HEBURU 13

1Tunmɔi ba unrunw gin’ ibɛɛ bii nɛ giru go yaamɔi. 2Yerunw sɛguru gɔ naŋanɔugi. Gamuu kunrin kanraun, jugɔlu go mɛlɛnkɛbe sɛgɛraabɛin. 3Inɛw kaju toin gɔbe, e be le kaju toi gin’ bei ajubai. Inɛw ɔɲɔmu bɛɛɲu gɔbe, e kanran be gin’ ɔɲɛ nɛ toi gin’ bei ajubai. 4Inɛw wooi, purupagu babai. Iyaa, purupagu teenu lɔgɔjiyaa biyɛmɔnɔu. Sabu Ama salagunw lee, dimudimiyɛnw lee saliyɛ kikiredo. 5Yoiyaara ebe gɔ buudu dadaaru le digɛ biyɛmɔnɔugi, kaa kijɛ e sɛɛ gɔ ei baamɔi. Sabu Ama sɔwaa gi: “Mu u le asuu wageniyɛindolɔn, asuu ui pajaidolɔn.” 6Kodigɛu, emɛ anrangaju le “Inɛw Baŋa Ama mui baranɛi, mu liyɛidolɔn. Inɛ mu bɛrɛ inge kanrun bɛɛdo ma?” gɛɛ bɛbɛɛɲu. 7Ei teeremɔw, Ama sɔɔ e bɛrɛ tagin gɔbei ajubai. Yoiyaara be yai lee, dumɔ bemɛ lee ajubaa ye, gagawu bemɛ deei. 8Yesu Kirisito, yaa lee, iye lee, asuu tunmai. 9Deeru yeru tɔgu dɛin dɛin le ei manamɔnɔugi. Sabu kinɛ emɛ gɔ kayɛrɛ sibɛ go tɔɔru lei laa, kaa Ama nɛɛma le paŋa bɛɛjɛ ye ɛju. Inɛw tɔɔru wogɔbe gɛlin gɔbe, wogɔ nɛ niwɛn turu kanran bɛɛnɛ. 10Sadagadumu emɛ sɛɛ gɔ nɛ guju kuru Ama Ginrun birɛbirɛnw gɔbe, dumu wogɔ sadaga nɛ kuru sɛnɛ. 11Ama bɛrɛ sadagadɔɔnɔnɛ kuu baŋa gɔ, hakɛ yaabu kanrun sadaga obodo giye, arusɛgɛbe ili yalu ɛjaa naa ɛjaa gɔ nɛ jɛjɛɛlɛjɛ. Kaa nawan gɔbe, ana laara nɛ goonaa ye tɛgɛrɛɲu. 12Kɔɔ sabu dɛi, Yesu kanran, kuu bana womɔ ili le inɛw gɔbe ɛjɛmɔ ga, ana laara nɛ gowaa yinwun. 13Kɔɔi biyaa ye, emɛ ana laara gɔ nɛ, dɔgɔ tunmɔ wo bɛi gɔ duiyaa ye, wo bɛrɛ yaamɔi. 14Sabu ɔn nɛ ana nɛ jaa biyɛɲu emɛ sɛnɛ. Kaa emɛ ana wɛɛido gɔi dɛnɛuwɔin. 15Kodigɛu, Yesu le digɛnu waaru wooi emɛ Ama bɛrɛ woi sɔmu sadaga emɛ obomɔi. Tiyɛ gɔ woi Inɛw Baŋa emɛi ga aŋa le daii sɔɔmɔi. 16Ɛju kanrun lee, kijɛ e sɛɛ tunmɔ le gamulu lee naŋanɔugi. Sabu sadaga wogɔ tunmɔ Ama kinɛ ahaajɛ. 17Ei teeremɔw gɔbe sɔɔ yabai, iyaa be le tubiyei. Ama, kinrun ebe dɛi bei seselumɛdo digɛu, be jaa ei kajubau gɛlin. Birɛ bemɛ kinɛ ɛɛli le birɛ bɛɛ ga sɔɔ bemɛ yabai. Kinɛ jiun le birɛɲu biyɛmɔnɔugi, sabu wogɔ e bɛrɛ niwɛn turu kanran siyɛidolo. 18Emɛ dɛi Ama gɛɛin. Emɛ kinɛjugɔ jarugu sɛlɛ le wɔin ga gawaa wɔin. Iyaa kijɛ puu nɛ emɛ yoiyaara ɛju yai ibɛɛ wɔin. 19Mu ɛjii ɛɛnnaa, e bɛrɛ gɛɛunwɔ bɛrii Ama mui pilemɛ ye e bɛrɛ tii ga Ama gɛɛin. 20Inɛw Baŋa emɛ Yesu, pejugirɛnɛ diyɛ gɔ, ili womɔ le aaru sɔgɔjɛ biyɛmaabe dɛi, Ama woi yiun logoro nɛ bulomaabe. Ama, jamu obonɛ gɔ, ebaa diŋɛ womɔ kanran bɛɛ ga, birɛ ɛju wooi birɛ bɛɛ gɔnrɔn e bɛrɛ obo. Yesu Kirisito le digɛnu, kijɛ wo bɛrɛ ɛju emɛ nɛ wo kanranmɔ. Boi sɔmu gɔ asuu nasuu Yesu mɔi biyɛmɔ. Amina. 22Mu ba unrunw, mu e bɛrɛ gɛɛunwɔ tinwinrun sɔɔ ɔn muyɔn le keŋiyɛin, sabu lɛtɛrɛ mu tɔŋu gɔ dumii wɔɔ. 23Emɛ bainɛ Timɔtei kaju nɛ pajaatin ga igii biyɛi. Wo bɛrii wiyaai ye, mu wo le ei yɛnɛi wɛɛdɔn. 24Ei teeremɔw gɔbe puu lee, Ama inɛw gɔbe lee, bemaa popoo wa. Itali gana jaŋu unrunw gɔbe, ei poonɔuwɔin. 25Ama nɛɛma gɔ e wooi le biyɛ.

will be added

X\