HEBURU 1

1Pɔɔlɔ, kubɔ lugo joo le, bana dɛin dɛin le, inɛw Ama titiyaanw le digɛu, Ama, emɛ babe bɛrɛ sɔɔ sɔi. 2Kaa bai dumɔrɔn ɔnbe nɛ, Ama, Aini unrunmɔ le digɛu emɛ bɛrɛ sɔwaabe. Wo woi kijɛ puu kɛn balanɛi bojaabe. Iyaa wo le digɛu adunai maŋu. 3Aini wogɔ, Ama dooro wo le dooriyejɛ, Ama bana wɔɔ gin’ tee wɔɔ, kijɛ puu sɔɔ unrunmɔ gɔnrɔn le dɔnwaan gɛlɛ. Hakɛ ɛjɛmɔɲu birɛ gɔ kibemaatiyaa, wo alagala go Ama, baba diyɛ baŋa numɔ iin sibɛ nɛ dɛinyin. 4Kunrin, Aini gɔ, Ama wo bɛrɛ boi obu gɔ, mɛlɛnkɛbe boi dɛi gaa bana wɔɔ gin’, wo kanran be dɛi sigɛ biyaai. 5Mɛlɛnkɛ aa bɛrɛ Ama ɔn gin’ sɔwaatɛli: “Ui Aini mai, iye mu ui narun.” Maa, “Mu wo bai biyɛdɔn, wo Aini mai biyɛdo.” 6Sigiyaa, Ama, Aini pɔlɔ womɔ waaru aduna nɛ wo tii le, wo sɔwaa gi: “Mɛlɛnkɛ gɔbe puu woi be demɛniyɛnmɔmu!” 7Mɛlɛnkɛbe dɛi sɔɔ wo gi unwɔ: “Wo mɛlɛnkɛ womɔbei ooɲɔi bojojɛ, birɛbirɛnw womɔbei yaun bijei bojojɛ.” 8Kaa Aini gɔ dɛi kijɛ wo gi: “Ama, ɔgɔdɔin uwɔ asuu nasuu yɔɔ. Diinɛ uwɔ nɛ teitai gɔ, ɔgɔbaga gɔ woi biyɛdo. 9U teitai ibiyaa, teitai laa ibiliyaabeu. Kɔɔ dɛi, Ama, Ama uwɔ gɔ, ui yɛmaa, ɔgɔnw kuu nɛ nii togo kɔɔrɔɲu gin’ kinɛ ɛɛli le ui joonaabe. Wo kunrin ui u bɔɔnw gɔbe dɛi sigɛ bojaabe.” 10Ama iyaa sɔwaa gi: “U Inɛw Baŋa, tɔlɔgu gɔ le, u aduna bɔlɔtei daanaabeu. Iyaa alagala gɔbe numɔ uwɔ birɛi. 11Kɔɔbe puu susuiyodɛin, kaa u yɔɔu. Be puu pɛyaa ye sɔi gin’ sɛsɛmiliyɛdɛin. 12U arugoi diyɛ gin’ bei mumunɔdou. Sɔi dilɛɲu gin’ bei didilɛdɛin. Kaa u kai, u jaa tunmai. Iyaa anranguju uwɔbe dumɔ sɛnɛ.” 13Mɛlɛnkɛ aa bɛrɛ Ama ɔn gin’ sɔwaatɛli: “Jaŋuw uwɔ gɔbe gɔnrɔn ye kubɔ uwɔ doɲu nɛ yai mu kunɔido baa, uwɔ numɔ iin ma sibɛ nɛ wɛɛ dɛinyɛn.” 14Kɔɔ biyaai ye, titiyaanw gɔbe puu, kikinu Ama dɛi birɛbirɛnwin. Yayabu gɔ inɛw bɛɛidɛin gɔbei bara ga bei tiyaaɲu.

will be added

X\