JAKE 3

1Ba unrunw mabe, logoro ebe nɛ inɛw joo Ama sɔɔ deerewin biyɛ ga dɛnɛnɔugi. Sabu emɛ jaŋudeerenw gɔbe, Ama saliyɛ kireido gɔ sigɛ le emɛ le nau biyɛdo ga e igii wɔi. 2Emɛ puu kijɛ joo nɛ emi lelelejɛ. Inɛ sɔɔ wo sɔɔjɛ nɛ leleelɛ gɔ, kɔɔbaŋa inɛ kibaai, sabu wo goju womɔ puu yaa sɛɛu gɛli bɛbɛɛdo. 3Emɛ sɔun womaa sɔɔ emɛ yaba ga wɔin ye, emɛ aŋa womɔ nɛ karumu kukunɔɲu: Kɔɔ gin’ emɛ woi yalu emɛ ibɛ puu nɛ jɛyai bɛbɛɛdɛin. 4Iyaa diikoro yɛnɛi: Halu ɛjii gaai wɔɔ kanran, ooɲɔ diyɛ diyɛbe woi damaa yaajɛ kanran, kɔɔ wooi logoro nɛ kijɛ kigelemɔɲu dagi le, diikoro jɔbɔmɔnɛ gɔ, yalu wo ibɛ nɛ woi jɛyaajɛ. 5Kɔɔ bana wɔɔ gin’, ninɛ kanran, goju nɛ yalu dagii, kaa saba diyɛ diyɛ sabajɛ. Yaun dagi bana unu diyɛ tɛgɛjɛ gɔi ajubu yɛnɛi. 6Ninɛ, yaun gin’ wɔɔ. Wo nɛ mɔɲu tɔgu dɛin dɛin jowaa wɔɔ. Goju emɛ nɛ yalu turui. Wo goju emɛ puu lɔlɔgɔjiyɛmɔjɛ. Yaun banrun asuu yinwɛɛnlɛ gɔ le woi tɛŋunaa, ninɛ, aduna nɛ bii emɛ puu nɛ, yaun kunɔjɛ. 7Olunawan tɔgu dɛin dɛinbe lee, sasaabe lee, kijɛ minɛ nɛ bumɔɲu lee, nɛudii iijube lee, Adama unrunw wogɔbe tubiyemu bɛbɛɛɲu, iyaa tubiyemaabɛin. 8Kaa ninɛ kai, inɛ turu kanran woi tubiyemu bɛɛlɛ: Ninɛ kijɛ mɔɲui, tiŋɛ bɛɛmɔɔlɛ, wo dugo inɛ dai le jowaa wɔɔ. 9Emɛ ninɛ le Inɛw Baŋa emɛ Bai sɔsɔmɔɲu, iyaa ninɛ le Ama, unrun le murin inɛw wo maŋaajɛ gɔbei jɛjɛbɛɲu. 10Aŋa tutunmɔ gɔ nɛ duba lee, jebu lee gogoojɛ. Ba unrunw mabe, wogɔ kanraun jaanla. 11Diipujo tutunmɔ nɛ dii ɛɛlu lee, dii gaaru lee goo bɛbɛɛjɛ ma? 12Ba unrunw mabe, gaa na, oliwe ii narun bɛbɛɛdo ma? Iyaa resɛn tiun, gaa ii narun bɛbɛɛdo ma? Kɔɔ gin’, diipujo nɛɛmi wɔɔ nɛ dii ɛɛlu goolɛ. 13Logoro ebe nɛ inɛ hakilɛ lee, jugɔ lee sɛɛ yato ma? Aiwa, inɛ wogɔ baŋa wo hakilɛ lee, sasai lee yasɛ ga bana ɛju womɔ le jugɔmɔ. Iyaa, kijɛ wo kanranjɛ puu kuu sunugu lee hakilɛ lee le kanranjɛ ga jugɔmɔ. 14Kaa kinɛ ebe nɛ ele mɔɲu lee, kuu ma too sɔɔ lee gɛliyaa wɔi ye, e kuu ebe unɔnɔugi. Iyaa, naran gɔ kakalu le tilɛnɔugi. 15Kɔɔ, hakilɛ Ama bɛrɛ daa go goojɛ gɔ woi laa. Kaa aduna hakilɛi, gojunawan hakilɛi, jinrun puu kuu baŋa bɛrɛ goi. 16Sabu yalu ele lee, kuu ma too lee wɔɔ gɔ, yalu wogɔ nɛ giru giru sɔɔ lee, sɔɔ mɔɲu tɔgu dɛin dɛin lee tɛtɛmɛmɔjɛ. 17Kaa, hakilɛ daa go goo ye wɛɛjɛ gɔ, wogɔ laa gɔ ɛjaa wɔɔ. Kɔɔ onu nɛ woi jamu hakilɛi, kaali wɔɔ, inɛ le ɛjii wɔɔ, amasɔgɔjugɔ le jowaa wɔɔ, sɔɔ ɛju tɔgu dɛin dɛin kanrannɛi, inɛi kabu kunɔɔlɛ, aŋa lɛilɛi sɛlɛ. 18Inɛw jai aŋaranw gɔbe, be jamui toi gin’ tɔɔuwɔin. Kɔɔ gin’ ii be gɛlɛido gɔ, wogɔ ɔnmɔ teitai gɔi.

will be added

X\