HEBURU 5

1Sadagadɔɔnɔnɛ kuu baŋa tuturu wooi, inɛw logoro nɛ Ama woi yɛmɛjɛ. Inɛw dɛi Ama birɛ birɛ ga woi daanaaɲu. Sin obu lee, hakɛ yaabu kanrun sadaga lee Ama bɛrɛ dɔɔnɔnɛi. 2Wo kuu womɔ le, yɛbɛlɛ wo bɛrɛ dɔɔ bɛbɛɛjɛ digɛu, inɛw sɔɔ inin, lelu nɛ toin gɔbe amasɔgɔ jugɔ bɛbɛɛjɛ. 3Wo kuu womɔ le yɛbɛlɛginɛi sabu dɛi, tɔgu womɔ inɛw hakɛ dɛi Ama bɛrɛ sadaga wo dɔɔnɔjɛ gin’, kuu womɔ hakɛ dɛi kanran, Ama bɛrɛ sadaga wo dɔɔnɔu jaain wɔɔ. 4Inɛ turu kanran sadagadɔɔnɔnɛ kuu baŋai bii baba gɔ kuu unrunmɔ bɛrɛ obu bɛɛlɛ. Kaa Aarɔn mɔ bana bii gin’, Amai wogɔ nɛ inɛi boonɔjɛ. 5Kɔɔ bana wɔɔ gin’, Kirisito gɔ, sadagadɔɔnɔnɛ kuu baŋai bii baba gɔ, kuu unrunmɔ bɛrɛ wo obolu. Kaa wo le sɔwaa, “Ui Aini mai, iye mu ui narun”, iyaa, “U Mɛlukisedɛku mɔ gin’ asuu Ama bɛrɛ sadagadɔɔnɔnɛi wɔu”, Ama gɛɛnɛ gɔ, baba kɔɔ wo bɛrɛ wo obu. 7Yesu aduna nɛ waaru wo bee le, wo amagɛɛn lee, kai womɔ Ama bɛrɛ tagu lee, kɔun diyɛ le giridii le, Ama, yiun nɛ woi yabu bɛɛbe baŋa bɛrɛ sɔmiyaanbe. Ama yaa, Yesu, baba le wo le tubiyaa wo wɔɔ gɔ dɛi, gɛɛn womɔ gɔ saabe. 8Kaa halu wo Ama Ainii kanran, wo ɔɲɛ wo iye gɔ le digɛu sɔɔ yabu deyaabe. 9Woi kibaai waaru bojin le, inɛw sɔɔ womɔ yabanw wooi bɛrɛ wo yayabu asuu wɔɔ obonɛi biyaai. 10Ama yaa woi Mɛlukisedɛku mɔ gin’, sadagadɔɔnɔnɛ kuu baŋai bojaabe. 11Sɔɔ kanɛ emɛ sɔi kɔɔbe kuu nɛ emɛ sɔɔ joo sɔɔun yasin. Kaa e sɔɔ paamu kanrun nɛ ɔgulai digɛu, tiyɛ bemɛ e bɛrɛ taga ga nawin wɔɔ. 12Waaru ɔn le jaŋudeerewin e biyɛun jaan bee. Kaa Ama sɔɔ sibɛ go sɔɔ pɔlɔ jugɔun jaan gɔbe e bɛrɛ deere ga e nimɛ kai yasɛi. Jaa gunu kaya dɛi, e nimɛ kanran iru kai yasɛi. 13Inɛ iru sai nɔɔjɛ, nimɛ ii digɛu, teitai sɔɔ kabu kunu bɛɛlɛ. 14Kaa jaa gunu inɛw naw mɔi. Be wɛɛjiyɛu, wɛɛjiyɛu, ɛju lee, mɔɲu lee kabu kunu deyaain.

will be added

X\