JAKE 2

1Ba unrunw mabe, e, Inɛw Baŋa emɛ Yesu Kirisito, dooro ɔgɔnɛ gɔ le gawaa wɔi. Kɔɔ sabu dɛi inɛw kabu e kunɔu jaanla. 2Kɔɔ gin’, mɔɔnu ebe nɛ inɛ turu, kange numɔsagai numɔ unrunmɔ nɛ kunaa, arugoi ɛju goriyaa wiyaa yowaai ye, iyaa dɔgɔpaganɛ turu, arugoi sɛmɛlɛ goriyaa wiyaa yowaai ye, 3e kɔɔ waaru le, ainɛ ɔgɔinɛ gɔi ɛjii sɛgɛraa ye, turu baŋa wo le gɛgɛɛdo: «Wɛɛ, u yalu ɛju ɔn nɛ dɛinyɛn.» Kɔɔ onu nɛ, ainɛ dɛguginɛ gɔ le gɛgɛɛdo: «U kɔɔ nɛ iŋiyɛn, maa wɛɛ kubɔsɔrɔ ma nɛ dɛinyɛn.» 4E kijɛ e kanranjɛ gɔi iyeuwɔi ma? E logoro ebe nɛ tunmɔi kabu kunɔuwɔi, e inɛw bana e lugojɛ gɔ ajubu mɔɲu le digɛ. 5Ba unrunw ibɛ mabe, e sɔɔ ɔn ɛjii keŋiyɛin: Ama, aduna ɔn nɛ, dɔgɔpaganw gɔbei yɛmaa, bemaa gagawu nɛ ɔgɔ unrunwin biyɛ gi. Iyaa Ama bemaa, inɛw woi ibɛɛ wɔin gɔbe dɛi pui kunaa, diinɛ ohobodo wo gi gɔ, wogɔ kɛn balanwin biyɛ gi. 6Kaa, e kai, dɔgɔpaganw gɔbei gailiyɛmɔuwɔi. Inɛw ei ɔɲɔmɔw gɔbe, inɛw ei saliyɛ kiru yalu nɛ paŋa le jɛyaanw gɔbe, ɔgɔ unrunw gɔbe bei laa ma? 7Inɛw Baŋa ebe boi ɛju e bɛrɛ kunu gɔ yamalanw gɔbe bei. 8“Aŋai kuu uwɔ u ibɛ gin’ u bɔɔnɛi yaa kɔɔ gin’ ibɛi biyɛ.” Ama diinɛ tɔɔru gɔ woi. E Ama Dɔn bana gɛɛjɛ gin’ Tɔɔru wogɔ kanrun ye kikibemɔjɛi ye, e sɔɔ ɛjui kanranjɛi. 9Kaa e inɛw kabu kunɔuwɔi ye, e hakɛ kanraunwɔi. Iyaa, ei Tɔɔru yamalawin dɛi, Tɔɔru gɔ yaa jarugu kuu ebe nɛ sunugouwɔ. 10Sabu inɛ Tɔɔru gɔ puu kanraan, koturu yamalajɛ baŋa gɔ, tɔɔru wajunw gɔbe wooi dɛi jarugu le wɔɔ. 11Kɔɔ gin’ Ama tɔɔraa gi: “Dimu dimiyɛnnɔu.” Ama iyaa tɔɔraa gi: “Inɛi daanɔu.” Nɛɛ, u dimu dimiyɛɛnlɛu, kaa inɛi dadaajɛu ye, u Tɔɔru gɔ puu yamalanɛi biyaau. 12Tɔɔru inɛi hɔɔlɔi bojojɛ gɔ, Ama, tɔɔru wogɔ le kuu ebe nɛ saliyɛ kikirɛdo ga ajubu le bii ye, sɔɔ ebe kunrin sɔɔi, birɛ ebe kunrin birɛi. 