HEBURU 6

1Kɔɔ sabu dɛi, Kirisito deeru sɔɔ pɔlɔ gɔbe sai nɛ biyɛlu kanraan ye, giru go inɛw naw le deeru jaan gɔ nɛ yaamɔi. Emɛ sɔɔ pɔlɔ gɔbe nɛ pilemu pilemu wɛɛ kanranmɔnɔugin. Tiyɛ gɔ birɛ niwɛn sɛlɛ gɔbe le onu duloti lee, Ama le diyɛ daana lee, 2batise dɛin dɛin deeru lee, inɛ kuu nɛ numɔ yaŋurun deeru lee, yiun bulogu deeru lee, Ama saliyɛ kiru tujɔ asuu nasuu biyɛido deeru lee. 3Giru go yai gɔ, Ama yabaajɛ ye kijɛ emɛ kanraindo gɔ woi. 4Inɛw Ama wijɛ gɔ kubɔ turu biyaa, alagala sin obu gɔ nɛwaan, Kikinu Pilu biyaa, Ama sɔɔ ɛjii wɔɔ ga jugaa, aduna wɛɛido gɔnrɔn gɔ nɛwaan, pilemaa numaa oju nɛ gowaain gɔbe, be pilemaa Ama Aini gɔi baga jai nɛ pɛgɛu, inɛw wooi giru nɛ dɔgɔ wo bɛrɛ tagarauwɔin. Kɔɔ sabu dɛi bei pilemɛ ye waja ajubuduli nɛ jɛɛlu bɛɛmɔɔlɛ. 7Minɛ bɛru bɛru anrandii bɛɛjɛ, dii gɔ nɔwaan, inɛw dɛi woi walin dɛi kijɛ niwɛn sɛɛ gogoomɔjɛ ye, minɛ gɔ Ama bɛrɛ duba biyaajɛ. 8Kaa minɛ gɔ jijii lee, dɔgɔ mɔɲu lee goomɔjɛ ye, woi niwɛn sɛlɛ. Ama jebu wo le bɛrii wɔɔ, woi tɛguru le dogojɛ. 9Ba unrunw ibɛ emɛbe, halu emɛ kɔɔ gin’ sɔɔ sɔɔuwɔin kanran, e bana ɛju yayabu nɛ yaajɛ gɔ nɛ toin ga, emɛ e sibɛ go diyɛdɔn le wɔin. 10Ama, teitai laa go wɔlɔ. Wo kijɛ e kanrun gɔbe naŋaidolo. Iyaa Ama inɛw dɛi birɛ biraa e galu lee, nimɛ e birɛjɛ gɔ lee le digɛu wo bɛrɛ ihibɛ e taguru gɔ, wo naŋaidolo. 11E tuturu puu dumɔ gɔ baa maini tunmɔ kɔɔ le bii ye, kijɛ e dɔmɔ gɔ sɛɛu bɛɛ ga emɛ wogɔi dɛnɛɲu. 12Ebaa walagunwin taŋa ga emɛ ibɛlain. Kaa ebaa inɛw gagawu nɛ biyaa, muyaan wɔnu, kɛn pui kunaaɲu gɔ bɛɛɲu gɔbei dee ga emɛ ibɛɛ wɔin. 13Ama, Abarahamu le pui kunɔu, kijɛ wo dɛi gaa kole jɛbiyɛɲu waja wɔlɔ gɔ digɛu, wo kuu unrunmɔ le jɛbiyaa, 14gi: “Mu naran go ui duba kakanrandɔn, iyaa tɔgu uwɔ ɛjii nanarinyɛnmɔdɔn.” 15Kunrin muyɔn le dɔmiyaan wɔu, Abarahamu kijɛ wo bɛrɛ pui kuni gɔ yinbɛi. 16Inɛw, waaru jebu be jɛbiyɛjɛ le, kijɛ be dɛi gaa le jɛbiyɛɲu. Jebu gɔ, sɔɔ gɔ bɛrɛ paŋa obaa ye jiiru puu wo donugojɛ. 17Kunrin Ama, pui wo kunu kɛn inɛw balanw gɔbe bɛrɛ diŋɛ unrunmɔ sɔɔ asuu kɔɔliyɛɛlɛ ga daii jugɔmɔ ibɛɛ bee. Kɔɔ dɛi, wo pui gɔ kuu nɛ jebu gɔ yinbaru. 18Kunrin kijɛ kɔɔliyɛɛlɛ kolɛi wɔɔ. Iyaa wogɔ nɛ Ama, kakalu maŋu bɛɛlɛ. Kodigɛu, emɛ inɛw yalu babaŋi emɛ wo nɛ biyaaɲu gɔbe, diyɛdɔn bɛbɛɛdɛin ga emɛ bɛrɛ pui kunaaɲu gɔ ɛjii gɛliyɛ ga anrangaju diyɛ le wɔin. 19Inrun kirɛgu diikoroi ɛjii ɛɛin yalu womɔ nɛ bojojɛ gin’, diyɛdɔn wogɔ kinrun emɛi gain gain bojojɛ. Iyaa diyɛdɔn wogɔ, alagala Ama ginrun, kɛju sɔi gɔ kɛjaa galaa ye, kɔlɔ go baa yadɔɔjɛ. 20Yesu wo laa giru emɛ nɛ, emɛ dɛi konɛ yowaabe. Wo Mɛlukisedɛku mɔ gin’ asuu Ama bɛrɛ sadagadɔɔnɔnɛ kuu baŋai biyaabe.

will be added

X\