HEBURU 7

1Mɛlukisedɛku wogɔ Salɛmu ana ɔgɔnɛi bee, iyaa Ama daa naa daa go wɔɔ sadagadɔɔnɔnɛi bee. Abarahamu, kɔmɔ nɛ ɔgɔnw gɔnraan pilemaa wɛɛu wo wɔu, Mɛlukisedɛku yaa woi sɛgɛraa, woi duba kanraanbe. 2Abarahamu, ɔgɔnw gɔbe bɛrɛ kijɛ wo ɛlu puu jaka wo bɛrɛ obu. Mɛlukisedɛku boi tiyɛ pɔlɔ gɔ teitai ɔgɔnɛi. Iyaa wo Salɛmu ɔgɔnɛi bee, tiyɛ gɔ jamu ɔgɔnɛ. 3Mɛlukisedɛku mɔ ba sɔɔ sɔɔnɛ, na sɔɔ sɔɔnɛ, tirɛ anranw sɔɔ sɔɔnɛ, bai womɔ ɔn nɛ tɔlɔjɛ wɔlɔ, ɔn nɛ dogojɛ wɔlɔ. Wo Ama Aini gin’ asuu sadagadɔɔnɔnɛi wɔɔ. 4Mɛlukisedɛku bana gaai wo wɔɔ gɔ yɛnɛi. Abarahamu emɛ tirɛ ainɛ diyɛ gɔ, kɔmɔ nɛ kijɛ wo bɛi jaka gɔ wo bɛrɛ obu. 5Lewi tɔgu inɛw sadaga dɔɔnu birɛ nɛ yooɲu gɔbe, Tɔɔru gɔ le kɛukɛu, be Isɛrɛlu unrunw bɛrɛ jaka yaba bɛbɛɛɲu. Tiyɛ gɔ, be inɛw bemɛ be gin’ Abarahamu tɔgu nɛ goin bɛrɛ yabaɲu. 6Kaa Mɛlukisedɛku, wo Lewi tɔgu inɛi laa bee kanran, Abarahamu bɛrɛ jaka yabaabe. Wo iyaa, Ama pui womɔbe inɛ bɛrɛ wo kunu gɔ, inɛ wogɔi duba kanraanbe. 7Bana wɔɔ le kɛukɛu, duba kanranjɛ baŋa gɔ, duba bɛɛnɛ gɔ dɛi gaa, jiiru wɔlɔ. 8Ama bɛrɛ sadagadɔɔnɔw sɔɔ sibɛ nɛ jaka yabanw gɔbe, waajibi inɛw yinwɛindɛinbei. Kaa Mɛlukisedɛku mɔ sibɛ nɛ Ama Dɔn inɛ dɛi sɛɛrɛ gowaa, ɔnmɔi wɔɔ wo gi gɔ, jaka gɔ wo yabu. 9Iyaa Abarahamu jaka waaru wo goonu le, Lewi, jaka yabanw tɔgu tirɛ ainɛ gɔ, wo kanran jaka goonaati gɛɛ bɛbɛɛmɔjɛ. 10Sabu Mɛlukisedɛku, Abarahamui waaru wo sɛguru le, Lewii naranla bee kanran, wo unrun tirɛ ainɛ ili nɛ yatobe. 11Isɛrɛlu unrunw bɛrɛ Tɔɔru obin gɔ, duu womɔ Lewi tɔgu inɛw sadaga dɔɔnu birɛ sɔɔ kuu nɛ daan. Sadaga dɔɔnu birɛ sɔɔ wogɔ, kijɛ kibaai bee ye, Aarɔn mɔ gin’ pajati ye, Mɛlukisedɛku mɔ gin’ Ama bɛrɛ sadagadɔɔnɔnɛ waja daana ga inge dɛi waajibi bii? 12Sabu, sadaga dɔɔnu birɛ sɔɔ gɔ dulomaaɲu ye, waajibi tɔɔru gɔ yaa duliyeun jaain wɔɔ. 13Kunrin, Inɛw Baŋa emɛ, inɛ dɛi sɔɔ kɔɔ sɔin gɔ, wo tɔgu waja nɛ goi. Tɔgu womɔ inɛ turu kanran, sadagadumu nɛ birɛ birɛɲu sɔɔ nɛ tolo. 14Sabu wo Juda tɔgu nɛ goi ga igimɛi wɔɔ. Mɔise, Ama bɛrɛ sadagadɔɔnɔw sɔɔ sɔɔu, tɔgu kɔɔ inɛw dɛi sɔɔ kanma gɛɛlu. 