HEBURU 3

1Kɔɔ sabu dɛi, ba unrunw Ama inɛwin wɔin gɔbe, e kanran inɛw Ama boonaajɛi wɔin gɔbe, Yesui ajubu yɛnɛi: Ama woi tiyaa, gagawu sɔɔ emɛ sɔɔjɛ nɛ sadagadɔɔnɔnɛ kuu baŋai boju. 2Mɔise, Ama ginrun gɔ puu nɛ birɛbirɛnɛ sɔɔ turu baŋai bii gin’, Yesu, Ama woi daananɛ gɔ le sɔɔ turu baŋai biyaabe. 3Ginrun ujɔnɛ, ginrun gɔ dɛi sigɛ baba wo bɛɛjɛ gin’, Mɔise dɛi sigɛ Yesu le baba jaan ga yinlugaaɲu. 4Ginrun tuturu puu inɛ uju. Kaa kijɛ puu ujɔnɛ gɔ Amai. 5Mɔise kai, Ama sɔɔ gɛɛido dɛi sɛɛrɛ goo ga, birɛbirɛnɛi go, Ama ginrun gɔ puu nɛ sɔɔ turu baŋai bii. 6Kaa Kirisito, Ainii go Ama ginrun kuu nɛ dɛinyaan, sɔɔ turu baŋai wɔɔ. Emɛ kijɛ bɛbɛɛdɛin ga kuu emɛ unaa emɛ sɛɛ gɔ nɛ, liyɛ sɛlɛ gɔ lee, diyɛdɔn gɔ lee gɛliyaa kole wɔin ye, Ama ginrun gɔ emi. 7Kɔɔ sabu dɛi, nɛɛ, Kikinu Pilu bana sɔi gin’: “Iye e Ama mii ɛgaajɛi ye, 8murutu waaru le olusolo nɛ Amai bai suburin gɔbe le bana bii gin’, e kɔkɔlɔmaa le biyɛnɔugi. 9Ama gi: ‘E babe, anranguju pɛnai birɛ ma iyaabɛin kanran, olusolo gɔ nɛ mui subɔraa yɛnaabɛin. 10Kɔɔ sabu dɛi, mu waaru wogɔ inɛw le kinɛ banraan, kijɛ mu gi: Be waaru puu ajubu bemɛ nɛ mana mana yaauwɔin. Be oju mabe sɔɔ paamu kanrun yabanɛ. 11Kodigɛu, mu kinɛbanrun ma le wɔu, mui jɛbiyaa, bemaa deeliye be dɛi mu boju gɔ nɛ asuu yooidenɛ gun.’’ 12Mu ba unrunw, logoro ebe nɛ inɛ turu kanran kinɛ mɔɲu kunɔ ye, gagawu sɛlɛ le bii ye, Ama ɔnmɔi wɔɔ gɔi pajanɔu ga kuu ebe kajubai. 13Kaa logoro ebe nɛ hakɛ inɛ turui manamɔ ye, kɔkɔlɔmaa kunɔmɔnɔu ga, iye, waaru ɛju emɛ sɛɛ gɔ le, e bai puu tunmɔ tinwɛnrɛin. 14Sabu diyɛdɔn le emɛ tɔlu gɔ, dumɔ gɔ baa ɛɛn go yagɛlɛin biyaai ye, emi Kirisito le bɔɔi. 15Ama Dɔn sɔwaa, “Iye e Ama mii ɛgaajɛi ye, murutu waaru le bana bii gin’, kɔkɔlɔmaa le biyɛnɔugi” gi. 16Inɛw Ama mii ɛgaabɛin, kaa murutu kanrin gɔbe aabei? Inɛw Mɔise bei teeremaa, Ejipute gana nɛ goin gɔbe puu bei laa ma? 17Anranguju pɛnai, Ama, inɛw aabe le kinɛbanrun le bee? Inɛw hakɛ kanraan olusolo nɛ numaa yayinwin gɔbei laa ma? 18Iyaa Ama jɛbiyaa, inɛw aabe deeliye be dɛi unrun boju gɔ nɛ asuu yooidenɛ gi? Inɛw sɔɔ womɔ yabalu kanranw gɔbei laa ma? 19Inɛw kɔɔbe gagawu sɛlɛ bemɛ sabu dɛi deeliye wogɔ nɛ yoonɛ kanrin ga emɛ iyeuwɔin.

will be added

X\