LUKA 12

1Kɔɔ waaru le, inɛw lugo kale sɛlɛ mɔrinyaanbɛin. Jojoo bemɛ gɔ dɛi be tunmɔ kubɔ namaubɛin. Yesu, jaŋu unrunw womɔ gɔbe le laa ɔn gin’ sɔi: «Parisiɛnbe aŋa lɛilɛi, kijɛ buru pidemu gin’ wɔɔ gɔ dɛi, kuu ebe kajubai. 2Kijɛ babaŋa puu ɛlu gogoodo. Iyaa kijɛ boŋurun puu jujugɔmɔdo. 3Kɔɔ gin’ ɔlɔ nɛ baŋiyaan toun kijɛ e sɔi gɔbe puu, aga wijɛ nɛ sɔsɔɔdɛin. Iyaa, ginrun kɔlɔ nɛ tunmɔ suguru nɛ dujo dujo ye, sɔɔ e sɔɔjɛ gɔbe dala nɛ boonu kunu ye tatagadɛin.» 4«E mu anrunge gɔbe, mu e bɛrɛ tagauwɔn, inɛw goju ebe daatiyaa ye, kɔɔ onu nɛ kijɛ kanma kanrun bɛɛidenɛ gɔbei liyɛnɔugi. 5Kaa, mu inɛ e liyɛun dagaa gɔ e bɛrɛ tatagadɔn, inɛ goju ebe daa ye, kɔɔ onu nɛ ei yaun asuu yinwɛindolo gɔ nɛ kamu kunɔɲu gɔnrɔn sɛɛ gɔ, e kɔɔbaŋai liyɛi. Ɔnhɔn, mu e le daii sɔɔuwɔn, e inɛ wogɔ baŋai liyɛi. 6«Sasaa dɔɔrɛi numɔrɔn dɔnrun gɔ, tama lɛi gɔ, woi laa ma? Kaa Ama, sasaa kɔɔbe logoro nɛ turu kanran naŋaalɛ. 7Halu kuu ebe kukuli gɔbe yaa puu lugaa bojaaɲu. Kɔɔ digɛu, e liyɛnɔugi. Sabu e sasaa dɔɔrɛi joo dɛi irei.» 8«Iyaa, mu e bɛrɛ tagauwɔn, inɛ aai kanran, inɛw giru nɛ, unruin jaŋu ii mai daii giyaajɛ ye, Inɛ Aini gɔ kanran, mɛlɛnkɛ gɔbe giru nɛ, woi jaŋu ii unrunmɔi gɛgɛɛdo. 9Kaa, inɛ aai kanran, inɛw giru nɛ, unrun mui inɛɛ daii giyaajɛ ye, inɛ wogɔ baŋai, mɛlɛnkɛ gɔbe giru nɛ kanran, woi inin gɛgɛɛdɛin. 10«Inɛ aai kanran, Inɛ Aini gɔ le sɔɔ mɔɲu sɔwaajɛ kanran, baŋa hakɛ yaabu kanrun bɛbɛɛdo. Kaa, inɛ Kikinu Pilu boi yamalaajɛ gɔ, hakɛ womɔ yaabu kanraindenɛ. 11«Ama gɛɛn ginrun gɔbe giru nɛ lee, inɛw giru toin giru nɛ lee, paŋagunw giru nɛ lee, waaru ei dimɛraan yaaɲu le, bana sɔɔ e sɔɔido dɛi ma, sɔɔ e sɔɔido dɛi ma, diyɛdai le biyɛnɔugi. 12Sabu Kikinu Pilu gɔ, waaru wogɔ le tee sɔɔ sɔɔun jaan gɔ e bɛrɛ jujugɔmɔdo.» 13Inɛ turu, mɔɔnu gɔ logoro nɛ ɔn gin’ Yesu le gi: «Jaŋudeerenɛ, u mu bainɛ womaa kɛn emɛ gɔ mu lee, wo lee logoro nɛ gamala gɛɛ.» 14Kaa Yesu, ainɛ gɔ le ɔn gin’ sai: «Hei! Banrunge, inɛ aa mui saliyɛkirenɛ ebei biyɛ ga kuu ebe nɛ daanu? Maa, inɛ aa mui kijɛ gamalanɛ ebei boju?» 15Kɔɔ onu nɛ Yesu be le ɔn gin’ sɔi: «Girikakala dɛi kuu ebe kajubai. Sabu inɛ kijɛ aŋai wo sii puu, kijɛ joo sii womɔ kinrun womɔ yabu bɛɛidolo.» 