HEBURU 12

1Emɛ kanran inɛw sɛɛrɛ bemɛ gowaaɲu joo naa joo kɔɔbe anrankulumɔ gin’ emi gɔŋaa gɛlin. Kɔɔ digɛu, kijɛ emi gaanajɛ wooi lee, hakɛ naraan emɛ nɛ tariyɛjɛ gɔ lee emɛ nɛ goonɔti ye, tunmɔ galu jobu giru emɛ nɛ bojaaɲu gɔ muyɔn le jɔbɔmɔi. 2Giri emɛ Yesu bɛrɛ dɛɛrɛ ye bojomɔi. Gagawu emɛ wo nɛ goojɛ, sɛɛu wo kibemɔjɛ. Wo kinɛ ɛɛli wo dɛi bojaaɲu gɔ nɛ giri dɛɛraa sɛbe dɛi, baga jai ɔɲɛ muyɔn ga yabaabe, dɔgɔ wogɔ nɛ too gɔ kijɛi ga lugolu. Kanɛ wo Ama ɔgɔdɔin numɔ iin sibɛ nɛ dɛinyaan wɔɔ. 3Hakɛ kanranw wo dɛi be ingilu gɔ aŋai Yesu wo muyɔn gɔ ajubai. Kunrin e ɔɲɔ ye kinɛ yanwan le biyɛidenɛ. 4Sabu hakɛ le kɔmɔ e taajɛ gɔ nɛ, e nimɛ kanran yiun nɛ dɔɔ baa tariyɛli. 5Ama, unrunw unrunmɔ gin’ ei lugaa, tinwinrun ei wo tinwinrun ɔn e naŋaai ma? Wo gi: “Aini ma, Inɛw Baŋa Ama kɔi logi gɔ, sɔɔ gailai gin’ yɛnɛnɔu. Wo ui sɔwaajɛ ye, kinɛ uwɔ yanwanmɔnɔu. 6Sabu Inɛw Baŋa Ama, inɛ wo ibɛ gɔi kɔɔjɛ. Aini womɔi ga inɛ wo lugojɛ puui lagajɛ.” 7Ɔɲɛ gɔ kɔi logi gin’ muyɔin, sabu Ama, unrunw womɔi gin’ ei aa gɛlɛ. Ii wo ba kɔi logi bɛɛlɛ yɔɔ ma? 8Unrunw puu kɔi logi bɛɛɲu gɔ e bɛɛlɛi ye, ei silɛ unrunwin, bama unrunw tɔitɔii laai. 9Emɛ aduna ɔn nɛ banw yasin, be emi kɔwaabɛin dɛi emɛ bei babaabɛin. Kɔɔ biyaai ye, emaa ɔnmɔi biyɛ ga, kɔɔ dɛi sigɛ emɛ Ba alagala nɛ wɔɔ gɔ le emɛ tubiyeun jaan. 10Emɛ babe aduna nɛ wɔin gɔbe, bana ɛjii wɔɔ ga be ajubaajɛ le kɛukɛu, waaru gaila emi kɔwaabɛin. Kaa Ama emaa bana ɛjaa wo wɔɔ gin’ ɛjaain biyɛ ga, ɛju emɛ dɛi emi kɔɔjɛ. 11Logi waaru inɛi lagaɲu le, baŋa bɛrɛ kinɛ ɛɛlii biyɛɛlɛ, kinɛ jinwin biyɛjɛ. Kaa kɔɔ onu nɛ inɛw kole deeru bɛin gɔbe tinɛ womɔ ihiyeɲu. Wogɔ jamu lee, teitai bii leei. 12Kɔɔ sabu dɛi, numɔ baariyaa wɔɔ ebe gɔbe ɛɛnnɛi. Gɔru baariyaa wɔɔ ebe gɔbe nɛ paŋa kunɔi. 13Kubɔ ebe oju demu demu wɔɔ gɔbe nɛ toiyomɔi. Kɔɔ gin’ tegutegenɛ kubɔ lɛɛriyɛidolo, kaa babajado. 14Inɛw wooi le jamu le biyɛ ga, iyaa ɛjaai biyɛ ga mainiyɛin. Sabu ɛjaai wɔlɔ go inɛ turu kanran Inɛw Baŋai iyeidolo. 15Inɛ turu kanran Ama nɛɛma gɔ le onu dulonɔu ga kuu ebe kajubai. Inɛ turu kanran, tiun gaaru gin’ pujo ye, inɛw joo bɛrɛ mɔɲu kanran ye, nurun womɔ gɔ tanuganɔu ga kuu ebe kajubai. 