JAKE 4

1Logoro ebe nɛ kɔmɔ lee, jai lee, inge ingelemɔjɛ ma? Dadaaru mɔɲu waaru puu goju ebe nɛ jaiyɛuwɔ gɔbe birɛi laa ma? 2E kijɛ turu daariyaa wɔi, kaa kijɛ wogɔ aŋai kanrun ye bɛɛɲu sɛlɛi. Kɔɔ waaru le e inɛi dadaajɛi. E kijɛ turu dadaaru le wɔi, kaa bana wogɔ bɛɛɲu sɛlɛi. Kɔɔ waaru le jiiru lee, jai lee ihingeledo. Kijɛ e ibɛ gɔ e bɛɛlɛi. Sabu e wogɔ Ama bɛrɛ gɛɛnlɛi. 3E gɛɛn gɛgɛɛnjɛi, kaa e kijɛ e gɛɛnjɛ bɛɛlɛi. Sabu bana le e gɛɛnjɛ gɔ mɔɲi wɔɔ: E kijɛ e gɛɛnjɛ gɔ dadaaru mɔɲu ebe kai kilɛ dɛi gɛɛnjɛi. 4E, dimudimiyɛnw gin’, inɛw sɔɔ turu nɛ iŋiyɛɛnnɛ gɔbe, aduna ibɛi bii gɔ Ama jaŋunɛi bii ga, e inɛi ma? Inɛ aduna anrungei bii ibɛɛ wɔɔ gɔ, kɔɔbaŋa Ama jaŋunɛi biyɛdo. 5E ajubu ebe nɛ Ama Dɔn gɔ bamai sɔɔjɛ ga wɔi ma? “Ama, kikinu emɛ nɛ wo kunaabe gɔ, kikinu wogɔ ele le wɔɔ.” 6Kaa kɔɔ wooi nɛ, Ama, nɛɛma gɔ kɔɔ dɛi sigɛ gaai wɔɔ. Kɔɔ sabu dɛi Ama Dɔn kijɛ gi: “Ama, inɛw kuu unrunbemɛ unɔw gɔbe le jajaiyɛjɛ. Kaa inɛw kuu sunugu le wɔin gɔbe bɛrɛ nɛɛma ohobojɛ.” 7Kɔɔ sabu dɛi, e Ama le tubiyei. E, jinrun puu kuu baŋa dɛi ɛɛn go iŋiyɛin, wo jɔbɔ ye e le wagee bibiyɛdo. 8E, Ama le bɛrii biyɛi, wo e le bɛrii bibiyɛdo. E inɛw hakɛ kanranw gɔbe, bana mɔɲu ebe dulomɔi. E inɛw kinɛ lɛilɛi le wɔin gɔbe, kinɛ ebe ɛjɛmɔi. 9Ei inɛw amasɔgɔgunwin ga igii biyɛi. Kinɛjiun le biyɛi, sɔmiyɛin. Mɔmu ebe gɔ pii tanugai. Kinɛ ɛɛlu ebe gɔ kinɛjiun tanugai. 10Inɛw Baŋa giru nɛ kuu ebe sunugoi. Wo kuu ebe uhunɔdo. 11E tunmɔ sɔɔ mɔɲu sɔɔnɔugi, ba unrunw mabe. Inɛ wo bainɛ sɔɔ mɔɲu sɔɔjɛ gɔ, maa inɛ wo bainɛ saliyɛ kirɛjɛ gɔ, kɔɔbaŋa Tɔɔru dɛi mɔɲu sɔɔuwɔ, Tɔɔru saliyɛi kirɛuwɔ. U Tɔɔru saliyɛ kireuwɔu ye, u waja Tɔɔru sɔɔ yabanɛi laau, kaa saliyɛkirenɛ womɔi biyaau. 12Tɔɔru daananɛ gɔ lee, saliyɛkirenɛ gɔ lee, Ama turu sai. Yabanɛ gɔ lee, susuiyomɔnɛ gɔ lee, Ama turu sai. Nɛɛ u, inɛ waja saliyɛ kirenɛ gɔ, ui aai? 13Nɛɛ, e mui ɛjii keŋiyɛin, e inɛw sɔɔ ɔn gin’ sɔɔnw gɔbe: «Iye ma, yogo ma, emɛ ana diyɛ ɔn nɛ yayaadɛin, emɛ wogɔ nɛ anranguju turu bibiyɛdɛin, emɛ ibɛsoɲu sasaɲadɛin, emɛ kɛɛlɛ bɛbɛɛdɛin.» 14E, yogo kijɛ biyɛido inɛw inin gɔbe! Sabu kinruntaun ebe yagɔ baa wɔɔ ma? Kukumɔ, waaru gaila le iyemaajɛ ye, kɔɔ onu nɛ ɔgu giru emɛ nɛ manayaajɛ gɔ, ei wogɔ le murin wɔɔ. 15Bana e gɛɛun jaan gɔ unwɔ: «Inɛw Baŋa yabaajɛ ye, emi ɔnmɔi biyɛdo, emɛ kijɛ ɔn ma kijɛ kɔɔ ma kakanrandɛin.» 16Kaa kanɛ e kuu ulo le biyaa, e saba sabauwɔi. Kuu ulo kɔɔ tunmɔ ɛjula. 17Inɛ kijɛ ɛju kanraun wo jaan gɔ igii wɔnu kanraanlɛ baŋa, wo hakɛ kanraunwɔ.

will be added

X\