16Kɔɔ onu nɛ Yesu, taanrinyɛn turu be le ɔn gin’ dain: «Ɔgɔinɛ turu minɛ nɛ dɛnrɛn ɛjii ilaabe. 17Kɔɔ waaru le, ɔgɔinɛ gɔ, kinɛ unrunmɔ nɛ ɔn gin’ gɛɛbe: ‘Nɛɛ, mu inge kanrandɔn? Sabu mu dɛnrɛn ma gɔbe puu yalu kunɔɲu sɛlɔn.’ 18Wo iyaa kinɛ unrunmɔ nɛ ɔn gin’ ajubu: ‘Kijɛ mu kanraindo gɔ unwɔ: Mu guyɔ ma gɔbe lalagadɔn. Kɔɔ onu nɛ guyɔ pɔlɔ mɔ gɔ dɛi gaa uhujɔdɔn. Kɔɔ gin’ mu dɛnrɛn ma lee, kijɛ ɛju mu sɛɛ wooi lee, wogɔ nɛ kekeenɛdɔn. 19Kɔɔ onu nɛ, kuu ma le ɔn gin’ gɛɛdɔn: Mu anranguju joo dɛi kijɛ joo mɔɔnaajɔn. Mu dedeeliyedɔn, jaa kakayadɔn, kijɛ nɔɔɲu nɔnɔɔdɔn, kinɛ ɛhɛɛliyɛmɔdɔn.’ 20Kaa Ama, ainɛ ɔgɔinɛ gɔ le ɔn gin’ sɔwaa gi: ‘Bomɔginɛ! Iye digɛ tee kinrun uwɔ gogoodo. Nɛɛ kijɛ balaa mɔɔnaa u sɛɛ gɔ, wogɔ aa mɔi biyɛdo?’ » 21Kɔɔ gin’ sɔwaatiyaa, Yesu baraa gi: «Inɛ kuu bana unrunmɔ dɛi kijɛ mɔɔnɔi laa ye, Ama giru nɛ kijɛ sɛlɛ gɔ sɔɔ kunrin wɔɔ.» 22Sɔɔ kɔɔbe onu nɛ, Yesu, jaŋu unrunw womɔ le kijɛ gi: «Kɔɔ sabu dɛi, mu e bɛrɛ tagauwɔn, pana ebe dɛi diyɛdai le biyɛnɔugi. Kijɛ e kayaido dɛi ma, goju ebe nɛ sɔi e kunɔido dɛi ma, diyɛdai le biyɛnɔugi. 23Kinrun, kayɛrɛ dɛi ire, iyaa goju yaa, sɔi dɛi ire. 24E gaŋabe sɔɔ ajubu yɛnɛi: Be toi tɔɔnɛ, gɛlu gɛlɛɛnɛ. Iyaa be yalu kijɛ baŋaranɲu ma, guyɔ ma sɛnɛ. Kaa Ama, pana bemɛ tɔtɔɔjɛ. Ei sigɛ le sasaabe dɛi ire. 25Logoro ebe nɛ inɛ aa, kuu womɔ dɛi jiire wo jiirejɛ dɛi kinruntaun womɔ halu gaila kanran baru bɛɛjɛ? 26E kɔɔ gin’ kijɛ dagi kɔɔ tunmɔ kanran kanrun bɛɛlɛi biyaa ye, inge dɛi kijɛ wajunw dɛi diyɛdai le wɔi? 27Minɛ nɛ kinrunbɔmɔbe aŋai puyo be puyojɛ ajubu yɛnɛi. Be birɛ birɛɛnɛ. Sɔi kanran tiyɛɛnɛ. Kaa naran go, halu, Ɔgɔnɛ Salomɔ ɔgɔ womɔ wooi nɛ, puyo kɔɔbe baa saŋa saŋiyɛnlu. 28Puyobe, iye kowɔnu, yogo yaun nɛ kunɔɲu gɔ, Ama kɔɔ gin’ bei sasaŋaranjɛ biyaai ye, wo wogɔ dɛi sigɛ duŋu ebe gooidolo ma? Gagawu ebe gaila de! 29Nɛɛ, e bai wooi diyɛdai le bii ye, kijɛ e kayaido ma, kijɛ e nɔɔido ma dɛnɛnu biyɛnɔugi. 