HEBURU 4

1Deeliye wogɔ nɛ yoo ga, Ama pui gɔ emɛ le yɔɔ digɛu, logoro ebe nɛ inɛ turu bɛɛ yoolu kakanrando ma liyɛmɔi. 2Inɛw olusolo nɛ bɛin gɔbe bɛrɛ tagin gin’, Kibɛru Ɛju gɔ emɛ bɛrɛ kanran yintagin. Kaa sɔɔ be ɛgu gɔ, be gagawu le yabanɛ digɛu, sɔɔ gɔ be bɛrɛ niwɛn siyɛlu. 3Deeliye dɛi Ama sɔwaa: “Mu kinɛbanrun ma le wɔu mui jɛbiyaa, bemaa deeliye be dɛi mu boju gɔ nɛ asuu yooidenɛ gun” wo gi gɔ, emɛ inɛw gawaaɲu gɔbe, deeliye wogɔ nɛ emɛ yoojɛ. Ama, aduna maŋu le baa birɛ womɔ kilaa yaabe kanran, wo sɔɔ kɔɔ sɔwaabe. 4Sabu Ama Dɔn yalu turu nɛ, bai sɔiye gɔ dɛi sɔwaa, “Bai sɔiye gɔ, Ama birɛ wo birɛbe puu dɛɛnrinyaanbe” gin. 5Yalu waja nɛ wo iyaa sɔwaa, “Be deeliye be dɛi mu boju gɔ nɛ asuu yooidenɛ” gin. 6Kɔɔi ye inɛw be laa deeliye nɛ yoi Kibɛru Ɛju gɔ ɛgin gɔbe, gagawu sɛlɛ bemɛ dɛi deeliye gɔ nɛ yoonɛ digɛu, inɛw gamuu nimɛ bɛɛ yoyoomɔ. 7Kodigɛu, Ama pilemaa bai kɛjaajɛ. Wo iye gi. Waaru diyɛ galaa wo yaa, wo Dawide le digɛu, Ama Dɔn yalu giru nɛ gin gɔ nɛ wogɔ sɔi, gi: “Iye e Ama mii ɛgaajɛi ye, kɔkɔlɔmaa le biyɛnɔugi.” 8Josue, inɛw gɔbei deeliye nɛ yoomaabe ye, Ama kɔɔ onu nɛ bai waja sɔɔ sɔɔbele. 9Kɔɔi biyaa ye, Ama, bai sɔiye gɔ le wo dɛɛnrin gin’, Ama inɛw dɛi deeliye kɔɔ tunmɔ yɔɔ. 10Sabu Ama deeliye boju gɔ nɛ inɛ yowaajɛ, Ama, birɛ unrunmɔ nɛ wo dɛɛnrinyaanbe gin’, kɔɔbaŋa kanran birɛ unrunmɔ nɛ dɛdɛɛnrinyɛndo. 11Kɔɔ digɛu maini ye deeliye wogɔ nɛ yoomɔi. Logoro emɛ nɛ inɛ turu kanran, sɔɔ yabala wogɔ tunmɔ le bii ye, deeliye gɔ nɛ bɛɛ yoolu kanrannɔu ga mainiyɛnmɔi. 12Ama sɔɔ gɔ, sɔɔ ɔnmɔi, gɔnrɔn yasɛ, polukaaba aŋa lɛi wooi dɛi sigɛ sii wɔɔ. Wo kikinu lee, kinrun lee yalu kabiyɛjɛ go baa yayoojɛ. Digu gɔbe lee, bɔnu lee yalu kabiyɛjɛ go baa yayoojɛ. Wo kinɛ dadaaru gɔbe lee, kinɛ ajubu lee saliyɛ kirenɛi. 13Kijɛ maŋaaɲu, Ama giru nɛ baŋiyaan wɔɔ turu kanran wɔlɔ. Ama, sɔɔ emɛ puu wo bɛrɛ sɔɔi emɛ do baŋa gɔ, kijɛ puu giru womɔ nɛ dɛbulu ye ije go biyɛjɛ. 14Ama bɛrɛ sadagadɔɔnɔnɛ kuu baŋa diyɛ, alagala nɛ Ama giru nɛ baa dɔwaa wɔɔ gɔ emɛ yasin. Wogɔ Ama Aini Yesui. Kodigɛu, gagawu emɛ sɔɔ emɛ sɔɔjɛ gɔ ɛjii gɛliyɛmɔi. 15Sadagadɔɔnɔnɛ kuu baŋa, yɛbɛlɛ emɛ nɛ emɛ le ɔɲɔ bɛɛlɛi emɛ sɛnɛ. Kaa kijɛ puu nɛ emɛ gin’ woi subɔraabɛin. Kaa wo hakɛ kanranlu. 16Kɔɔi biyaa ye, Ama womaa amasɔgɔ emɛ jugɔ ga, emaa nɛɛma bɛi ye, waaru jaan gɔ le jobudigilu emɛ saa ga, emɛ liyɛ sɛlɛ go Ama ɔgɔdɔin giru nɛ dɔɔmɔi.

will be added

X\