LUKA 10

1Kɔɔ onu nɛ, Inɛw Baŋa Yesu, jaŋu unrunw waja pɛsɔi lɛisigɛ yɛmaabe. Wo bei inɛ lɛi lɛi goonaa, ana nɛ lee, yalu wo yaaun jaan gɔbe wooi nɛ lee, bei giru unrunmɔ nɛ tiyaabe. 2Yesu, jaŋu unrunw gɔbe le ɔn gin’ sɔwaabe: «Dɛnrɛn ilaa, gaai wɔɔ, kaa birɛbirɛnw joolain. Kɔɔ dɛi, minɛ baŋa bɛrɛ gɛɛin, womaa dɛnrɛn gɔ ginrun jɛɛlɛ giye, birɛbirɛnw minɛ gɔ nɛ tii wa. 3Nɛɛ, yaai! Kaa igii biyɛi, mu peju unrunw gin’ tataabe logoro nɛ ei tiiuwɔn. 4Buudu yalu kunɔɲu ma, jɛmɛ ma, taga ma jeɲɛnɔugi. Oju nɛ iŋi ye, inɛ turui kanran poonɔnɔugi. 5Ginrun e yoojɛ wooi nɛ, e laa gɔ ɔn gin’ gɛɛi: ‘Ginrun ɔn jamu wo le biyɛmɔ!’ 6Kɔɔ nɛ jamu inɛ turu yato ye, jamu ebe gɔ kuu womɔ nɛ susugodo. Kɔɔi laa ye, jamu ebe gɔ e nɛ pilemɛ ye wɛwɛɛdo. 7Ginrun e yoi gɔ nɛ yabiyɛi. Kakayɔn e bɛrɛ be oboido gɔ kayai. Kijɛ nɔɔɲu e bɛrɛ be oboido gɔi nɔɔi. Sabu birɛbirɛnɛ tujɔ womɔ wo le jaain wɔɔ. E ginrun ginrun nɛ yoonu biyɛnɔugi. 8Kɔɔ gin’ iyaa, ana nɛ e yoi wooi nɛ, inɛw gɔbe ei sɛgɛraaɲu ye, e bɛrɛ kijɛ oboidɛin gɔi kayai. 9Ana wogɔ jiungunw gɔbei bajamɔi. Iyaa, be le ɔn gin’ gɛɛi: ‘Ama diinɛ gɔ e le bɛruniyaain.’ 10Kaa, ana turu nɛ e yowaa, ana gɔ bɛɛnw ei sɛgɛrɛ ga yabanɛ biyaai ye, ana wogɔ pɔŋɔrɔn gɔbe nɛ yaai, kɔɔ onu nɛ kijɛ e gɛɛido: 11‘Emɛ e dɛi ana ebe ugunu, kubɔ emɛ nɛ tara gɔ kanran pogouwɔin. Kaa, kɔɔ wooi logoro nɛ, Ama diinɛ gɔ e le bɛruniyaain ga jugi biyɛi.’ 12Kɔɔ sabu dɛi mu e bɛrɛ tagauwɔn, Ama, aduna saliyɛ bai wo kireido, Sodomɛ ana bɛɛnw ɔɲɛ gɔ, ana kɔɔ inɛw mɔ baalu biyɛdo.» 13«Kɔɔ gin’ Korajinɛ ana bɛɛnw, Bɛtusayida ana bɛɛnw, bɔnrɔn e le yɔɔ. Sabu ana ebe nɛ taanrinyɛn birɛ kanraan tagurin gɔbe, Tire lee, Sidɔn lee ana nɛ kanraan tagurin bee biyaa ye, be ɔn baa bana bemɛ dulomu ye, sɔi sɛmɛlɛ gori ye, dɛinyin ye, minɛ kɔkɔliyɛbɛin. 14Kɔɔ dɛi, Ama, aduna saliyɛ bai wo kireido dɔwaai ye, Tire lee, Sidɔn lee bɛɛnw ɔɲɛ gɔ ebe mɔ baalu biyɛdo. 15U kai, Kapɛrunaumu ana gɔ, ui jeɲaa ye, alagala baa unɔdɛin ma? Ai, ui yinwunrun baa sunugodɛin.» 