30Aduna ɔn nɛ inɛw Ama inin gɔbe, kijɛ kɔɔbe dɛi diyɛdai le be biyɛjɛ. Kaa e kai, e Ba Ama, e kijɛ kɔɔbe kai yasɛi ga igii wɔɔ. 31Kaa, Ama diinɛ gɔ dɛnɛi. Kɔɔ biyaai ye, kijɛ wajunw gɔbe kuu ebe nɛ boru babaradɛin. 32«U liyɛnɔu, peju kulɔ dagi gɔ. Sabu e Ba Ama, e bɛrɛ diinɛ womɔ gɔ obo ga, kinɛ womɔ aa wɔɔ. 33Kijɛ e sɛɛ gɔ dɔnraan ye, kɛɛlɛ gɔ dɛgugunw bɛrɛ gamalai. Gelu kɛɛlɛ gɛli asuu sɛmiliyɛɛlɛ gɔ, e wogɔ dɛnɛi. Arusɛgɛ dogoolɛ gɔ alagala nɛ mɔɔnɔi. Wogɔ nɛ gugunyɔnnɛ dɔi bɛɛidolo, iyaa peru yaa yamala bɛɛidolo. 34Sabu kijɛ ebe yalu wɔɔ gɔ nɛ, kinɛ ebe kanran yalu wogɔ nɛ biyɛjɛ.» 35«Dɔin ebe pagaa ye, lanpa ebe tanugaa ye biyɛi. 36Birɛbirɛnw, kuu baŋa bemɛ purupagu yalu nɛ yaa, pilemɛ ye, wo wɛɛido dɔmi gin’, e kunrin biyɛi. Waaru kuu baŋa gɔ wiyaa, taan gɔ wo tɔgaajɛ, ɔgu kɛu wo dɛi taan pinɛlɛ bɛbɛɛdɛin. 37Birɛbirɛnw giri yeiyelu go, birɛ nɛ be toun, kuu baŋa gɔ wiyaa tɛmaajɛ gɔ, Ama be yabu. Mu naran go e bɛrɛ tagauwɔn, wo dɔin womɔ papagado, jaa kaya ga bei dadaanado. Wo dɔɔ ye, be bɛrɛ jaa gagamalado. 38Kunrin, digɛtaŋu le ma, digɛtaŋu galaa wo yaa, kuu baŋa gɔ wo wiyaa, inɛw kunrin woi dɔmɔu wo tɛmaajɛ, be kai, Ama be yabu. 39«Iyaa e igii biyɛi: Ginrun baŋa, gugunyɔnnɛ, ginrun womɔ nɛ waaru wɛɛido igii bee ye, wo gugunyɔnnɛ gɔi paja ye, ginrun unrunmɔ tɔgɔrɔmɔbele. 40Kɔɔ dɛi e kanran, waaru wooi yeguru le biyɛi. Sabu Inɛ Aini gɔ, lɛɛrɛ ajubaa sɛlɛ e wɔɔ gɔ le wɛɛdo.» 41Piɛru saa gi: «Inɛw Baŋa, u taanrinyɛn u dain kɔɔ, u emɛ dɛi sɔɔjɛu ma, inɛw puu dɛi sɔɔjɛu?» 42Inɛw Baŋa, Piɛru le saa gi: «Ginrun kajubanɛ sɔɔ turu baŋa, hakilɛ sɛɛ gɔ aai? Inɛ wogɔ waaru jaan gɔ le birɛbirɛnw wajunw gɔbe pana tɔɔ ga, wo baŋa sagu bemɛ wo bɛrɛ gawarado. 43Birɛbirɛnɛ wogɔ, kɔɔ gin’ birɛ womɔ nɛ sɛɛu wo tonu, wo baŋa wiyaa tɛmaa ye, Ama wo yabu. 44Mu naran go e bɛrɛ tagauwɔn, ginrun baŋa gɔ, kijɛ unrunmɔ puu wo bɛrɛ gagawarado. 