HEBURU 9

1Aaru pɔlɔ gɔ, Ama demɛniyɛnmu sibɛ go tɔɔru womɔbe yasɛbe, Ama ginrun numɔ le yegeraaɲu kanran yasɛbe. 2Sabu guju kuru Ama Ginrun kuraa yabe. Kuru kɔlɔ kɛju pɔlɔ gɔ, yalu ɛjaai gɔ woi. Wogɔ nɛ pilɛlɔn diyɛ gɔ lee, tabalu gɔ lee, Ama burui ga buru duunaaɲu gɔ lee yatobɛin. 3Yalu kɔɔ galaai ye kɛju kunu lɛiye sɔi gɔ onu nɛ yalu ɛjaa naa ɛjaa gɛɛɲu gɔ yabe. 4Wogɔ nɛ uguru tɛguru yalu kange le yegeraaɲu gɔ lee, aaru koro gɔ, sɛɛu kange le kuyaa wɔɔ gɔ lee yatobɛin. Koro gɔ kɔlɔ nɛ, kange gelu, buru manɛ gɛɛɲu gɔ too gɔ lee, Aarɔn baga titimu, liyɛ bujaa wɔɔ gɔ lee, aaru tibu kɛbiriyɛun, tɔɔru sɔɔ konɛ tɔŋaaɲu gɔ lee yatobɛin. 5Ama, dooro baŋa yalu gɔ nɛ yɔɔ sɛɛrɛi ga, koro gɔ kuu nɛ, Mɛlɛnkɛ Serubɛn gɛɛɲu gɔbe yegeraa yabɛin. Be, hakɛ mɛɛnɛɲu yalu gɔ gamuju bemɛ le dɛbaa gɛliyaa bɛin. Kaa sɔɔ gɔbe digu le digu le sɔɔɲu waaru gɔ kanɛ laa. 6Kijɛ kɔɔbe puu kɔɔ gin’ wo wɔnu, Ama bɛrɛ sadaga dɔɔnɔw gɔbe bai tuturu puu kuru kɛju pɔlɔ yalu gɔ nɛ yowaa ye, sadaga dɔɔnu bemɛ birɛ birɛɲu. 7Kaa kuru kɛju lɛiye gɔ nɛ, Ama bɛrɛ sadagadɔɔnɔnɛ kuu baŋa gɔ sai, anranguju nɛ kubɔ turu sai yoojɛ. Wo kuu womɔ dɛi, iyaa tɔgu gɔ puu lelu dɛi, waajibi arusɛgɛ ili, sadagai Ama bɛrɛ dɔɔnɔ ga kole yoojɛ. 8Guju kuru Ama Ginrun pɔlɔ kɔɔ waaru bee puu nɛ, yalu ɛjaa naa ɛjaa gɔ nɛ yoo ga oju pinɛlɛla bee ga, Kikinu Pilu sɔɔ kɔɔbe le emɛ bɛrɛ jugɔmɔube. 9Kɔɔbe puu kanɛ bana sɔɔ wɔɔ jugɔmɔjɛ. Sin obu lee, sadaga lee, Ama bɛrɛ jɛɛlɛubɛin gɔbe, Ama demɛniyɛnmɔnɛ gɔ kinɛjugɔ nɛ jarugu donugu bɛɛbele ga tagarajɛ. 10Sabu sɔɔ gɔ kayɛrɛ ma, kijɛ nɔɔɲu ma, dii le ui bana ɛjɛmɔɲu tɔgu dɛin dɛin ma sɔɔ le digɛ. Kɔɔbe kinɛjugɔ sɔɔ le digɛla, kaa goju sai le tɔɔru digɛi. Ama, kijɛ puu pilemɛ ye kanai wo bojoido waaru yai dɔɔ nɛ birɛ birɛ ga daanaabɛin. 11Kaa Kirisito, kijɛ ɛju kanɛ baa wɔin sadagadɔɔnɔnɛ kuu baŋai wɛi. Kuru nɛ wo galu gɔ, wo gaa, sɛɛu kibaa wɔɔ. Wogɔ inɛ numɔ le yegerenɛ. Tiyɛ gɔ aduna maŋaaɲu ɔn kijɛi laa. 12Wo kubɔ turu sai yalu ɛjaa naa ɛjaa gɔ nɛ yowaa kilaai. Wo ɛnrɛn ili le ma, naa unrunw ili le ma yoolu. Kaa kuu bana womɔ ili le yoi. Wo kɔɔ gin’ kanraan, asuu kuu emɛ gowaai boju. 13Ɛnrɛn ili lee, naa jaŋu ili lee, naa unrunw tɛgɛrɛɲu unɔ gɔ lee, inɛw ligijiyaain gɔbe nɛ miɲaa ye, ligiji bemɛ sɔɔ donugaa ye, bei ɛhɛjɛmɔjɛ. 