16Yesu, iyaa pilemaa jaŋu unrunw gɔbe le ɔn gin’ gi: «Inɛ sɔɔ ebe keŋiyɛnjɛ gɔ, mui keŋiyɛnjɛ. Iyaa, inɛ e le yabalu, mu le yabalu kanrun. Kɔɔ gin’ iyaa inɛ mu le yabalu gɔ, mui tiinɛ gɔ lei yabalu kanrun.» 17Jaŋu unrunw pɛsɔi lɛisigɛ Yesu tii gɔbe kinɛ ɛɛlu le pilemaa wiyaa, ɔn gin’ sɔin: «Inɛw Baŋa, halu jinrunbe kanran boi uwɔ paŋa le emɛ le tubiyeuwɔin.» 18Yesu be le saa: «Mu, Setanu, anran bana giri yɛnɛjɛ gin’, ginsɛsai, alagala gowaa bagau wo wɔu iyaabɔn. 19Yɛnɛi, mu yugurube kuu nɛ lee, mɔmiyɛnbe kuu nɛ lee nama ga, paŋa e bɛrɛ obaajɔn. Iyaa jaŋunɛ paŋa puu kuu nɛ yaa e bɛrɛ gɔnrɔn obaajɔn. Kijɛ turu kanran mɔɲu e bɛrɛ kanrun bɛɛidolo. 20Yinkanran jinrunbe e le tubiyaain ga kinɛ ebe ɛɛliyɛmɔnɔugi. Kaa boi ebe alagala nɛ tɔŋi wɔɔ dɛi kinɛ ɛɛliyɛmɔi.» 21Waaru wogɔ le tee, Yesu, Kikinu Pilu gɔnrɔn le kinɛ saii ɛɛliyɛmaa, ɔn gin’ sɔi: «Ba, alagala lee, minɛ lee baŋa gɔ, sɔɔ ɔnbe, hakilɛgunw lee, jugɔ jugɔnw lee bɛrɛ baŋaraantiyaa, unrunw dagunw bɛrɛ u jugɔmu gɔ dɛi, u birɛpoo. Ɔnhɔn! Ba, sabu giru uwɔ nɛ kijɛ dagaa gɔ woi. 22«Mu Ba kijɛ wooi numɔ ma nɛ kunaajɛ. Ba gɔi laa ye, Aini gɔ aai ma inɛ igu wɔlɔ. Iyaa, Aini gɔ lee, Aini gɔ inɛ bɛrɛ Ba gɔ jugɔmu wo ibɛ gɔ lee laa ye, Ba gɔ ai ma inɛ igu wɔlɔ.» 23Iyaa, kɔɔ onu nɛ, jaŋu unrunw unrunmɔ sibɛ go kigelemaa, be tee sai le Yesu ɔn gin’ sɔi: «Kijɛ e iyejɛ ɔnbe, giri wogɔ iyenw gɔbe, Ama be yabu. 24Kɔɔ sabu dɛi mu e bɛrɛ tagauwɔn, inɛw Ama titiyaanw joo lee, ɔgɔnw joo lee, kijɛ e iyejɛ ɔnbe iye ibɛɛ bɛin, kaa biyaa iyenɛ. Be sɔɔ e ɛgɛjɛ ɔnbe ɛgɛ ibɛɛ bɛin, kaa biyaa ɛgɛnɛ.» 25Kɔɔ onu nɛ, Ama tɔɔru deerenɛ turu ingelaa, Yesui subɔrɔ yɛnɛ dɛi, wo le ɔn gin’ sɔi: «Jaŋudeerenɛ, maa ɔnmɔsɔgɔ bɛɛ ga, kijɛ inge mu kanraun jaan?» 26Yesu wo le saa gi: «Tɔɔru dɔn gɔ nɛ ingei tɔŋaaɲu? U sɔɔ wogɔ jaŋaa, yani paamu?» 27Ama tɔɔru deerenɛ gɔ saa gi: «”U Inɛw Baŋa, Ama uwɔ gɔi, kinɛ uwɔ wooi le, kinrun uwɔ wooi le, gɔnrɔn uwɔ wooi le, hakilɛ uwɔ wooi le ibɛi biyɛ.” Iyaa “Aŋai kuu uwɔ u ibɛ gin’, u bɔɔnɛi yaa kɔɔ gin’ ibɛi biyɛ.”» 28Yesu saa gi: «Bana u sai gɔ ɛjii wɔɔ. U kunrin kanran. Kɔɔ gin’ kanraanjɛu ye, u ɔnmɔsɔgɔ bɛbɛɛdou.» 