbe dɛi sigɛ hakɛ kanranwin ga wɔi ma? 3Ai, wogɔ narain laa ga mu e bɛrɛ tagauwɔn. Kaa e bana ebe dulomɔli ye, e kanran kɔɔ gin’ susuiyodei. 4Inɛw pɛli gagarasigɛ kuu nɛ Silowe ginrun gabu numaa sugaa bei daabe gɔ, ajubu ebe nɛ, inɛw wogɔbe Jerusalɛmu nɛ inɛw tobɛin gɔbe puu dɛi sigɛ mɔɲu kanranwin ga e wɔi ma? 5Ai, wogɔ narain laa ga mu e bɛrɛ tagauwɔn. Kaa e bana ebe dulomɔli ye, e kanran kɔɔ gin’ susuiyodei.» 6Yesu, kɔɔ onu nɛ taanrinyɛn ɔn jeɲaa dain: «Ainɛ turu gaa na, resɛn minɛ womɔ nɛ yibaa yasɛbe. Wo gaa na gɔ kuu nɛ ii tɛtɛmɛdo ma dɛi wiyaa yɛnaabe, kaa wo ii turu kanran tɛmɛlu. 7Kɔɔ waaru le, wo minɛ womɔ walanɛ gɔ le ɔn gin’ sɔi: ‘Yɛnɛ! Gaa na ɔn kuu nɛ ii dɛnɛi wiyaa tɛmɛlu mu kanrun anranguju taaniyei. Woi bɛŋɛti. Wo inge sabu dɛi minɛ gɔ nɛ yalu bamai aa gɛlɛ?’ 8Kaa minɛ walanɛ gɔ saa gi: ‘Mu baŋa, u nimɛ kanran yuwɔ woi paja yɛnɛ. Taŋa taŋa womɔ nɛ minɛ gɔ guraa ye, binugu mui kunɔmɔ. 9Kunrin kanraan ye, wo anranguju wɛɛido gɔ ii nanarando bibiyɛ. Kɔɔ gin’ biyɛlu ye, u woi bɛŋɛti.’ » 10Deeliye bai turu, Yesu, Ama gɛɛn ginrun nɛ deeru deereube. 11Yalu wogɔ nɛ yaanran turu yabe. Wo anranguju pɛli gagarasigɛ baa, jinrun turu woi aa sɛbe. Jinrun gɔ woi nurungiyemaa, woi yɔniyɛnmaa, demu iŋiyɛnmɔbele. 12Yesu, yaanran gɔi waaru wo iye le, woi boonaa, wo le kijɛ gi: «Na, nurun uwɔ gɔ bajaai.» 13Yesu, yaanran gɔ kuu nɛ numɔ yaŋaraanbe. Ginsɛsai, yaanran gɔ sɛɛu demu biyaa, Ama boi sɔmɔi tɔlaabe. 14Kaa Ama gɛɛn ginrun kuu baŋa gɔ, Yesu, deeliye bai inɛi bajamu gɔ dɛi, kinɛ womɔ banraain. Kɔɔ sabu dɛi wo mɔɔnu gɔ le sɔwaa gi: «Birɛ bai birɛɲu bai kuloi wɔɔ: E ei bajamɔ ga, bai wogɔbe le wɛɛi. Kaa deeliye bai wɛɛnɔugi.» 15Inɛw Baŋa aŋa womɔ saa gi: «E inɛw aŋa lɛilɛi gɔbe, e tuturu puu, deeliye bai, jandulu ebe ma, naa jiŋu ebe ma, bei dii nɔɔmɔ dɛi pegu bemɛ nɛ pagalaidelei ma? 16Yaanran ɔn Abarahamu tɔgui. Anranguju pɛli gagarasigɛ baa Setanu woi pagaa gɛliyaa wɔɔ. Pagu wogɔ nɛ woi goonɔ ga deeliye bai wogɔ kanraan ye gajui ma?» 17Yesu, waaru sɔɔ kɔɔbe wo sɔi le, jaŋuw womɔ gɔbe puu dɔgɔ le bɛin. Kaa Yesu, birɛ taanrinyɛn kanraanbe gɔbe dɛi, mɔɔnu gɔ puu kinɛ ɛɛlu le bee. 18Yesu kijɛ gi: «Ama diinɛ gɔ, inge le murin wɔɔ? Mu inge le woi tunwɔn bɛɛdɔn? 19Wo tiun ii uji mutarudu be gɛɛjɛ gɔ le murin wɔɔ. Ainɛ turu wogɔ jeɲaa sadiŋɛ womɔ nɛ tɔwaabe. Wo tɛiyaa, tiun na taŋaabe. Sasaabe wiyaa, numɔ ii womɔ gɔbe nɛ kuru bemɛ kuraabɛin.» 20Yesu iyaa taanrinyɛn waja daan ɔn gin’ gi: «Mu Ama diinɛ inge le iyaa tunwɔndɔn? 