HEBURU 8

1Sɔɔ emɛ sɔɔjɛ gɔ nɛ, sɔɔ ii gɔ unwɔ: Emɛ Ama bɛrɛ sadagadɔɔnɔnɛ kuu baŋa kɔɔ tunmɔi sɛin. Wo alagala nɛ Ama baba diyɛ baŋa ɔgɔdɔin numɔ iin sibɛ nɛ dɛinyaan wɔɔ. 2Konɛ, Ama Ginrun kɔlɔ gɔ nɛ, tiyɛ gɔ guju kuru Ama Ginrun nanaa inɛ kurolu, Inɛw Baŋa Ama kuraabe gɔ nɛ, wo sadagadɔɔnɔnɛ kuu baŋai biyaa wɔɔ. 3Sadagadɔɔnɔnɛ kuu baŋa tuturu puui, sin obu lee, sadaga lee, Ama bɛrɛ dɔɔnɔ dɛi daanaɲu. Kodigɛu, sadaga dɔɔnɔnɛ kuu baŋa emɛ gɔ, wo kanran, Ama bɛrɛ kijɛ dɔɔnɔɲu wo siyɛun jaain wɔɔ. 4Wo aduna nɛ bee ye, woi sadagadɔɔnɔnɛi kanran biyɛbele, sabu inɛw wajunw, Tɔɔru le kɛukɛu sadaga dɔɔnɔɲu yɔɔin. 5Wogɔ bɛɛnw sadaga dɔɔnu birɛ be birɛjɛ gɔ, alagala nɛ nanaa kanranɲu gɔ yarai. Mɔise mɔ kanran, guju kuru Ama Ginrun gɔ waaru kurodo ga wo bee le kunrin bee. Ama wo le sɔwaa gi: “Ɛjii kajuba, kokoo nɛ u bɛrɛ tagurin gɔ bana wɔɔ gin’, kijɛ gɔ puu wogɔ gin’ kanran.” 6Kaa kanɛ Yesu, sadaga dɔɔnu birɛ wo bɛi gɔ, bemɛ gɔ kuu nɛ wɔɔ. Sabu aaru dɛi sɔɔ yegerenɛi wo wɔɔ gɔ, aaru pɔlɔ gɔ dɛi sigɛ. Iyaa pui sigɛbe kuu nɛ daan. 7Aaru pɔlɔ gɔ nɛ sɔɔ tolo, sɛɛu bee ye, aaru lɛiye dɛnɛnu doori bee. 8Kaa Ama, inɛw womɔbe nɛ jarugu tɛmaabe. Wo saa gi: “Inɛw Baŋa Ama gi: ‘Bai yawɛɛjɛ, mu Isɛrɛlu inɛw lee, Juda tɔgu lee le aaru kana ahaaradɔn. 9Aaru wogɔ, be babe numɔ aa, Ejipute gana nɛ bai bei mu goonɔbe le, be le aaru mu aaru gɔ gin’ biyɛidolo. Sabu be aaru ma gɔ yamalaatin digɛu, mu kanran be le onu dulaatun.’ 10Nɛɛ Inɛw Baŋa Ama gi: ‘Bai kɔɔbe galaai ye, Isɛrɛlu inɛw le aaru mu aaraido gɔ unwɔ: Mu tɔɔru mabe hakilɛ bemɛ nɛ kukunɔdɔn. Kinɛ bemɛ nɛ yaa tɔtɔŋɔdɔn. Mu Ama bemɛi biyɛdɔn, be inɛw mai biyɛdɛin. 11Inɛ turu kanran, waja tɔgu womɔ inɛ ma, wo bainɛ ma deere ye, «U Inɛw Baŋa Amai jugɔ» gɛɛnu doori. Dagunɛ nɛ goi ye, diyɛnɛ nɛ yai dɔɔ, be puu mui jujugɔdɛin. 12Sabu mu teitai laa bemɛ be bɛrɛ yaabu kakanrandɔn. Mu waja asuu hakɛ bemɛ ajubu ma nɛ wɛɛmɔidolɔn.’’ 13Ama, aaru kɔɔ aaru kanai wo gi gɔ le digɛu, aaru pɔlɔ gɔ pɛii bojaati. Kijɛ pɛi anranguju joo bɛɛu gɛlɛ gɔ, manu womɔ bɛrii wɔɔ.

will be added

X\