29Kaa Ama tɔɔru deerenɛ gɔ kuu unrunmɔ bɛrɛ naran obu ibɛi bee dɛi, Yesu le ɔn gin’ gi: «Nɛɛ, mu bɔɔnɛ gɔ aai?» 30Yesu saa gi: «Ainɛ turu Jerusalɛmu gowaa, Jeriko sugoube. Oju nɛ wo tou, kuu numɔ numɔw kuu womɔ nɛ numaa, sɔi wo tobe gɔbe puu ɛlaa, woi lagaa, goju womɔ puu barumaa, kinrun goolu laa ye, kijɛ wo bɛrɛ waju bele wo wɔu, pajaatiyaa jɔbin. 31Kɔɔ gin’ ainɛ gɔ oju nɛ wo diiun, Ama bɛrɛ sadagadɔɔnɔnɛ turu, soo sɛlɛ womɔ le oju tutunmɔ gɔ dimiyaan sugoube. Ainɛ gɔi iyaa, baaraa galaabe. 32Kɔɔ gin’ Lewi tɔgu inɛ turu yaa, yalu wogɔ nɛ wiyaa dɔwaa, ainɛ gɔi iyaa, wo kanran, baaraa galaabe. 33Kaa Samari ana bɛɛnnɛ turu ana yaau, wiyaa yalu ainɛ gɔ diinbe gɔ nɛ dɔwaabe. Waaru woi wo iye le, amasɔgɔ womɔ woi aabe. 34Genɛ womɔ nɛ dɔwaa, ainɛ gɔ mirun gɔbe nɛ nii lee, resɛndii ilɛ lee togaa kɔɔraa, ɛjii pagaabe. Kɔɔ onu nɛ ainɛ gɔi jeɲaa arusɛgɛ unrunmɔ kuu nɛ daanaa, yerunw ginrun sugo turu nɛ woi jɛyaa, woi ɛjii kajubaabe. 35Aga baa yaa gɔ, wo yerunw ginrun sugo baŋa bɛrɛ sarudu buudu lɛi goonaa obaa, wo le ɔn gin’ sɔi: ‘U woi ɛjii kajuba. Waaru pilemaa mu wiyaajɛ, kɛɛlɛ sigɛ wo dɛi u goonu gɔ puu, mu u bɛrɛ tutujɔdɔn.’ » 36Yesu, Ama tɔɔru deerenɛ gɔ bɛrɛ ɔn gin’ selumu: «Inɛw taanu ɔnbe logoro nɛ, ajubu uwɔ nɛ, inɛ aai, ainɛ kuu nɛ kuu numɔ numɔw numi gɔ bɔɔnɛi bii?» 37Ama tɔɔru deerenɛ gɔ saa gi: «Ainɛ amasɔgɔ womɔ jugɔnɛ gɔi.» Yesu wo le kijɛ gi: «U kanran yaa ye, kɔɔ tunmɔ kanran.» 38Yesu lee, jaŋu unrunw womɔ lee, oju galau wɔun, ana turu nɛ be dɔwaa, yaanran turu, boi womɔ Mate gɛɛbɛin gɔ, ginrun unrunmɔ nɛ Yesui sɛgɛraabe. 39Mate bainɛ turu yabe. Boi womɔ Mari gɛɛbɛin. Mari kɔɔ, Inɛw Baŋa Yesu kubɔsɔrɔ nɛ dɛinyaan, sɔɔ wo sɔɔbe gɔ keŋiyɛunbe. 40Kaa Mate, ginrun kɔlɔ nɛ birɛ dɛin dɛin wo sɛbe gɔbe le ɔɲaa, wiyaa, Yesu le ɔn gin’ sɔi: «Inɛw Baŋa, mu bainɛ birɛ ɔn puu mu turu sai bɛrɛ pajaa birɛmɔu wo wɔɔ gɔ, u nɛ sɔɔ wɔlɔ ma? Womaa wɛɛ mui bara giye, wo le sɔɔ.» 41Kaa Inɛw Baŋa saa wo le kijɛ gi: «Mate, Mate, u kijɛ joo dɛi liyaa, taŋa taŋa jɔbɔuwɔu. 42Kaa kijɛ sigɛ le maa gɔ, kijɛ turui. Mari kijɛ yɛmu gɔ, kijɛ ire gɔ woi. Iyaa wo bɛrɛ yaa wogɔ ɛlɛidenɛ.»

will be added

X\