LUKA 1

1Inɛw joo, logoro emɛ nɛ sɔɔ biyaabe gɔ mainiyaan tɔŋaabɛin. 2Be, sɔɔ gɔbe giri bemɛ le tɔlɔgu gɔ baa, inɛw iyenw gɔbe, iyaa lee inɛw pilemaa Kibɛru Ɛju birɛbirɛnwin biyaabɛin gɔbe, bana emɛ bɛrɛ be tagu gin’ tee, tɔŋaabɛin. 3Kɔɔ sabu dɛi, Teyɔpile, baŋa ire, sɔɔ kɔɔbe digu le digu le tɔŋaa, u bɛrɛ tii ga, mu bɛrɛ yaa ɛjii wɔɔ. 4Kɔɔ le digɛnu uwaa kijɛ ui deerin gɔbe narain jugɔ ga mu tɔŋɔuwɔn. 5Herɔde, Judea gana ɔgɔnɛi waaru wo bee le, Ama bɛrɛ sadagadɔɔnɔnɛ turu yabe. Boi womɔ Jakari gɛɛbɛin. Wo Abia tɔgui bee. Yaanran womɔ boi Elisabɛtu gɛɛbɛin, Aarɔn tiruwɛnɛ turui. 6Jakari lee, Elisabɛtu lee, Ama giru nɛ inɛw teitai bɛin. Be Inɛw Baŋa Ama tɔɔru gɔbe lee, sɔɔ womɔ gɔbe lee, lelu tolo go ɛjii kajubaubɛin. 7Kaa be ii sɛbenɛ. Sabu Elisabɛtu yaanran ii naraanlɛi bee. Iyaa be lɛi puu inɛw pɛii bɛin. 8Bai turu Jakari, Ama Ginrun Diyɛ gɔ kɔlɔ nɛ, Ama bɛrɛ sadaga dɔɔnu birɛ birɛube. Sabu dinrɛn gɔ tɔgu womɔ inɛw mɔi bee. 9Womaa Inɛw Baŋa Ama Ginrun Diyɛ kɔlɔ gɔ nɛ yoo ye, mɔi jiɲu ɛju gɔ, Ama bɛrɛ sadaga tɛgɛrɛ ga, Ama bɛrɛ sadagadɔɔnɔw atɛmu le kɛukɛu, keriteŋu gɔ Jakari kuu nɛ sugaabe. 10Mɔi jiɲu ɛju tɛguru waaru le inɛw gɔbe puu bain go, Ama gɛɛun bɛin. 11Kɔɔ waaru le Inɛw Baŋa mɛlɛnkɛ turu, Jakari bɛrɛ unruin tagaraabe. Mɛlɛnkɛ gɔ mɔi jiɲu ɛju gɔ yalu tɛgɛrɛɲu numɔ iin sibɛ go iŋɛbe. 12Jakari, Mɛlɛnkɛ gɔi waaru wo iye le, saii bimiliyaai. Wo ɛjii liyaabe. 13Kaa mɛlɛnkɛ gɔ wo le kijɛ gi: «Jakari, u liyɛnɔu, sabu Ama, gɛɛn uwɔ gɔ saati. Yaanran uwɔ Elisabɛtu, u bɛrɛ aini narun ohobodo. U ii gɔ boi Jan kunɔ. 14U ii gɔ dɛi kinɛ ɛɛlu diyɛ bɛbɛɛdou. Inɛw joo, ii gɔ naraanɲu dɛi kinɛ bemɛ ɛhɛɛliyɛdo. 15Wo Inɛw Baŋa Ama giru nɛ inɛ diyɛi biyɛdo. Wo resɛndii ilɛ ma, kijɛ inɛi bimiliyejɛ turu kanran nɔɔidolo. Wo na bɛrɛ nɛ baa, wo Kikinu Pilu le joi ye biyɛdo. 16Wo Isɛrɛlu inɛw jooi, pilemɛ ye Inɛw Baŋa Ama bemɛ bɛrɛ jɛjɛɛlɛdo. 17Wo giru womɔ nɛ, Eli bana lee, Eli gɔnrɔn sɛbe gɔ lee le bii ye, birɛ birɛdo. Kɔɔ le digɛnu banw gɔbei pilemɛ ye unrunw gɔbe le mɔmɔɔnɔdo. Iyaa inɛw kɔkɔlɔmaagunw gɔbei dulomɔ ye, inɛw teitai wɔin gɔbe hakilɛ bɛbɛɛmɔdo. Wo Inɛw Baŋa Ama bɛrɛ tɔgu kinɛ yeguru ɛju le wɔɔ bobojodo.» 