JUDE 1

1Mu, Jude, Yesu Kirisito birɛbirɛnɛ gɔ, Jake suŋɔrɔn gɔ, lɛtɛrɛ ɔn e bɛrɛ tɔŋaa mu tiiuwɔn. Ba Ama inɛw boonaajɛ gɔbe, inɛw wo ibɛ gɔbe, Yesu Kirisito dɛi inɛw wo gɛlɛ gɔbe, mu e bɛrɛ tɔŋaa tiiuwɔn. 2Ama, amasɔgɔjugɔ lee, jamu lee, ihibɛ lee ei gaai obo. 3Ba unrunw ibɛ mabe, Ama, yayabu tunmɔ, emɛ puu mɔi wɔɔ gɔ kuu nɛ maini ye lɛtɛrɛ tɔŋɔ ga saii daariyaabɔn. Kaa, kɔɔ waaru le, gagawu, inɛw womɔbe bɛrɛ kubɔ turu sai obaa kilaa, sagu wo duuru gɔ dɛi jaiyɛ ga, lɛtɛrɛ ɔn e bɛrɛ tii ye, ei mainiyɛnmɔ ga, mu bɛrɛ waajibi biyaai, mu jugaabɔn. 4Inɛw gamuu baŋiyaan logoro ebe nɛ yowaa yatoin. Ama Dɔn nɛ pɔɔlɔ baa tɔŋi wɔɔ, inɛw kɔɔ tunmɔbe, jarugu kuu bemɛ nɛ susugodo gin. Inɛw Ama inin kɔɔbe, kuu sɛlɛ sɔɔ bemɛ gɔ bɛrɛ naran obo ga, Ama emɛ nɛɛma sɔɔ gɔ dulomɔuwɔin. Be iyaa, Kuu Baŋa turu gɔ, Inɛw Baŋa emɛ Yesu Kirisito le yabanɛ. 5Kijɛ gamuu e igu gɔbe ei naŋaranmu ibɛɛ wɔun. Waaru galaai gɔ le, Inɛw Baŋa Ama, Ejipute gana nɛ Isɛrɛlu unrunwin waaru gunɔ nɛ yabaa wo goonu le, inɛw wo le gawanɛ gɔbei kɔɔ onu nɛ suyaabe. 6Iyaa, mɛlɛnkɛ gɔnrɔn laa Ama bei obu gɔ le biyɛ ga yabanɛ, kaa yalu be bee gɔbe pajin gɔbe, Bai Diyɛ saliyɛ kiru gɔ dɛi, Ama bei asuu, inrun jɔrɔgɔ le kɔmaa, ɔlɔ nɛ kunaa yasɛ. 7Kunrin mɛlɛnkɛ kɔɔbe gin’ Sodomɛ bɛɛnw lee, Gomɔre bɛɛnw lee, ana be le bɛrii daanbɛin bɛɛnw lee, sala nɛ kuu bemɛ obaa bɛin gɔbe, iyaa Adama ii kijɛ mɔɲu kanraun jaanla gɔbe, be kanrun gɔ ajubai. Be yaun asuu yinwɛɛnlɛ gɔ nɛ ɔɲaa yatoin. Sɔɔ kɔɔbe, inɛw bemaa kunrin kanrannɔu ga, bei titinwɛnrɛnɲu. 8Inɛw mɔɲu, logoro ebe nɛ sasai le yoonw kɔɔbe, be yaa kunrin kanranɲu: Yaŋawelu bemɛ digiyaa, goju bemɛ koi lɔgɔjiyɛmɔɲu. Be Ama gɔnrɔn gɔ yau kanranɲu. Be mɛlɛnkɛ dooro le wɔin gɔbei koi duyɔɲu. 9Kaa halu, mɛlɛnkɛbe puu kuu baŋa gɔ, Misɛlu kanran, waaru Mɔise yiun gɔ dɛi jinrun puu kuu baŋa le wo jiireube le, wo woi duyɔ ga daariyɛlu. Kaa, kijɛ wo gi: «Ama ui laga.» 10Kaa, inɛw kɔɔbe, kijɛ paamaanɛ be wɔɔ gɔ dɛi sɔɔ mɔɲu sɔɔɲu. Be olunawanbe gin’ kuu bemɛ le sɔɔ be biyaajɛ gɔi kanranɲu. Be kunrin kuu bemɛ suyoɲu. 11Bɔnrɔn be le yɔɔ, sabu be Kayɛn bana kanrun gin’ kanrin. Iyaa, Balaamu bana kanrun gin’, be buudu bɛɛ dɛi mɔɲu kakanranɲu. Bei suiyaai, sabu be Kore gin’ Ama le murutu kanraanbɛin. 