1 Mu Jake, Ama lee, Inɛw Baŋa Yesu Kirisito lee birɛbirɛnɛ gɔ mui. Ama unrunw aduna yalu wooi nɛ ginaa wɔin gɔbe puu, mu lɛtɛrɛ ɔn e bɛrɛ tiiuwɔn. Mu ei poonɔuwɔn. 2 Ba unrunw mabe, ei subɔrɔ dɛi waaru nau e bɛrɛ dɔwaa ye, wogɔ kinɛ ɛɛlu sɔɔ gin’ lugoi. 3 Kunrin, kijɛ kɔɔbe le gagawu ebe subɔraa yɛnaaɲu ye, wogɔ muyɔn ebe bariyɛmɔjɛ ga e igii wɔi. 4 Kaa dumɔ gɔ baa, ɛɛn go iŋiyɛin. Kunrin ebaa Yesu jaŋu unrunw kibaain, kijɛ turu kanran e nɛ lugo dɔɔlu biyɛnɔu ga ɛɛn go iŋiyɛin. 5 Inɛ turu, logoro ebe nɛ hakilɛ sɛlɛ ye, wo wogɔ Ama bɛrɛ gɛɛn, wo wo bɛrɛ ohobodo. Ama, inɛw wooi bɛrɛ dɔnrun wɔlɔ go, gaai, ihibɛ le ohobojɛ. 6 Inɛ hakilɛ sɛlɛ gɔ, kɔɔbaŋa kinɛ lɛilɛi turu kanran sɛlɛ go, gagawu le Ama bɛrɛ gɛɛn. Sabu inɛ kinɛ lɛilɛi le wɔɔ gɔ, kɔɔbaŋa nɛudii, ooɲɔ taŋa taŋa bala bala ye yaajɛ gin’ wɔɔ. 7 Kɔɔ gin’, inɛ kɔɔbaŋa, kinɛ lɛilɛi baŋa gɔ, inɛ kijɛ wo kanranjɛ puu nɛ diyɛ womɔ daanla gɔ, wo Inɛw Baŋa bɛrɛ kijɛ gɛɛn ye bɛbɛɛdo ma giye ajubanɔu. 9 Bainɛ dɛguginɛ gɔ, Ama, kuu womɔ unaajɛ dɛi kinɛ womɔ ɛɛliyɛmɔ. 10 Yesu jaŋu ii ɔgɔinɛ gɔ yaa, Ama, kuu womɔ sunugaajɛ dɛi kinɛ womɔ ɛɛliyɛmɔ. Ɔgɔinɛ belu puyo gin’ ɔgu gagalajɛ. 11 Sabu nai gowaa, ɔgiyaai ye, belu gɔi mamaaŋiyɛnmɔjɛ, puyo womɔ babagamɔjɛ. Iyaa ɛhɛju womɔ manayaado. Kɔɔ gin’ ɔgɔinɛ yaa, birɛ womɔ nɛ wo tonu, woi oroli ye gagalado. 12 Inɛ subɔrɔ tariyaajɛ gɔ, Ama wo yabu. Kɔɔ gin’ pinɛ womɔ yɛnaaɲu onu nɛ, wo, inɛw Ama ibɛɛ wɔin gɔbe bɛrɛ Ama ɔnmɔsɔgɔ oboido gɔ, wogɔ bɛbɛɛdo. 13 Inɛ aai kanran, subɔrɔ nɛ woi yowaai ye, Ama woi suburu ga ajubanɔu. Sabu Ama lee mɔɲu lee jaŋala, iyaa wo inɛ turu kanran suburu ye teitai laa kanranmɔɔlɛ. 14 Inɛ tuturu puu, dadaaru mɔɲu womɔ woi biɲaa ye pɛnrɛn nɛ kunaa ye, subɔrɔ nɛ yoojɛ. 15 Kɔɔ gin’ dadaaru mɔɲu gɔ bɛrɛ bɛraa ye, hakɛ naranjɛ. Hakɛ gɔ gabiyaa, na taŋa ye, yiun naranjɛ. 16 Ba unrunw ibɛ mabe, e kuu ebe lelemɔnɔugi. 17 Sin obu ɛju naa ɛju wooi lee, sin obu kibaai wooi lee, alagala goo ye wɛɛjɛ. Ama bɛrɛ goo ye wɛɛjɛ. Nai lee, iyepilu lee, tolobe lee maŋanɛ gɔ bɛrɛ goo ye wɛɛjɛ. Ama asuu duliyeelɛ, wo onu dulo ye ɔlɔ nɛ asuu emi pajaidolo. 18 Kijɛ wo maŋaabe wooi logoro nɛ emaa dɛnrɛn ii pɔlɔ gin’ biyɛ ga, Ama, diŋɛ womɔ tɔitɔi le, emi naran sɔɔ gɔ le naraanbe. 19 Ba unrunw ibɛ mabe, e sɔɔ ɔn jugi biyɛi: Inɛ tuturu puu sɔɔ keŋi nɛ ɔgi biyɛ, kaa sɔɔ sɔi nɛ lee, kinɛbanrun nɛ lee ɔgiriyɛnɔugi. 20 Sabu, inɛ kinɛbanrun le wɔɔ gɔ, Ama giru nɛ kijɛ teitai wɔɔ gɔ kanraanlɛ. 21 Kɔɔ sabu dɛi, kijɛ inɛ lɔgɔjiyɛmɔjɛ wooi lee, kanran mɔɲu wooi lee pajutii. E kuu sunugu le Ama, kinɛ ebe nɛ sɔɔ yibaajɛ gɔ le yabai. Sabu wogɔ ei yabu bɛbɛɛdo. 22 E, Ama sɔɔ keŋi sai turu nɛ bii ye, kuu ebe lelemɔnɔugi. E naran go wogɔ birɛ birɛi. 23 Inɛ Ama sɔɔ ɛgaa, wogɔ birɛ birɛɛlɛ gɔ, kɔɔbaŋa inɛ kikinu yɛnu nɛ girupala womɔ bana wɔɔ gɔ tɔitɔi yɛnɛjɛ gin’ wɔɔ. 24 Kaa wo unruin yɛnaa kilaai onu nɛ, wo yayaajɛ. Kɔɔ onu nɛ wo bana wo bee gɔ ɔgu kɛu naŋayaajɛ. 25 Kibɛru Ɛju gɔ Ama tɔɔru kibaai gɔ woi, wogɔ inɛi hɔɔlɔi bobojojɛ. Inɛ Kibɛru Ɛju deeru gɔbe ɛjii dimɛ gɔ, inɛ wogɔ baŋa Kibɛru Ɛju deeru gɔbe naŋaalɛ ye, wo deeru wogɔbe le kɛukɛu birɛ birɛjɛ ye, kɔɔ waaru le inɛ kɔɔbaŋa kijɛ wo kanraindo wooi nɛ duba bɛbɛɛdo. 26 Inɛ unrun wa, Ama oju dimɛ ga wɔɔ, kaa ninɛ womɔ karumu kunɔ bɛɛlɛ gɔ, kɔɔbaŋa kuu unrunmɔ lelemɔuwɔ. Ama dimi womɔ gɔ niwɛn sɛlɛ. 27 Ama emɛ Ba gɔ, Ama dimi ɛju tɔitɔi ga wo lugojɛ gɔ unwɔ: Laawagunw ɔɲaa wɔin lee, yapanuw ɔɲaa wɔin gɔbe lee kajubu gɔ lee, aduna kijɛ lɔgɔgu pajaatiyaa ye, kuu uwɔ ɛjii gɛli leei.
