HEBURU 2

1Kɔɔ sabu dɛi, emaa sɔɔ naran emɛ ɛgu gɔ nɛ emi goi ye wageniyɛnnɔu ga, sɔɔ gɔ ɛjii ai gɛli ye, emɛ kajubaun jaain wɔɔ. 2Sabu mɛlɛnkɛbe sɔɔ sɔi gɔ narain ga iyemaabe tilai wo wɔnu, nɛ yɛnɛ iyaa sɔɔ kɔɔ inɛ digiyɛlu, kole yabalu gɔ, tujɔ wo le jaan gɔ biyaabe tilai wo wɔnu, 3emɛ yayabu diyɛ ɔn lugolu kanraanɲu ye, yani ɛli bɛɛdɛin? Inɛw Baŋa kuu womɔ le wo laa yayabu kɔɔ sɔɔ wo tagaa inɛw ɛgin gɔbe, sɔɔ gɔ narain ga emɛ bɛrɛ yinjugɔmi. 4Ama yaa sɛɛrɛ taanrinyɛn lee, yarabirɛ lee, taanrinyɛn tɔgu dɛin dɛin lee, be le digɛu kanranmaabe. Wo iyaa Kikinu Pilu sin obu gɔbe diŋɛ womɔ le kɛukɛu gamalaabe. Kunrin, wo sɛɛrɛ wo goobe nɛ paŋa oboube. 5Aduna wɛɛido sɔɔ emɛ sɔɔjɛ gɔ, Ama, aduna wogɔ kuu nɛ mɛlɛnkɛbei daanalu. 6Kaa inɛ turu Ama Dɔn yalu turu nɛ sɛɛrɛ ɔn gowaa gi: “Inɛ, kijɛ ingei bai, Ama, u woi ajubadou? Adama ii kijɛ ingei bai, woi kajubadou? 7U gaila woi mɛlɛnkɛbe doɲu nɛ bojaabeu. U dooro lee, baba lee ɔgɔdomɔ gin’ kuu womɔ nɛ kunaabeu. 8U kijɛ puu kubɔsɔrɔ womɔ nɛ wo le tubiyemaabeu.” Ama kijɛ puu inɛ le tubiyemaabe ye, tiyɛ gɔ kijɛ wo le tubiyelu turu kanran bojolu. Yinkanran, kanɛ kijɛ puu wo le tubiyaain ga emɛ iyeuwɔnɛ. 9Kaa emɛ sɔɔ ɔn igii wɔin: Yesu, Ama nɛɛma dɛi, inɛw wooi dɛi yinwɛn ga, gaila woi mɛlɛnkɛbe doɲu nɛ bojaabɛin. Yiun wo muyɔn gɔ dɛi, dooro lee, baba lee ɔgɔdomɔ gin’ kuu womɔ nɛ kunaa, emɛ kanɛ woi iyeuwɔin. 10Naran go Ama kijɛ puu mɔiyɛnmɔnɛ baŋa gɔ, iyaa kijɛ puu wo dɛi wɔɔ baŋa gɔ, inɛw jooi dooro unrunmɔ nɛ kunɔ ga, ɔɲɛ gɔ le digɛu Yesui kibaai wo boju gɔ, wogɔ jaain bee. Sabu yayabu bemɛ nɛ bei teeremɔnɛ gɔ Yesu woi. 11Yesu, hakɛ nɛ inɛ ɛjɛmɔnɛ baŋa gɔ lee, inɛw hakɛ nɛ wo ɛjɛmu gɔbe lee, be puu ba turu. Kɔɔ digɛu, bei unrun ba unrunw boonɔ ga dɔgɔ woi sɛlɛ. 12Ama le sɔwaa kijɛ wo gi: “Mu mu ba unrunw bɛrɛ boi uwɔ tatagadɔn. Mu mɔɔnu gɔ logoro nɛ u dɛi boi sɔmu nii niniidɔn.” 13Wo iyaa sɔwaa gi: “Mu diyɛ ma Ama nɛ dadaanadɔn.” Gimaa iyaa gi: “Mu, Ama mu bɛrɛ unrunw obu gɔ le unwɔun.” 14Unrunw gɔbe goju nɛ ilii jɔbɔjɛ dɛi, Yesu, wo kanran goju wogɔ tunmɔ jeɲaabe. Wo yiun womɔ le digɛu, jinrun puu kuu baŋa, yiun paŋa, numɔ womɔ nɛ too baŋa gɔnrɔn donugo ga kɔɔ gin’ kanrun. 15Iyaa inɛw kinruntaun bemɛ wooi nɛ, yiun liliyɛ bemɛ dɛi gunɔ toin gɔbei gunɔ gɔ nɛ goonɔ ga kɔɔ gin’ kanrun. 16Sabu wo mɛlɛnkɛbe jobu digilui saai wɛɛlu, kaa, Abarahamu tirɛ unrunw jobudigilu saai wɛi ga daii wɔɔ. 17Kɔɔ sabu dɛi, wo Ama bɛrɛ sadagadɔɔnɔnɛ kuu baŋai, Ama birɛ nɛ amasɔgɔjugɔnɛi, sɔɔ turu baŋai bii ye, inɛw hakɛ mɛɛnɛ ga, waajibi kijɛ puu nɛ wo ba unrunw bana jeɲɛu jaain bee. 18Woi waaru suburin le, wo kuu womɔ le ɔɲaabe dɛi, inɛw subɔrɔ nɛ toin gɔbei bara bɛbɛɛjɛ.

will be added

X\