45Kaa birɛbirɛnɛ gɔ kinɛ womɔ nɛ unrun baŋa ɔgu wɛɛidolo ga ajubaa, anranw birɛbirɛnw wajunw gɔbe lee, yaanw birɛbirɛnw gɔbe lee lagai tɔlaajɛ ye, iyaa jaa kayaa ye, kɔɲɔ nɔwaan ye, wogɔ le bimiliyaa ye biyɛjɛ ye, 46bai turu soo sɛlɛ womɔ nɛ, lɛɛrɛ ajubaa sɛlɛ wo wɔɔ le, wo baŋa wɛwɛɛdo. Wo bɔnrɔn diyɛ wo bɛrɛ ihiyemɔdo. Iyaa woi inɛw Ama inin gɔbe le mɔɔnɔ ye tutujɔdo. 47«Kunrin birɛbirɛnɛ kuu unrunmɔ baŋa diŋɛ jugaa wɔun, yeguru turu kanran kunɔlu gɔ ma, diŋɛ womɔ kanrun yabalu gɔ, birɛbirɛnɛ wogɔ, logi woi babaado. 48Kaa birɛbirɛnɛ wo baŋa diŋɛ inɛɛ wɔu, kijɛ logi jaan kanraanjɛ ye, logi gaila bɛbɛɛdo. Inɛ bɛrɛ kijɛ joo obaaɲu gɔ, wo bɛrɛ gaai seselumɛdɛin. Iyaa inɛ bɛrɛ joo go sagu gawaraaɲu gɔ, wo bɛrɛ inɛw wajunw mɔ dɛi sigɛ seselumɛdɛin.» 49«Mu aduna nɛ yaun kunɔi wɛiun. Kanɛ baa yaun gɔ tanugaatiyaabɛin ye ibɛɛ wɔun. 50Mu batise tɔgu turu mu bɛɛun jaain wɔɔ. Batise wogɔ sɔɔ kibeido baa, mu kinɛjiun le wɔun. 51Ajubu ebe nɛ, mu aduna nɛ jamui jɛɛlɛi wɛiun ga wɔi ma? Ai de! Mu inɛw tunmɔ le kabuga dɛi wɛiun. 52Kanɛ baa, inɛw numɔrɔn ginrun nɛ yatoin ye, inɛw taanu inɛw lɛi gɔbe le kakabiyɛdɛin, inɛw lɛi gɔbe taanu gɔbe le kakabiyɛdɛin. 53Banɛ, aini unrunmɔ le jajaiyɛdo, aini, unrun ba le jajaiyɛdo. Nanɛ, iyaa womɔ le jajaiyɛdo, iyaa kanran, unrun na le jajaiyɛdo. Igɛ na, ii unrunmɔ yaanran le jajaiyɛdo, ii yaanran, unrun igɛ na le jajaiyɛdo.» 54Yesu iyaa, mɔɔnu gɔ le ɔn gin’ sɔi: «Waaru dudaga sibɛ go, anrankulumɔ daanau wo wɔu e iyaajɛ, e ɔgu gɛgɛɛdei: ‘Anran yawɛɛjɛ.’ Sɔɔ wogɔ kunrin tee biyɛjɛ. 55Iyaa, e ooɲɔ, tɛŋurun sibɛ go gowaa, suyou wo wɔu iyaajɛi ye, e gɛgɛɛdei: ‘Ujɔ bibiyɛdo.’ Sɔɔ gɔ kunrin tee biyɛjɛ. 56E inɛw aŋa lɛilɛigunw gɔbe, minɛ lee, alagala lee yɛnɛ ye tiyɛ bemɛ jugu bɛbɛɛjɛi ye, e inge dɛi waaru ɔn sɔɔ tiyɛ jugɔɔlɛi wɔi ma?» 57«E inge dɛi kuu ebe le sɔɔ bana teitai kanraun jaan gɔ yɛnɛɛlɛi wɔi ma? 58Kɔɔ gin’, u jaŋunɛ ui dimɛraan saliyɛ kiru yalu nɛ jɛyaauwɔ ye, oju nɛ tonu mainiyaan ye, ɔgu wo le sɔɔ yegere. Kɔɔi laa ye, wo ui saliyɛkirenɛ numɔ nɛ kukunɔdo. Saliyɛkirenɛ gɔ ui garidu numɔ nɛ kunɔ ye, garidu gɔ kaju nɛ ui kunɔmɔdo. 59Mu e bɛrɛ tagauwɔn, yoru gɔ puu tujaa halu kɛturu kanran u le wajaa ye, kajuginrun gɔ nɛ bɛɛ gooidolou.»

will be added

X\