15Sɔɔ emɛ gi gɔ daii wɔɔ ga sɔɔ waja sigɛ le jugɔmɔjɛ unwɔ: Ama bɛrɛ sadagadɔɔnɔnɛ Mɛlukisedɛku gin’ wɔɔ waja gowaa wɔɔ. 16Sadagadɔɔnɔnɛi wo bii gɔ, inɛ nɛ wo goibe sɔɔ le digɛla. Kaa ɔnmɔ dogoolɛ gɔnrɔn le digɛ. 17Sabu Ama Dɔn sɛɛrɛ gowaa gi: “U Mɛlukisedɛku mɔ gin’ asuu Ama bɛrɛ sadagadɔɔnɔnɛi wɔu.” 18Kunrin, sɔɔ tɔɔraaɲu pɛi gɔ, yɛbɛlɛ womɔ lee, niwɛn tolo womɔ lee dɛi woi pajaatin. 19Sabu Tɔɔru, kijɛ turu kanran kibaai bojaa bɛɛlu. Kaa iyaa, diyɛdɔn sigɛ wiyaai. Emɛ wogɔ le Ama giru nɛ dɔɔɲu. 20Wogɔ nɛ sigiyaa, Ama kuu unrunmɔ wo jɛbi sɔɔ gɔ yɔɔ. Inɛw wajunw sadaga dɔɔnɔwin be bii gɔ, kuu jɛbi kɔɔ tunmɔ le biyɛnɛ. 21Kaa Yesu, sadagadɔɔnɔnɛi wo bii gɔ, Ama kuu unrunmɔ jɛbiyaa woi daanu. Ama sɔwaa gi: “Inɛw Baŋa Ama kuu unrunmɔ jɛbiyaajɛ, wo sɔɔ unrunmɔ kɔɔlɔmɔidolo. U asuu Ama bɛrɛ sadagadɔɔnɔnɛi wɔu.” 22Ama kuu jɛbi gɔ sabu dɛi, Yesu, aaru dɛi sɛɛrɛi biyaa wo wɔɔ gɔ, aaru pɔlɔ gɔ dɛi sigɛ. 23Sɔɔ waja yaa unwɔ: Lewi tɔgu, sadagadɔɔnɔw gɔbe yinwɛn yinwɛn yaabɛin digɛu, birɛ gɔ nɛ asuu toii bɛɛbenɛ dɛi jooi bɛin. 24Kaa Yesu, wo kai asuu ɔnmɔi wɔɔ digɛu, sadaga dɔɔnu birɛ womɔ gɔ nɛ dilɛ wɔlɔ. 25Kosabu dɛi inɛw wo le digɛnu Ama giru nɛ dɔɔɲu gɔbei sɛɛu yabu bɛɛjɛ. Sabu be dɛi Ama bɛrɛ gɛɛn ga wo asuu ɔnmɔi yɔɔ. 26Kɔɔi biyaa ye, Ama bɛrɛ sadagadɔɔnɔnɛ kuu baŋa emɛ le dagaa gɔ, Yesu woi. Wo ɛjaa wɔɔ, jarugu wo le wɔlɔ, lɔgɔ turu kanran wo nɛ tarala, hakɛgunw le woi kabugaa, alagalabe dɛi sigɛ Ama woi daa go unaajɛ. 27Sadagadɔɔnɔnɛ kuu bɛɛnw wajunw, bai puu kuu unrunbemɛ hakɛ dɛi sadaga tɛgɛraa ye, kɔɔ onu nɛ Isɛrɛlu tɔgu puu hakɛ dɛi be tɛgɛrɛjɛ gin’, wo wogɔ kai sɛlɛ. Waaru kuu unrunmɔ sadaga wo obu le, wo kubɔ turu sai wogɔ kanraan kilaai. 28Mɔise tɔɔru le kɛukɛu, sadagadɔɔnɔnɛ kuu bɛɛnw daanaaɲu gɔbe, inɛw yɛbɛlɛgunwin. Kaa Ama kuu jɛbi sɔɔ, Tɔɔru onu nɛ wɛi gɔ, Aini gɔi sadagadɔɔnɔnɛ kuu baŋai daanu. Ama woi asuu kibaai boju.

will be added

X\