18Jakari, Mɛlɛnkɛ gɔ aŋa saa gi: «Mui pɛyaai, iyaa yaanran ma yaa inɛ pɛii. Nɛɛ, mu wogɔ yani jugɔdɔn ma?» 19mɛlɛnkɛ gɔ wo le saa gi: «Mui Gabiriɛlui, Ama giru nɛ mui iŋɛ. U bɛrɛ sɔɔ sɔɔ ga, iyaa kibɛru ɛju kɔɔ u bɛrɛ taga ga mui tiyaaɲu. 20Yɛnɛ, u waja sɔɔ sɔi bɛɛidolou. Sɔɔ gɔ bai kibeido dɔɔ baa, aŋa uwɔ pagiyaado. Sabu u sɔɔ u bɛrɛ mu tagu gɔ le gawalu. Sɔɔ kɔɔbe, waaru gɔ dɔwaai ye, sɛɛu kikibedɛin.» 21Kɔɔ waaru le mɔɔnu gɔ Jakarii dɔmɔbe. Nɛɛ Jakari, Ama Ginrun Diyɛ gɔ nɛ toun tanwaain dɛi be bɛrɛ maunɛ bee. 22Bain waaru wo goi le, Jakari, mɔɔnu gɔ le sɔɔ sɔwaa bɛɛlu. Kɔɔ waaru le, Ama Ginrun Diyɛ gɔ nɛ tou, wo kuu iye turu iyaabe ga, be jugaabɛin. Wo numɔ ii le be le sɔɔ sɔɔube, aŋa womɔ pagiyaayaabe. 23Jakari, birɛ luumɔ womɔ galaai onu nɛ, wo pilemaa ginrun unrunmɔ nɛ yai. 24Bai dagaa galaai onu nɛ, yaanran womɔ Elisabɛtu, bɛrɛ jeɲaabe. Wo iyepilu numɔrɔn baa inɛw giru nɛ baŋiyaanbe. Wo ɔn gin’ sɔɔube: 25«Inɛw Baŋa Ama, giri womɔ mu bɛrɛ waaru wo dɛɛru le, inɛw giru nɛ kijɛ mu bɛrɛ dɔgɔi bee gɔ goonaabe. Kijɛ mu bɛrɛ wo kanrun gɔ kɔɔ woi.» 26Elisabɛtu, bɛrɛ jeɲu iyepilu kuloiye gɔ, mɛlɛnkɛ Gabiriɛlu, Ama woi Galile gana nɛ Nasarɛtu ana nɛ, 27iyaa aala turu ginrun nɛ tii. Iyaa aala gɔ, ainɛ turu, boi womɔ Josɛpu gɛɛbɛin gɔ, Dawide ginrun bɛɛnnɛ turu yaalai bee. Boi womɔ Mari gɛɛbɛin. 28Mɛlɛnkɛ gɔ ginrun gɔ nɛ yowaa kijɛ gi: «Poo, u inɛ Ama nɛɛma diyɛ biyaajɛ gɔ. Inɛw Baŋa Ama u le wɔɔ.» 29Kaa Mari liyaa, kikinu manu le bee. Wo poo gɔ tiyɛ gɔ ingei ma ajubau bee. 30Mɛlɛnkɛ gɔ kɔɔ waaru le wo le kijɛ gi: «Mari, u turu kanran liyɛnɔu, sabu Ama nɛɛma u le yɔɔ. 31Yɛnɛ, u bɛrɛ bɛbɛrɛdou, aini nanarandou, boi womɔ Yesu kukunɔdou. 32Woi inɛ diyɛi bibiyɛdo, iyaa woi Ama daa naa daa go wɔɔ Ainii gɛgɛɛdɛin. Inɛw Baŋa Ama, wo tirɛ ainɛ Dawide ɔgɔdɔin gɔ wo bɛrɛ ohobodo. 33Wo asuu Jakɔbu tɔgu gɔi laamu kakanrando, iyaa laamu womɔ dumɔ siyɛidolo.» 34Mari, mɛlɛnkɛ gɔ le kijɛ gi: «Sɔɔ kɔɔ yani kanrun bɛɛmɔdo ma? Sabu mu ainɛ inɔn.» 35Mɛlɛnkɛ gɔ aŋa womɔ saa gi: «Kikinu Pilu gɔ kuu uwɔ nɛ susugodo. Iyaa, Ama daa naa daa go wɔɔ gɔ gɔnrɔn, kini gin’ ui dɛdɛbɛdo. Kɔɔ sabu dɛi ii dɛin u naraindo gɔ, woi Ama Ainii gɛɛdɛin. 