13Inɛ, inɛw wajunw amasɔgɔ jugɔlu gɔ, inɛ wogɔ, saliyɛ womɔ Ama bai kireido gɔ, amasɔgɔjugɔ biyɛidolo. Kaa amasɔgɔ jugɔ, saliyɛ kuu nɛ gɔnrɔn yasɛ. 14Ba unrunw mabe, inɛ turu unrun gagawu yasɛ gɛɛjɛ, kaa birɛ womɔ le wogɔ tagaraalɛ ye, wogɔ niwɛn ingei sɛɛ? Gagawu womɔ kɔɔ gin’ woi yabu bɛbɛɛdo ma? 15Aiwa, bainɛ turu ma, yasanɛ turu ma, duŋu le ma, giyɛ le wɔɔ biyaai ye, 16kɔɔ gin’ logoro ebe nɛ turu baŋa bemaa, «Jamu le biyɛi, Ama kaali ebe goo, Ama pana ebe tɔɔ» aŋa le sai giyaajɛ ye, e inɛw kɔɔbe bɛrɛ kijɛ kai bemɛ kilɛido oboolɛi ye, wogɔ be bɛrɛ inge niwɛin sɛɛ? 17Kɔɔ bana wɔɔ gin’, gagawu kanran, kuu womɔ le, birɛ gɔbe wɔlɔ ye, woi kijɛ yinwin. 18Kaa, inɛ turu ɔn gin’ sɔwaajɛ ye: «U gagawu yasɛu, mu kai birɛ gɔbe yasɔn. Birɛ wɔlɔ go gagawu uwɔ yani bii bɛɛjɛ ma mu bɛrɛ tagara, kɔɔ waaru le mu gagawu ma, birɛ le u bɛrɛ tatagaradɔn. 19U Ama koturu sai wɔɔ ga, wogɔ le gawaa wɔu. Aiwa, ɛjii wɔɔ. Wogɔ sɔɔ ɛjui. Jinrunbe kanran wogɔ le gawaa wɔin, iyaa be liyaai ye kikinwɛnɲu. 20U inɛ bomɔginɛ gɔ, birɛ gɔbe wɔlɔ ye, gagawu kijɛ tiyɛ sɛlɛi ga jugɔ ibɛɛ wɔu ma? 21Emɛ tirɛ ainɛ Abarahamu, waaru aini womɔ Isakai sadagadumu gɔ nɛ Ama bɛrɛ sadaga gin’ wo obu le, birɛ womɔ sabu dɛi, Ama woi inɛ teitai wɔɔi ga lugaabe. 22Nɛɛ u iyeuwɔu, Abarahamu, gagawu womɔ lee, birɛ womɔ lee, kubɔ tunmɔ yaabɛin. Kɔɔ gin’ Abarahamu gagawu gɔ, birɛ womɔ le digɛu, gagawu kibaai biyaabe. 23Kɔɔ gin’ Ama Dɔn nɛ sɔɔ tɔŋaaɲu gɔi kibaai: “Abarahamu, Ama le gawaabe. Gagawu womɔ digɛu, Ama woi teitai wɔɔ ga lugaabe.” Iyaa Ama woi unrun anrungei gi.» 24Aiwa, e nɛɛ iyeuwɔi, Ama, inɛ teitai wɔɔ ga wo lugojɛ gɔ, gagawu womɔ sai dɛi laa, kaa birɛ wo birɛjɛ gɔbe dɛi. 25Rahabu, yaanran dimu le kayaube mɔ gɔ yaa kunrin bii. Waaru tebutebenw Josue tii gɔbei ɛjii sɛgɛraa, bei baraa, oju waja le ana gɔ nɛ bei wo goomu le, birɛ womɔ dɛi woi yaanran teitai ga Ama lugaabe. 26Sabu bana goju, kikinu tolo ye yinwaain wɔɔ gin’, gagawu yaa, birɛ gɔbe wɔlɔ ye yinwaain.

will be added

X\