16Inɛ turu kanran salaginɛi ma, Esau gin’ Amai babaalɛ biyɛnɔu ga kuu ebe kajubai. Esau, kubɔ turu pana dɛi diyɛ unrunmɔ dɔnrun. 17Dogo, unrun ba duba gɔ bɛɛdo wo giyaa, wo le yabanɛ ga e igii wɔi. Halu wo giridii le duba gɔ dɛnɛube kanran, sɔɔ womɔ bana kɔɔlɔmɔɲu bɛɛlu. 18Isɛrɛlu unrunw dɔɔin gin’ e Sinayi kokoo tabu bɛɛmɔjɛ genɛ nɛ dɔɔli. Yaun bije womɔ le, ɔlɔ womɔ le, kurugu womɔ le, ooɲɔ simɛ womɔ le, kaan soguru womɔ le, mii paan womɔ le bee gɔ, e wogɔ genɛ nɛ dɔɔli. Isɛrɛlu unrunw mii wogɔ ɛgaa, waja sɔɔ turu kanran unrunbe bɛrɛ ɛgɛmɔnɔu ga amagɛɛn kunaabɛin. 20Sabu “Halu bɛlu kokoo gɔ nɛ tɛmiyaanjɛ ye, tibu le kama daadɛin” ga tɔɔru obin gɔ, be wogɔ gɔnrɔnbenɛ. 21Sɔɔ konɛ bee gɔ bana inɛ liirɛmɔjɛ gɔ gabaai digɛu, Mɔise sɔwaa gi: «Mu ɛjii liyaa, kinwɛunbɔn.» 22Kaa e kokoo genɛ nɛ dɔwaa e wɔɔ gɔ, Siɔn kokoo gɔi. Ama ɔnmɔi wɔɔ gɔ ana, alagala Jerusalɛmu, mɛlɛnkɛ muɲu joo naa joo womɔ le, e wogɔ genɛ nɛ dɔwaa wɔi. 23E unrunw pɔlɔ Ama Kikinu sibɛ go naraanɲu, alagala nɛ boi bemɛ tɔŋi wɔɔ, kinɛ ɛɛli mɔɔnu nɛ dɔwaa wɔi. E Ama, inɛw puu saliyɛkirenɛ gɔ lee, inɛw teitai sɛɛu kibaai bojin kikinube lee genɛ nɛ dɔwaa wɔi. 24Iyaa e Yesu, aaru kana sɔɔ yegerenɛ gɔ lee, ili womɔ miɲi gɔ Abɛlu ili dɛi sigɛ sɔɔ sɔɔjɛ gɔ lee genɛ nɛ dɔwaa wɔi. 25Wogɔ digɛu, kuu ebe kajubai. E le sɔɔ sɔɔjɛ baŋa sɔɔ gɔ pogonɔugi. Sabu aduna nɛ, Ama tinwinrun be bɛrɛ oboube sɔɔ inɛw yabanɛ gɔbe, jarugu duiyi nɛ ɛliyɛnɛ. Nɛɛ, alagala nɛ wɔu, emɛ bɛrɛ tinwinrun obojɛ baŋa gɔ, emɛ wo le onu dulaatin ye, emɛ yani ɛliyɛdɛin? 26Waaru kɔɔ le mii womɔ adunai jigemaabe, kaa kanɛ wo emɛ le pui kunaa, “Mu kubɔ turu sai iyaa, adunai sai laa, kaa alagalabei yaa jijigemɔdɔn” gi. 27“Kubɔ turu sai iyaa” wo gi gɔ, tiyɛ gɔ kijɛ maŋaaɲu gɔbe jijigedɛin, mana yaadɛin ga tagarajɛ. Kunrin kijɛ jigeelɛ gɔbe yabiyɛdɛin. 28Kɔɔ sabu dɛi, emɛ diinɛ jigeelɛi bɛɛɲu digɛu, yogosɛlɛ le biyɛmɔnɔugin. Emɛ birɛpoo tagu le bii ye, Ama kinɛ bana aajɛ gin’ baba le, giri liyɛ le, woi demɛniyɛnmɔmɔi. 29Sabu Ama emɛ gɔ, naran go yaun kijɛ sɛɛu tɛgɛ yamalajɛi.

will be added

X\