JAKE 5

1Nɛɛ, ɔgɔ unrunw gɔbe, mui ɛjii keŋiyɛin. Mɔɲu e bɛrɛ dɔɔido gɔbe dɛi, mii diyɛ le sɔmiyɛin. 2Arusɛgɛ e sɛɛ gɔbe dodogodo. Sɔi ebe gɔbe peru kakayado. 3Kange e sɛɛ gɔ lee, sarudu e sɛɛ gɔ lee, kɔjɔ uhulodo. Kɔɔ gin’, saliyɛ kiru bai gɔ le kɔjɔ wogɔ e dɛi sɛɛrɛi bibiyɛdo. Kɔjɔ wogɔ yaun gin’ ei tɛgu ye yayamalado. E, waaru dumɔ ɔn le arusɛgɛ balaa mɔɔnaa wɔi. 4Inɛw birɛbirɛnw, minɛ ebe gɛlɛnw gɔbe tujɔ gɔ, e be bɛrɛ oboli. E amasɔgɔ pii bemɛ gɔ keŋiyɛin. Mii bemɛ, Ama kijɛ wooi kuu nɛ daan gɔ suguru nɛ baa yowaai. 5E, aduna ɔn nɛ kijɛ kinɛ ebe aajɛ dadaaru dɛi kɛɛlɛ ebe yamalaabei. Arusɛgɛ, bai woi sɛnwɛindɛin dɛi aŋai ɛjii kayamaaɲu gin’, e, saliyɛ kiru bai gɔ dɛi kuu ebe le ei ɛjii kayamaa, pooniyaan wɔi. 6E, inɛw teitai wɔin gɔbe kuu nɛ jarugu duuraa, bei daabei, be sɔɔ turu kanran saanɛ. 7Ba unrunw mabe, e, Inɛw Baŋa wɛɛido baa, muyɔn le biyɛi. Bana woluwalanɛ, minɛ unrunmɔ nɛ gɛlu ɛju bɛɛ dɛi muyɔn le wo biyɛjɛ gɔi yɛnɛi: Anrandii pɔlɔ gɔ sugu gowaa, anrandii dumɔ gɔ sugoido baa, wo muyɔn le bii ye dɔdɔmiyɛnjɛ. 8E kanran muyɔn le biyɛi. Anrangaju le biyɛi. Sabu Inɛw Baŋa wɛɛgu gɔ bɛrii wɔɔ. 9Ba unrunw mabe, Ama womaa saliyɛ ebe kirɛnɔu ga, e tunmɔ dɛi guguun guunnɔugi. Yɛnɛi, saliyɛkirenɛ gɔ wagela. Wo murɔn aŋa gɔ nɛ kohiŋɛn. 10Ba unrunw, e inɛw Ama titiyaanw Ama dɛi sɔɔ sɔwaabɛin gɔbei ajubu yɛnɛi. Ɔɲɛ bemɛ gɔ lee, muyɔn bemɛ gɔ lee deei. 11Emɛ, inɛw muyɔn muyɔnw gɔbe Ama be yabu gɛɛuwɔin. E Jɔbu muyɔn muyaanbe gɔ sɔɔ gɔ ɛgaabei. Inɛw Baŋa Ama, dumɔ gɔ bana Jɔbui duba wo kanraanbe gɔ igii wɔi. Sabu Inɛw Baŋa amasɔgɔjugɔ lee, ɛhɛju lee le jowaa wɔɔ. 12Sigɛ le, ba unrunw, e kuu ebe jɛbiyɛnɔugi. E alagala le ma, minɛ le ma, bana waja turu le kanran kuu ebe jɛbiyɛnɔugi. Kaa Ama, jarugu, kuu ebe nɛ sunugonɔu ga, «ee» ebe ee biyɛmɔi, «ai» ebe ai biyɛmɔi. 13Inɛ turu logoro ebe nɛ ɔɲɛ le wɔɔ ye, wo Ama bɛrɛ gɛɛn. Inɛ turu kinɛ ɛɛlu le wɔɔ ye, birɛpoo tagu nii wo niiu jaain wɔɔ. 14Logoro ebe nɛ inɛ turu jijinwɛnjɛ biyaai ye, Ama inɛw mɔɔnu inɛw naw gɔbe boonaa ye, kuu womɔ nɛ nii paraaɲu onu nɛ, wo dɛi Inɛw Baŋa boi le Ama be gɛɛnmɔ. 15Ama inɛw mɔɔnu inɛw naw gɔbe, Inɛw Baŋa Ama, gɛɛn bemɛ sasaado ga, wogɔ le gawaa wɔin ye, inɛ jiunginɛ gɔi babajado. Inɛw Baŋa Ama, inɛ kɔɔ bɛrɛ jamu ohobodo. Wo hakɛ kanraanbe ye, Ama woi yaabu kakanrando. 16Kɔɔ sabu dɛi, e tunmɔ bɛrɛ hakɛ ebe tagai. Ei baja dɛi, e tunmɔ dɛi Ama bɛrɛ gɛɛin. Inɛ teitai wɔɔ amagɛɛn gɔ, gɔnrɔn diyɛ yasɛ. 17Eli inɛ emɛ gin’ beei: Wo anran miinɔu ga, amagɛɛn nɛ ɛjii mainiyaanbe. Kɔɔ gin’, anranguju taanu lee pɛjɛrɛ lee, minɛ nɛ anrandii sugolu. 18Kɔɔ onu nɛ wo iyaa lee Ama gɛnyaanbe. Anran miyaanbe. Dɛnrɛn ilaabe. 19Ba unrunw mabe, logoro ebe nɛ inɛ turu lelaa, naran oju gɔ pajaa wo tiyaa, bainɛ waja inɛ wogɔi naran oju gɔ nɛ pilemaa jɛɛlaajɛ ye, 20e igii biyɛi, inɛ, inɛ hakɛ kanrannɛ turu oju mɔɲu wo tobe gɔ nɛ goonɔjɛ gɔ, kɔɔbaŋa inɛ hakɛ kanrannɛ gɔ kikinu gɔi yaun asuu yinwɛɛnlɛ gɔ nɛ yabauwɔ. Iyaa, hakɛ joo naa joo yaabu kakanrandɛin.

will be added

X\