HEBURU 11

1Kijɛ emɛ dɔmɔ bɛbɛɛdɛin ga diyɛ daanu ye bii gɔ, gagawu gɔ woi. Gagawu, kijɛ iyemɔɔlɛ gɔbe yɔɔin ga diyɛ daanu ye bii. 2Gagawu dɛi pɔɔlɔ inɛw Ama kinɛ aamaabɛin. 3Alagala lee, minɛ lee Ama sɔɔ le mɔii ga, emɛ gagawu le wogɔ paamaɲu. Wogɔ digɛu, kijɛ emɛ iyejɛ gɔbe, kijɛ iyemɔɔlɛ nɛ goi. 4Gagawu dɛi Abɛlu, sadaga Kayɛn mɔ dɛi sigɛ Ama bɛrɛ obu. Gagawu womɔ dɛi, Ama woi inɛ teitai lugu, sabu Ama, sin obu womɔbe le yabaabe. Halu wo yinwaain kanran, gagawu gɔ le digɛu, wo nimɛ sɔɔ sɔɔuwɔ. 5Gagawu dɛi, Henɔku yinwɛnlu go, Ama nɛ woi jeɲaa uni. Waja woi iyemɔlu, sabu Ama woi jeɲaajiyaabe. Ama woi jeɲɛmɔ nɛ, Henɔku kinɛ womɔ aamaabe ga wo dɛi sɛɛrɛ gowaabɛin. 6Gagawu wɔlɔ go inɛ turu kanran Ama kinɛ aamu bɛɛlɛ. Sabu inɛ Ama giru nɛ dɔɔjɛ, Ama yɔɔ, iyaa wo inɛw woi dɛnɛw gɔbei tutujɔjɛ ga wo gawaun jaain wɔɔ. 7Gagawu dɛi Nɔwe, sɔɔ wɛɛlu, nimɛ iyemɔbele dɛi Ama woi wo tinwɛnraan, Ama giri liyɛ le sɔɔ yabaa, ginrun womɔ inɛwin yaba ga diikoro diyɛ yegeraabe. Wo kunrin aduna kuu nɛ jarugu duuraatiyaa, teitai gagawu le bɛɛmɔjɛ kɛn balanɛi biyaabe. 8Gagawu dɛi Abarahamu, Ama woi boonaa gana kɛn womɔi wo bojoido sibɛ go yaa wo giyaa, wo sɔɔ yabaa yaabe. Wo yalu wo yaaido inɛɛ wɔu gowaa yai. 9Gagawu dɛi wo gana Ama wo bɛrɛ pui kunu gɔ nɛ wiyaa, yerunɛ gana yeru nɛ daan gin’ dɛinyaanbe. Wo konɛ guju kurube nɛ toiyaa bee. Isaka lee, Jakɔbu lee, wo le pui tutunmɔ gɔ kɛn balanw gɔbe, be yaa guju kuru nɛ kunrin tobɛin. 10Sabu Abarahamu, ana bɔlɔtei ɛɛnbe kuu nɛ daan, Ama ajubaa ujaabe gɔi dɔmɔbe. 11Gagawu dɛi, Abarahamu, halu woi ɛjii pɛyaa galaayaabe kanran, iyaa Sara ii naranbele kanran, ii bɛɛɲu gɔnrɔn biyaabe. Sabu wo le pui kunu baŋa gɔ sɔɔ turu baŋai ga wo diyɛdaanu le bee. 12Kunrin, ainɛ turu kɔɔ nɛ, ainɛ yinwaanyaabe bɔɔi kɔɔ nɛ, tɔgu joo narinyaanbe. Jojoo bemɛ alagala tolo gin’ bee, nɛudii diŋirun sɔsɔun gin’, lugo bɛɛmɔɔlɛ. 13Inɛw kɔɔbe puu kijɛ be bɛrɛ pui kuni gɔ bɛɛnɛ go gagawu gɔ le biyaa wɔu yinyinwin. Kaa be kijɛ gɔbe wagee iyaa kinɛ bemɛ aabe. Be unrunbe aduna nɛ yerunwin, oju galanwin ga, daii sɔwaabɛin. 14Inɛw kɔɔ gɛɛnw, baginruin dɛnɛuwɔin ga tagaraɲu. 15Be gana nɛ be goi dadaaru bei yasɛbe ye, konɛ pilemɛ ye wɛɛɲu bana bɛbɛɛbɛin. 16Kaa be baginrun sigɛi daariyaa wɔin, tiyɛ gɔ alagala baginrun. Kɔɔ sabu dɛi, Ama be dɛi ana yegeraajɛ digɛu, unruin Ama bemɛ be boonɔjɛ gɔ dɛi dɔgɔ woi aalɛ. 17Gagawu dɛi, Abarahamu, Ama, waaru woi maraan yɛnu le, Isakai sadaga tɛgɛrɛdo ga yabaabe. Abarahamu, Ama, pui unrunmɔbe wo bɛrɛ kunu baŋa gɔ, halu Ama wo le sɔwaa: “U Isaka sai le tirɛ unrunw u bɛrɛ obodɔn ga pui mu kunu gɔbe bɛbɛɛdou” giyaabe kanran, wo aini koturu womɔ sadaga tɛgɛrɛdo ga bee. 19Ama gɔnrɔn yasɛ, halu yiun bulogu bɛbɛɛjɛ ga, Abarahamu manugaube. Ii womɔ pilemaa wo bɛrɛ obin gɔ, yiun nɛ bulogaa obin gɛɛ bɛbɛɛmɔjɛ. 