12Ba unrunw tunmɔ le mɔrinyaan yalu jaa e kayajɛ nɛ, ei dɔgɔ aamɔw gɔ bei. Be kayɛrɛ ɛjii kayaa ye, bɛrɛ bemɛ dɔgɔ sɛlɛ le joonɔɲu. Be anrankulumɔ dii sɛnɛ ooɲɔ balaa yaajɛ gin’ wɔin. Be tiun nabe ii bemɛ waaru dɔwaai kanran, ii naraannɛ gin’ wɔin. Be tiun nabe duu bemɛ mɔmaa goonaaɲu gin’ wɔin. Bei yinwaan dogaai. 13Bei nɛudii gunu waaŋiyaan wɔin gin’ birɛ lɔgɔgu bemɛ yugɔrɔ gin’ goonɔu wɔin gin’ wɔɔ. Bei tolo yalu wooi nɛ gɔŋɔrɔnɲu gin’ wɔɔ. Ama be dɛi ɔlɔ diyɛ naa diyɛ gɔ nɛ yalu yegeraa sɛɛ. Be wogɔ nɛ asuu bibiyɛdɛin. 14Henɔku, Adama tirɛ unrunw logoro nɛ tirɛ ii sɔiye gɔ, waaru wage nɛ baa inɛw kɔɔbe dɛi sɔɔ sɔwaa, kijɛ wo gi: «Yɛnɛi! Inɛw wooi saliyɛ kire ga Inɛw Baŋa titiyaanw ɛjaa kulɔ joo lugu bɛɛmɔɔlɛ womɔbe le wɛwɛɛdo. Wo, inɛw Ama giri liyɛɛnɛ gɔbe, kijɛ mɔɲu be kanrun gɔbe puu dɛi lee, iyaa inɛw hakɛ kanranw, Ama giri liyɛɛnɛ sɔɔ mɔɲu wo dɛi be sɔi gɔbe puu dɛi lee, jarugu kuu bemɛ nɛ duurɔ ga, wo wɛwɛɛdo.» 16Wogɔbe inɛw guguun guunwin, bana be wɔɔ gɔ le inɛw kinɛ bemɛ aa wɔnɛ. Be dadaaru bemɛ le kɛukɛu yoi yaauwɔin. Aŋa bemɛ nɛ sɔɔ goojɛ, sɔɔ kuu ulogui. Be inɛwin, kijɛ bemɛ bɛɛ dɛi sɔmɔɲu. 17Kaa e kai, ba unrunw ibɛ mabe, e Inɛw Baŋa emɛ Yesu Kirisito jaŋu unrunw tiyaaɲu gɔbe, sɔɔ giru nɛ be tagu gɔbe pilemu ajubai. 18Be e bɛrɛ sɔwaa gin: «Waaru dumɔ gɔ le inɛw ei mɔmɔw wɛwɛɛdɛin, inɛw Ama giri liyɛla dadaaru bemɛ le kɛukɛu yoi yayaadɛin.» 19Ama unrunw logoro nɛ mii kabu kunɔw gɔ bei. Inɛw arusɛgɛ gin’ wɔin gɔbe bei. Ama Kikinu be nɛ tolo. 20Kaa e kai, ba unrunw ibɛ mabe, Inɛw Baŋa emɛ Yesu Kirisito, e bɛrɛ, ɔnmɔsɔgɔ, ɛhɛju womɔ dɛi oboido waaru gɔ dɔmiyaan wɔnu, e gagawu gaai ɛjaai ebe nɛ giru go yaai. Kikinu Pilu gɔnrɔn le Ama gɛɛin. Ama ihibɛ gɔ nɛ biyɛi. 22Inɛw kinɛ lɛilɛi le wɔin gɔbe amasɔgɔ jugu ye, bei barai. 23Inɛw gamuu gɔbe, yaun nɛ bei ɛlɛ ye goonu ye yabai. Gamuu gɔbe, e amasɔgɔ bemɛ e jugɔun jaain wɔɔ. Kaa e kuu ebe kajubai. Halu sɔi hakɛ bemɛ dɛi lɔgɔjiyaa wɔɔ gɔ, wogɔbe ibiliyɛi. 24Ei numɔnɔu giye, ei gɛliyɛnɛ gɔ, jarugusɛlɛ le, kinɛ ɛɛlu diyɛ le dooro womɔ giru nɛ ei jɛɛlu ye iŋɛrɛindo baŋa gɔ, 25Ama turu emi Yabanɛ gɔ woi. Boi sɔmu gɔ lee, baba diyɛ gɔ lee, paŋa gɔ lee, gɔnrɔn gɔ lee, Yesu Kirisito, Inɛw Baŋa emɛ nɛ womɔi biyɛmɔ. Tɔlɔgu gɔ le baa, iye wɛɛ dɔɔ kunrin wɔɔ. Asuu nasuu kunrin biyɛdo. Amina.

will be added

X\