HEBURU 10

1Yahutunw tɔɔru gɔ, kijɛ nanaa gɔbe bana sɛɛu tagaraalɛ. Kaa kijɛ ɛju wɛɛido gɔ kikinɛi sai. Kɔɔ sabu dɛi, sadaga tutunmɔ deeliye sɛlɛ go pipilemu anranguju puu goonɔɲu gɔbe le digɛnu, tɔɔru kɔɔ Ama giru nɛ inɛw dɔɔnw gɔbei asuu kibemu bɛɛlɛ. 2Bei kibemu bɛbɛɛbe ye, inɛw Ama demɛniyɛnmɔw gɔbe kubɔ turu sai hakɛ nɛ bei ɛhɛjɛmɔbɛin digɛu, iyaa hakɛ jarugu, kinɛjugɔ bemɛ nɛ kanɛ toiyobele digɛu, sadaga dɔɔnu gɔ papajabɛin. 3Kaa sadaga kɔɔbe le inɛw bɛrɛ anranguju wɛɛjɛ puu hakɛ bemɛ naŋaranmɔɲu. 4Sabu naa jaŋu ili lee, ɛnrɛn ili lee, asuu hakɛ goonu bɛɛlɛ. 5Kɔɔ sabu dɛi Kirisito, aduna nɛ wɛɛu, Ama le sɔwaa gi: “U sadaga wee, sin obu wee dɛnɛlu. Kaa u gojui mu bɛrɛ obu. 6Arusɛgɛ sɛɛu tɛguru sadaga wee, hakɛ yaabu kanrun sadaga wee, wogɔbe kinɛ uwɔ aalɛ. 7Nɛɛ mu sɔwaa gun: ‘Ama, mu unwɔun. Dɔn gɔ nɛ mu dɛi bana tɔŋaaɲu le kɛukɛu, mu diŋɛ uwɔ kanrain wiyaa wɔun.” 8Kirisito laa gɔ sɔwaa gi: “U sadaga wee, sin obu wee, arusɛgɛ sɛɛu tɛguru sadaga wee, hakɛ yaabu kanrun sadaga wee dɛnɛlu, kinɛ uwɔ aalɛ.” Kokanran sadaga kɔɔbe Tɔɔru gɔ le kɛukɛu dɔɔnɔɲu. 9Kɔɔ onu nɛ wo gimaa, “Mu unwɔun, diŋɛ uwɔ kanrain wiyaa wɔun” gi. Kunrin wo sadaga pɔlɔ sɔɔ gɔ goonaatiyaa, lɛiye gɔ daanaati. 10Yesu Kirisito, Ama diŋɛ kibemaati. Wogɔ digɛu, goju womɔ kubɔ turu sai sadaga obaa wo kilu gɔ le digɛu, emi hakɛ emɛ nɛ ɛjaai. 11Ama bɛrɛ sadagadɔɔnɔnɛ puu birɛ unrunmɔ birɛ ga bai tuturu puu ihiŋiyɛnjɛ. Wo sadaga tɔgu tunmɔ gɔbe, halu wogɔbe hakɛbe goonu bɛɛnɛ kanran, kubɔ joo dɔdɔɔnɔjɛ. 12Kaa Kirisito asuu nasuu dɛi hakɛ yaabu kanrun sadaga turu deŋɛ deŋɛ dɔɔnaatiyaa, Ama numɔ iin sibɛ nɛ dɛinyaain. 13Kanɛ kɔɔ nɛ, wo Ama, jaŋuw womɔ gɔbei gɔnrɔn ye kubɔ womɔ doɲu nɛ wo kunɔido dɔmiyaan wɔɔ. 14Kunrin, sadaga turu deŋɛ deŋɛ le digɛu, wo inɛw hakɛ nɛ ɛjɛɲu gɔbei asuu dɛi kibemaati. 15Kikinu Pilu yaa sɛɛrɛ wogɔi emɛ bɛrɛ goojɛ. Kikinu Pilu laa gɔ sɔwaa: 16“Inɛw Baŋa Ama gi: ‘Bai kɔɔbe galaai ye, aaru be le mu aaraido gɔ unwɔ: Mu tɔɔru mabe kinɛ bemɛ nɛ kukunɔdɔn. Hakilɛ bemɛ nɛ yaa tɔtɔŋɔdɔn.’” 17Kɔɔ onu nɛ wo gi: “Mu waja hakɛ bemɛ lee, mɔɲu bemɛ lee asuu ajubu ma nɛ wɛɛmɔidolɔn.” 18Nɛɛ, hakɛ kɔɔbe yaabu kanraantin digɛnu, waja hakɛ yaabu kanrun sadaga jɛɛlɛnu doori. 19Nɛɛ kai ba unrunw, Yesu ili digɛnu, emɛ yalu ɛjaa naa ɛjaa gɔ nɛ yoo ga liyɛ sɛnɛ. 20Wogɔ nɛ yoo ga, Yesu emɛ dɛi oju kana, ɔnmɔi wɔɔ, kɛju sɔi le galajɛ pinɛlaati. Tiyɛ gɔ goju womɔ le galajɛ. 