21Ama diinɛ gɔ kijɛ buru pidemu le murin wɔɔ. Yaanran turu kijɛ buru pidemu wogɔ jeɲaa, punau kilo pɛɛlɛi numɔrɔnsigɛ nɛ kunaa, bolaa, punau bolaaɲu gɔ puu ingeleido baa pajaabe.» 22Yesu, Jerusalɛmu oju nɛ toun, ana diyɛbe lee, ana dagibe lee kɛjɛ kɛjɛ taŋaube. Wo ana wogɔbe nɛ inɛwin deeru deere deere galaube. 23Inɛ turu Yesu bɛrɛ selumaa, gi: «Mu Baŋa, inɛw gailai sai yabadɛin ma?» Yesu, inɛw wo le bɛin gɔbe le ɔn gin’ sai: 24«E mainiyaanjɛi ye mɔnɔgolo ɛmu gɔ le yooi. Sabu, mu e bɛrɛ daii sɔɔuwɔn, inɛw joo Ama diinɛ gɔ nɛ yoo ga dɛdɛnɛdɛin. Kaa be yoo bɛɛidenɛ. 25Waaru gɔ dɔwaai ye, ginrun baŋa gɔ ingelaa ye taan gɔ pinaa ye sɔsɔgɔdo. Kɔɔ waaru le, e bain go wɔnu, taan gɔ tɔgɔnu ɔn gin’ gɛɛdei: ‘Emɛ baŋa, taan gɔ emɛ dɛi pinɛlɛ.’ Ginrun baŋa gɔ sasaado: ‘Mu e yago goii ma inɔn.’ 26Kɔɔ waaru le e gɛgɛɛdei: ‘U lee, emɛ lee, emɛ mɔrinyaan kayaabɛin, nɔwaanbɛin. U iyaa ana tai emɛbe nɛ deeru deeraabeu.’ 27Wo ɔn gin’ e le saado: ‘Mu ei aabei ma inɔn. Genɛ ma nɛ dɔrɔ gooi, e inɛw mɔɲu kanranw gɔbe.’ 28Waaru Abarahamu lee, Isaka lee, Jakɔbu lee, inɛw Ama titiyaanw gɔbe puu lee, Ama diinɛ nɛ e iyaajɛ, waaru ei bain go kamaatiyaaɲu, e pii piinu, tɔnrɔn tɛnwɛnnu biyɛdei. 29Inɛw duu sibɛ go lee, dudaga sibɛ go lee, donɔ sibɛ go lee, tɛŋurun sibɛ go lee goi wɛi ye, Ama diinɛ nɛ jaa kakayadɛin. 30E sɔɔ ɔn ɛjii paamu kanrain: Kanɛ inɛw onu dimi gɔbe, logoro bemɛ nɛ, inɛw gamuu waaru wogɔ le giru totoiyodɛin. Iyaa kanɛ inɛw giru toin gɔbe, logoro bemɛ nɛ, inɛw gamuu waaru wogɔ le onu didimiyɛndɛin.» 31Kɔɔ waaru le, Parisiɛn gamuu wiyaa, Yesu le ɔn gin’ sɔin: «U ɔn nɛ gowaa ye yalu waja nɛ jɔbɔ yaa, sabu Herɔde ui dai ibɛɛ wɔɔ.» 32Yesu be le saa gi: «Yurugu kɔɔ bɛrɛ yaa ye ɔn gin’ sɔɔi: ‘Mu bai lɛi jinrunbe inɛw kuu nɛ nana goonɔuwɔn, iyaa inɛwin sɛɛu bajamɔuwɔn. Kɔɔ onu nɛ birɛ ma gɔ kikilɛdo.’ 33Kaa bai lɛi mu oju ma digi mu yaaun jaain wɔɔ. Sabu inɛ Ama titiyainɛ, Jerusalɛmu ana nɛi laa ye yalu waja nɛ wo yinwɛun dagalu. 34«Nɛɛ, u Jerusalɛmu, u, ana inɛw Ama titiyaanw daanɛ gɔ, Ama u bɛrɛ inɛw tii gɔbe, u ana bei tibu le kamu kamu daajɛ gɔ, waaru joo nɛ mu unrunw uwɔ gɔbei mɔɔnɔ ga dɛnaabɔn. Ɛɲɛ na, unrunw womɔ gamuju doɲu nɛ wo kunɔjɛ gin’, mu ei mɔɔnɔ ga dɛnaabɔn. Kaa, e wogɔ yabali. 35Aiwa! Kɔɔi biyaa ye, ginrun ebe e bɛrɛ koolo pajadɛin. Naran go, e waja “Inɛw Baŋa Ama boi le inɛ wɛɛjɛ gɔ duba wo le biyɛmɔ” e gɛɛido bai yai dɔɔ baa, e mui iyeidelei.»

will be added

X\