20Gagawu dɛi Isaka, Jakɔbu lee, Esau lee, sɔɔ be bɛrɛ wɛɛido dɛi, Ama boi bowaabe. 21Gagawu dɛi Jakɔbu, yinwɛin wo do ɛjii bɛruniyaan wɔɔ waaru le, Josɛpu anranw unrunw lɛi tuturu dɛi Ama boi bowaa, baga unrunmɔ kuu nɛ tijaa gɛliyaa Amai demɛniyɛnmaabe. 22Gagawu dɛi Josɛpu, bai womɔ bɛruniyaan wo wɔu, Isɛrɛlu unrunw Ejipute gana nɛ be gooido sɔɔ sɔwaa, sɛgɛ unrunmɔ dɛi tɔɔru obu. 23Gagawu dɛi Mɔise ba lee, wo na lee woi naraan, ii gɔ anran ɛju yasɛ ga iyaa, be ɔgɔnɛ tɔɔru ginɛmu gɔ liyɛnɛ go, iyepilu taanu woi baŋurin. 24Gagawu dɛi Mɔise, waaru wo gabi le, unruin ɔgɔnɛ iyaa ii boonɔmɔ ga yabalu. 25Hakɛ nɛ toi ye waaru gaila kinɛ ɛɛliyɛmɔ dɛi, wo Ama inɛw le ɔɲɛ iye ire ga wogɔ yɛmaabe. 26Ama Yabanɛ Diyɛ tii gɔ dɛi dɔgɔ iyi gɔ, Ejipute arusɛgɛ gɔbe dɛi sigɛ kijɛ irei ga wo yinlugu. Sabu wo wagee, giru go tujɔ wo bɛɛido gɔ nɛ giri dɛɛraa sɛbe. 27Gagawu dɛi Mɔise, Ejipute nɛ ɔgɔnɛ kinɛbanrun gɔ liyɛlu go goi. Ama iyemɔɔlɛ gɔi iyeuwɔ gin’ biyaa, wo ɛɛn go biyaabe. 28Gagawu dɛi wo Taŋagalu janwan gɔ daanaa, Ama titiyainɛ dadaanɛ gɔ, Isɛrɛlu anranw unrunw, bɛrɛ pɔlɔ gɔbei tabanɔu ga, taan bemɛ nɛ ili miɲɛ kɔɔrɔ ga tɔɔru. 29Gagawu dɛi Isɛrɛlu unrunw, nɛudii banrun gɔ minɛ maa gin’ kɛjaa taŋi. Kaa Ejipute bɛɛnw wogɔ gin’ kanraan be yɛnaa, dii bei kimaati. 30Isɛrɛlu unrunw, gagawu bemɛ dɛi, Jeriko ana jege gɔ, bai sɔi gɔŋaa be galaa wolu. 31Gagawu dɛi yaanran dimu le kayanɛ, Rahabu, Jeriko nɛ inɛw Ama sɔɔ yabaanɛ gɔbe le bariyaa suiyolu. Sabu wo Isɛrɛlu inɛw tebutebenw gɔbei ɛju le sɛguru. 32Mu nɛɛ inge sɔi baradɔn? Sabu Jedeyɔn ma, Baraku ma, Samusɔn ma, Jɛpute ma, Dawide ma, Samuɛlu ma, inɛw Ama titiyaanw gɔbe ma sɔɔ sɔɔdɔn gun ye, wogɔ waaru bɛɛidolɔn. 33Gagawu le be diinɛbe kuu nɛ gɔnrɔn biyaa, teitai kanraan, Ama kijɛ pui kunu gɔ biyaabɛin. Be yarabe aŋa pagaabɛin, 34yaun paŋa donugaabɛin, polukaaba aŋa nɛ ɛliyaa gowaabɛin. Yɛbɛlɛgunwin wɔu, pilemaa gɔnrɔn biyaabɛin, kɔmɔ nɛ be anranwin bɛin, iyaa gana waja kɔmɔ numɔ gɔbei nanaabɛin. 35Yiunbe bulaa, yaanw gamuu bɛrɛ inɛw bemɛ pilemaa obaaɲu. Inɛw gamuui ɛjii ɔɲɔmaa, yiun baa dɔɔni. Be bulogu sigɛ gɔ bɛɛdɛin ga, ɔɲɛ gɔ nɛ bei ɛli goomɔ ga yabanɛ. 36Inɛw gamuu iyaa yamurinyɛnmu lee, bɔɔniyɛn logi lee biyaabɛin. Gamuui yɔgu le kɔmaa, kaju nɛ kunaabɛin. 37Gamuui tibu le kamaa daabɛin, bimu le dɛŋaabɛin, polukaaba le daabɛin. Gamuu peju guju lee, ɛnrɛn guju lee sɔi bemɛi goriyaa, kijɛ kanma sɛbenɛ wɔu, tɔɔɲɔ bɛɛu, ɔɲɔmu diyɛ bɛɛu, ungo yaa, ungo yaa kanraunbɛin. 38Inɛw kɔɔbe puui aduna le jaanla bee. Be ginaa, olusolo nɛ lee, kokoo kuu nɛ lee, kɔmɔ nɛ lee, bonɔ nɛ lee yalabɛin. 39Inɛw kɔɔbe puu, gagawu bemɛ dɛi sɔɔ bemɛ Ama kinɛ aabe. Kokanran be kijɛ be bɛrɛ pui kuni gɔ bɛɛnɛ. 40Sabu Ama, kijɛ sigɛ, emɛ dɛi ajubaa yasɛbe. Emɛ tolo go bei sɛɛu kibaai biyɛ ga wo ibɛla bee.

will be added

X\