36Yɛnɛ, Elisabɛtu, yaanran u mɛrɛnnɛ gɔ, wo kanran pɛi womɔ kuu nɛ aini naran ga bɛrɛ jeɲaa wɔɔ. Yaanran ii naraanlɛi ga gɛɛubɛin gɔ, kanɛ iyepilu kuloi baa bɛrɛ le wɔɔ. 37Sabu Ama kijɛ kanrun bɛɛidolo wo wɔɔ turu kanran wɔlɔ.» 38Mari aŋa womɔ saa gi: «Yɛnɛ, mui Inɛw Baŋa Ama gunɔ yaanrain. Sɔɔ u sɔi gɔ le kɛukɛu, mu bɛrɛ kunrin biyɛmɔ.» Kɔɔ onu nɛ mɛlɛnkɛ gɔ Marii pajaatiyaa yaai. 39Sɔɔ kɔɔbe biyɛun be digɛu, Mari ingelaa, ɔgu kɛu, kokoo sibɛ go Judea ana turu nɛ yaabe. 40Wo Jakari ginrun nɛ yowaa, Elisabɛtui poonaabe. 41Elisabɛtu, Mari poo kunu gɔ waaru wo ɛgu le, ibanrin kɔlɔ womɔ nɛ too gɔ ɔgu bɔnrinyaanbe. Kɔɔ waaru le Kikinu Pilu Elisabɛtu nɛ jowaabe. 42Elisabɛtu, mii ɛɛn le sɔwaa gi: «Yaanw logoro nɛ sigɛ le ui duba kanraanɲu, iyaa ii kɔlɔ uwɔ nɛ too gɔ yaa duba wo le wɔɔ. 43Kijɛ inge ma dɛi Inɛw Baŋa ma na gɔ mu bɛrɛ wɛɛu wɔɔ ma? 44Sabu yɛnɛ, waaru poo u kunu gɔ suguru ma nɛ yoi le, ibanrin gɔ kɔlɔ ma nɛ kinɛ ɛɛlu le bɔnrinyaanbe. 45Sɔɔ Inɛw Baŋa Ama sɔi gɔ kikibedo ga u yaanran gawaa wɔɔ gɔ, Ama u yabu.» 46Kɔɔ waaru le Mari saa gi: «Kinɛ ma Inɛw Baŋa Amai demɛniyɛnmɔuwɔ. 47Mu Ama, mui Yabanɛ dɛi kinɛ ɛɛlu le wɔun. 48Sabu gunɔ yaanran gailiyɛmaaɲu gɔ sibɛ go, wo giri unrunmɔ dɛɛraabe. Kɔɔ sabu dɛi yɛnɛ, waja, tɔgu gɔbe puu Ama mu yabu gɛɛdɛin. 49Ama, gɔnrɔn baŋa gɔ, mu dɛi kijɛ diyɛ kanraanjɛ. Boi womɔ gaai wɔɔ. 50Amasɔgɔjugɔ womɔ gɔ, inɛw giri womɔ liyɛnw gɔbe sibɛ go asuu dumɔ siyɛidolo. 51Wo birɛ diyɛ diyɛ numɔ womɔ paŋa le biraabe. Inɛw kinɛ unrunbemɛ nɛ kuu ulo le jowaa wɔin gɔbei digaa tiyaabe. 52Wo ɔgɔnw gɔbe ɔgɔdɔin bemɛ nɛ nanaa goonaati. Dɔgɔpaganw gɔbe kuu unaabe. 53Giyɛgunw gɔbe kakayɔn ɛju le bei baamaabe. Ɔgɔ unrunw gɔbei numɔ ije le digaa tiyaabe. 54Wo Isɛrɛlu tɔgu, birɛbirɛnw womɔ gɔbei baraabe. Wo bana emɛ babe le pui wo kunaabe gin’ amasɔgɔjugɔ womɔ gɔ Abarahamu lee, wo tirɛnw gɔbe lee dɛi asuu naŋalu.» 56Mari iyepilu taanu gin’ Elisabɛtu le biyaa, kɔɔ onu nɛ pilemaa ginrun unrunmɔ nɛ yai. 57Elisabɛtu, bɛrɛ womɔ wo dɔwaa, wo aini naraanbe. 58Ginrun diŋu womɔ inɛw gɔbe lee, wo mɛrɛnw gɔbe lee, Inɛw Baŋa Ama, amasɔgɔ womɔ jugaabe ga ɛgaa, Elisabɛtu le bariyaa kinɛ ɛɛliyɛmaabɛin. 