14Kɔɔ kunrin wɔɔ ye, Kirisito ili gɔ kɔɔ dɛi sigɛ gɔnrɔn sɛɛ. Wo Ama Kikinu asuu wɔɔ gɔ le digɛu kuu unrunmɔ Ama bɛrɛ sadaga lɔgɔ taralai obu. Ili womɔ kinɛjugɔ emɛ nɛ birɛ niwɛn sɛlɛ gɔbe ɛjɛmɔ ye, emaa Ama ɔnmɔi wɔɔ gɔ dɛi birɛ birɛ ga kakanrando. 15Kɔɔ sabu dɛi, inɛw Ama bei boonu gɔbe, asuu kɛn pui gɔ bɛɛ ga, Kirisito aaru kana sɔɔ yegerenɛi. Yiun womɔ aaru pɔlɔ waaru le hakɛ kanrin gɔbe dɔrugaati digɛu, be wogɔ bɛbɛɛdɛin. 16Kɛn balu dɔn nɛ sɔɔ too gɔ, dɔn tɔŋɔnɛ gɔ yinwaain ye kijɛ kanranɲui. Kinrun le wo wɔnu sɔɔ kanranɲui laa. Kodigɛu, kɛn balu dɔn yɔɔ ye, dɔn tɔŋɔnɛ gɔ yinwaain ga igimɛi biyɛun jaain wɔɔ. 18Kɔɔ sabu dɛi, aaru pɔlɔ gɔ kanran ili wɔlɔ go aaranɛ. 19Mɔise, inɛw gɔ puu bɛrɛ tɔɔru sɔɔ tuturu puu Tɔɔru tɔŋaaɲu gɔ nɛ bana too gin’ tagaatiyaa, naa unrunw ili dii le biraa, peju kukuli banrun lee, isɔpe tiun bagi lee, konɛ sowaa Tɔɔru dɔn gɔ nɛ miɲaa, iyaa inɛw gɔ puu bɛrɛ miɲaabe. 20Kɔɔ gin’ kanraun wɔu kijɛ wo gɛɛbe: “Ɔn Ama ebaa aaru nɛ biyɛ ga wo tɔɔru gɔ ili gɔi.” 21Mɔise kɔɔ gin’ iyaa kuru gɔ lee, sadaga birɛ gelu gɔ puu lee nɛ ili miɲaabe. 22Tɔɔru le kɛukɛu, kijɛ tuturu laa ye, puu ili le ɛjɛmɔɲu. Iyaa ili togiyelu go, hakɛ yaabu kanrun wɔlɔ. 23Kɔɔbe alagala nɛ kijɛ nanaa wɔɔ yarai. Bei kɔɔ gin’ ɛjɛmɔ ga waajibi bee. Kaa alagala kijɛ nanaa gɔbe, be kuu bemɛ le sadaga kɔɔbe dɛi sigɛbe kaii sɛin. 24Sabu Kirisito, yalu ɛjaa nɛ wo yoi gɔ, nanaa gɔ yara gin’ numɔ le yegeraaɲu gɔi laa. Kaa wo alagala naa gɔ nɛ yowaa, kanɛ emɛ dɛi Ama giru nɛ wɔɔ. 25Sadagadɔɔnɔnɛ kuu baŋa anranguju wɛɛjɛ puu arusɛgɛ ili le yalu ɛjaa naa ɛjaa gɔ nɛ yoyoojɛ. Kaa Kirisito kɔɔ gin’, kubɔ joo kuu unrunmɔ sadaga obodo ga yoolu. 26Sabu wogɔ gin’ bee ye, Kirisito aduna maŋi nɛ kubɔ joo wo ɔɲɔu jaain bee. Kaa kanɛ, waaru gɔbe dumɔrɔn bemɛ nɛ dɔɔuwɔ gɔ le, wo kuu unrunmɔ sadaga obu le digɛnu hakɛ donugo ga, kubɔ turu sai wiyaa kilaai. 27Inɛ tuturu puu kubɔ turu yinwɛn ga waajibi, kɔɔ onu nɛ Ama, saliyɛ womɔ kikiredo. 28Kɔɔ bana wɔɔ gin’, Kirisito, inɛw joo hakɛbe duiyɔ ga, kubɔ turu sai kuu unrunmɔ sadaga obu. Wo kubɔ lɛiye gɔ wɛwɛɛdo, kaa hakɛ goonɔ dɛi biyɛidolo. Inɛw woi dɔmɔi gɔbei yaba ga wɛɛdo.

will be added

X\