21Iyaa sadagadɔɔnɔnɛ diyɛ, Ama ginrun kuu nɛ daan, emɛ yasin. 22Kɔɔbe wooi digɛu, kinɛpilu le, gagawu kibaai le, kinɛ emɛ ɛjɛmɔ ye kinɛjugɔ nɛ jarugu sɔɔ goonɔti ye, dii ɛju le goju gɔ mɔŋi go, emɛ Ama giru nɛ dɔɔmɔi. 23Emɛ le pui kunu baŋa gɔ sɔɔ turu baŋai digɛu, diyɛdɔn sɔɔ emɛ sɔɔjɛ gɔ ɛjii gɛliyɛmɔi. 24Tunmɔ kajubu ye, ihibɛ nɛ lee, birɛ ɛju biru nɛ lee tunmɔi mainiyɛnmɔmɔi. 25Bana inɛw gamuu wɛɛjui biyaa wɔɔ gin’, emɛ tunmɔ le mɔrin gɔ pajamɔnɔugin. Kaa tunmɔ tinwɛnrɛnmɔi. Sigɛ le Inɛw Baŋa bai wɛɛido gɔ bɛrii wɔɔ ga e iyeuwɔi dɛi tunmɔ tinwɛnrɛnmɔi. 26Naran gɔ emɛ bɛrɛ jugɔmaaɲu onu nɛ, bɛrɛ mɔɲu dɛi emɛ hakɛ kanrannu yaaɲu ye, hakɛ yaabu kanrun sadaga waja wɔlɔ. 27Liliyɛ diyɛ le, Ama saliyɛ kiru gɔ lee, yaun diyɛ, Ama le inɛw yabanɛ gɔbei tɛnwɛn ga wɔɔ gɔ lee, emɛ dɔmɔ gɔ woi. 28Inɛ Mɔise tɔɔru yamalaajɛ puu, inɛw lɛi ma taanu ma aŋa sɛɛrɛ ɛgaa ye, amasɔgɔjugɔ wɔlɔ go woi daaɲu. 29Nɛɛ, Ama Aini gɔi kubɔ le inɛ namanu galaido gɔ, aaru ili, kole woi hakɛ nɛ ɛjɛmaabɛin gɔ kijɛ yamalai inɛ bojoido gɔ, iyaa Ama Kikinu, nɛɛma wo bɛrɛ obu gɔi inɛ duyɔido gɔ mɔ yani biyɛdo? Tujɔ wo le jaan gɔ, yagɔ baŋa mɔ dɛi sigɛ le mɔɲu biyɛun jaan ga e ajubaalɛi ma? 30Sabu “duguru gɔ mu goodo, pilemɛ ye mu tujɔdo” gɛɛnɛ baŋa gɔ, iyaa, “Inɛw Baŋa Ama, tɔgu womɔ inɛw saliyɛ kikiredo” gɛɛnɛ baŋa gɔ, emɛ igii wɔin. 31Aa, Ama ɔnmɔi wɔɔ numɔ nɛ yoi gɔ, wogɔ liliyɛ diyɛ naa diyɛ sɔɔi de! 32Kaa Ama wijɛ gɔ e bɛi onu nɛ, bai pɔlɔ wɛin gɔbe sɔɔ ajubu yɛnɛi. Bai wogɔbe le, e kɔmɔ diyɛ taa ɔɲɛ diyɛ muyaanbei. 33Doguru gamuu, inɛw puu giru nɛ ei duyɔ lee, ɔɲɔmɔ lee kanranɲu. Doguru gamuu iyaa inɛw kɔɔ gin’ wɔin gɔbe boru bariyaabei. 34E kajugunw amasɔgɔ jugaabei. Iyaa kijɛ e sɛɛ e bɛrɛ ɛlɛ ga kinɛ ɛɛli le yabaabei, sabu e kɔɔ dɛi sigɛ, kijɛ asuu biyɛido yasɛi ga igii wɔi. 35Kodigɛu, diyɛdɔn ebe pajanɔugi. Tujɔ diyɛ kole yadigɛ. 36Ama diŋɛ kibemɔ ye, e bɛrɛ kijɛ pui kuni gɔ bɛɛ ga, e muyɔn kai yasɛi. 37Sabu Ama Dɔn gɛɛjɛ gin’: “Gaila kanraan ye, gaila sai nɛ, inɛ wɛɛun dagaa gɔ wɛwɛɛdo. Wo tanwaindolo. 38Kaa inɛ gagawu le digɛu giru ma nɛ teitai wɔɔ gɔ, woi ɔnmɔi bibiyɛdo. Kaa wo onu pilemɔjɛ ye, wo le kinɛ ma aaidolo.” 39Emɛ kai, emɛ inɛw onu pilemɛ ye suiyoɲu gɔbe bɔɔi laain. Kaa inɛw gawa ye kinrun bemɛ yabaɲu gɔbe bɔɔi.

will be added

X\