59Ii gɔi narin bai gagaraye gɔ woi araa nɔɔmɔi wiyaabɛin. Be boi womɔ wo ba Jakari boi gɔ kunaabɛin. 60Kaa ii na gɔ saa gi: «Ai, boi womɔ Jan gɛɛdɛin.» 61Be saa: «U mɛrɛnw logoro nɛ inɛ boi kɔɔ gin’ boonɔɲu turu kanran wɔlɔ.» 62Be numɔ ii le ii gɔ ba bɛrɛ sɔɔ sɔwaabɛin, womaa ii gɔ boi inge kunu ibɛɛ bee ma gin. 63Jakari, baga kɛkɛbu dɔn tɔŋu turu selumaa, wo ɔn gin’ tɔŋu: “Boi womɔ gɔ Jan woi.” Inɛw gɔbe puu bɛrɛ maunɛ biyaabe. 64Kɔɔ waaru le tee Jakari aŋa pagalaai. Wo sɔɔ sɔɔi tɔlaabe. Amai sɔmɔube. 65Ginrun diŋu inɛw gɔbe puu liyaabɛin. Judea kokoo gana wooi nɛ kijɛ kɔɔbe puu dɛi sɔɔ sɔɔubɛin. 66Inɛw sɔɔ kɔɔbe ɛgɛnw gɔbe puu ajubu ajubu yɛnɛubɛin. Iyaa kuu unrunbemɛ selumɛubɛin, kijɛ be gɛɛbe: «Ii ɔn, inge ii tɔgui biyɛdo?» Inɛw Baŋa Ama gɔnrɔn diyɛ gɔ naran go ii gɔ le yabe. 67Jakari, Jan Batise ba gɔ, Kikinu Pilu le jowaa, Ama bɛrɛ sɔɔ goi sɔwaabe: 68«Inɛw Baŋa, Isɛrɛlu Ama gɔ, boi womɔ sɔmi biyɛmɔ. Sabu wo tɔgu womɔ inɛwin yɛnɛi wiyaa, kuu bemɛ goonaabe. 69Wo gunɔnɛ womɔ Dawide tɔgu nɛ, Yabanɛ diyɛ, paŋa sɛɛ gɔi, ingelemaajɛ. 70Ama pɔɔlɔ baa inɛw titiyaanw ɛjaa womɔbe le digɛu bana wo sɔwaabe gin’, 71wo jaŋuw emɛ numɔ nɛ lee, inɛw emi ibiliyaa wɔin gɔbe numɔ nɛ lee, emi yayabado ga pui kunaabe. 72Kɔɔ gin’ wo amasɔgɔjugɔ womɔ, emɛ babe bɛrɛ tatagarado gi. Wo iyaa, aaru asuu kɔɔlɔɔlɛ womɔ gɔ naŋaidolo gi. 73Sabu Ama, Abarahamu emɛ tirɛ ainɛ bɛrɛ, kuu unrunmɔ jɛbiyaa, pui kunaa, 74jaŋuw emɛ numɔ nɛ emi yayabado gi. Emaa, liliyɛ sɛlɛ le woi demɛniyɛnmɔ ga, 75bai emɛ wooi nɛ emaa, giru womɔ nɛ inɛw kuu emɛ wo bɛrɛ sɛɛu obaa wɔiin biyɛ ga, inɛw teitai biyɛ ga, wo kunrin kanraanbe. 76Nɛɛ, u, aini ma, ui Ama daa naa daa go wɔɔ gɔ titiyainɛi ga gɛgɛɛdɛin. Sabu u Inɛw Baŋa giru nɛ bii ye, oju womɔ yegerenɛi biyɛdou. 77Iyaa, kɔɔ gin’ yayabu gɔ, hakɛ yaabu kanrun le bɛɛmɔjɛ ga, tɔgu womɔ inɛw bɛrɛ jugɔmɔdou. 78Ama emɛ gɔ, wo ihibɛ lee, amasɔgɔjugɔ lee le jowaa wɔɔ. Inɛw ɔlɔ nɛ daain gɔbe lee, inɛw yiun kini nɛ daain gɔbe leei wijɛmɔ ga, iyaa emi jamu oju nɛ dimɛrɛn yaa ga, kodɛi nai tumɔgu wijɛ gɔ, emɛ dɛi dodoorodo.» 80Ii gɔ gabiyɛube, iyaa hakilɛ yaa bɛɛ bɛɛ yaaube. Isɛrɛlu tɔgu bɛrɛ unruin wo tagaraido baa, wo olusolo nɛ biyaabe.

will be added

X\